Eski ou sezi tou loportinite pour partaz ou krwayans avek lezot?

“ESKI vre laverite i egziste?” An Lapolonny sa ti size pour en konpetisyon nasyonal ekrir en konpozisyon. Lenstriksyon sa ekspoze ti dir: “Nou pa bezwen annan laverite konplet. Personn pa bezwen li. Vre laverite pa vreman egziste.” En zenn etidyan aze 15 an ki apel Agata i en Temwen Zeova e i ti deside sezi sa loportinite pour li partaz son krwayans avek lezot.

Pour prepar son ekspoze, premyerman Agata ti demann Zeova led atraver lapriyer pour son gidans e apre i ti konmans rod bann lenformasyon lo son size. I ti vwar bann lenformasyon ki relye avek son tenm dan Latour Veyer le 1 Zilyet 1995. (Angle/Franse) I ti sit sa kestyon ki Pons Pilat ti demann Zezi: “Kisisa laverite?” (Zan 18:38) I ti servi sa kestyon dan en sans konmsi i ti pe dir: ‘Laverite, ki si sa sa? Sa pa egziste sa!’

Agata ti ekrir plitar ki kestyon Pilat ti fer li mazin tenm sa konpetisyon ek lenstriksyon pour sa ekspoze. Apre sa i ti diskit lo devlopman relatif setadir sa lide kot en keksoz ki vre pou en dimoun i kapab pa vre pour en lot e zot tou le de zot kapab “korek.” I ti demann bann kestyon parey, “Lekel parmi nou ki ti pou fye vwayaz lo en avyon si nou pa ti krwar ki lalwa avyasyon pa ti vre?” Apre sa i ti atir latansyon lo Labib, an dizan: “Parol Bondye i en baz ki’n ganny byen etablir.” I ti eksprimen avek lespwar ki bann ki senserman rod laverite pou annan ase pasyans pour trouv li.

Agata ti ranport en diplonm spesyal e i ti ganny sans pour fer en prezantasyon devan bann zelev dan son laklas. Bokou son bann kanmarad lekol ti aksepte kan i ti ofer zot en letid Labib. Agata i vreman rekonesan ki in servi sa loportinite pour li partaz son lafwa avek bokou lezot dimoun. Wi, kan nou sezi tou loportinite pour koz lo nou lafwa nou kapab prodwir fri. Ki bann loportinite ki ou ou annan pour koz lo ou lafwa?