Eski Zot Pare Pour Zour Zeova?
Eski Zot Pare Pour Zour Zeova?
“Gran zour Zeova i pros. I pros, e i pe vin byen vit.” —TSEFANYA 1:14.
1-3. (a) Ki Labib i dir konsernan zour Zeova? (b) Ki sa “zour Zeova” ki nou pou eksperyanse byento?
GRAN zour Zeova pa pou dir 24 erdtan, me i en gran peryod letan kot Bondye pou egzekit son zizman lo bann mesan. Bann ki pa servi Bondye i annan rezon pour per sa zour fernwanr, sa zour firer, sa zour lakoler brilan, sa zour ladetres ek dezolasyon. (Izai 13:9; Amos 5:18-20; Tsefanya 1:15) Profesi Yoel ti dir: “Ar wi sa zour, parski zour Zeova i pros, i pou vini parey en ravaz sorti kot sa Enn Tou Pwisan!” (Yoel 1:15) Me sa zour, Zeova pou delivre bann ki “annan leker drwat.”—Psonm 7:10.
2 Sa lekspresyon “zour Zeova” i refer avek legzekisyon zizman Bondye dan diferan lepok. Par egzanp bann zabitan Zerizalenm ti eksperyans en “zour Zeova” ler Zeova ti servi bann Babilonnyen pour egzekit son zizman lo zot an 607 A.N.L. (Tsefanya 1:4-7) Pareyman, an 70 N.L. Zeova ti servi bann Romen pour egzekit son zizman lo sa nasyon Zwif ki ti rezet Son garson. (Danyel 9:24-27; Zan 19:15) Labib i osi predir en “zour Zeova” kan i pou ‘fer lager kont tou bann nasyon.’ (Zekarya 14:1-3) Anba lenspirasyon, zapot Pol ti relye sa zour avek prezans Kris, ki ti konmanse an 1914 ler Zezi ti ganny kouronnen Lerwa dan lesyel. (2 Tesalonisyen 2:1, 2) Lefet ki nou annan levidans ki zour Zeova pe aprose byen vit, sa teks pour lannen 2007 pour bann Temwen Zeova i vreman apropriye. Sa teks in ganny tire dan Tsefanya 1:14, i dir: “Gran zour Zeova i pros.”
3 Vi ki sa gran zour Zeova i pros, la i le moman pour met ou pare. Ki mannyer ou kapab prepar ou pour sa zour? Ki lezot pa ou bezwen fer pour met ou pare pour zour Zeova?
Met ou pare
4. Pour ki gran leprev Zezi ti prepar li?
4 Dan sa profesi konsernan lafen sa sistenm, Zezi Kri ti dir avek son bann disip: “Met zot pare.” (Matye 24:44) Ler Zezi ti dir sa parol, li menm li i ti’n pare pour sa gran leprev, setadir donn son lavi konman en sakrifis. (Matye 20:28) Ki nou kapab aprann atraver lafason ki Zezi ti prepar li?
5, 6. (a) Ki mannyer lanmour pour Bondye e pour bann dimoun i ed nou pour pare pour zour Zeova? (b) Ki legzanp Zezi in kite an sa ki konsern lanmour pour nou prosen?
5 Zezi ti kontan Zeova ek Son bann standar drwat avek tou son leker. Konsernan Zezi, Ebre 1:9 i dir: “Ou kontan lazistis, e ou ay mesanste. Pour sa rezon, o mon Bondye, Bondye in konsakre ou avek en delwil lazwa, e in fer ou en pli gran loner ki ou bann koleg.” Akoz i ti kontan son Papa dan lesyel, Zezi ti reste fidel avek li. Si nou demontre menm lanmour pour Bondye e viv an armoni avek son bann lalwa drwat, i pou protez nou. (Psonm 31:23) En tel lanmour ek lobeisans pou ed nou pare pour sa gran zour Zeova.
6 Lanmour ki Zezi ti annan pour bann dimoun ti en laspe remarkab dan son personnalite. San dout, i “ti ranpli avek konpasyon pour lafoul ki i ti war, akoz zot ti fatige e dekouraze parey bann mouton ki napa berze.” (Matye 9:36) Alors, sa ti pous Zezi pour pres sa bon nouvel avek sa bann dimoun, zis parey lanmour i motiv nou pour pres sa mesaz Rwayonm avek nou prosen. Lanmour pour Bondye ek nou prosen i fer nou reste konman bann Kretyen aktif e sa i ed nou pour prepar nou pour sa gran zour Zeova.—Matye 22:37-39.
7. Anmezir ki nou pe esper sa gran zour Zeova, akoz nou kapab annan lazwa?
7 Zezi ti pran plezir pour fer lavolonte Zeova. (Psonm 40:8) Si nou annan sa menm latitid, nou pou trouv lazwa pour donn Bondye en servis sakre. Nou pou demontre menm zenerozite ki Zezi, e sa pou fer nou vreman ere. (Akt 20:35) Vreman, “lazwa Zeova i [nou] latour for.” Avek sa kalite lazwa, nou pou pli byen prepare pour sa gran zour Bondye.—Neemya 8:10.
8. Akoz nou devret vin pli pros avek Zeova dan lapriyer?
8 Lapriyer ki Zezi ti fer avek tou son leker ti ed li prepar li pour bann leprev ki ti pou teste son lafwa. I ti pe priye ler Zan ti batiz li. Zezi ti priy en lannwit antye avan i ti swazir son bann zapot. (Lik 6:12-16) E lekel sa dimoun ki lir Labib ki pa santi li touse par sa lapriyer ki Zezi ti fer sa dernyen swar son legzistans konman en imen lo later? (Mark 14:32-42; Zan 17:1-26) Eski ou en dimoun ki priy regilyerman parey Zezi ti fer? Apros Zeova regilyerman, pran letan pour priye, rod gidans son lespri sen, e pa tarde pour aplik son gidans kan i’n vin kler pour ou. En bon relasyon avek nou Papa dan lesyel i endispansab dan sa letan difisil kot gran zour Bondye pe aprose byen vit. Alors, annou fer tou sa ki nou kapab pour vin pli pros avek Zeova dan lapriyer.—Zak 4:8.
9. Ki kantite enportan i enportan pour glorifye non Zeova?
9 Lefet ki Zezi ti osi enterese ki non sen Zeova i ganny glorifye sa ti ed li pour prepar li pour bann leprev ki i ti fer fas avek. Anfet, i ti ansenny son bann disip ki zot lapriyer anver Bondye i devret enkli sa demann: “Ki ou non sen i ganny glorifye.” (Matye 6:9) Si nou vreman anvi ki non Zeova i ganny glorifye, oubyen ganny konsidere sakre, nou pou fer zefor pour evite fer okenn keksoz ki pou sali son non. Sa pou fer nou pli byen prepare pour sa gran zour Zeova.
Eski ou devret fer serten sanzman?
10. Akoz i apropriye pour egzamin nou lavi?
10 Si zour Zeova i vini demen, eski ou pou vreman pare pour li? Sakenn parmi nou i devret egzamin son lavi e vwar si i annan okenn aksyon oubyen latitid kot nou merit fer sanzman. Vi ki lavi imen i kourt e pa stab, sakenn parmi nou i bezwen toultan reste vizilan lo plan spirityel. (Eklezyast 9:11, 12; Zak 4:13-15) Alors annou egzamin serten fakter ki petet nou bezwen reflesir lo la dan nou lavi.
11. Ki lobzektif ou’n fikse konsernan ou lektir Labib?
11 En fakter enportan i sa lankourazman sorti kot sa ‘lesklav fidel’ pour lir Labib sak zour. (Matye 24:45) Ou kapab fikse sa lobzektif pour lir Labib enn fwa par an depi Zenez ziska Revelasyon e an menm tan pran letan pour reflesir lo sa ki ou lir. Par lir apepre kat sapit par zour, ou kapab lir sa 1,189 sapit Labib dan enn an. Sak lerwa Izrael ti lir Lalwa Zeova “toulezour dan son lavi.” I kler ki Zozye ti fer parey. (Deterononm 17:14-20; Zozye 1:7, 8) Pa i vreman enportan pour bann berze spirityel lir Parol Bondye sak zour, vi ki sa pou ed zot ansenny sa ki “an armoni avek vre doktrin”!—Tit 2:1.
12. Lefet ki zour Zeova i pros ki sa i devret pous ou pour fer?
12 Lefet ki gran zour Zeova i pros sa i devret pous nou pour asiste bann renyon Kretyen regilyerman e partisip otan ki nou kapab pandan ki zot pe deroule. (Ebre 10:24, 25) An fezan sa ou pou amelyor ou servis konman en proklanmater ki pe rod e osi ed bann ki annan sa bon kondisyon leker pour lavi eternel. (Akt 13:48) Petet ou kapab fer plis dan kongregasyon dan lezot fason osi, par egzanp ed bann ki a laz e ankouraz bann zenn. Ou pou vreman ere si ou fer sa bann zefor!
Ou relasyon avek lezot
13. Ki kestyon nou kapab demann nou lekor konsernan met sa nouvo personnalite?
13 Vi ki zour Zeova pe aprose a gran pa, eski ou bezwen fer en pli gran zefor pour “sanze e vin en dimoun konpletman nouvo, kree dan resanblans Bondye e ki dimoun i war ki zot viv dan en fason zis e sen dapre laverite”? (Efezyen 4:20-24) Anmezir ki ou devlop bann bon kalite Kretyen, lezot pou remarke ki ou pe ‘les Lespri Bondye diriz ou lavi’ e ki ou demontre son bann fri dan ou lavi. (Galat 5:16, 22-25) Eski ou kapab mansyonn bann sanzman spesifik pour montre ki ou ek ou fanmir in fer pour vin en dimoun konpletman nouvo? (Kolosyen 3:9, 10) Par egzanp, eski lezot i konn ou konman en dimoun ki rann bann bon servis ou bann frer ek ser dan lafwa enkli lezot dimoun? (Galat 6:10) En letid Labib regilye pou ed ou devlop bann bon kalite Kretyen ki pou prepar ou pour zour Zeova.
14. Akoz en dimoun i devret priye pour ganny lespri sen anmezir ki i fer zefor pour devlop kontrol lo son lekor?
14 Be eski ou en dimoun ki ankoler vitman e ki ou realize ou bezwen plis kontrol lo ou lekor? Sa kalite i enn parmi bann fri ki lespri sen Bondye i kapab prodwir dan ou. Alors, priye pour ganny lespri sen parey Zezi ti dir: “Kontinyen demande e zot a gannyen; kontinyen rode e zot a trouve; kontinyen frape e laport i a ouver. . . . Si, zot, move konman zot ete, zot kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li?”—Lik 11:9-13, NW.
15. Ki ou devret fer si i annan en dezakor ant ou ek en ou konpanyon Kretyen?
15 Admeton ki i annan en dezakor ant ou ek enn ou konpanyon Kretyen. Dan sa ka, fer tou sa ki ou kapab pour regle sa problenm ant zot de, afen ki lape ek linite i rennyen dan kongregasyon. (Psonm 133:1-3) Aplik sa konsey Zezi ki trouve dan Matye 5:23, 24 oubyen Matye 18:15-17. Si ou’n les ou lakoler dire ziska aswar, deswit esey aranz sa sitiasyon. Souvandfwa sa ki zis neseser, se ki nou annan sa lanvi pour pardonnen. Pol ti ekrir: “Vin bon, ranpli avek lafeksyon pour kanmarad; e pardonn kanmarad, parey Bondye in pardonn zot dan Kris.”—Efezyen 4:25, 26, 32.
16. Dan ki fason konpasyon i neseser dan maryaz?
16 Dan en relasyon maryaz tou le de msye ek madanm i bezwen demontre konpasyon e defwa menm pare pour pardonnen. Si dan ou ka ou bezwen demontre plis lanmour ek konpasyon anver ou konzwen, fer sa zefor pour arive atenn sa lobzektif avek led Bondye ek son Parol. Eski i annan en keksoz ki ou bezwen devlope pour viv annakor avek sa ki ganny dir dan 1 Korentyen 7:1-5 pour diminyen presyon e evite vin enfidel? Sirman sa i en domenn dan lavi kot en msye ek en madanm marye i bezwen “ranpli avek konpasyon.”
17. Ki bann pa en dimoun i bezwen pran si i’n komet en pese grav?
17 Me si ou’n komet en fot grav? Pran bann pa neseser pour aranz sa sitiasyon oplivit posib. Fer tou sa ki ou kapab, rod lasistans bann ansyen. Zot lapriyer ek konsey pou ed ou reganny ou lasante spirityel. (Zak 5:13-16) Dan ou lapriyer montre Zeova ki ou’n repantir. Si ou pa fer sa ou pou santi ou koupab e ou pou annan en konsyans sarze. David ti fer sa leksperyans, me i ti santi li soulaze apre ki i ti’n konfes son pese avek Zeova! David ti ekrir: “Ere sa enn ki’n ganny pardonnen pour son rebelyon, sa enn ki son pese in ganny kouver. Ere sa zonm ki Zeova pa pran an kont son fot, e sa enn ki pa tronp lezot.” (Psonm 32:1-5) Zeova i pardonn bann ki fer pese me ki senserman repantir.—Psonm 103:8-14; Proverb 28:13.
Pa fer parti sa lemonn
18. Ki mannyer ou devret konsider sa lemonn?
18 San okenn dout ou enpasyan pour vwar sa nouvo lemonn merveye ki nou Papa dan lesyel in promet nou. Me alor ki mannyer ou konsider sa lemonn enzis ki elwannyen avek Bondye? Satan, sa enn ki “sef lemonn” ti napa okenn pouvwar lo Zezi kri. (Zan 12:31; 14:30) Sirman ou pa oule ki Dyab ek son lemonn annan pouvwar lo ou, alor pran aker sa bann parol zapot Zan: “Pa bezwen kontan lemonn ni sa bann keksoz ki dan lemonn.” Sa i sa pli bon desizyon akoz sa “lemonn pou disparet ek tou son bann dezir; me sa ki fer lavolonte Bondye i reste eternelman.”—1 Zan 2:15-17.
19. Ki kalite lobzektif bann zenn Kretyen i ganny ankouraze pour annan?
19 Eski ou pe ed ou bann zanfan pour “pa les zot ganny sali par move lenfliyans sa monn”? (Zak 1:27) Satan ti a kontan tyonbo ou bann zanfan parey en zonm ki pe lapes i fer pour is pwason ver li enn fwa ki i’n atrap li. Bann diferan lasosyasyon ek lezot lorganizasyon in ganny formen pour fer bann zenn adapte zot dan sa lemonn Satan. Me bann serviter Zeova i deza manm sa sel lorganizasyon ki pou sirviv destriksyon sa move lemonn. Alors bann zenn Kretyen i devret ganny ankouraze pour annan “plis lentere dan travay Senyer.” (1 Korentyen 15:58) Bann paran Kretyen i bezwen ed zot zanfan pour fikse bann lobzektif ki pou fer zot annan en lavi ere e satisfezan ki onor Bondye e ki ed zot pour met zot pare pour zour Zeova.
Vwar pli lwen ki sa gran zour Zeova
20. Akoz nou devret gard antet lavi eternel?
20 Ou pou kapab esper zour Zeova anpe si ou gard antet lavi eternel. (Zid 20, 21) Si ou enpasyan pour viv pour touzour dan Paradi, alors ou annan sa lespwar pour reganny ou lafors lazenes e annan tou ou letan pour pourswiv ou bann lobzektif e aprann plis konsernan Zeova. Anfet ou pou kapab kontinyen aprann konsernan Zeova pour touzour akoz ozordi imen i konn zis “bordir sa ki i fer.” (Zob 26:14) Pa i eksitan pour konn sa bann promes!
21, 22. Ki lenformasyon ou ek bann ki pou resisite pou kapab partaze ant zot?
21 Dan Paradi, bann ki pou ganny resisite pou kapab fourni nou avek lenformasyon ki nou pa okouran ditou konsernan lepase. Enok pou la pour eksplike ki mannyer i ti ganny kouraz neseser pour anons mesaz Zeova avek bann dimoun enzis. (Zid 14, 15) Noe pou sertennman rakonte ki mannyer konstriksyon lars ti deroule. Abraam ek Sara pou kapab rakonte ki mannyer zot ti santi ler zot ti abandonn zot lavi konfortab Our pour al viv dan bann latant. Mazin ler Ester pou donn bann detay lo lafason ki i ti defann zentere son pep e fer ki plan Amann kont zot i tonm dan delo. (Ester 7:1-6) Mazin osi Yona kot pe rakont konsernan sa trwa zour ki i ti pase dan vant sa gro pwason oubyen Zan Batis pe dekrir son santiman ler i ti batiz Zezi. (Lik 3:21, 22; 7:28) Pa nou annan en kantite keksoz enteresan pour aprann!
22 Pandan sa mil an ki Kris pou dirize, ou pou kapab annan sa privilez pour ed bann ki pou resisite pour ganny “konnesans Bondye.” (Proverb 2:1-6) Pa i en plezir ozordi pour vwar dimoun ganny konnesans lo Zeova e pratik sa ki zot in aprann! Me mazin sa lazwa ki ou pou gannyen byento kan Zeova pou beni ou zefor pour ansenny bann dimoun ki ti viv en kantite letan pase e ki pou aksepte sa lansennyman avek en leker rekonesan!
23. Ki nou devret determinen pour fer?
23 Bann benefis ki nou resevwar ozordi konman pep Zeova i tro bokou pour nou bann imen enparfe kapab rakonte. (Psonm 40:5) Sirtou, nou rekonesan pour bann provizyon spiritiyel ki Bondye i donnen. (Izai 48:17, 18) Nenport sirkonstans ki nou ladan, annou ofer en servis sakre avek tou nou leker anmezir ki nou esper sa gran zour Zeova.
Ki ou pou reponn?
• Ki si sa “sa zour Zeova”?
• Ki mannyer ou kapab montre ou pare pour zour Zeova?
• Vi ki sa gran zour Bondye i pros, ki sanzman petet nou pou bezwen fer?
• Kwa ki ou ti a kontan fer kan zour Zeova pou’n terminen?
[Kestyon]
[Portre lo paz 14]
Zezi ti’n pare pour bann gran leprev
[Portre lo paz 17]
Pa i pou en privilez pou ed bann ki pou resisite ganny konnesans lo Zeova!