“Tenir Ferm E Vwar Delivrans Zeova”

“Zeova i avek mwan; mon pa pou per. Ki imen i kapab fer mwan?” —PSONM 118:6.

1. Ki bann levennman enportan imen pou fer fas avek byento?

BANN imen ozordi pou byento fer fas avek bann levennman ki zanmen zot in eksperyanse oparavan. Zezi ti pe predir konsernan nou letan, ler i ti averti son bann disip ki i pou annan: “En [“gran ladetres,” NW] pli terib ki tou sa ki’n deza annan avan, depi konmansman lemonn ziska konmela, e pa pou zanmen ariv ankor. Me si sa bann zour pa ti’n diminyen personn pa ti pou sove. Me sa bann zour in ganny diminyen akoz son pep ki in swazir.”—Matye 24:21, 22.

2. Kwa ki pe anpes sa gran ladetres konmanse?

² Menm si bann lanz i envizib pour bann imen, konmela menm zot pe anpes sa gran ladetres konmanse. Zapot Zan ti annan sa privilez pour konn rezon akoz sa bann lanz pe anpes sa gran ladetres konmanse, par en revelasyon ki Zezi ti donn avek li. La sa ki zapot Zan dan son vye zour ti dekrir: “Mon ti war kat lanz pe debout dan kat kwen later; zot ti pe tenir sa kat divan, pour ki okenn divan pa soufle lo later . . . Answit, mon ti war en lot lanz monte sorti kote soley leve avek sele Bondye vivan, e i ti kriy avek en lavwa for avek sa kat lanz . . . ‘Pa fer dimal later, lanmer ou okenn pye dibwa ziska ki nou ava’n fini mark avek sele fron bann serviter Bondye.’”—Revelasyon 7:1-3.

3. Ki sa premye keksoz ki pou arive zour sa gran ladetres?

³ I pa reste bokou letan pour bann Kretyen swazir ganny sele dan en fason permanan. Sa kat lanz in pare pour larg sa bann divan destriksyon. Kan zot pou fer li, ki sa premye keksoz ki pou arive? En lanz ti reponn sa kestyon: “Sa gran lavil Babilonn pou ganny zete avek vyolans, e personn pa pou trouv li ankor.” (Revelasyon 18:21) Kan sa bann fo larelizyon pou ganny detrir, i pou vreman annan en gran lazwa dan lesyel!—Revelasyon 19:1, 2.

4. Ki bann levennman ki pou arive dan lavenir?

⁴ Tou bann nasyon lo later pou zwenn ansanm kont pep Zeova. Eski sa bann nasyon pou reisi elimin sa bann Kretyen fidel? I kapab paret ki sa pou leka. Me gete! Bann larme lesyel swivi par Kris Zezi pou fer sir ki sa bann larme imen i ganny detrir. (Revelasyon 19:19-21) Finalman, Dyab ek son bann lanz pou ganny zete dan labim, kot zot pou inaktif. Zot pou nepli kapab tant bann dimoun akoz zot pou ganny ansennen pour mil an. Pa sa pou anmenn en soulazman pour sa gran lafoul ki pou sirviv!—Revelasyon 7:9, 10, 14; 20:1-3.

5. Ki lazwa bann ki reste fidel avek Zeova pou gannyen byento?

⁵ Byento nou pou eksperyans sa bann levennman merveye e enpresyonan. Tou sa bann levennman i annan pour fer avek defann drwa Zeova pour dirize, son souvrennte iniversel. E zis mazin sa: Si nou reste fidel avek Zeova e si nou reste determinen pour siport son souvrennte, nou pou annan sa loportinite pour partisip dan sangtifikasyon son non ek lakonplisman  son plan. Pa nou pou annan en sitan gran lazwa!

6. Vi ki pou annan sa bann levennman ki pou arive byento, ki nou pou egzaminen?

⁶ Eski nou’n prepare pour sa bann levennman enportan? Eski nou annan lafwa dan pouvwar ki Zeova i annan pour delivre? Eski nou annan konfyans ki i pou ed nou dan sa bon moman e dan sa pli bon fason? Anmezir ki nou reponn sa bann kestyon personnel, nou kapab gard antet sa ki zapot Pol ti dir avek bann Kretyen Ronm: “Tou sa ki’n ganny ekrir dan lepase in ganny ekrir pour nou lansennyman, pour ki par pasyans ek konsolasyon ki Lekritir i donnen nou posed lesperans.” (Romen 15:4) Parmi bann keksoz ki’n ganny ekrir pour nou lenstriksyon, ki donn nou rekonfor ek lespwar, i sa resi ki rakont sa letan kot Zeova ti delivre bann Izraelit dan lanmen bann Ezipsyen ki ti pe maltret zot. Par egzamin o profon sa bann levennman eksitan, ki mannyer Zeova ti fer pour delivre bann Izraelit i devret ankouraz nou en kantite anmezir ki nou esper sa gran ladetres ki pe aprose byen vit.

Zeova i sov son pep

7. An 1513 A.N.L., ki sitiasyon enkyetan ti devlope Lezip?

⁷ Ti dan lannen 1513 A.N.L. Zeova ti’n fini anvoy sa nef fleo lo bann Ezipsyen. Apre sa nevyenm fleo, Faraon ti demann Moiz pour sorti devan li, i ti dir li: “Sorti la devan mwan! Fer mannyer pa esey rod pour revwar mon figir ankor, akoz zour ou pou vwar mon figir, ou pou mor.” Moiz ti reponn: “Parey ou’n koze. Mon pa pou esey rode pour revwar ou figir ankor.”—Egzod 10:28, 29.

8. Pour sirviv, ki bann lenstriksyon bann Izraelit ti gannyen e ki rezilta sa ti anmennen?

⁸ Aprezan Zeova i revel avek Moiz ki i ti pou annan en lot fleo ki ti pou frap Faraon ek tou bann Ezipsyen, enn dernyen. Le 14 Abib (Nizan), premye ne tou Ezipsyen ek tou zannimo ti pou mor. Me bann fanmir Izraelit ti kapab ganny eparnyen par swiv bann lenstriksyon Bondye ki ti ganny donnen avek Moiz. Zot ti bezwen pas en pe disan en mal mouton lo lankadreman laport, lo sa de kote ek son bout anler e reste anndan. Ki ti arive sa zour swar? Les Moiz li menm rakont nou: “Ler minwi ti sonnen Zeova ti touy tou premye ne dan Lezip.” Deswit Faraon ti reazir. I ti apel Moiz ek Aaron kot li e i ti dir avek zot: “Leve, sorti parmi mon pep, . . . e ale, al servi Zeova zis parey zot in dir.” Deswit bann Izraelit ti ale, i kapab ki i ti annan plis ki trwa milyon zot an tou, enkli “en gran lafoul dimoun tou sort” ki pa ti bann Izraelit.—Egzod 12:1-7, 29, 31, 37, 38.

9. Par ki semen Bondye ti gid pep Izrael pour sorti Lezip e akoz?

 ⁹ Sa semen pli pros pour bann Izraelit pran ti pas tou dilon Lanmer Lamediterane atraver pei bann Filisten. Me sa ti teritwar lennmi. Alors, petet pour evite ki son pep ti angaz zot dan lager, Zeova ti gid zot par sa semen dezer ki sitye dan rezyon Lanmer Rouz. Menm si ti annan plizyer milyon dimoun ki ti pe deplase, sa lafoul ti pe mars dan en fason annord. Labib i dir: “Bann garson Izrael ti sorti Lezip dan en fason annord parey larme.”—Egzod 13:17, 18.

“Vwar delivrans Zeova”

10. Akoz Bondye ti demann avek bann Izraelit pour kanpe devan Piairot?

¹⁰ Apre, sitiasyon ti sanze dan en fason etonan. Zeova ti dir avek Moiz: “Dir avek bann garson Izrael, ki zot devret retournen e zot devret kanpe devan Piairot, ant Migdol ek lanmer, vizavi Baal-Tsefonn.” Par obeir sa bann lenstriksyon, sa gran lafoul ti vwar zot pri ant bann montanny ek en bradmer Lanmer Rouz. I paret ki ti napa okenn semen sorti. Me, Zeova ti konnen sa ki i ti pe fer. I ti dir avek Moiz: “Mon pou les leker Faraon vin dir, e i pou sirman tay deryer zot e mon pou ganny laglwar pour mwan menm atraver Faraon ek tou son lafors militer; e bann Ezipsyen pou sirman konnen ki mwan mon Zeova.”—Egzod 14:1-4.

11. (a) Ki Faraon ti fer e ki mannyer bann Izraelit ti reakte? (b) Ki mannyer Moiz ti reazir vizavi konplent bann Izraelit?

¹¹ Faraon ti regrete ki i ti’n les bann Izraelit kit Lezip. Alor i ti konmans swiv zot avek 600 sa bann meyer saret lager. Ler bann Izraelit ti vwar bann Ezipsyen, zot ti vreman per. Zot ti kriy Moiz: “Eski i akoz napa latonm Lezip ki ou’n anmenn nou isi pour mor dan sa dezer?” Moiz ti annan konfyans ki Zeova ti pou delivre zot, i ti reponn: “Pa bezwen per. Tenir ferm e vwar delivrans Zeova, ki i pou realize pour zot ozordi. . . . Zeova li menm pou lager pour zot, e zot, zot pou reste trankil.”—Egzod 14:5-14.

12. Ki mannyer Zeova ti sov son pep?

¹² Parol ki Moiz ti dir konsernan lefet ki Zeova li menm ti pou lager pour bann Izraelit ti vre. Par mwayen son lafors ekstraordiner Zeova ti entervenir. Par en mirak lanz Zeova ti bouz sa kolonn nyaz ki ti pe diriz bann Izraelit deryer zot. Sa kolonn nyaz ti fer vin fernwanr lo kote bann Ezipsyen, tandis ki lo kote bann Izraelit ti annan lalimyer. (Egzod 13:21, 22;14:19, 20) Par obeir konmann Bondye, Moiz ti fil son lanmen. Sa resi i kontinyen: “Zeova ti fer sa lanmer kil an aryer par en gro divan sorti dan les tou dilon lannwit . . . Finalman bann garson Izrael ti al o milye sa lanmer lo later sek, tandis ki sa delo ti vin en miray pour zot lo zot kote drwat e lo zot kote gos.” Bann Ezipsyen ti rekonmans swiv bann Izraelit, me Zeova ti lo kote son pep. I ti fer bann Ezipsyen konfize e apre i ti dir avek Moiz: “Avans ou lanmen parlao lanmer, pour ki delo i kouver bann Ezipsyen, zot bann saret lager ek zot kavalye.” Larme Faraon ti ganny detrir konpletman napa en solda ki ti reste vivan!—Egzod 14:21-28; Psonm 136:15.

Tir leson atraver delivrans Izrael

13. Ki mannyer bann Izraelit ti reakte ler zot ti ganny delivre?

¹³ Ki lefe sa delivrans mirakile ti annan lo bann sirvivan? San tarde Moiz ek bann  Izraelit ti konmans sante pour loue Zeova! Zot ti sante: “Les mwan sant pour Zeova, parski i’n ranport en laviktwar glorye. . . . Zeova pou renny konman lerwa pour en letan endefini, wi pour touzour.” (Egzod 15:1, 18) Wi, premye lide ki zot ti annan ti pour loue Bondye. Dan sa sitiasyon, Zeova ti demontre son souvrennte.

14. (a) Ki nou kapab aprann konsernan Zeova atraver leksperyans Izrael? (b) Ki nou teks pour lannen 2008?

¹⁴ Ki lenstriksyon, rekonfor, ek lespwar nou gannyen atraver sa bann levennman eksitan? Sirman nou kapab vwar ki Zeova i kapab pran ka avek okenn leprev ki son pep i pas atraver. I kapab rezourd okenn sitiasyon ki zot fer fas avek. Lanmer Rouz pa ti kapab vin en lobstak pour Izrael kan Zeova ti fer sa gro divan les soufle. I ti kapab fer Lanmer Rouz vin en latonm pour larme Faraon. Ler nou reflesir lo sa bann levennman, nou kapab repet bann parol ki sa psalmis ti dir: “Zeova i avek mwan; mon pa pou per. Ki imen i kapab fer mwan?” (Psonm 118:6) Nou kapab osi trouv rekonfor dan bann parol ki Pol ti dir dan Romen 8:31: “Si Bondye i pour nou, lekel ki pou kapab kont nou?” Pa sa bann parol enspire i donn nou bokou konfyans! Zot diminyen okenn lafreyer oubyen dout ki nou kapab annan e donn nou bokou lespwar. Alors pa nou teks pour lannen 2008 i apropriye: “Tenir ferm e vwar delivrans Zeova”!—Egzod 14:13.

15. Ki degre enportan lobeisans ti enportan pour delivrans bann Izraelit Lezip e ki kantite enportan i enportan ozordi?

¹⁵ Ki nou kapab aprann ankor avek legzanp bann Izraelit ki ti sorti Lezip? Nou bezwen obeir Zeova dan nenport keksoz ki i demann nou pour fer. Bann Izraelit ti obeisan ler zot ti swiv bann detay ki zot ti gannyen pour prepar Lapak. Zot ti reste dan zot lakaz sa zour swar le 14 Nizan. Finalman, kan zot ti kit Lezip, zot ti bezwen fer li “dan en fason annord parey larme.” (Egzod 13:18) Ozordi, i vreman enportan pour swiv gidans ki nou gannyen sorti kot “lesklav fidel e pridan”! (Matye 24:45, NW) Nou bezwen ekout byen atantivman parol Bondye deryer nou, ki dir: “‘La sa semen. Mars lo la,’ si fodre al a drwat oubyen si fodre al a gos.” (Izai 30:21) Anmezir nou apros sa gran ladetres, i byen posib ki nou resevwar bann lenstriksyon detaye. Nou vwayaz atraver sa lemonn trouble pou depan lo si nou kontinyen mars menm pa avek lezot serviter fidel Zeova.

16. Ki nou kapab aprann atraver fason ki Bondye ti diriz bann levennman pour delivre bann Izraelit?

 ¹⁶ Pa bliye osi, ki Zeova ti met bann Izraelit dan en sitiasyon kot i ti paret ki zot ti’n pri ant bann montanny e lo lot kote ti annan Lanmer Rouz. I paret ki sa pa ti en bon demars. Me Zeova ti met tou keksoz anba kontrol e tou keksoz ti reisi pour ki laglwar i vin pour li e pour son pep ganny sove. Ozordi, i kapab ki nou pa vwar klerman akoz serten kestyon konsernan lorganizasyon i ganny trete dan en serten fason, me nou annan tou rezon pour met nou konfyans dan gidans Zeova atraver mwayen ki i servi pour kominik avek nou. I annan de fwa, i paret ki nou lennmi pe fer sikse. Vi ki nou vizyon i limite, nou pa kapab vwar tou bann fakter ki enplike. Kantmenm sa, Zeova i kapab diriz bann levennman dan sa bon moman, zis parey i ti fer dan letan bann Izraelit.—Proverb 3:5.

Annan konfyans dan Zeova

17. Akoz nou kapab annan konfyans total dan gidans Zeova?

¹⁷ Eski ou kapab mazin sa konfyans ki bann Izraelit ti bezwen annan kan zot ti reflesir lo sa kolonn nyaz lizour e sa kolonn dife aswar? I ti evidan ki “lanz sa vre Bondye” ti pe gid zot pandan zot vwayaz. (Egzod 13:21, 22; 14:19) Ozordi, nou kapab annan konfyans ki Zeova i avek son pep pour gid, protez e delivre zot. Nou kapab pran aker sa promes: “[Zeova] pa pou kit son bann fidel. Sirman i pou vey zot pour en letan endefini.” (Psonm 37:28) Pa zanmen oubliye ki se sa bann lanz pwisan ki pe ed bann serviter Bondye ozordi. Avek zot sipor, nou kapab “tenir ferm e vwar delivrans Zeova.”—Egzod 14:13.

18. Akoz nou bezwen ‘met lo nou tou lekipman batay ki Bondye i donnen’?

¹⁸ Kwa ki pou ed nou pour “tenir ferm” dan semen laverite? Si ‘nou met lo nou tou bann lekipman batay ki Bondye i donnen.’ Eski nou pe met lo nou tou bann parti sa lekipman spirityel? Pour sa lannen ki pe vini, i ti pou saz ki sakenn parmi nou i egzaminen si nou’n byen met sak parti sa lekipman. Nou lennmi Satan oubyen Dyab, i konn nou bann febles e i esey destabiliz nou oubyen atak nou la kot nou annan en pwen feb. Nou pe “lit” kont bann move lespri. Nou kapab reisi si nou reste fidel avek Zeova!—Efezyen 6:11-18; Proverb 27:11.

19. Si nou andire, ki privilez nou kapab gannyen?

¹⁹ Zezi ti dir avek son bann disip: “Par zot perseverans zot a sov zot lavi.” (Lik 21:19) Fotespere nou parmi sa bann ki pou andir fidelman nenport ki difikilte ki nou kapab rankontre e par faver imerite Bondye nou ganny sa privilez pour “tenir ferm e vwar delivrans Zeova.”

Ki ou pou reponn?

• Ki bann levennman eksitan pe aprose?

• Ki mannyer Zeova ti demontre son pouvwar pour delivre an 1513 A.N.L.?

• Ki ou determinen pour fer dan lavenir?

[Kestyon]

[Blurb lo paz 22]

Teks pour lannen 2008 i “Tenir ferm e vwar delivrans Zeova.”—Egzod 14:13.

[Portre lo paz 19]

“Tou sa ki’n ganny ekrir dan lepase in ganny ekrir pour nou lansennyman”

[Portre lo paz 20]

Par son lantetman Faraon ti fer Lezip sibir bann dezas

[Portre lo paz 21]

Bann Izraelit ti sirviv ler zot ti fer tou keksoz ki Zeova ti konmann zot pour fer