Devlop bann kalite ki kapab ed ou fer disip
Devlop bann kalite ki kapab ed ou fer disip
“Ale e fer tou pep vin mon bann disip.”—MATYE 28:19.
1. Ki abilite ek latitid serten serviter Bondye dan lepase ti bezwen annan?
PARFWA, bann serviter Zeova i bezwen devlop bann abilite ek latitid ki pou kapab ed zot fer son lavolonte. Par egzanp, kan Bondye ti demann Abraam ek Sara pour kit zot lavil Our kot zot ti annan tou, zot ti bezwen annan bann kalite ek abilite ki ti pou permet zot reste dan latant. (Ebre 11:8, 9, 15) Zozye ti bezwen annan kouraz, konfyans dan Zeova ek konnesans lo Lalwa Bondye pour li kapab anmenn bann Izraelit dan Later Promiz. (Zozye 1:7-9) Nenport ki abilite Betsalel ek Ooliab ti’n kapab annan, sirman lespri sen ti ed zot pour devlop plis dan zot abilite afen pour zot pli byen partisip e siperviz travay konstriksyon kot tabernak ek lezot travay ki ti annan pour fer avek tabernak.—Egzod 31:1-11.
2. Ki kestyon nou pou egzaminen an sa ki konsern fer disip?
2 Plizyer syek plitar, Zezi Kri ti donn son bann disip en latas. I ti dir zot: “Ale e fer tou pep vin mon bann disip. . . . Ansenny zot pour obei tou sa ki mon’n komande.” (Matye 28:19, 20) Sa ti premye fwa ki imen ti ganny sa privilez pour fer en tel travay. Ki bann kalite nou bezwen pour fer disip? Konman nou kapab devlop sa bann kalite?
Demontre en profon lanmour pour Bondye
3. Ki loportinite sa lord pour fer disip i donn nou?
3 Nou pou bezwen annan en profon lanmour pour Zeova pour nou kapab apros dimoun e esey persyad zot pour vin ador sa vre Bondye. Bann Izraelit ti kapab demontre zot lanmour pour Bondye, si zot ti obeir son komannman avek tou zot leker, ofer li bann sakrifis ki fer li plezir e loue li par sant bann kantik. (Deterononm 10:12, 13; 30:19, 20; Psonm 21:13; 96:1, 2; 138:5) Nou ki pe fer disip ozordi nou osi nou obeir lalwa Bondye, me anplis ki sa nou eksprim nou lanmour pour Zeova kan nou koz lo li ek son plan avek lezot. Nou bezwen koz avek konviksyon, swazir bann bon mo pour eksprim nou profon santiman lo sa lespwar ki Bondye in donn nou.—1 Tesalonisyen 1:5; 1 Pyer 3:15.
4. Akoz i ti en plezir pour Zezi ansenny lezot lo Zeova?
4 Akoz i ti annan en profon lanmour pour Zeova, pour Zezi i ti en plezir pour li koz lo plan Bondye, sa Rwayonm ek vre ladorasyon. (Lik 8:1; Zan 4:23, 24, 31) Anfet, Zezi ti dir: “Mon nouritir se pour obei lavolonte sa enn ki’n anvoy mwan, e fini travay ki i’n donn mwan.” (Zan 4:34) Sa bann parol ki en psalmis ti ekrir ti aplik lo Zezi: “O mon Bondye, mon’n pran plezir pour fer ou lavolonte, e ou lalwa i oprofon dan mwan. Mon’n anons sa bon nouvel lo ladrwatir dan sa gran lasanble. Gete! Mon pa ferm mon labous. O Zeova, ou menm ou konn sa byen.”—Psonm 40:8, 9; Ebre 10:7-10.
5, 6. Ki sa kalite esansyel ki nou bezwen pour fer disip?
5 Bann nouvo ki’n fek aprann laverite, ki ganny pouse par lanmour pour Bondye, parfwa zot koz lo Zeova ek son Rwayonm avek sitan lantouzyasm ki zot byen reisi konvenk dimoun pour egzamin Labib. (Zan 1:41) Lanmour pour Bondye i sa keksoz prensipal ki pous nou pour partisip dan sa travay pour fer disip. Alors, annou kontinyen gard sa lanmour vivan, par regilyerman lir e reflesir lo son Parol.—1 Timote 4:6, 15; Revelasyon 2:4.
6 San okenn dout, lanmour pour Zeova ti ed Zezi Kri pour vin en ansennyan devoue. Me i ti osi annan lezot rezon akoz Zezi ti en proklanmater Rwayonm efikas. Alors, ki sa lot keksoz ki ti ed Zezi pour kapab fer disip dan en fason efikas?
Avek lanmour montre lentere dan lezot
7, 8. Konman Zezi ti vwar lezot?
7 Zezi ti montre ki i ti konsernen avek dimoun e vreman enterese avek zot. Menm ler i ti dan lesyel konman sa “zouvriye abil” Bondye, i ti vreman kontan en kantite bann keksoz ki ti annan pour fer avek imen. (Proverb 8:30, 31) Kan i ti vin lo later konman en zonm, i ti annan konpasyon pour dimoun, sa bann ki ti vin kot li ti ganny rekonfor. (Matye 11:28-30) Zezi ti demontre sa menm lanmour ek konpasyon ki Zeova ti annan, e sa ti fer dimoun anvi vin ador sa sel vre Bondye. Tou sort kalite dimoun ti ekout Zezi akoz avek lanmour Zezi ti montre ki i ti enterese avek zot ek zot sitiasyon.—Lik 7:36-50; 18:15-17; 19:1-10.
8 Kan en zonm ti demann Zezi ki i bezwen fer pour ganny lavi eternel, “Zezi ti get li e i ti kontan li.” (Mark 10:17-21) Labib i dir sa konsernan serten dimoun ki Zezi ti ansennyen an Betani: “Zezi ti kontan Mart, son ser Mari, ek son frer Lazar.” (Zan 11:1, 5) Zezi ti telman konsernen avek dimoun ki i pa ti repoze zis pour li kapab ansenny zot. (Mark 6:30-34) Sa profon lentere avek lanmour ki Zezi ti annan pour imen, ti fer ki napa personn ki ti pli kapab atir dimoun ver vre ladorasyon ki li.
9. Ki latitid Pol ti annan dan son travay pour fer disip?
9 Zapot Pol osi ti demontre lentere senser dan dimoun ki i ti pres avek. Par egzanp i ti dir bann dimoun ki ti’n vin Kretyen an Tesalonik: “Akoz nou lafeksyon pour zot nou ti pare pour anons zot non selman Levanzil Bondye me osi donn menm nou prop lavi pour zot akoz nou lanmour pour zot ti gran.” Gras akoz son zefor ranpli avek lanmour, serten an Tesalonik “ti abandonn bann zidol pour servi Bondye vivan e vre.” (1 Tesalonisyen 1:9; 2:8) Zis parey Zezi ek Pol, si nou osi nou senserman enterese avek dimoun, nou pou kontan kan nou vwar ki sa bon nouvel pe tous sa bann “ki annan sa bon kondisyon leker pour ganny lavi eternel.”—Akt 13:48, NW.
Demontre en leta lespri sakrifis
10, 11. Akoz nou bezwen fer sakrifis kan nou pe esey fer disip?
10 Bann ki efikas dan sa travay pour fer disip, i pare pour fer sakrifis. Pour ganny larises i pa sa keksoz pli enportan pour zot. Anfet, Zezi ti dir son bann disip: “Konman i vreman difisil pour en dimoun ris antre dan Rwayonm Bondye!” Bann disip ti sirprann kan zot ti tann Zezi dir sa. Me i ti dir: “Mon bann zanfan, konman i vreman difisil pour antre dan Rwayonm Bondye! I pli fasil pour en samo pas par trou en zegwir, ki pour en zonm ris antre dan Rwayonm Bondye.” (Mark 10:23-25) Zezi ti demann son bann disip pour annan en lavi senp afen pour zot kapab konsantre lo sa travay pour fer disip. (Matye 6:22-24, 33) Akoz ler nou annan sa leta lespri sakrifis sa i ed nou pour fer disip?
11 I demann bokou zefor pour ansenny tou keksoz ki Zezi ti demann nou pour fer. Normalman, en Kretyen ki anvi fer disip i fer en kantite zefor pour nobou kondwir en letid Labib avek en dimoun ki enterese tou le semenn. Pour zot kapab ganny plis sans pour zwenn bann dimoun senser, serten proklanmater in aret travay aplentan e zot in rod en travay amitan. Plizyer milye Temwen Zeova in aprann en lot langaz pour zot kapab pres avek serten group etnik dan zot pei. Serten proklanmater ki oule fer disip in al dan en lot landrwa dan zot pei oubyen zot in al aletranze pour kapab partisip plis dan sa travay rekolt. (Matye 9:37, 38) Tousala i demann sakrifis. Me i annan ankor keksoz ki neseser si nou anvi vin pli efikas dan nou travay pour fer disip.
Annan pasyans me pa gat letan
12, 13. Akoz pasyans i tre enportan pour kapab fer disip?
12 Pasyans, i en lot kalite ki ed nou fer disip. Sa mesaz ki nou pe prese i irzan, me souvan i demann en bon pe letan ek pasyans pour kapab fer disip. (1 Korentyen 7:29) Zezi pa ti mank pasyans avek son demi frer Zak. Menm si Zak ti’n byen abitye avek sa travay predikasyon ki Zezi ti fer, a en serten moman dan son lavi, ti annan serten keksoz ki ti pe anpes li vin en disip. (Zan 7:5) Me i kler ki Zak ti vin en disip apre, akoz Labib i montre ki i ti zwenn ansanm avek son manman, son frer ek bann zapot pour priye. I paret ki i ti vin disip ant letan ki Zezi ti mor ek zour Lapannkot lannen 33 N.L., e sa pa ti en kantite letan. (Akt 1:13, 14) I ti byen progrese spirityelman, plitar i ti ganny bann gro responsabilite dan kongregasyon Kretyen.—Akt 15:13; 1 Korentyen 15:7.
13 Parey en fermye, bann Kretyen pe kiltiv bann keksoz ki souvan i pran letan pour pouse. Par egzanp, pour arive konpran Parol Bondye, devlop lanmour pour Zeova ek en leta lespri ki parey pour Kris, tousala i demann pasyans. Zak ti ekrir: “Alor pasyans, mon bann frer, ziska [“prezans,” NW] nou Senyer. Zot war konman fermye i espere avek pasyans pour son later prodwi son rekolt. I esper avek pasyans sa premye sezon lapli ek dernyen sezon lapli. Demenm, zot osi pran pasyans. Reste ferm, parski zour [“prezans,” NW] nou Senyer i pros.” (Zak 5:7, 8) Zak ti pe ankouraz son bann frer ek ser Kretyen pour ‘pran pasyans ziska zour [“prezans,” NW] nou Senyer.’ Si bann disip pa ti konpran en keksoz, avek pasyans Zezi ti eksplik zot oubyen i ti servi bann legzanp pour ed zot konpran. (Matye 13:10-23; Lik 19:11; 21:7; Akt 1:6-8) Vi ki Senyer i la prezan, nou osi nou bezwen pasyante anmezir ki nou fer bokou zefor pour fer disip. Nou bezwen ansenny sa bann ki vin disip ozordi avek pasyans.—Zan 14:9.
14. Menm si nou annan pasyans, ki mannyer nou kapab servi nou letan dan en fason saz pour fer disip?
14 Menm si nou pasyante, pa bokou dimoun ki nou konmans etidye avek ki vin disip. (Matye 13:18-23) Apre ki nou’n fer sifizaman zefor pour ed zot, avek lasazes nou aret etidye avek sa bann ki pa fer okenn progre, e nou rod sa bann ki petet pou pli byen apresye laverite dan Labib. (Eklezyast 3:1, 6) Byensir, menm avek dimoun ki apresye zot letid Labib, petet ou pou bezwen pas plis letan avek zot pour ed zot sanz zot pwennvi, latitid ek sa ki zot vwar pli enportan dan lavi. Alors, nou pasyante zis parey Zezi ti demontre pasyans avek son bann disip ki ti vwar li difisil pour annan en bon latitid.—Mark 9:33-37; 10:35-45.
Devlop sa lar pour ansennyen
15, 16. Akoz senplisite ek bon preparasyon i enportan kan nou pe fer disip?
15 Pour kapab reisi fer disip i tre enportan ki nou annan lanmour pour Bondye, lentere dan dimoun, demontre en leta lespri sakrifis ek pasyans. Nou osi bezwen devlop nou abilite pour ansennyen, akoz ler nou fer sa nou pou kapab ansenny dan en fason ki kler e senp. Par egzanp, bokou keksoz ki sa Gran Ansennyan, Zezi Kri ti dir ti efikas akoz i ti gard li senp. Petet ou mazin bann keksoz ki i ti dir parey: “Akimil zot larises dan lesyel.” “Pa donn lisyen sa ki sakre.” “Lasazes Bondye i ganny rekonnet par son bann aksyon.” “Rann Sezar sa ki pour Sezar e rann Bondye sa ki pour Bondye.” (Matye 6:20; 7:6; 11:19; 22:21) Byensir, Zezi pa ti zis dir bann fraz kourt koumsa. Son lansennyman ti kler e i ti donn en leksplikasyon kan i ti neseser. Ki mannyer ou kapab imit lafason ki Zezi ti ansennyen?
16 Pour kapab ansenny dan en fason senp e kler, i tre enportan ki nou fer bon preparasyon. En proklanmater ki pa’n prepare i tant pour koz tro bokou. I kapab ki sa pwen prensipal pa vin evidan akoz i telman pe koz en kantite, e dir tou sa ki i konnen lo sa topik ki i pe egzaminen. Me parkont, en proklanmater ki byen prepare i pran an konsiderasyon bezwen sa dimoun ki i pe al ansennyen, i reflesir lo sa size e i ansenny dan en fason kler zis sa ki vreman neseser. (Proverb 15:28; 1 Korentyen 2:1, 2) I gard antet kwa ki sa etidyan i deza konnen e ki pwen ki i bezwen met lanfaz lo la dan letid. Sa proklanmater i kapab konn en kantite detay enteresan lo sa size, me pour li kapab ansenny dan en fason kler i pou bezwen dir zis lenformasyon ki neseser.
17. Ki mannyer nou kapab ed dimoun pour reflesir lo bann verse Labib?
17 Olye zis dir zot laverite koumsanmenm, Zezi ti osi ed bann dimoun pour reflesir. Par egzanp, en fwa i ti demande: “Ki ou mazinen Simon, bann lerwa later i fer lekel pey taks, bann sitwayen oubyen bann etranze?” (Matye 17:25) I kapab ki ou en dimoun ki vreman kontan eksplik bann keksoz dan Labib, me ou pou bezwen annan kontrol lo ou lekor pour ou kapab les sa etidyan eksprim li oubyen eksplik sa ki i’n konpran lo sa topik ki zot pe etidye. E i byen ki nou pa bonbard zot avek en ta kestyon. Plito, avek bon zizman, legzanp apropriye ek bann bon kestyon nou kapab ed zot konpran bann pwen dan Labib ki’n ganny fer resorti dan nou bann piblikasyon ki baze lo Labib.
18. Ki i enplike pour kapab devlop sa “lar pour ansennyen”?
18 Labib i koz lo “lar pour ansennyen.” (2 Timote 4:2, NW; Tit 1:9, NW) Pour kapab annan sa abilite pour ansennyen, nou bezwen fer plis ki zis ed en dimoun gard antet lenformasyon ki korek. Nou bezwen ed li pour vwar ladiferans ant laverite ek mansonz, ant sa ki byen ek mal, ant lasazes ek sotiz. Anmezir ki nou fer sa e ed li pour devlop lanmour pour Zeova dan son leker, petet i kapab vwar akoz i bezwen obeir Zeova.
Fer disip avek devouman
19. Ki mannyer tou Kretyen i kontribye pour fer disip?
19 Kongregasyon in ganny organize pour fer disip. Kan en nouvo i vin en disip, pa zis sa Temwen ki ti zwenn sa dimoun e ki ti ed li ki zwaye, nou tou dan kongregasyon nou annan rezon pour kontan. Meton en group dimoun in zwenn ansanm pour zot al rod en manrmay ki’n perdi, petet zis en dimoun dan sa group ki pou trouv sa zanfan. Me kan sa manrmay i retourn kot son paran, tou dimoun ki ti al donn lanmen rod li i kontan. (Lik 15:6, 7) Pareyman, kongregasyon antye i donn lanmen fer disip. Tou Kretyen i ede pour trouv sa bann ki kapab vin disip Zezi. E kan en nouvo i konmans asiste renyon kot Lasal Rwayonm, nou tou ki prezan nou kontribye pour fer li pli byen apresye vre ladorasyon. (1 Korentyen 14:24, 25) Alors, nou tou nou kapab ere, akoz plizyer santenn milye dimoun i vin disip tou le-z-an.
20. Ki ou devret fer si ou anvi ansenny lezot laverite dan Labib?
20 En kantite Kretyen fidel ti pou kontan pour ansenny en dimoun lo Zeova ek vre ladorasyon. Me malgre tou zefor ki zot fer, petet zot pa’n arive reisi fer li. Si ou enn parmi, kontinyen batir ou lanmour pour Zeova, enterese avek dimoun, annan en leta lespri sakrifis, demontre pasyans e fer zefor pour amelyor ou abilite pour ansennyen. Pli enportan ankor, dan lapriyer koz lo sa dezir ki ou annan pour ansenny lezot laverite. (Eklezyast 11:1) Pa dekouraze, toultan mazinen ki tou sa ki ou fer dan servis Zeova i ede dan sa travay pour fer disip e sa i glorifye Bondye.
Eski ou kapab eksplike?
• Akoz sa travay pour fer disip i demontre ki kantite nou lanmour i ete pour Bondye?
• Ki bann kalite nou bezwen pour kapab fer disip?
• Ki i enplike pour devlop sa “lar pour ansennyen”?
[Kestyon]
[Portre lo paz 20]
Nou demontre nou profon lanmour pour Bondye kan nou fer disip
[Portre lo paz 22]
Akoz bann ki fer disip i bezwen enterese avek dimoun?
[Portre lo paz 23]
Ki serten kalite bann ki fer disip i bezwen annan?
[Portre lo paz 24]
Tou Kretyen i kontan ler zot vwar bon rezilta sa travay pour fer disip