Pa zanmen perdi lespwar!

Eski ou’n en Temwen Zeova pour plizyer lannen e ou ti a kontan ou konzwen i zwenn avek ou pour ador Zeova?

Ouswa, eski ou’n dekouraze kan ou etidyan Labib, ki ti paret pe byen progrese o konmansman pa’n pran laverite o serye?

 Detrwa leksperyans bann dimoun Langleter pou ed ou vwar akoz ou pa devret zanmen perdi lespwar. Ou pou osi vwar ki ou kapab fer pour dan en sans, “anvoy ou dipen lo sirfas delo,” pour ki ou kapab ed sa bann ki pa ankor pran pozisyon pour laverite.​—Ekle. 11:1.

PERSEVERANS, EN FAKTER VREMAN ENPORTAN

Perseverans i en fakter vreman enportan. Ou devret reste atase avek laverite e avek Zeova. (Det. 10:20) Sanmenm ki Georgina ti fer. Ler i ti konmans etidye Labib avek Temwen Zeova an 1970, son msye Kyriacos ti vreman ankoler. I ti esey fer li aret son letid, i pa ti les bann Temwen antre kot li e i ti pran tou piblikasyon Temwen Zeova ki i ti vwar.

Kyriacos ti pli ankoler ankor letan Georgina ti konmans asiste renyon kongregasyon. En zour, i ti al kot Lasal Rwayonm pour fer problenm. Apre ki i ti realize ki Kyriacos ti koz pli byen Grek ki Angle, en ser ti telefonn en frer Grek dan en lot kongregasyon pour vin ed zot. Kyriacos ti byen reazir anver bon latitid sa frer e pour detrwa mwan, zot ti etidye Labib ansanm. Me, apre sa, Kyriacos ti aret etidye.

Georgina ti kontinyelman sibir lopozisyon pour ankor trwa-z-an. Kyriacos ti dir li ki i ti pou kite avek li si i ti batize. Zour son batenm, Georgina ti sipliy Zeova pour ki Kyriacos pa kit li. Kan bann Temwen ti arive pour anmenn li kot lasanble, Kyriacos ti dir zot: “Ale zot. Nou ava swiv zot dan nou loto.” I ti asiste progranm bomaten e menm asiste batenm son madanm!

Apre sa, i ti nepli opoz son madanm parey avan e dousman dousman i ti fer bann gro sanzman. Karant an apre ki Georgina ti’n zwenn bann Temwen pour premye fwa, son msye ti batize! Kwa ki ti ed Kyriacos? I dir: “Mon ti kontan Georgina akoz i ti determinen.” Georgina i dir: “Malgre mon msye ti opoz mwan, mon pa ti pou aret ador mon Bondye. Tou sa letan, mon ti priy Zeova e mon pa ti zanmen perdi lespwar.”

VALER EN NOUVO PERSONNALITE

En lot fakter ki kapab ed ou konzwen se ler ou devlop personnalite en Kretyen. Zapot Pyer ti konsey bann madanm Kretyen: “Soumet sakenn avek son msye, pour ki, par zot kondwit, si serten parmi zot msye pa obei parol Bondye, zot a kapab kanmenm aksepte lafwa san laparol.” (1 Pyer 3:1) Christine ti viv an armoni avek sa konsey, menm si i ti pran bokou letan pour son msye aksepte laverite. Kan i ti vin en Temwen plis ki 20-t-an pase, son msye John pa ti santi sa nesesite pour annan Bondye dan son lavi. John pa ti enterese avek larelizyon, me i ti kapab vwar valer ki nouvo krwayans son madanm ti annan pour li. I dir: “Mon ti vwar ki sa ki i ti aprann ti fer li ere. Son latitid ti sanze e i ti vin en dimoun pli for, e sa ti ed mwan dan bann sityasyon vreman difisil.”

Christine pa ti zanmen fors son msye pour aksepte son krwayans, e son msye i dir: “Depi o konmansman, Christine ti konpran ki i pa ti devret fatig mwan avek sa bann zafer, e avek pasyans i ti les mwan aprann dan mon vites pour mwan e dan mon prop fason.” Kan Christine ti vwar bann lartik dan Latour Veyer ouswa Awake! lo bann size ki i ti konnen John pou vwar enteresan, tel ki lasyans ek lanatir, i ti montre li an dizan, “Mon krwar ou ti pou kontan lir sa.”

Avek letan, John ti pran retret e konmans fer en pti pe zardinaz. Vi ki i ti annan plis letan pour reflesir lo bann kestyon profon konsernan lavi, i ti konmans mazinen, ‘Eski nou’n vin an egzistans par azar ouswa nou’n ganny kree pour en bi?’ En zour, en frer ki John ti pe koz koz avek ti demann li, “Eski ou ti pou kontan etidye?” John i dir: “La ki mon ti’n konmans krwar dan Bondye, mon ti aksepte.”

Pa i ti vreman byen ki Christine pa ti’n zanmen perdi lespwar! Apre ki i ti’n priye pour 20-t-an pour ki John i aksepte laverite, John ti batize. Konmela, zot tou le de zot servi Zeova ansanm avek bokou devouman. John i fer sa remark: “I annan de keksoz ki ti fer mwan aksepte laverite, sa se labonte ek lefet ki bann Temwen ti byen zantiy. Kan ou marye avek en Temwen Zeova, ou annan en konzwen fidel, ki ou kapab depan lo la e ki pare pour fer bann sakrifis.” Wi, Christine ti met an pratik sa parol dan 1 Pyer 3:1 e i ti marse!

LAGRENN I RAPORT FRI APRE PLIZYER LANNEN

Me ki nou kapab dir konsernan bann etidyan ki pour en rezon ou en lot zot in perdi sa lentere ki zot ti annan o konmansman? Lerwa Salomon ti ekrir: “Dan bomaten senm ou lagrenn e ziska aswar pa les ou lanmen repoze; parski ou pa konnen kote i pou reisi, si isi oubyen laba, ouswa si tou le de pou bon menm.” (Ekle. 11:6) Parler, lagrenn laverite i kapab pran plizyer lannen pour zermen. Kantmenm sa, en dimoun i kapab finalman realiz lenportans pour apros avek Bondye. (Zak 4:8) Wi, petet en zour ou pou ganny en gro sirpriz.

Egzamin legzanp Alice ki ti sorti Lenn e al reste Langleter. An 1974, i ti konmans etidye Labib. I ti koz Hindi me i ti oule amelyor son Angle. Alice ti etidye pour detrwa lannen e asiste enn de renyon dan en kongregasyon Angle. I ti konnen ki sa ki i ti pe aprann ti laverite, me i pa ti realiz son lenportans. Deplis, i ti kontan larzan e al bann parti. Pour fini kont, Alice ti aret etidye.

Pros 30 an pli tar, Stella, ki ti abitye etidye avek Alice ti ganny en let sorti kot li. Sa let ti dir: “Mon asire ou ti pou kontan konnen ki ou etidyan ki ou ti etidye Labib avek an 1974 in batize dan dernyen lasanble distrik. Ou’n zwe en rol enportan dan mon lavi. Ou’n plant lagrenn laverite dan mwan, e menm si mon pa ti pare pour dedye mon lavi avek Bondye sa letan, mon ti gard sa lagrenn laverite dan mon lespri ek leker.”

Ki ti’n arive? Alice i eksplike ki i ti’n tonm dan en depresyon apre lanmor son msye an 1997. I ti priy Bondye. Dis minit pli tar, de Temwen ki koz Punjabi ti tap son laport e donn li sa trak Ki Lespwar i annan pour bann Dimoun mor? Alice ti santi ki son lapriyer ti’n ganny reponn e i ti deside pour asosye avek Temwen Zeova. Me kote zot ti ete? I ti bat avek en vye dayri ki ladan ti annan ladres en kongregasyon Punjabi ki Stella ti’n donn li. Alice ti al kot Lasal Rwayonm e i ti byen ganny akeyir par bann frer ek ser ki koz Punjabi. Alice i dir: “Menm apre ki mon ti’n ale, mon ti ankor santi sa lanmour e sa ti soulaz mwan dan mon depresyon.”

I ti konmans asiste renyon regilyerman, rekonmans etidye Labib, ensi ki aprann koz e lir Punjabi byen. An 2003 i ti batize. A lafen son let ki i ti ekrir Stella, i ti dir, “Mersi bokou pour plant sa bann lagrenn laverite 29 an pase e pour kit en bon legzanp pour mwan swiv.”

Ki ou aprann avek sa leksperyans? I kapab pran plis letan ki ou ekspekte, me si en dimoun i lafen spirityelman, onnet e annan limilite, Zeova pou les laverite pouse dan son leker. Rapel sa ki Zezi ti dir dan son parabol: “Ki [swa senmer] i dormi, ki i leve bann lagrenn i zermen e grandi tousel. Later par limenm i prodwi premyerman son tiz, apre zepi e apre lagrenn dan zepi.” (Mark 4:27, 28) Sa fason grandi i pran letan e i ariv “par limenm.” An realite, sak proklanmater Rwayonm pa konnen ki mannyer sa pou arive. Alor, kontinyen senm annabondans. I kapab ki ou pou rekolte annabondans.

Pa oubliy lenportans lapriyer. Georgina ek Christine ti kontinyen priy Zeova. Si ou “priye tou letan” e pa zanmen perdi lespwar, “dan ankor en kantite zour,” ou pou kapab revwar sa “dipen” ki ou ti’n anvoye lo sirfas delo.​—Rom. 12:12; Ekle. 11:1.

[Portre lo paz 30]

[Portre lo paz 30]

[Portre lo paz 30]

[Portre lo paz 30]

Karant an apre ki Georgina ti’n zwenn bann Temwen pour premye fwa, son msye ti batize

[Portre lo paz 30]

Let ki Stella ti gannyen sorti kot Alice i dir: “Mon asire ou ti pou kontan konnen ki ou etidyan ki ou ti etidye Labib avek an 1974 in batize dan dernyen lasanble distrik.”

 [Ekstre lo paz 32]

“Mersi bokou pour plant sa bann lagrenn laverite 29 an pase e pour kit en bon legzanp pour mwan swiv.”​—Alice