Fer Resers Lo “Bann Keksoz Profon Bondye”

“Lespri i egzamin tou keksoz, menm bann keksoz profon Bondye.” —1 KORENTYEN 2:10, NW.

1. Mansyonn serten lansennyman ki bann nouvo etidyan Labib in kontan pour dekouver?

POUR bokou parmi nou ki dan kongregasyon Kretyen, nou ankor rapel lazwa ki nou ti gannyen ler nou ti konmans dekouver laverite dan Labib. Nou ti konpran akoz non Zeova i enportan, akoz Bondye i permet soufrans, akoz serten dimoun i al dan lesyel e ki pou arive avek bann imen fidel alavenir. Parey bokou dimoun ozordi, petet nou ti etidye Labib avan sa, me nou pa ti arive konpran, se konmsi sa konnesans ti kasyet. Nou ti parey en dimoun ki’n al get koray dan delo sale, me si i napa en mask oubyen i pa dan en glass-bottomed boat, i pa pou byen vwar sa bann zoli koray, pwason oubyen kokiy anba delo. I ti parey ler nou ti ganny led pour konpran Labib, nou ti konmans konpran “bann keksoz profon Bondye.”—1 Korentyen 2:8-10, NW.

2. Akoz nou pa pou zanmen fini aprann lo Parol Bondye?

² Me eski nou devret kontant nou avek en konnesans anler anler lo laverite ki dan Labib? Sa lekspresyon “bann keksoz profon Bondye” i enplik konpran lasazes Bondye ki’n ganny revele avek bann Kretyen atraver lespri sen me ki’n ganny kasyet avek lezot dimoun. (1 Korentyen 2:7) Lasazes Zeova napa limit e nou kapab eksperyans bokou lazwa ler nou pe fer resers dan sa domenn! Nou pa pou zanmen konn tou lo lasazes Zeova ek son bann travay. Nou kapab kontinyen eksperyans menm lazwa ki nou ti annan okonmansman ler nou ti fek aprann bann  lansennyman debaz lo Labib si nou kontinyen fer resers dan “bann keksoz profon Bondye.”

3. Akoz i enportan pour nou kapab byen konpran akoz nou krwar en serten keksoz?

³ Akoz nou bezwen konpran sa “bann keksoz profon”? Ler nou konpran pa zis nou krwayans me akoz nou krwar tel ou tel keksoz, andotmo fondasyon nou krwayans, sa i fortifye nou lafwa ek nou konfyans dan sa ki nou krwar. Labib i demann nou pour servi “nou kapasite pour rezonnen” pour ki nou kapab “konpran [oubyen prouve] lavolonte Bondye. Sa ki bon, sa ki fer li plezir, sa ki parfe.” (Romen 12:1, NW, 2) Ler nou konpran akoz Zeova i demann nou pour viv dan en serten fason, sa i fortifye nou determinasyon pour obeir li. Alors, konn “bann keksoz profon Bondye” i kapab donn nou lafors pour reziste bann tantasyon pour fer sa ki mal e pous nou pour vin “zele pour fer dibyen.”—Tit 2:14.

4. Ki savedir etidye Labib?

⁴ Pour konpran bann keksoz profon i demande ki nou etidye. Me selman, etidye i diferan avek senpleman lir koumsa menm. I enplik egzamin oprofon sa lenformasyon pour vwar ki mannyer i relye avek sa ki nou deza konnen. (2 Timote 1:13) I demande ki nou konpran akoz sa keksoz i koumsa. Etidye i enkli osi medite lo ki mannyer nou kapab servi sa ki nou’n aprann pour fer bann bon desizyon ouswa konman nou kapab ed lezot. Deplis, vi ki “tou Lekritir i enspire par Bondye e i itil,” nou letid i devret baze “lo tou parol ki sorti dan labous Bondye.” (2 Timote 3:16, 17; Matye 4:4) Etidye Labib i demann bokou zefor me i gou! E arive konpran “bann keksoz profon Bondye” i pa tro difisil.

Zeova i ed bann ki annan limilite konpran

5. Lekel ki kapab konpran “bann keksoz profon Bondye”?

⁵ Menm si ou pa ti fer tro byen lekol e ou pa abitye etidye, pa krwar ki ou pa pou kapab konpran “bann keksoz profon Bondye.” Pandan minister Zezi lo later, Zeova ti ed bann dimoun konpran son plan. Bann ki ti ganny ede pa ti bann dimoun saz e edike, me bann senp dimoun ki ti napa bokou ledikasyon, me selman zot ti annan ase limilite pour aksepte ganny ansennyen par serviter Bondye. Zot ti parey bann pti baba konpare avek bann ki ti al dan bann gran lekol. (Matye 11:25; Akt 4:13) Konsernan bann keksoz ki “Bondye in prepare pour sa bann ki kontan li,” zapot Pol ti ekrir son bann frer dan lafwa: “Se avek nou ki Bondye in revel zot atraver son lespri, akoz lespri i eksplor dan tou keksoz, menm dan bann keksoz profon Bondye.”—1 Korentyen 2:9, 10, NW.

6. Ki 1 Korentyen 2:10 i vedir?

⁶ Ki mannyer lespri Bondye i “eksplor dan tou keksoz, menm dan bann keksoz profon Bondye?” Olye donn en revelasyon avek sak Kretyen endividyelman, Zeova i servi son lespri sen pour diriz son lorganizasyon ki donn son pep ki ini en bon konprenezon lo Labib. (Akt 20:28; Efezyen 4:3-6) Dan lemonn antye, tou bann kongregasyon i annan en progranm preski parey pour etidye Labib. Avek letan, nou arive kouver tou bann lansennyman ki trouve dan Labib. Lespri sen i azir  atraver kongregasyon pour ed dimoun annan sa bon latitid pour zot konpran “bann keksoz profon Bondye.”—Akt 5:32.

Kwa sa “bann keksoz profon Bondye”?

7. Akoz bokou dimoun pa arive konpran “bann keksoz profon Bondye”?

⁷ Pa mazinen ki “bann keksoz profon” i neseserman vedir bann keksoz difisil pour konpran. Konn “bann keksoz profon Bondye” i difisil pour laplipar dimoun, pa akoz lasazes Bondye i tro difisil pour gannyen, me akoz Satan i anbet dimoun pour ki zot pa aksepte led ki lorganizasyon Zeova i donnen.—2 Korentyen 4:3, 4.

8. Ki sa bann keksoz profon ki Pol ti pe koz lo la dan trwazyenm sapit son let pour bann Korentyen?

⁸ Trwazyenm sapit let Pol pour bann Efezyen i montre ki “bann keksoz profon Bondye” i enkli plizyer vre lansennyman ki laplipar dan pep Zeova i konpran ase byen. Par egzanp, lekel sa desandans ki ti ganny promet dan Labib, ki mannyer serten imen ti pou ganny swazir pour al viv dan lesyel, e konn plis detay lo Rwayonm Bondye ki ganny dirize par Kris. Pol ti ekrir: “Dan letan pase en tel sekre pa ti ganny kominike avek bann zonm, me Bondye par son Lespri in aprezan revel li avek son bann sen zapot ek son profet. Sa sekre se ki par mwayen levanzil bann non-Zwif i osi destinen pour ganny en par avek bann Zwif dan leritaz ki Bondye in rezerve pour son pep; zot manm dan menm lekor e zot partisip zot osi dan menm promes ki Bondye in fer an Kris-Zezi.” Pol ti dir ki i ti ganny demande “pour fer ki tou dimoun i arive distenge konman plan sekre Bondye pou realize.”—Efezyen 3:5-9.

9. Akoz i en privilez pour konpran “bann keksoz profon Bondye”?

⁹ Pol ti kontinyen eksplik lavolonte Bondye ki “aprezan par [“kongregasyon,” NW], bann lanz ek tou lotorite ek pouvwar dan lesyel i a kapab konn lasazes Bondye dan son diferan form.” (Efezyen 3:10) Bann lanz i benefisye ler zot vwar e konpran ki mannyer Zeova i azir dan kongregasyon Kretyen avek lasazes. Pa i en privilez pour nou konpran bann keksoz ki menm bann lanz i enterese avek! (1 Pyer 1:10-12) Apre, Pol ti dir ki nou devret esey “konpran larzer, longer, oter e profonder” lafwa Kretyen. (Efezyen 3:11, 18) Prezan annou egzamin enn de legzanp keksoz profon ki nou ti kapab egzamin pli oprofon.

Enn de legzanp bann keksoz profon

10, 11. Dapre Labib, kan ki Zezi, ti vin parti prensipal “desandans” “madanm” Bondye dan lesyel?

¹⁰ Nou konnen ki Zezi i parti prensipal “desandans” sa “madanm” dan lesyel ki Zenez 3:15 i koz lo la. Pour egzamin pli oprofon sa size, nou ti kapab demann nou lekor: ‘Kan ki Zezi ti vin sa Desandans? Eski sa ti avan i ti vin lo later, ouswa ler i ti ne konman en imen, eski i ti zour son batenm oubyen ler i ti ganny resisite?’

¹¹ Bondye ti promet ki desandans sa “madanm,” ki ganny mansyonnen dan sa profesi, ti pou kraz latet sa serpan. Sa madanm i lorganizasyon Bondye ki dan lesyel. Me plizyer milye lannen ti pase avan ki sa desandans ki ti pou kapab detrir Satan ek son bann travay ti aparet. Pour sa rezon, profesi Izai ti dir ki sa madanm pa ti kapab fer zanfan e ki i ti tris. (Izai 54:1, 5, 6) Finalman, Zezi ti ne dan lavil Betleenm. Me se selman apre son batenm ki i ti vin en garson spirityel Bondye ler i ti resevwar lespri sen sorti kot Bondye. Sa zour Zeova ti dir li: “Sa mon Garson.” (Matye 3:17; Zan 3:3) Parti prensipal sa “desandans” ti’n finalman fer son laparisyon. Plitar, bann disip Zezi ti resevwar lespri sen e ti vin zot osi bann zanfan Bondye. Pour bokou letan “madanm” Zeova ti santi parey en “madanm ki pa’n zanmen donn nesans,” me finalman i ti kapab “kriye avek lazwa.”—Izai 54:1; Galat 3:29.

12, 13. Ki verse dan Labib ki montre ki tou bann Kretyen swazir lo later i form sa “lesklav fidel e pridan”?

 ¹² En lot legzanp bann keksoz profon ki’n ganny revele avek nou, i konsernan plan Bondye pour swazir 144,000 dimoun lo later. (Revelasyon 14:1, 4) Nou dakor ki bann Kretyen swazir ler zot ankor lo later, dan nenport ki lepok, i form sa “lesklav fidel e pridan” ki Zezi ti dir ti pou donn sa “manze” avek son bann serviter. (Matye 24:45, NW) Ki verse dan Labib ki prouve ki sa lansennyman i korek? Eski petet Zezi ti pe koz an zeneral lo nenport Kretyen ki batir son frer avek manze spirityel?

¹³ Bondye ti dir nasyon Izrael: “Zot mon bann temwen, wi mon serviter ki mon’n swazir.” (Izai 43:10) Me le 11 Nizan 33 N.L., Zezi ti dir bann sef Izrael ki Bondye ti’n rezet zot nasyon, zot ti nepli Son serviter. I ti dir: “Zot pou ganny arase Rwayonm Bondye, e [i pou] ganny donnen [avek] en lot nasyon ki pou prodwi son fri.” Zezi ti dir lafoul: “Lala! ou lakaz aprezan in ganny abandonnen.” (Matye 21:43; 23:38; Nou ki’n met an italik.) Ler nasyon Izrael ti lesklav Zeova, i pa ti ni fidel ni pridan. (Izai 29:13, 14) Plitar sa menm zour, ler Zezi ti demande: “Lekel vreman sa lesklav fidel e pridan?” an realite, i ti pe demande, ‘Lekel sa nasyon pridan ki pou ranplas nasyon Izrael pour li vin lesklav fidel Bondye?’ Zapot Pyer ti reponn ler i ti dir kongregasyon bann Kretyen swazir: “Zot . . . en nasyon sen, en pep ki pour Bondye.” (1 Pyer 1:4; 2:9; Nou ki’n met an italik.) Sa nasyon spirityel, “Izrael Bondye,” ti vin nouvo lesklav Bondye. (Galat 6:16, NW) Zis parey bann Izraelit ti form en sel “serviter,” pareyman tou bann Kretyen swazir lo later dan nenport ki lepok i sa “lesklav fidel e pridan.” Pa i en privilez pour nou resevwar sa “manze” atraver sa lesklav Bondye!

Letid Labib personnel i gou

14. Akoz etidye Labib i anmenn plis lazwa ki senpleman lir Labib?

¹⁴ Ler nou ganny en nouvo konprenezon lo Labib, pa nou santi nou kontan akoz ki mannyer i fortifye nou lafwa? Se pour sa rezon ki etidye Labib, pa zis lir, i kapab anmenn bokou lazwa. Alors, ler ou lir nou bann piblikasyon Kretyen, reflesir lo la oprofon. Demann ou lekor sa kestyon: ‘Eski sa leksplikasyon i menm parey ki sa ki mon ti konpran oparavan lo sa size? Ki lezot verse Labib oubyen pwen ki mon kapab mazinen ki donn plis laprev ki mon konprenezon konsernan sa lartik i korek?’ Si ou bezwen fer plis resers, ekrir ou kestyon e plitar ou pou kapab etidye sa size pli oprofon.

15. Ki bann proze letid ki kapab vreman gou, e ki ou kapab fer pour ki son byenfe i dirab?

¹⁵ Ki bann proze letid ki kapab anmenn lazwa ler ou pe dekouver bann nouvo konprenezon? Par egzanp, ou kapab etidye an detay bann diferan lalyans ki Bondye ti fer pour ki limanite i benefisye, sa pou vreman ogmant ou konprenezon . Ou kapab fortifye ou lafwa par etidye bann profesi ki annan pour fer avek Zezi Kri ouswa egzamin verse par verse en liv profetik dan Labib. En lot keksoz ki kapab vreman batir ou lafwa se revwar listwar modern bann Temwen Zeova. Ou kapab servi sa liv Jehovah’s Witnesses—Proclaimers of  God’s Kingdom, si ou annan sa liv dan en langaz ki ou konpran. * Si ou repas lo bann “Kestyon Lekter” ki ti ganny pibliye dan Latour Veyer dan lepase, sa pou sirman ed ou pour annan en pli bon konprenezon lo serten verse Labib. Esey pran not bann rezonnman baze lo Labib ki’n ede ariv lo sa konklizyon. Sa pou ed ou devlop ou abilite pour “fer diferans ant sa ki byen ek sa ki mal.” (Ebre 5:14) Ler ou etidye, pran not dan ou prop Labib ouswa lo en fey, sa pou anmenn plis benefis pour ou menm e pour bann ki ou kapab ede.

Ed bann zenn pour kontan etidye Labib

16. Ki mannyer ou kapab ed bann zenn pour kontan letid Labib?

¹⁶ Paran i kapab fer bokou pour ki zot zanfan i devlop en lanvi pour bann keksoz spirityel. Pa souzestim abilite bann zenn pour konpran bann keksoz profon. Si ou demann bann zenn pour fer bann resers lo en serten size dan zot preparasyon pour letid an fanmir, ou kapab demann zot kwa ki zot in aprann. Dan letid an fanmir, zot kapab fer bann pti legzersis kot bann zenn i defann zot lafwa e zot prouve ki sa ki zot krwar i vre. Ou osi kapab servi sa brosir “See the Good Land” * pour ansenny zot zeografi dan Labib e pour ed zot konpran pli byen sa ki zot in lir dan lektir Labib lasemenn.

17. Akoz nou devret balans byen letan ki nou pase dan bann proze letid Labib personnel?

¹⁷ Bann proze letid lo Labib i kapab vreman enteresan e i batir ou lafwa. Selman, pa les sa bann proze anpes ou prepar ou bann renyon avek kongregasyon. Bann renyon i en lot fason ki Zeova i servi pour ansenny son pep atraver “lesklav fidel e pridan.” Toudmenm, lezot resers i kapab ed ou donn bann larepons ki pli enteresan dan bann renyon parey Letid Liv Kongregasyon oubyen ler zot pe egzamin bann pwen enteresan dan lektir Labib dan Lekol Minister Teokratik.

18. Akoz fer zefor pour konpran “bann keksoz profon Bondye” i vo lapenn?

¹⁸ En letid Labib personnel e profon i kapab ed ou vin pli pros avek Zeova. Labib i montre valer en tel letid dan en verse kot nou lir: “Parski lasazes i fourni en proteksyon zis parey larzan i fourni en proteksyon. Me lavantaz avek konnesans se ki lasazes li menm i gard son bann propriyeter vivan.” (Eklezyast 7:12) Alors, i vo lapenn fer zefor pour konpran bann keksoz spirityel pli oprofon. Labib i fer sa promes avek bann ki kontinyen rode: “Ou pou trouv konnesans Bondye.”—Proverb 2:4, 5.

[Not anba lo paz]

Eski ou kapab eksplike?

• Kwa sa “bann keksoz profon Bondye”?

• Akoz nou pa devret zanmen aret etidye bann keksoz profon Bondye?

• Akoz tou Kretyen i kapab annan sa lazwa pour konpran “bann keksoz profon Bondye”?

• Ki mannyer ou kapab benefisye plennman avek “bann keksoz profon Bondye”?

[Kestyon]

[Portre lo paz 28]

Kan ki Zezi ti vin sa desandans promiz?

[Portre lo paz 31]

Paran i kapab demann zot zanfan pour fer bann resers pour prepar letid an fanmir