Kestyon lekter

Ki mannyer en Kretyen i devret konsider lasas ek lapes?

Labib pa defann lasas oubyen lapes. (Deterononm 14:4, 5, 9, 20; Matye 17:27; Zan 21:6) Kantmenm sa, bann Kretyen ki fer lasas oubyen lapes i bezwen reflesir lo plizyer prensip Labib.

Zeova ti permet Noe ek son desandans pour touy e manz zannimo a kondisyon ki zot ti fer sennyen sa bann zannimo avan manz zot. (Zenez 9:3, 4) Sa komannman ti met lanfaz lo respe pour lavi zannimo lefet ki zot ti’n ganny kree par Bondye. Alors, bann Kretyen pa touy zannimo zis pour sport oubyen akoz i gou. Zot pa pou osi touy zannimo san pitye e san demontre respe pour lavi.—Proverb 12:10.

I annan osi en lot laspe ki enplik nou latitid. Bann zapot ki ti peser ti san dout satisfe ler zot ti atrap en bon pe pwason. Pourtan, napa okenn lendikasyon ki montre ki zot ti vantar akoz zot skil dan lapes oubyen lasas. Oubyen ki zot ti al lapes oubyen lasas pour fer konpetisyon avek lezot, pour montre ki zot bann vre zonm oubyen zis akoz i eksitan pour tay deryer, atrap, oubyen touy zannimo.—Psonm 11:5; Galat 5:26.

Alors, nou kapab demann nou lekor: ‘Eski mon en legzanp an sa ki konsern demontre respe pour pwennvi Zeova lo lavi? Eski tou lazournen mon mazin oubyen koz zis lo lasas ouswa lapes? Eski mon fason viv i montre ki mon pran plezir dan leksitasyon pour sas, atrap e touy zannimo oubyen pwason, oubyen eski i montre ki mon en minis Bondye? Eski lasas oubyen lapes i fer mwan asosye plis avek bann non krwayan oubyen fer mwan negliz mon fanmir?’—Lik 6:45.

Serten ki al lasas oubyen ki lapes pour manze i kapab zistifye zot lekor ler zot met bann aktivite spirityel dekote pandan bann sezon lasas ek lapes. Me nou montre ki nou annan lafwa ek konfyans dan Bondye ler nou pa les nanryen pran plas son bann lentere. (Matye 6:33) Deplis, bann Kretyen i obeir lalwa “Sezar” konsernan lasas ek lapes, ki swa lotorite i met zot an fors oubyen non.—Matye 22:21; Romen 13:1.

Pour kapab annan menm pwennvi avek Zeova lo lasas ek lapes, serten pou bezwen aziste zot fason panse an rapor avek son standar. (Efezyen 4:22-24) Parkont, nou bezwen respe desizyon ki lezot in pran avek bokou latansyon. Zapot Pol ti donn en konsey apropriye konsernan sa: “Annou arete ziz nou prosen; plito deside pour nou pa met devan nou frer nanryen ki pou skandaliz li ou fer li tonm dan pese.” (Romen 14:13) Ler nou demontre en tel lanmour ki pa egois ek respe, sa i promouvwar lape dan kongregasyon e i fer plezir nou Kreater, ki Sours tou lavi.—1 Korentyen 8:13. *

[Not anba lo paz]