Ganny rekonforte e rekonfort lezot

Konman imen enparfe, nou tou nou’n tonm malad, menm serten in arive byen malad. Ki mannyer nou kapab fer fas avek sa bann difikilte ki nou eksperyanse?

En led efikas pour fer fas avek bann tel sityasyon se ler nou ganny rekonforte avek nou fanmir, zanmi ouswa frer ek ser Kretyen.

Zoli parol en bon zanmi i kapab parey en lakrenm ki geri e rafresi nou. (Prov. 16:24; 18:24; 25:11) Me, bann vre Kretyen pa zis enterese pour ganny rekonforte. Zot fer zefor pour rekonfort ouswa “konsol tou bann ki dan soufrans, par sa konsolasyon ki [zot menm zot] gannyen avek [Bondye].” (2 Kor. 1:4; Lik 6:31) Antonio, en sirveyan distrik Meksiko ti eksperyans sa.

Ler i ti ganny dir ki i annan lymphoma, en kalite kanser disan, Antonio ti angwase. Kantmenm sa, i ti lalit pour kontrol bann santiman negatif. Ki mannyer? I ti esey rapel bann kantik Rwayonm e i ti sant zot pour ki i kapab tande e reflesir lo parol ladan. Priy aotvwa e lir Labib ti rekonfort li en kantite.

Me, aprezan, Antonio i realize ki enn parmi bann pli gran led ki i ti gannyen ti sorti kot son bann frer ek ser Kretyen. I dir: “Kan nou de mon madanm nou ti santi nou dekouraze, nou ti demann enn nou fanmir ki en ansyen dan kongregasyon pour vin kot nou e priy avek nou. Nou ti ganny soulaze e rekonforte.” I azoute: “Anfet, gras a sipor nou fanmir ek nou bann frer ek ser spirityel, dan zis en pti pe letan nou ti kapab sirmont nou bann santiman negatif.” Pa i vreman rekonesan pour annan bann bon zanmi zantiy koumsa!

En lot led ki nou gannyen dan bann letan parey se led lespri sen. Zapot Pyer ti dir ki lespri sen Bondye i en “kado” gratwit. (Akt 2:38) Sanmenm ki ti arive zour Lapannkot 33 N.L. ler bokou dimoun ti ganny swazir avek lespri sen. Me, pa zis bann Kretyen swazir ki ganny lespri sen, nou tou nou ganny sa kado. Vi ki lespri sen i annabondans, alor, akoz ou pa demande pour ganny li annabondans?​—Iza. 40:28-31.

DEMONTRE LENTERE SENSER DAN BANN KI PE SOUFER

Zapot Pol ti fer fas avek en kantite difikilte, menm pros pour mor parfwa. (2 Kor. 1:8-10) Pourtan, Pol pa ti per pour mor. Lefet ki i ti konnen Bondye ti pe siport li, sa ti rekonfort Pol. I ti ekrir: “Nou rann glwar Bondye, Papa, nou Senyer Zezi-Kri, Papa ki ranpli avek labonte, Bondye ki touzour donn konsolasyon. I konsol nou dan [tou] nou bann soufrans.” (2 Kor. 1:3, 4) Pol pa ti les problenm akable li. Plito, bann leprev ki i ti fer fas avek ti ed li pour konpran lezot e pli byen ekipe pour rekonfort lezot letan zot dan bezwen.

Apre ki i ti’n rekipere, Antonio ti rekonmans son servis konman sirveyan. Oparavan, i ti regilyerman demontre lentere dan lezot, me aprezan, zot de son madanm zot in fer en zefor spesyal pour vizit e ankouraz sa bann ki malad. Par egzanp, apre ki i ti’n vizit en Kretyen ki ti pe lalit avek en maladi grav, Antonio ti aprann ki sa frer pa ti oule al renyon. Antonio i eksplike, “I pa ki i pa ti kontan Zeova ouswa son bann frer ek ser. I zis ki sa maladi ti’n telman afekte son santiman ki i ti santi i pa vo nanryen.”

En keksoz ki Antonio ti fer pour ankouraz sa frer malad se ki i ti demann li pour fer lapriyer kot enn bann rankont. Menm si sa frer ti santi ki i pa alaoter, i ti aksepte pour fer lapriyer. Antonio i dir: “I ti fer en zoli lapriyer e apre sa, i ti konmsi i ti en lot dimoun. I ti santi li annan valer ankor.”

Anfet, ziska en serten degre, nou tou nou’n eksperyans en kek soufrans. Me, parey Pol i dir, sa i kapab byen ekip nou pour ed lezot ler zot dan bezwen. Alor, annou touzour sansib anver soufrans lezot Kretyen e imit Zeova nou Bondye par vin en sours rekonfor pour lezot.