Ansenny ou zanfan pour fer lape

Nicole ki ti annan 8 an ti byen kontan ki son fanmir ti pe al sanz landrwa reste e i ti toultan met son zanmi Gabrielle okouran lo tou bann dernyen detay. San ekspekte, en zour Gabrielle ti dir avek Nicole ki i pa ti enterese avek lefet ki i ti pe ale. Nicole ti santi li blese e ankoler alors i ti dir avek son manman, “Mon pa anvi war Gabrielle ankor!”

SOUVANDFWA paran i bezwen entervenir dan sa bann problenm ki zanfan i gannyen parey dan ka Nicole ek Gabrielle, pa zis pour konsol zot akoz zot in ganny blese, me osi pour montre zot ki mannyer pour rezourd sa sitiasyon. Natirelman bann zenn zanfan i demontre “bann mannyer en zanfan” e laplipar letan zot pa konsyan domaz ki zot parol ek aksyon i kapab annan lo lezot. (1 Korentyen 13:11) Zot bezwen led pour devlop bann kalite ki anmenn lape anver lezot manm fanmir ek lezot dimoun.

Bann paran Kretyen i vreman anvi elve zot zanfan pour “rod lape e fer lape.” (1 Pyer 3:11) Sa lazwa ki en dimoun i annan kan i fer lape i plis ki tou sa zefor ki i bezwen fer pour kouver sa santiman fristrasyon, mefyans ek lanimozite. Si ou en paran, ki mannyer ou kapab ansenny ou zanfan pour fer lape?

Devlop dan li sa dezir pour fer plezir sa Bondye lape

Zeova i ganny apele sa “Bondye ki donn nou son lape” e i ganny idantifye konman sa enn ki “donn lape.” (Filipyen 4:9; Romen 15:33) Se pour sa rezon ki bann paran ki saz zot konn servi byen Parol Bondye pour ki zot ava kapab devlop dan zot zanfan sa dezir pour fer plezir Bondye e pour imit son bann kalite. Par egzanp, ou kapab ed ou zanfan pour esey mazin sa zoli larkansyel kouler ver emerod ki anserkle tronn Zeova dan vizyon zapot Zan. * (Revelasyon 4:2, 3) Eksplik li ki sa larkansyel i reprezant lape ek trankilite ki antour Zeova e ki sa kalite benediksyon pou ganny verse lo tou bann ki obeir li.

 Zeova in osi donn nou gidans atraver son garson Zezi, ki ganny apele “Prens Lape.” (Izai 9:6, 7) Alors, lir e diskit avek ou zanfan bann resi Labib kot Zezi ti ansenny bann bon leson konsernan evit bann lager ek dispit. (Matye 26:51-56; Mark 9:33-35) Eksplik li akoz Pol ki oparavan ti en zonm ki ti kontan “ensilte” ti sanz son fason e i ti ekrir ki “serviter Senyer pa devret en dimoun ki fer kerel. Okontrer, i devre byen avek tou dimoun, . . . e annan pasyans.” (1 Timote 1:13; 2 Timote 2:24) Larepons ki ou zanfan i donnen i kapab sirprann ou.

Evan i mazinen kan i ti annan set an i ti ganny sikannen par en garson dan bis lekol. I ti dir: “Mon ti telman ankoler anver sa garson ki mon ti anvi revanze! Me apre mon ti rapel en leson ki mon ti’n aprann dan lakour konsernan bann ki esey konmans en lager. Mon ti konnen ki Zeova pa ti oule mon ‘rann mal pour mal’ e ki mon devret ‘viv anpe avek tou dimoun.’” (Romen 12:17, 18) Apre sa Evan ti trouv lafors ek kouraz pour kalme sa sitiasyon par reponn dan en fason byen dous. I ti anvi fer plezir sa Bondye lape.

Vin en paran ki fer lape

Eski ou lakour i en landrwa ki anpe? Si wi, ou zanfan i kapab aprann bokou lo lape menm kan ou pa dir ni en parol. Ou lefikasite lo lafason ki ou ansenny ou zanfan pour fer lape i depan lo lakantite ki ou imit sa lape ki Bondye ek Kris i demontre.—Romen 2:21.

Russ ek Cindy i travay dir pour elve zot de garson. Zot ankouraz zot pour reazir dan en bon fason kan lezot i fatig zot. Cindy i dir: “Latitid ki nou de Russ nou demontre anver nou de garson ek lezot kan bann difikilte i leve i zwe en gran rol dan lafason ki nou de garson i arive rezourd bann sitiasyon parey.”

Menm kan ou fer en fot, e tou paran osi i fer fot, ou kapab menm servi sa loportinite pour ansenny bann leson enportan. Stephen ti dir: “Ti annan letan kan mon madanm Terry ek mwan ti reakte an tro e disiplin nou trwa zanfan san ki nou ti konn tou detay. Kan sa ti arive nou ti demann lekskiz.” Terry ti azoute: “Nou ti fer nou zanfan konnen ki nou osi nou enparfe e ki nou fer bann fot. Nou santi ki sa pa ti zis kontribye pour anmenn lape dan nou fanmir me i ti osi ed nou zanfan pour aprann plis lo ki mannyer pour rod lape.”

Eski ou zanfan pe aprann ki mannyer pour demontre lape kan zot obzerv lafason ou tret zot? Zezi ti donn sa konsey: “Alor fer pour lezot sa ki ou oule lezot i fer pour ou.” (Matye 7:12) Menm si ou annan ou bann defo, reste asire ki sa lanmour ek lafeksyon ki ou montre anver ou zanfan pou prodwir bon rezilta. Ou zanfan pou reazir pli byen ler ou donn zot konsey avek lanmour.

Pa ankoler vitman

Proverb 19:11 i dir: “En zonm ki annan bon zizman pou sirman apez son lakoler.” Ki mannyer ou kapab ed ou zanfan pour annan bon zizman? David i dekrir en bon lapros  pratik ki li ek son madanm Mariann i vwar i marse avek zot garson ek fiy. I ti dir: “Ler zot ganny ofanse avek sa ki en dimoun i dir ouswa fer ki bles zot, nou ed zot pour konpran santiman sa dimoun. Nou demann zot bann kestyon senp parey: ‘Eski sa dimoun ti’n pas en move lazournen? Eski i kapab ki i ti zalou? Eski en dimoun in bles li?’” Mariann i azoute, “Sa i tant pour kalme zot olye les bann panse negatif fatig zot ouswa argimante lo lekel ki byen ouswa mal.”

Sa kalite formasyon i kapab prodwir bann bon rezilta. Remarke ki mannyer Nicole, ki’n ganny mansyonnen o konmansman sa lartik ti ganny ede avek son manman Michelle, dan en fason ki ti al plis ki zis revin zanmi avek Gabrielle. Michelle ti dir: “Nicole ek mwan nou ti lir sapit 14 dan sa liv Ekout sa Gran Ansennyan. * Apre sa mon ti eksplik li sa ki Zezi ti anvi dir kan i ti dir ki nou devret pardonn en dimoun ziska ‘swasanndiset fwa.’ Apre ki mon ti’n ekout Nicole eksprim son santiman mon ti ed li santi sa sagrinasyon ek fristrasyon ki Gabrielle ti pe santi akoz son pli bon dalon ti pe al reste en lot landrwa byen lwen.”—Matye 18:21, 22, NW.

Sa nouvo konprenezon ki Nicole ti gannyen lo kwa ki ti’n kapab fer Gabrielle reazir dan sa fason ti ed li pour devlop en bon santiman pour lezot e motiv li pour telefonn Gabrielle e demann li lekskiz. Michelle i azoute: “Depi sa zour, Nicole i trouv lazwa ler i pran an konsiderasyon santiman lezot e i fer bann bon keksoz pour fer lezot santi zot pli byen.”—Filipyen 2:3, 4.

 Ed ou zanfan pour evite pran lakoler kan bann pti fot ek mal konprenezon i arive. Kan ou fer sa ou pou satisfe kan ou pou vwar ou zanfan pe eksprim labonte ek lafeksyon senser anver lezot.—Romen 12:10; 1 Korentyen 12:25.

Ankouraz lezot pour pardonnen i en zoli keksoz

Proverb 19:11 i dir: “I en zoli keksoz . . . pour les pase fot.” Dan son bann moman pli tris, Zezi ti imit son Papa e demontre en latitid kot i ti pardonnen. (Lik 23:34) Ou zanfan i kapab aprann ki degre i zoli pour pardonnen kan zot personnelman santi sa rekonfor letan ou ou pardonn zot.

Par egzanp, Willy ki annan senk an i kontan penn bann desen avek son granmanman. En zour, son granmanman ti aret penn en sel kou e konmans dispit avek Willy e apre sa i ti vire e ale. Willy pa ti kontan. Son papa Sam ti dir: “Granmanman Willy i soufer avek en maladi ki apel Alzheimer. Alors nou ti bezwen eksplik Willy ki si sa sa an servan bann term senp ki i ti pou kapab konpran.” Apre ki i ti’n fer Willy rapel ki limenm i ti’n ganny pardonnen plizyer fwa dan diferan lokazyon e ki i ti devret fer parey avek lezot, Sam ti vreman enpresyonnen avek reaksyon Willy. I dir: “Eski ou kapab imazinen ki mannyer mon madanm ek mwan nou ti santi kan nou ti vwar nou pti garson al kot son granmanman ki ti aze 80-z-an e koz avek li dan en fason kot i ti pe ekskiz son lekor avek douser e apre diriz li par son lanmen kot latab?”

I vreman zoli kan bann zanfan i aprann kontinyen “siport” febles ek fot lezot e pour pardonn zot. (Kolosyen 3:13) Menm kan en dimoun i fer en move keksoz par ekspre, asir ou zanfan ki demontre lape i kapab pli for, akoz “kan Zeova i pran plezir dan fason viv en zonm, i fer ki menm son lennmi pou anpe avek li.”—Proverb 16:7.

Kontinyen ed ou zanfan pour fer lape

Kan paran i servi Parol Bondye pour enstri zot zanfan “dan lape” e konman “bann ki viv dan lespri lape,” zot vin sa vre sours benediksyon pour zot zanfan. (Zak 3:18) Sa bann tel paran pe byen ekip zot zanfan avek sa ki zot vreman bezwen pour rezourd konfli e pour anpe avek lezot. Sa i vreman kontribye ver boner e satisfaksyon dan zot lavi.

Dan ek Kathy, zot annan trwa adolesan ki pe fer byen dan domenn spirityel. Dan i dir: “Menm si nou ti rankontre bann difikilte pour elve zot kan zot ti ankor pli pti, nou vreman kontan ki nou zanfan pe byen fer dan servis Zeova. Konmela zot annan bann bon relasyon kot zot anpe avek lezot e zot pardonn lezot libreman kan en keksoz i menas sa lape.” Kathy li i dir: “Sa i vreman ankourazan pour nou vi ki lape i form parti fri lespri Bondye.”—Galat 5:22, 23.

Alors, konman paran Kretyen ou annan bon rezon pour pa “aret” ansenny ou zanfan pour viv anpe avek lezot menm si okonmansman i kapab paret ki progre i dousman. Pandan ki zot fer li, reste asire ki “Bondye lanmour ek lape i ava avek zot.”—Galat 6:9; 2 Korentyen 13:11.

[Not anba lo paz]

[Bwat lo paz 14]

EN LENFLIYANS POZITIF?

En lartik ki ti ganny pibliye par Media Awareness Network ki ti annan pour tit “Vyolans dan divertisman medya” ti fer sa remark: “Sa konsep lo vyolans konman en mwayen pour rezourd problenm i byen ganny demontre dan bann divertisman. Tou le de sa malfeter ek sa ero, i kontinyelman servi vyolans pour rezourd problenm.” Zis dan apepre 10 poursan progranm televizyon, film, ek lanmizik ki ti ganny analize ti pran an konsiderasyon bann move konsekans vyolans. Sa lartik i dir, “o kontrer vyolans ti ganny prezante konman byen zistifye, normal e pa kapab ganny evite, i ti sa sel mwayen pour rezourd problenm.”

Eski ou vwar lenportans pour fer bann azisteman lo sa ki ganny gete lo televizyon kot ou? Pa bezwen les divertisman medya diminyen ou zefor pour ansenny ou zanfan pour anpe avek lezot.

[Portre lo paz 12]

Enkilke dan ou zanfan sa dezir pour fer plezir sa Bondye lape

[Portre lo paz 13]

Pran letan pour koriz bann aksyon ek parol blesan

[Portre lo paz 15]

Ou zanfan i devret aprann demann lekskiz e pardonnen