Onor gran non Zeova
Onor gran non Zeova
“Mon pou glorifye ou non pour en letan endefini.”—PS. 86:12.
ESKI OU KAPAB EKSPLIKE?
Ki savedir konn non Bondye?
Ki mannyer Zeova in revel son non progresivman?
Ki savedir mars o non Zeova?
1, 2. Ki mannyer Temwen Zeova i konsider non Bondye konpare avek lezot Kretyen?
LAPLIPAR larelizyon Kretyen in konpletman aret servi non Bondye. Par egzanp, Revised Standard Version i dir sa dan son prefas: “I vreman pa apropriye pour bann Kretyen servi nenport ki non prop pour sa sel Bondye.”
2 De lot kote, Temwen Zeova i fyer pour port non Bondye e pour glorifye li. (Lir Psonm 86:12; Izai 43:10. *) Deplis, i en gran privilez pour nou konpran sinifikasyon sa non e sa kestyon ki annan pour fer avek son sanktifikasyon. (Mat. 6:9) Me, sa i en privilez ki nou pa devret zanmen pran alalezer. Anliny avek sa, annou egzamin trwa kestyon enportan: Ki savedir konn non Bondye? Ki mannyer Zeova in azir annakor avek son gran non e alor glorifye li plis ankor? Ki mannyer nou kapab mars o non Zeova?
KI SAVEDIR KONN NON BONDYE
3. Ki savedir konn non Bondye?
3 Pour konn non Bondye i enplik plis ki zis konn sa mo “Zeova.” I enkli konn repitasyon Zeova, ensi ki son bann kalite ek son plan. I enplik konn son bann aksyon parey Labib i montre, tel ki lafason ki i ti azir anver son bann serviter. Byensir, Zeova i ed nou ganny sa konnesans gradyelman, dapre lakonplisman son plan. (Prov. 4:18) Zeova ti revel son non avek sa premye koup imen, sanmenm sa Ev ti servi li apre ki i ti’n donn nesans Kaen. (Zen. 4:1) Bann patrias fidel tel ki Noe, Abraam, Izaak ek Zakob ti konn non Bondye. Deplis, zot lapresyasyon pour sa non ti ogmante anmezir Zeova ti beni zot, pran swen avek zot e revel serten laspe son plan avek zot. Moiz ti ganny en konnesans spesyal an rapor avek non Bondye.
4. Akoz Moiz ti demann Bondye son non e akoz i fer sans?
4 Lir Egzod 3:10-15. * Ler Moiz ti annan 80-z-an, Bondye ti donn li sa lord: “Fer bann Izraelit, mon pep, sorti Lezip.” Avek bokou respe, Moiz ti reponn li avek en kestyon, enn ki vreman enportan. Anfet, Moiz ti demande: ‘Ki mannyer ou apele?’ Lefet ki depi byen lontan zot ti konn non Bondye, akoz Moiz ti demann sa kestyon? I evidan ki i ti anvi konn plis lo sa personnaz ki ti annan sa non. En laprev ki ti pou konvenk son pep ki Bondye ti pou vreman delivre zot. Moiz ti annan rezon pour demann sa, akoz bann Izraelit ti lesklav pour en bon pe letan. Petet, zot ti pou kapab doute si Bondye zot zanset ti pou kapab sov zot, parski menm serten ti’n konmans ador bondye bann Ezipsyen!—Ezek. 20:7, 8.
5. Ki mannyer Zeova ti ed Moiz konpran pli byen ankor sinifikasyon son non?
5 Ki mannyer Zeova ti reponn kestyon Moiz? I ti dir li: “La sa ki ou pou dir bann garson Izrael, ‘SA KI MON OULE VINI in anvoy mwan kot zot.’” * Apre i ti azoute: “Zeova Bondye zot zanset, . . . in anvoy mwan kot zot.” Bondye ti pe montre ki i ti pou vin nenport kwa ki i swazir pour vini pour ki i akonplir son plan, e ki i pou toultan fer sa ki i dir. Sanmenm ki dan verse 15 nou lir sa ki Zeova li menm ti dir: “Sa i mon non pour en letan endefini, e sa i mon memoryal pour zenerasyon apre zenerasyon.” Pa sa parol ti’n bezwen ranforsi lafwa Moiz e fer li annan en gran ladmirasyon pour Bondye!
ZEOVA I VIV ANNAKOR AVEK SON NON
6, 7. Ki mannyer Zeova ti vin sa ki i oule vini?
6 Zis apre ki i ti’n donn Moiz lord pour delivre bann Izraelit, Zeova ti vin sa ki i ti oule vini par delivre bann Izraelit. I ti imilye Lezip avek dis fleo terib, e an menm tan prouve ki bann bondye Lezip enkli Faraon ti napa okenn pouvwar. (Egz. 12:12) Zeova ti apre sa ouver Lanmer Rouz, fer bann Izraelit traverse e noy Faraon ek son lafors militer. (Ps. 136:13-15) Zeova ti prouve ki i ti sa Enn ki prezerv lavi anmezir i ti fourni manze ek delo pour son pep ki ti apepre de a trwa milyon oubyen menm plis, dan sa “gran dezer efreyan.” I ti menm anpes zot lenz ek sandalet ize. (Det. 1:19; 29:5) Wi, vreman napa nanryen ki kapab anpes Zeova prouve ki i kapab vin sa ki i oule vini. Zeova ti plitar dir Izai: “Mwan, mon Zeova e napa okenn sover apard mwan.”—Iza. 43:11.
7 Zozye ki ti siksed Moiz ti osi temwanny tou sa bann aksyon efreyan ki Zeova ti fer Lezip e dan dezer. Alor, ler i ti pros pour mor, avek konviksyon senser, Zozye ti dir bann Izraelit: “Zot konn byen avek tou zot leker e avek tou zot nanm ki napa okenn parol parmi tou bann bon parol ki Zeova zot Bondye in dir zot ki pa’n reisi. Tousala in vin vre pour zot. Napa en parol ki pa’n reisi.” (Zoz. 23:14) Wi, vreman Zeova ti akonplir son parol, par vin sa ki i ‘ti oule vini’!
8. Ki mannyer Zeova in viv annakor avek son non dan nou letan?
8 Ozordi osi, Zeova i ‘vin sa ki i oule vini.’ Atraver son Garson, i ti predir ki pandan bann dernyen zour, sa mesaz lo Rwayonm ti pou ganny anonse “partou dan lemonn.” (Mat. 24:14) Apard ki Bondye Tou Pwisan, lekel ankor ki ti kapab predir ki en travay koumsa ti pou ganny fer, fer sir ki i ganny fer e servi bann dimoun “senp san gran ledikasyon” pour akonplir sa travay? (Akt 4:13) Alor, ler nou pran par dan sa travay, an realite nou pe ede pour ki profesi Labib i ganny akonplir. Nou onor nou Papa e montre ki nou vreman senser ler nou priye: “Ki ou non sen i ganny glorifye; Ki ou Renny i ganny etabli; Ki ou lavolonte i ganny akonpli lo later parey dan lesyel.”—Mat. 6:9, 10.
SON NON I GRAN
9, 10. Ki nou aprann lo Zeova dan lafason ki i ti tret bann Izraelit e avek ki rezilta?
9 En pe letan apre ki bann Izraelit ti’n sorti Lezip, Zeova ti vin en keksoz nouvo pour son pep. Par mwayen lalyans Lalwa, Zeova ti vin zot “propriyeter” oubyen zot msye e i ti pare pour aksepte tou responsabilite ki ti pou vin avek. (Zer. 3:14) Bann Izraelit ti an retour vin son madanm senbolik, andotmo, en pep pour son non. (Iza. 54:5, 6) Anmezir ki zot ti volonterman soumet avek li e gard son bann komannman, i ti prouve ki i ti sa Msye parfe. I ti pou beni zot, protez zot e fer zot eksperyans lape. (Nom. 6:22-27) Gran non Zeova ti pou alor ganny glorifye parmi bann nasyon. (Lir Deterononm 4:5-8; * Psonm 86:7-10. *) Tou dilon listwar bann Izraelit, en kantite etranze ti aksepte vre ladorasyon. Anfet, zot ti dir sa ki Rit en madanm Moabit ti dir avek Naomi: “Ou pep pou vin mon pep, e ou Bondye mon Bondye.”—Rit 1:16.
10 Pour apepre 1,500-z-an, lafason ki Zeova ti tret bann Izraelit ti revel en kantite nouvo laspe dan son personnalite. Malgre sa nasyon ti kontinyelman rebele, Zeova ti prouve ki i ti en “Bondye ki annan mizerikord” e “ki pa ankoler vitman.” I en Bondye ki annan en pasyans ekstraordiner. (Egz. 34:5-7) Me kantmenm sa, pasyans Zeova ti annan en limit e sa ti arive ler bann Zwif ti rezet e touy son Garson. (Mat. 23:37, 38) Bann desandans Izrael ti ganny rezete konman pep Bondye. An realite, zot ti mor spirityelman, parey en pye dibwa ki’n sek. (Lik 23:31) Ki lefe sa ti annan lo zot latitid anver non Bondye?
11. Ki mannyer bann Zwif ti ptitapti aret servi non Bondye?
11 Listwar i montre ki avek letan, bann Zwif ti vin siperstisye anver non Bondye. Zot ti konmans santi ki zot pa ti merit pronons son non. (Egz. 20:7) Ptitapti, bann Zwif ti konpletman aret servi non Bondye. San dout leker Zeova ti fermal pour vwar son non ganny trete san okenn respe. (Ps. 78:40, 41) Bondye, “ki son non i Zalou” pa ti pou les en pep ki’n rezet li e ki li menm in rezete port son non pour touzour. (Egz. 34:14) Sa fe i devret fer nou vwar sa lenportans pour servi non nou Kreater avek bokou respe.
EN NOUVO PEP KI PORT NON BONDYE
12. Ki mannyer en pep ki port non Zeova ti vin an egzistans?
12 Zeova ti revele atraver profet Zeremi, ki i ti pou etabli “en nouvo lalyans” avek en nouvo nasyon, e sa se Izrael spirityel. Zeremi ti predir ki “depi sa ki pli pti parmi zot ziska sa ki pli gran parmi zot” ti pou “konn Zeova.” (Zer. 31:31, 33, 34) Sa profesi ti konmans ganny akonpli zour Lapannkot lannen 33 N.L. Bondye ti etablir sa nouvo lalyans. Zeova ti dir ki sa nouvo nasyon, setadir “Izrael Bondye” ki enkli bann Zwif ek non Zwif, ti pou vin en ‘pep pour non Bondye’ oubyen en ‘nasyon ki port son non.’—Gal. 6:16, NW; lir Akt 15:14-17; Mat. 21:43.
13. (a) Eski bann Kretyen dan premye syek ti servi non Bondye? Eksplike. (b) Ki mannyer ou konsider sa privilez ki ou annan pour servi non Zeova dan ou minister?
13 Konman en ‘nasyon ki port non Bondye,’ bann manm sa nasyon spirityel ti servi non Bondye, sirtou ler zot ti pe sit Lekritir Ebre. * Alor, zour Lapannkot 33 N.L., ler zapot Pyer ti pe adres bann Zwif ek bann ki ti’n konverti sorti partou dan lemonn, i ti servi non Bondye detrwa fwa. (Akt 2:14, 20, 21, 25, 34) Bann Kretyen dan premye syek ti onor Zeova, e Zeova ti an retour beni zot zefor dan predikasyon. Pareyman ozordi, Zeova i beni nou minister ler nou proklanm son non avek lafyerte e nou montre bann dimoun enterese sa non dan zot prop Labib si posib. Dan sa fason nou entrodwir zot avek sa vre Bondye. Pa sa i en gran privilez pour zot, osi byen ki pour nou! Sa lentrodiksyon i kapab parfwa konmansman en bon relasyon avek Zeova ki pou kontinyen vin pli for e dir pour touzour.
14, 15. Malgre lapostazi, ki Zeova in fer konsernan son gran non?
14 Plitar, bann aposta ti konmans kontamin kongregasyon Kretyen dan premye syek, sirtou apre lanmor bann zapot. (2 Tesa. 2:3-7) Bann fo ansenyan ti menm adopte tradisyon bann Zwif pour pa servi non Bondye. Me eski Zeova ti pou les son gran non ganny efase? Zanmen! I vre ki petet nou pa konn egzakteman lafason ki i ti ganny prononse, me sa non i ankor egziste. Avek letan, i’n aparet dan diferan tradiksyon Labib, ensi ki dan bann liv ki bann spesyalis Labib in ekrir. Par egzanp, an 1757, Charles Peters ti ekrir ki konpare avek sa kantite tit ki Bondye i annan, “i paret ki ‘Zeova’ i sa enn ki dekrir li pli byen.” Dan en liv ki ti ganny ekrir an 1797 lo ladorasyon Bondye, Hopton Haynes ti konmans sapit 7 dan sa fason: “ZEOVA i sa non prop BONDYE parmi bann Zwif, zis sa enn ki zot ti adore parey Kris osi ek son bann Zapot.” Henry Grew (1781-1862) pa ti zis servi non Bondye, me i ti osi rekonnet ki i ti’n ganny sali e i ti bezwen ganny sanktifye. Pareyman, George Storrs (1796-1879) ki ti en zanmi pros Charles Russell ti servi non Bondye, zis parey Charles Russell li menm.
15 Lannen 1931 ti enn byen remarkab, akoz pep Bondye ki sa letan ti apel bann Etidyan Labib ti adopte sa non Temwen Zeova ki sorti dan Labib. (Iza. 43:10-12) Dan sa fason, zot ti pe fer konnen lemonn ki zot ti fyer pour vin bann serviter sa sel vre Bondye e “en pep pour son non.” Zot ti oule loue sa non. (Akt 15:14) Bann devlopman koumsa i fer nou rapel sa ki Zeova ti dir dan Malaki 1:11: “Depi soley leve ziska soley kouse, mon non pou gran parmi bann nasyon.”
MARS O NON ZEOVA
16. Akoz nou merit konsider li en loner pour mars o non Zeova?
16 Profet Mika ti ekrir: “Tou bann pep zot, zot pou mars sakenn o non zot bondye, me nou, nou pou mars o non nou Bondye Zeova pour en letan endefini, wi pour touzour.” (Mik. 4:5) Lefet ki Zeova ti permet bann Etidyan Labib adopte son non, i pa zis en gran privilez, me i ti osi en lasirans pour demontre son laprouvasyon. (Lir Malaki 3:16-18. *) Me ou personnelman? Eski ou pe fer tou sa ki ou kapab pour ‘mars o non Zeova’? Eski ou konpran ki sa i enplike?
17. Kwa ki enplike dan mars o non Bondye?
17 Mars o non Bondye i enplik omwen trwa keksoz. Premyerman, nou devret koz lo sa non avek lezot e ed zot rekonnet ki zis bann “ki kriy non Zeova [ki] pou ganny sove.” (Rom. 10:13, NW) Dezyenmman, nou devret reflekte bann kalite Zeova, sirtou son lanmour. Trwazyenmman, nou mars o non Bondye ler avek lazwa, nou soumet avek son bann standar drwat e pa anmenn repros lo non sen nou Papa. (1 Zan 4:8; 5:3) Eski ou determinen pour “mars o non nou Bondye Zeova pour en letan endefini”?
18. Akoz tou bann ki onor gran non Zeova i kapab get lavenir avek konfyans?
18 Byento, tou bann ki inyor oubyen opoz Zeova pou forse konn li. (Ezek. 38:23) Sa i enkli bann dimoun ki parey Faraon ki ti dir: “Lekel li Zeova, ki mon devret obeir li?” Me, i pa ti tarde pour konnen, pa i vre! (Egz. 5:1, 2; 9:16; 12:29) Me nou, nou’n pare pour konn Zeova. Nou fyer pour port son non e pour vin son pep obeisan. Alor, avek konfyans nou pe esper lakonplisman sa promes ki’n ganny rikorde dan Psonm 9:10: “Sa bann ki konn ou non pou met konfyans dan ou, akoz bann ki rod ou O Zeova, sirman ou pa pou kit zot.”
[Not anba lo paz]
^ par. 2 Psonm 86:12: “Mon loue ou, O Zeova mon Bondye, avek tou mon leker e mon pou glorifye ou non pour en letan endefini.” Izai 43:10: “Se sa ki Zeova i dir: ‘Zot mon bann temwen, wi mon serviter ki mon’n swazir, pour ki zot konn mwan e annan lafwa dan mwan, e ki zot konpran ki mon pa’n sanze. Avan mwan, i ti napa okenn Bondye, e apre mwan i pou napa.’”
^ par. 4 Egzod 3:10-15: “10 Aprezan vini e les mwan anvoy ou kot Faraon, pour fer bann garson Izrael, mon pep, sorti Lezip. 11 Me, Moiz ti dir avek sa vre Bondye: ‘Ki mwan, mon ete ki mon bezwen al kot Faraon e tir bann garson Izrael Lezip?’ 12 Alors, i ti reponn: ‘Parski mon pou vreman avek ou, e sa i en siny pour ou ki mon’n anvoy ou: Apre ki ou’n tir sa pep Lezip, zot pou servi sa vre Bondye lo sa montanny.’ 13 Me Moiz ti dir avek sa vre Bondye: ‘Sipoze mon’n ariv kot bann garson Izrael e mon dir zot: “Bondye zot zanset in anvoy mwan kot zot,” e zot dir mwan, “Ki mannyer i apele?” Ki mon pou dir zot?’ 14 Alor, Bondye ti dir avek Moiz: ‘MON POU VIN SA KI MON OULE VINI.’ I ti azoute: ‘La sa ki ou pou dir bann garson Izrael, “SA KI MON OULE VINI in anvoy mwan kot zot.”’ 15 Ankor enn fwa Bondye ti dir avek Moiz: ‘Dir bann garson Izrael, “Zeova Bondye zot zanset, Bondye Abraam, Bondye Izaak ek Bondye Zakob, in anvoy mwan kot zot.” Sa i mon non pour en letan endefini, e sa i mon memoryal pour zenerasyon apre zenerasyon.’”
^ par. 5 Non Bondye i dan laform en verb Ebre ki vedir “fer arive.” Alor, “Zeova” i vedir “I fer arive.”—Zen. 2:4, not.
^ par. 9 Deterononm 4:5-8: “5 Gete, mon’n ansenny zot regilasyon ek zizman, zis parey mon Bondye Zeova in donn mwan lord pour fer, pour ki zot fer parey dan sa pei ki zot pe al pran posesyon. 6 E zot devret gard e aplik zot, akoz sa pou montre ki zot annan lasazes ek konprenezon devan lizye tou dimoun ki pou antann tou sa bann regilasyon, e zot pou sirman dir, ‘Sa gran nasyon i en pep ki vreman saz e ki annan konprenezon.’ 7 Lekel sa gran nasyon ki annan bann bondye pros avek li parey Zeova nou Bondye ki toultan la ler nou kriy li? 8 Lekel sa gran nasyon ki annan bann regilasyon ek zizman ki drwat parey tou sa bann lalwa ki mon pe met devan zot ozordi?”
^ par. 9 Psonm 86:7-10: “7 Zour mon dan ladetres, mon pou apel ou, parski ou pou reponn mwan. 8 Napa personn parey ou parmi bann bondye, O Zeova, ni okenn travay parey sa ki pour ou? 9 Tou nasyon ki ou’n fer pou vini, zot pou prostern devan ou O Zeova, e glorifye ou non. 10 Akoz ou gran e ou pe fer bann keksoz merveye; zis ou tousel ki Bondye.”
^ par. 13 Dan Lekritir Ebre ki bann Kretyen dan premye syek ti servi, i ti annan sa kat let ki form non Bondye. Levidans i montre ki i ti osi le ka avek bann premye kopi Septant, en tradiksyon Grek Lekritir Ebre.
^ par. 16 Malaki 3:16-18: “16 Sa letan, bann ki annan lakrent pour Zeova ti koz avek kanmarad, sakenn avek son konpanyon, e Zeova ti kontinyen port latansyon e ekoute. En liv souvenir ti konmans ganny ekrir devan li pour bann ki annan lakrent pour Zeova e pour bann ki mazin son non. 17 Zeova bann larme in dir, ‘Zot pou sirman vin pour mwan, zour ki mon pe prodwir en propriyete spesyal. Mon pou montre zot konpasyon, zis parey en zonm i montre konpasyon anver son garson ki pe servi li.’ 18 Ankor enn fwa zot pou vwar ladiferans ant en dimoun drwat ek enn move, ant enn ki pe servi Bondye ek enn ki pa’n servi li.”
[Kestyon]
[Portre lo paz 24]
[Portre lo paz 25]
Moiz ti konn sinifikasyon non Bondye e sa ti fer son lafwa vin pli for
[Portre lo paz 26]
Faraon pa ti oule rekonnet Zeova konman Bondye
Ou pou kapab kontan sa osi
RWAYONM BONDYE PE DIRIZE!
Zeova i glorifye son non
Ki sa Rwayonm in akonplir an rapor avek non Bondye? Ki mannyer personnelman ou ede pour sanktifye non Bondye?
