Viv En Lavi Ki An Armoni Avek Plan Bondye Ozordi

“[Kris in] mor pour . . . ki bann vivan i nepli viv pour zot menm.”—2 KORENTYEN 5:15.

1. Ki en misyonner ti rakonte?

“NOU ti dan sa premye transpor sivilyen ki ti ariv kot sa vilaz Afriken byen elwannyen apre ki lager sivil ti fini,” sa i parol en misyonner ki apel Aaron. * “Nou pa ti kapab kominik avek sa pti kongregasyon dan sa vilaz, e nou ti anvi konnen ki sa bann frer ek ser ti bezwen. Nou ti anmenn manze, lenz, bann piblikasyon lo Labib e osi sa video Jehovah’s Witnesses—The Organization Behind the Name. * Ti telman annan bokou dimoun dan sa ‘lasal sinema lokal’—en gran lakaz an fey avek en televizyon ek en VCR—ki nou ti bezwen zwe sa film de fwa. Tou le de fwa nou ti ganny plizyer letid Labib. Vreman, tou nou zefor ti vo lapenn.”

2. (a) Akoz bann Kretyen i determinen pour servi zot lavi dan servis Bondye? (b) Ki kestyon nou pou egzaminen?

² Akoz Aaron ek lezot frer ti pare pour lans zot dan en misyon sitan difisil? Akoz zot rekonnesans pour sakrifis Zezi Kri, zot in dedye zot lavi avek Bondye e zot anvi servi zot lavi an armoni avek plan Bondye. Parey zot, tou bann Kretyen ki’n dedye zot lavi avek Bondye i determinen pour “nepli viv pour zot menm,” me pour fer tou keksoz “pour Levanzil” oubyen akoz sa bon nouvel. (2 Korentyen 5:15; 1 Korentyen 9:23) Zot konnen ki ler sa sistenm ki nou pe viv ladan pou fini, tou son larzan ek laglwar pou fini lanmenm. Alors, vi ki zot vivan e ki zot lasante i ase bon, zot anvi servi sa loportinite pour viv dan en fason ki an armoni avek plan Bondye. (Eklezyast 12:1) Ki mannyer nou kapab fer sa? Kote nou kapab ganny sa kouraz ek lafors ki nou bezwen pour fer sa? Ki serten loportinite nou annan dan servis Bondye?

Bann letap konkret dan nou progre

3. Ki bann diferan letap debaz ki enplike pour fer lavolonte Bondye?

³ Pour bann vre Kretyen, fer lavolonte Bondye i en travay pour lavi diran. Laplipar di tan, i konmans avek bann letap debaz, parey met nou non pour partisip dan Lekol Minister Teokratik, lir Labib tou le zour, partisip dan travay predikasyon e fer bann progre pour kapab batize. Anmezir ki nou progrese, nou pa oubliye sa ki zapot Pol ti dir: “Pran byen [aker] sa responsabilite e met tou ou zefor ladan, pour ki tou dimoun i a war ou progre.” (1 Timote 4:15) Sa progre ki nou pe koz lo la i pa konmsi nou pe rod promosyon me plito i demontre nou determinasyon pour fer lavolonte Bondye avek tou nou leker. En tel fason viv i demontre ki nou les Bondye diriz nou lepa dan tou sa ki nou fer dan lavi, e i fer li dan en fason bokou pli siperyer ki sa ki nou fer nou menm.—Psonm 32:8.

4. Ki mannyer nou kapab kontrol nou lenkyetid?

⁴ Si nou ezite pour fer bann desizyon ouswa nou enkyet tro bokou pour nou prop lekor, sa i kapab anpes nou progrese dan servis Bondye. (Eklezyast 11:4) Alors, si nou anvi eksperyans vre lazwa ki vin avek servi Zeova ek lezot, premyerman petet nou pou bezwen sirmont nou prop lenkyetid. Par egzanp, Erik, ti anvi al servi dan en kongregasyon kot zot koz en lot langaz. Me i ti pe trakase: ‘Eski mon pou ganny aksepte  dan sa kongregasyon? Eski mon pou kontan sa bann frer ek ser? Eski zot pou kontan mwan?’ I rakonte: “Finalman, mon ti realize ki olye mazin tro bokou mon prop lekor mon ti bezwen plito mazin plis bann frer ek ser. Mon ti deside pour aret trakase e zis konsantre lo sa ki mon ti kapab donn lezot. Mon ti priye pour demann led e mon ti bouze avek mon plan. Ozordi mon ganny bokou lazwa dan mon servis.” (Romen 4:20) Wi, pli nou servi Bondye ek lezot san mazin nou prop lekor pli nou eksperyans lazwa ek lakontantman.

5. Akoz en bon plan i neseser pour viv en lavi ki an armoni avek plan Bondye? Donn en legzanp.

⁵ Pour byen viv an armoni avek plan Bondye, nou bezwen osi mazin byen davans konman pour organiz nou lavi. Avek lasazes, nou evite akimil en kantite det ki fer nou vin lesklav sa sistenm e ki anmar nou pour fer libreman travay Bondye. Labib i rapel nou: “En dimoun ki pret larzan avek en lot i vin son serviter.” (Proverb 22:7) Met nou konfyans dan Zeova e met bann keksoz spirityel premye dan nou lavi i ed nou reste konsantre lo plan Bondye. Par egzanp, Guoming ek son de ser i reste avek zot manman dan en landrwa kot lakaz i ser e i pa fasil trouv en travay ki stab. Zot fer en bon plan pour byen servi zot larzan e zot kontribye pour kouver bann depans. Zot ganny sa ki neseser dan lavi menm ler pa zot tou ki ti annan en travay. Guoming i dir: “Parler pa nou tou ki anmenn larzan kot lakour, me selman nou kapab kontinyen dan nou servis pionye e osi pran byen swen avek nou manman. Nou kontan ki nou manman pa demann nou pour sakrifye nou bann lobzektif spirityel pour nou kapab ofer li bann keksoz deliks.”—2 Korentyen 12:14; Ebre 13:5.

6. Ki legzanp ki montre ki mannyer nou kapab aranz nou lavi dapre plan Bondye?

⁶ Si dan ou lavi ou pe pas bokou letan dan bann keksoz profann, ki annan pour fer avek larzan oubyen lezot keksoz ankor, petet ou pou bezwen fer bann sanzman enportan pour ou kapab met plan Bondye premye dan ou lavi. Laplipar di tan, i pa pou fasil pour fer sa bann sanzman en sel kou, e menm si ou fer fot dan ou premye lesey, sa pa vedir ki ou pa pou kapab reisi. Get legzanp Koichi ki ti pas tro bokou letan pour anmize. Koichi ti’n etidye Labib ler i ti ankor adolesan, me pour plizyer lannen bann zwe video ti kontrol son lavi. En bo zour, Koichi ti mazinen: ‘Ki mon pe fer? Mon’n desot 30-t-an e napa nanryen ki fer sans dan sa ki mon pe fer avek mon lavi!’ Koichi ti rekonmans etidye Labib e i ti aksepte led avek kongregasyon. Menm si i ti pran letan pour li sanze, i pa ti aret dan semen. Avek bokou lapriyer ek lankourazman lezot, i ti arive sirmont sa move labitid. (Lik 11:9) Aprezan avek lazwa, Koichi pe servi konman en asistan ministeryel.

Aprann pour annan en pwennvi ekilibre

7. Akoz nou bezwen ekilibre dan servis Zeova?

⁷ Viv en lavi ki an armoni avek plan Bondye i demande ki nou fer tou sa ki nou kapab dan son servis. Nou pa zanmen devret fer zis en minimonm oubyen vin pares dan servis Bondye. (Ebre 6:11, 12) Me selman, Zeova pa demann nou pour telman donnen ki nou konpletman epize lo plan fizik, mantal oubyen emosyonnel. Avek modesti, nou rekonnet ki nou pa kapab akonplir travay Bondye par nou prop lafors, sa i glorifye li e i osi montre ki nou ekilibre. (1 Pyer 4:11) Zeova i promet ki i pou donn nou lafors ki nou bezwen pour fer son lavolonte, me nou pa devret donn plis ki nou limit i permet nou donnen e sey fer bann keksoz ki Zeova pa ekspekte avek nou. (2 Korentyen 4:7) Si nou oule kontinyen servi Zeova san ki nou konpletman epize, nou bezwen kalkile ki mannyer nou pou pli byen servi nou lafors.

8. Ki ti arive ler en zenn Kretyen ti esey donn son meyer Zeova ek lemonn an menm tan, e ki sanzman sa ser ti bezwen fer?

⁸ Par egzanp, pandan de-z-an Ji Hye ki viv dan en pei Lazi ti pionye e an menm tan i ti annan  en travay ki ti demann en kantite. I rakonte: “Mon ti pe esey donn mon meyer avek Zeova ek lemonn, me mon ti dormi zis senk erdtan aswar. Finalman, mon ti santi mwan fatige mantalman e mon ti napa bokou lazwa dan mon servis pour Zeova.” Pour li kapab servi Zeova avek ‘tou son leker, tou son nanm, lespri ek lafors,’ Ji Hye ti rod en louvraz ki ti demann mwens lenerzi. (Mark 12:30) I dir: “Menm si mon fanmir i met presyon lo mwan pour ki mon fer bokou larzan, mon’n arive met plan Bondye premye dan mon lavi. Mon ganny ase larzan pour bann keksoz debaz parey en resanz apropriye. E mon byen kontan mon kapab ganny plis repo! Mon annan lazwa dan mon minister, e mon pli for spirityelman konmela. Sa i akoz mon pa sitan ekspoz mon lekor avek lanmizman ek sa ki atiran dan lemonn parey avan.”—Eklezyast 4:6; Matye 6:24, 28-30.

9. Ki lefe nou zefor i kapab annan lo bann dimoun ki nou zwenn dan predikasyon?

⁹ I vre ki pa tou dimoun ki kapab servi konman en proklanmater aplentan. Si ou aze, ou annan en move lasante oubyen lezot limit, ou kapab asire ki Zeova i vreman apresye ou fidelite e nenport kwa ki ou kapab fer dan son servis avek tou ou leker. (Lik 21:2, 3) Personn pa devret souzestim lefe ki nou zefor, menm si i pa bokou, i kapab annan lo lezot. Par egzanp, meton nou tap laport enn de dimoun dan predikasyon e nou pa’n trouv personn ki paret enterese avek nou mesaz. Apre ki nou’n ale, nou pa konnen si bann dimoun pa pou koz lo sa vizit pandan plizyer erdtan oubyen zour, e sa i kapab leka menm si zot pa ti ouver zot laport ler nou ti tape! Nou pa ekspekte ki tou dimoun ki antann sa bon nouvel pou aksepte li, me toudmenm serten pou aksepte. (Matye 13:19-23) Kekfwa serten pou aksepte ler sitiasyon dan lemonn i sanze oubyen ler zot lavi i sanze. Antouka, ler nou fer sa ki nou kapab dan nou minister, nou pe fer travay Zeova. Nou “pe travay ansanm [avek] Bondye.”—1 Korentyen 3:9.

10. Ki loportinite nou tou nou annan dan kongregasyon?

¹⁰ Deplis, nou tou nou kapab ed lezot dan nou fanmir e dan nou kongregasyon. (Galat 6:10) Nou bon lenfliyans lo lezot i kapab annan en lefe dirab e profon. (Eklezyast 11:1, 6) Ler bann ansyen ek asistan ministeryel i desarz zot bann responsabilite seryezman, sa i kontribye pour ki kongregasyon i stab e an bonn sante  spirityelman e osi i favoriz progre dan nou bann aktivite Kretyen. Nou asire ki ler nou annan bokou pour fer “dan travay Senyer,” nou “travay pa anven.”—1 Korentyen 15:58.

En karyer ki an armoni avek plan Bondye

11. Apard ki travay avek en kongregasyon lokalman, ki lezot loportinite ki ou kapab annan dan servis Bondye?

¹¹ Konman Kretyen, nou kontan viv e nou anvi glorifye Bondye dan tou sa ki nou fer. (1 Korentyen 10:31) Ler nou fidelman fer zefor pour anons sa bon nouvel e pour ansenny lezot tou sa ki Zezi ti komande, nou pou trouv diferan fason ki anmenn lazwa pour akonplir sa travay. (Matye 24:14; 28:19, 20) Deplis, i annan loportinite pour travay avek en kongregasyon kot i annan plis bezwen, swa dan en lot landrwa dan ou pei oubyen dan en lot pei, oubyen menm dan en kongregasyon ki koz en lot langaz. Bann ansyen ek asistan ministeryel ki selibater e ki kalifye i kapab ganny envite pour swiv Lekol Formasyon Ministeryel e apre zot kapab servi kot i annan en bezwen pour bann frer matir, swa dan zot pei oubyen dan en lot. Bann koup marye ki dan servis aplentan i kapab kalifye pour resevwar formasyon lekol Gilead pour vin misyonner dan en lot pei. E i touzour annan en bezwen pour plis volonter pour fer diferan travay dan bann Betel e pour konstri e repar bann Lasal Rwayonm, bann Lasal Lasanble ek bann biro brans.

12, 13. (a) Ki mannyer ou kapab deside ki laspe dan servis Bondye ki ou devret swazir? (b) Donn legzanp pour montre ki mannyer leksperyans ki nou resevwar dan en laspe nou servis i kapab itil.

¹² I annan diferan posibilite dan servis Bondye. Lekel ou devret swazir? Vi ki ou en serviter ki’n dedye ou lavi avek Zeova, toultan rod gidans Zeova ek son lorganizasyon. Son “bon lespri” pou ed ou fer sa pli bon desizyon. (Neemya 9:20) Souvandfwa, en travay ki nou fer dan lorganizasyon Zeova pou ouver laport pour en lot loportinite dan son servis. Leksperyans ek abilite ki nou’n gannyen dan en form servis an partikilye i kapab itil dan lezot responsabilite ki nou gannyen plitar.

¹³ Par egzanp, Dennis ek son madanm Jenny i abitye travay lo bann konstriksyon Lasal Rwayonm. Apre ki siklonn Katrina ti tap sid Leta-z-ini, zot ti volonter pour donn lanmen dan en lekip sekour. Dennis i dir: “Nou’n servi sa ki nou ti aprann dan konstriksyon bann Lasal Rwayonm pour ed nou bann frer e sa in anmenn nou bokou lazwa. Lapresyasyon ki bann  ki nou’n ede in demontre i vreman tousan. Lezot lekip sekour ti napa sa gran sikse pour reisi repar bann lakaz. Me Temwen Zeova in deza repar oubyen rekonstri plis ki 5,300 lakaz ek plizyer Lasal Rwayonm. Dimoun in vwar sa e zot montre plis lentere dan nou mesaz.”

14. Ki ou kapab fer si ou anvi pran servis aplentan?

¹⁴ Eski ou kapab viv ou lavi dan en fason ki an armoni avek plan Bondye par swazir servis aplentan konman ou karyer? Si ou fer li, ou kapab asire ki ou pou eksperyans bokou benediksyon. Si ou sirkonstans konmela pa permet ou fer li, petet ou kapab fer serten azisteman dan ou lavi. Priy Bondye parey Neemya ti fer ler i ti anvi aksepte en misyon enportan. I ti dir: “O, Zeova, silvouple, . . . permet ou serviter reisi.” (Neemya 1:11) Apre sa, met ou konfyans dan sa “Enn ki ekout lapriyer,” e pran aksyon ki an armoni avek ou lapriyer. (Psonm 65:2) Si ou oule Zeova i beni ou zefor pour servi li pli plennman, ou bezwen premyerman fer sa bann zefor. Ler ou’n fer ou desizyon pour pran servis aplentan, pa aret dan semen. A longer ditan, ou pou ganny plis leksperyans e osi plis lazwa.

En lavi ki vreman vo lapenn

15. (a) Ki mannyer nou benefisye ler nou lir e koz lo sa ki’n ariv bann serviter fidel Bondye? (b) Mansyonn en biografi ki ou’n vreman kontan.

¹⁵ Ki rezilta ou pou gannyen si ou viv ou lavi dan en fason ki an armoni avek plan Bondye? Demann bann ki pe servi Zeova depi lontan, sirtou sa bann ki’n pas bokou lannen dan servis aplentan. Zot lavi i vreman fer sans e zot in eksperyans bokou benediksyon! (Proverb 10:22) Zot pou dir ou ki Zeova pa’n zanmen manke pour ed zot ler zot ti pas dan difikilte pour ganny sa ki zot ti vreman bezwen e menm plis ankor. (Filipyen 4:11-13) Depi 1955 ziska 1961, Latour Veyer an Angle in pibliy plizyer biografi bann frer ek ser fidel anba sa tenm “Pursuing My Purpose in Life” (Pourswiv mon bi dan lavi). Apre sa, plizyer santenn lezot biografi in ganny pibliye. Dan sak leksperyans ou kapab resanti sa devouman ek lazwa, en pe parey sa ki ou vwar dan liv Akt dan Labib. Ler ou lir sa bann leksperyans, ou pou anvi dir, ‘Se sa kalite lavi ki mon anvi viv!’

16. Kwa ki fer lavi en Kretyen ere e annan en bi?

¹⁶ Aaron ki nou ti mansyonnen o konmansman sa lartik, i ankor rapel: “Lafrik, mon ti souvan zwenn bann zenn ki ti pe vwayaze partou partou dan pei pe rod en bi dan zot lavi. Laplipar pa ti trouv li. Me nou nou ti la, pe viv en lavi ki an armoni avek plan Bondye par anons sa bon nouvel Rwayonm e nou’n rezwir en lavi enteresan e ki fer sans. Nou’n eksperyanse ki i annan plis lazwa “pour donnen ki pour resevwar.”—Akt 20:35.

17. Akoz nou devret viv nou lavi dapre plan Bondye la konmela?

¹⁷ Be ou? Ki ou bi dan lavi? Si ou napa en lobzektif kler dan lavi, lezot lobzektif pou fasilman pran tou ou letan ek lenerzi. Akfer ou devret gaspiy ou lavi presye pour bann keksoz swadizan enportan ki lemonn Satan i promote? Byento, ler “gran ladetres” i deklare, keksoz materyel ek pozisyon dan sa lemonn pou napa okenn valer. Sa ki pou vreman enportan se nou relasyon avek Zeova. Pa nou pou vreman kontan ki nou’n servi Bondye ek lezot e ki nou’n fer tou pour viv nou lavi dapre plan Bondye!—Matye 24:21, NW; Revelasyon 7:14, 15.

[Not anba lo paz]

Eski ou kapab eksplike?

• Ki mannyer Zeova i santi konsernan nou servis pour li?

• Ki mannyer ler nou byen organiz nou lavi e nou ekilibre, i kapab ed nou servi Bondye ek lezot?

• Ki loportinite i annan pour nou servi Bondye?

• Ki mannyer nou kapab annan en lavi ki vreman fer sans?

[Kestyon]

[Portre lo paz 25]

Si nou oule kontinyen servi Zeova avek tou nou leker nou bezwen ekilibre

[Portre lo paz 26]

I annan plizyer posibilite dan servis Zeova