Eski ou en dimoun ki rekonfort lezot?

MONTANNY Ermonn i trouve dan bout sid anfas avek bann ranze montanny Liban. Son lapwent montanny enpresyonan i mont en oter 2,814 met parlao nivo lanmer. I annan lanez lo son latet montanny preski tou dilon lannen, e sa i fer ki bann lavaper tyed ki pas parlao li dan aswar i kondanse e prodwir laroze. Sa laroze i desann lo bann pye sapen ek bann pye fri ki pli ba lo bann lapant e lo bann plantasyon rezen. Dan letan lontan an Izrael pandan bann mwan sezon sek, bann vezetasyon ti ganny mouye prensipalman par sa bann laroze.

Dan en kantik ki ti ganny enspire par Bondye, sa linite parmi bann adorater Bondye i ganny konpare avek “sa laroze ki sorti Ermonn ki pe desann lo montanny Siyon.” (Psonm 133:1, 3) Zis parey Montanny Ermonn i fourni laroze ki rafresi vezetasyon, nou kapab rekonfort bann ki nou zwenn. Ki mannyer nou kapab fer sa?

Legzanp Zezi i donn rekonfor

Zezi Kri ti annan en gran lenfliyans lo lezot. Menm si en dimoun ti rankontre li pour en pti moman letan, i ti kapab rekonfort li en kantite. Par egzanp, Mark en ekriven Levanzil ti dir: “[Zezi] ti pran bann zanfan dan son lebra, enpoz lanmen lo zot e beni zot.” (Mark 10:16) Pa sa ti bezwen rekonfort sa bann zanfan en kantite!

Sa dernyen swar ki i ti pase lo later konman en imen, Zezi ti lav lipye son bann disip. Son limilite ti’n bezwen tous zot leker. Zezi ti dir avek zot: “Mon’n donn zot en legzanp pour ki zot osi, zot a fer parey mon’n fer pour zot.” (Zan 13:1-17) Wi, zot osi zot ti bezwen annan limilite. Bann zapot pa ti arive konpran deswit sa ki Zezi ti pe dir, e plitar sa menm swar zot ti pe dispit konsernan lekel ki pli enportan parmi zot. Me kantmenm sa, sa pa ti agas Zezi. O kontrer, avek pasyans i ti rezonn avek zot. (Lik 22:24-27) Menm “kan zot ti ensilte li, [Zezi] pa ti reponn par lensilt.” Anfet, “dan son soufrans, i pa’n fer okenn menas; me i ti met tou dan lanmen Bondye ki rann lazistis.” I vo lapenn imit legzanp Zezi ki donn rekonfor.—1 Pyer 2:21, 23.

Zezi ti dir: “Pran mon zoug e aksepte mon legzanp akoz mon dou e mon annan limilite dan mon leker e zot a ganny repo.” (Matye 11:29) Zis mazinen, Zezi li menm pe ansenny ou personnelman! Apre ki zot ti tann son lansennyman dan sinagog, bann dimoun dan sa lavil kot i ti’n grandi ti etonnen e ti demande: “Kote i ganny sa lasazes? Ki mannyer i fer sa bann mirak?” (Matye 13:54) Ler nou lir konsernan lavi Zezi ek son minister sa i kapab ansenny nou en kantite lo ki mannyer pour rekonfort lezot. Annou vwar ki mannyer Zezi ti kit en legzanp remarkab par son fason koze pozitif e son leta lespri pour ede.

Reste pozitif dan ou fason koze

I pli fasil pour detri en batiman ki konstri enn nouvo. Sa menm prensip konsernan detri e batir i aplik avek lafason ki nou koze. Konman bann imen enparfe, nou tou nou annan nou defo. Lerwa Salomon ti dir: “Napa okenn zonm zis lo later ki fer touzour sa ki byen e pa fer pese.” (Eklezyast 7:20) I fasil pour vwar defo en lot dimoun e fer li tonbe  par fer bann remark blesan. (Psonm 64:2-4) De lot kote, pour gard nou konversasyon pozitif i demann bokou refleksyon ek zefor.

Zezi ti servi son lalang pour ankouraz dimoun. I ti ofer zot rekonfor spirityel par anons zot sa bon nouvel Rwayonm. (Lik 8:1) Zezi ti ankouraz osi sa bann ki ti vin son disip par koz avek zot lo son Papa. (Matye 11:25-27) I pa etonan ki dimoun ti ganny atire ver Zezi!

Parkont, bann profeser lalwa ek bann Farizyen pa ti pran ka avek bezwen lezot. Zezi ti dir: “Zot kontan premye plas dan lafet e rezerv premye plas dan sinagog.” (Matye 23:6) Anfet, zot ti mepriz bann dimoun ordiner, par dir: “ Sa lafoul pa konn Lalwa Moiz e zot en bann dimoun modi.” (Zan 7:49) Definitivman sa pa ti en latitid ankourazan!

Nou parol i souvan reflekte nou panse ek nou santiman e lafason ki nou vwar lezot. Zezi ti dir: “En zonm bon i tir dibyen dan kof son bon leker, tandis ki en zonm move i tir dimal dan kof son move leker. Labous i koz sa ki debord dan leker.” (Lik 6:45) Alors, ki nou kapab fer, pour fer sir ki nou parol i rekonfort lezot?

Nou kapab fer sa, par pran en pti moman pour reflesir avan nou koze. Proverb 15:28 i dir: “Leker sa enn ki drwat i reflesir pour kapab reponn.” Nou pa bezwen pran en ta letan pour fer en tel refleksyon. Par fer en pti refleksyon davans nou kapab konnen ki lefe nou parol pou annan lo lezot. Nou kapab demann nou lekor: ‘Eski sa ki mon pe al dir i demontre lanmour? Eski i vre, oubyen i zis sa ki mon’n tande? Eski i “en parol dan sa bon moman?” Eski sa pou rekonfort e ankouraz sa bann avek ki mon pou partaz sa lenformasyon?’ (Proverb 15:23) Si nou realize ki sa panse i negatif oubyen i pa apropriye dan sa sirkonstans, fer en gran zefor pour rezet li. Plito, akoz ou pa esey ranplas li par en keksoz pli pozitif e apropriye? Bann parol san reflesir i parey “bann kou lepe” tandis ki bann komanter pozitif i “en gerizon.”—Proverb 12:18.

En lot keksoz ki kapab ede, se pour mazinen kwa ki fer nou bann frer ek ser Kretyen presye dan lizye Bondye. Zezi ti dir: “Personn pa kapab vin kot mwan, si mon Papa ki’n anvoy mwan, pa atir li kot mwan.” (Zan 6:44) Zeova i vwar bann bon kalite dan sak son bann serviter fidel, menm dan bann ki nou kapab santi zot annan en personnalite difisil. Par fer plis zefor pour idantifye zot bann bon kalite, nou pou annan rezon pour koz lot zot dan en fason pozitif.

Ed lezot

Zezi ti byen konpran difikilte bann ki ti pe soufer. Sirman, “son leker ti ranpli avek konpasyon pour lafoul ki i ti war, akoz zot ti fatige e dekouraze parey bann mouton ki napa berze.” (Matye 9:36) Me Zezi ti fer plis ki zis vwar sa sitiasyon ki zot ti ladan fer lapenn; i ti fer en keksoz pour ed zot. I ti ofer zot sa lenvitasyon: “Vin kot mwan zot tou ki fatige e ki pe anmenn en fardo e mwan, mon a donn zot repo.” I ti osi donn zot sa lasirans: “Mon zoug i fasil e mon fardo i leze.”—Matye 11:28, 30.

 Ozordi, nou pe viv dan bann “letan difisil.” (2 Timote 3:1) En kantite dimoun i santi zot anba presyon akoz ‘traka lavi.’ (Matye 13:22) Lezot i fatige akoz sitiasyon personnel ki zot ladan. (1 Tesalonisyen 5:14) Ki mannyer nou kapab rekonfort sa bann ki dan bezwen? Parey Kris, nou kapab ed zot anmenn zot fardo.

Serten dimoun i esey zet zot fardo par koz lo zot problenm. Si bann dimoun ki dekouraze i apros nou pour ganny led, eski nou pran letan pour ekout zot avek latansyon? Nou bezwen annan disiplin lo nou lekor si nou oule konpran santiman en dimoun ler nou pe ekout li. Pour fer sa, nou bezwen reste konsantre lo sa ki sa dimoun pe dir, olye mazinen ki mannyer nou pou reponn oubyen ki mannyer nou pou rezourd sa problenm. Par ekout sa dimoun atantivman, gard en kontak vizyel, e sourir kan i apropriye pour fer li, sa pou montre nou enterese avek li.

I annan en kantite loportinite pour ankouraz lezot konpanyon Kretyen dan kongregasyon. Par egzanp, ler nou asiste bann renyon dan Lasal Rwayonm, nou kapab al ver sa bann ki pe lalit avek problenm lasante. Parfwa sa ki nou bezwen fer pour batir lezot se pran detrwa minit avan oubyen apre renyon pour dir zot bann parol ankourazan. Nou kapab osi remarke lekel ki pa la dan nou Letid Liv. Petet nou kapab telefonn zot e eksprim nou lentere pour konnen ki mannyer zot ete oubyen ofer zot nou led.—Filipyen 2:4.

Bann ansyen dan kongregasyon i annan bokou responsabilite. Nou kapab fer en kantite pour fer zot louvraz vin pli fasil si nou korpere e avek limilite fer okenn travay ki nou kapab ganny demande pour fer. Parol Bondye i ankouraz nou: “Obei zot bann dirizan e swiv zot lord; parski zot pe kontinyelman vey lo zot lam, konman bann dimoun ki bezwen rann kont lo zot size. Les zot fer zot travay dan lazwa, e non pa dan lapenn ki pa pou anmenn okenn lavantaz pour zot.” (Ebre 13:17) Par demontre en leta lespri volonter, nou kapab rekonfort bann “ki diriz byen” kongregasyon.—1 Timote 5:17.

Fer plis konversasyon pozitif ek sa ki byen

Bann laroze ki rafresi i rezilta sa plizyer milye gout delo ki desann dousman, konmsi zot pa sorti okenn par. Pareyman, ler nou rekonfort lezot i pa rezilta zis en bon aksyon, me plito i en akimilasyon bann kalite Kretyen ki nou toultan pe demontre.

Zapot Pol ti ekrir: “Annan en gran lafeksyon pour kanmarad parey bann frer, e setaki montre plis respe pour kanmarad.” (Romen 12:10) Annou aplik sa konsey ki Pol in donnen. Par nou parol ek aksyon fotespere ki nou vreman rekonfort lezot.

[Portre lo paz 31]

En dimoun ki esey konpran santiman lezot ler i ekoute, i en dimoun ki rekonfort lezot

[Portre lo paz 32]

Laroze sorti lo Montanny Ermonn i sa mwayen prensipal ki aroz vezetasyon