Benefisye plennman atraver lektir Labib
Benefisye plennman atraver lektir Labib
“Mon ganny plezir dan lalwa Bondye.”—ROM. 7:22.
ROD SA BANN PWEN
Ki byenfe ou gannyen kan ou lir “avwabas”?
Ki mannyer ou kapab mazin bann verse Labib kan ou pe ed lezot?
Si ou lir Labib atantivman, ki proteksyon ou pou gannyen?
1-3. Ki byenfe ou gannyen kan ou lir Labib e aplik son bann lansennyman?
“MON remersye Zeova tou le bomaten pour ed mwan konpran Labib.” Sa ser Kretyen aze ki’n dir sa parol in deza lir Labib antye plis ki 40 fwa, e i pa pe arete. En ser pli zenn ti ekrir ki lektir Labib in ed li pour vwar ki Zeova i reel. Sa in fer li vin pli pros avek son Papa dan lesyel. I dir, “Zanmen mon’n deza sitan ere dan mon lavi!”
2 Zapot Pyer ti ankouraz nou tou pour “kontan dile pir parol Bondye.” (1 Pyer 2:2) Bann ki kontan pour etidye Labib e aplik son lansennyman i annan en konsyans kler ek en bi dan lavi. Zot devlop en bon lanmitye avek lezot ki kontan e servi sa vre Bondye. Tousala i bann bon rezon pour pran “plezir dan lalwa Bondye.” (Rom. 7:22) Me i annan ankor plis byenfe. Kwa sa bann byenfe?
3 Pli ou aprann konn Zeova ek son Garson, pli ou lanmour pour zot ek ou prosen pou ogmante. Kan ou ganny konnesans egzakt lo Labib, sa i ed ou pour vwar ki mannyer Bondye pou byento sov bann imen obeisan dan sa lemonn ki pe ariv ver son lafen. Ou annan en bon nouvel pour partaz avek lezot dimoun dan predikasyon. Zeova pou beni ou anmezir ki ou ansenny lezot sa ki ou’n aprann atraver ou lektir Labib.
LIR E REFLESIR
4. Ki savedir lir Labib “avwabas”?
4 Zeova pa anvi son bann serviter i zis lir son Parol vit vit. I ti dir Zozye: “Sa liv lalwa pa devret elwannyen avek ou labous, ou devret lir li avwabas lizour konman aswar.” (Zoz. 1:8; Ps. 1:2) Eski sa i vedir ki nou bezwen lir avwabas tou sa ki’n ganny ekrir depi Zenez ziska Revelasyon? Non. I vedir ki ou lir avek en vites ki permet ou reflesir lo sa ki ou pe lir. Kan ou lir Labib “avwabas,” sa i ed ou port latansyon lo sa ki pou itil e ankourazan pour ou sa moman. Lir sak fraz, resi oubyen verse ki ou’n apresye lantman e pronons byen sa bann mo. Dan sa fason, sa ki ou pe lir i kapab tous ou leker. Akoz sa i enportan? Parski kan ou konpran sinifikasyon bann konsey Bondye, ou pou ganny motive pour met zot an pratik.
5-7. Donn legzanp pour montre ki mannyer lir Labib avwabas i kapab ed ou pour (a) reste moralman pir; (b) tret lezot avek pasyans ek labonte; (c) met konfyans dan Zeova menm dan letan difisil.
5 Lir Labib avwabas i itil sirtou kan ou pe lir bann liv Labib ki ou pa familye avek. Pour donn en legzanp, imazin trwa senaryo. Premyerman, meton en zenn frer pe fer son lektir Labib personnel e i’n ariv dan liv Osea. Dan sapit 4, i fer en pti poz apre ki i’n lir verse 11 ziska 13 avwabas. (Lir Osea 4:11-13. *) Akoz? Sa bann verse i atir son latansyon akoz i pe lite pour reziste presyon pour komet limoralite seksyel kot lekol. I reflesir lo sa verse e mazinen: ‘Zeova i vwar bann keksoz mal ki dimoun i fer menm dan kasyet. Mon pa anvi ofans li.’ Sa frer i determinen pour reste pir moralman devan Zeova.
6 Dan dezyenm senaryo, en ser Kretyen pe lir liv Yoel e la i ariv lo sapit 2, verse 13. (Lir Yoel 2:13. *) Anmezir i lir sa verse avwabas, i reflesir lo ki mannyer i pou imit Zeova ki en Bondye “mizerikord ek konpasyon, i pa ankoler vitman, e i annan en kantite labonte leker.” I deside pour aret koz koze mirak ek parol blesan ki i servi parler kan i koz avek son msye ek lezot dimoun.
7 Trwazyenm senaryo: Imazin en papa Kretyen ki’n perdi son louvraz e pe trakase lo ki mannyer i pou pran swen avek son madanm ek zanfan. Dan Naoum 1:7, i lir avwabas ki Zeova “i konn bann ki pe rod refiz dan li” e protez zot parey “en landrwa proteksyon dan zour ladetres.” Sa panse i soulaz li. I santi lanmour ek swen Zeova e i aret trakas tro bokou. Apre i lir verse 15 avwabas. (Lir Naoum 1:15. *) Sa frer i realize ki kan i pres sa bon nouvel dan letan difisil, i pe demontre ki i vwar Zeova konman son landrwa proteksyon. An menm tan ki sa frer i kontinyen rod en louvraz, i osi trouv letan pour prese dan lasemenn.
8. An bref mansyonn en pyer presye spirityel ki ou’n dekouver dan ou lektir Labib.
8 Sa bann pwen ki’n ganny mansyonnen i sorti dan bann liv Labib ki serten i kapab vwar difisil pour konpran. Anmezir ou egzamin liv Osea, Yoel ek Naoum avek sa dezir pour aprann, ou pou ganny sa lanvi pour lir avwabas lezot verse dan sa bann liv. Zis mazin kantite lasazes ek rekonfor ou pou gannyen si ou lir liv ki sa bann profet in ganny enspire pour ekrir! Ki nou pou dir lo lezot liv Labib? Parol Bondye i parey en min ki ranpli avek dyanman. Alor, fouy byen dan sa min! Wi, lir Labib an antye avek bi pour trouv bann pyer presye spirityel, setadir gidans ek lankourazman ki ladan.
FER ZEFOR POUR KONPRAN
9. Ki mannyer nou kapab ogmant nou konprenezon lo Labib?
9 I vre ki i enportan pour ou lir Labib tou le zour, me ou osi bezwen anvi ganny konprenezon ek bon zizman. Alor, servi byen piblikasyon ki lorganizasyon Zeova i fourni pour fer resers lo lorizin bann dimoun, landrwa ek levennman ki ou lir lo la. Oubyen si ou anvi konnen ki mannyer en lansennyman Labib i kapab annan lefe lo ou lavi, demann en ansyen oubyen en Kretyen matir pour ed ou. Pour konpran lenportans pour ogmant nou konprenezon, annou vwar legzanp en Kretyen dan premye syek ki ti fer bokou zefor pour fer sa. I ti apel Apolos.
10, 11. (a) Ki mannyer Apolos ti ganny ede pour amelyore konman en predikater bon nouvel? (b) Ki nou kapab aprann avek sa resi lo Apolos? (Vwar bwat “Eski ou lansennyman i azour?”)
10 Apolos ti en Kretyen Zwif ki ti annan “en gran konnesans dan Lekritir” e i ti “plen avek lantouzyas [oubyen “ranpli avek lespri sen,” NW].” Liv Akt i dir ki “i ti prese e ansenny egzakteman bann fe konsernan Zezi. Me i ti konn zis batenm Zan.” San realize, lansennyman Apolos lo batenm ti nepli azour. Apre ki Prisil ek Akilas ti’n tann son lansennyman Efez, sa koup Kretyen ti “eksplik li pli byen Semen Bondye.” (Akt 18:24-26) Ki byenfe Apolos ti gannyen?
11 Apre ki i ti’n pres Efez, Apolos ti al Akai. “Ler i ti ariv laba, i ti vin byen itil pour bann ki par lagras Bondye ti krwar. Parski avek son bann largiman solid, i ti montre bann Zwif piblikman ki zot ti dan lerer, i ti prouve par Lekritir ki Zezi ti Kris.” (Akt 18:27, 28) Sa letan la, Apolos ti kapab eksplik byen sinifikasyon batenm Kretyen. Avek tou sa ki i ti’n aprann, i ti “byen itil” pour ed bann nouvo progrese dan laverite. Ki nou kapab aprann atraver sa resi? Parey Apolos, nou fer tou pour konpran sa ki nou lir dan Labib. Me, kan en Kretyen byen eksperyanse i donn nou bann sizesyon lo konman pour ansenny dan en fason pli efikas, nou kapab aksepte son led avek limilite e demontre lapresyasyon. Si nou fer sa, kalite nou servis sakre pou amelyore.
SERVI SA KI OU APRANN POUR ED LEZOT
12, 13. Donn legzanp pour montre ki servi Labib avek bon zizman i kapab ed nou etidyan progrese.
12 Parey Prisil, Akilas ek Apolos, nou kapab vin en benediksyon pour lezot. Ki mannyer ou santi kan ou’n ankouraz en dimoun pour sirmont en lobstak e fer progre spirityel? Ouswa konman en ansyen, ki mannyer ou santi kan en adorater Zeova i remersye ou pour en konsey Labib ki’n ed li fer fas dan moman difisil? San dout, servi Parol Bondye pour ed lezot amelyor zot lavi, i donn gran satisfaksyon ek lazwa. * Vwar ki mannyer ou kapab atenn sa lobzektif.
13 Konsernan vre ek fo ladorasyon, bokou Izraelit dan letan Eliya ti bezwen deside lo ki lipye zot ti pou debout. Konsey Eliya pour sa bann dimoun i kapab ed bann etidyan Labib ki ezite progrese spirityelman. (Lir 1 Lerwa 18:21. *) Dan en lot ka: Si en dimoun ki enterese i per lafason ki son zanmi oubyen fanmir pou reazir, ou kapab ankouraz li par rezonn avek li lo Izai 51:12, 13. *—Lir.
14. Kwa ki pou ed ou rapel bann verse Labib kan ou bezwen zot pour ed lezot?
14 Dan Labib i annan bokou parol ki kapab ankouraz, koriz e fortifye son lekter. Me ou kapab demande, ‘Ki mannyer mon kapab trouv bann verse Labib o moman ki mon bezwen zot?’ Lir Labib e medit lo panse Zeova tou le zour. An fezan sa, ou pou mazin bann verse ki lespri sen i kapab fer ou rapel kan ou bezwen.—Mark 13:11; lir Zan 14:26. *
15. Kwa ki pou ed ou konpran Parol Bondye pli byen?
15 Parey Lerwa Salomon, priy Zeova pour ganny lasazes pour desarz ou bann responsabilite teokratik. (2 Kron. 1:7-10) Parey bann profet dan lepase, “fer bann resers ek bann lenvestigasyon” dan Parol Bondye pour ganny konnesans egzakt lo Bondye ek son lavolonte. (1 Pyer 1:10-12) Zapot Pol ti ankouraz Timote pour nouri li “par bann parol lafwa ek vre lansennyman.” (1 Tim. 4:6) Kan ou fer sa, ou pou dan en pli bon pozisyon pour ed lezot spirityelman e an menm tan batir ou prop lafwa.
PAROL BONDYE I GARANTI PROTEKSYON
16. (a) Ki mannyer lektir Labib o profon tou le zour ti benefisye bann Zwif Bere? (b) Akoz lektir Labib i enportan pour nou ozordi?
16 Bann Zwif Bere Masedwann ti annan labitid pour ‘toulezour etidye Lekritir.’ Kan Pol ti pres sa bon nouvel avek sa bann Zwif, zot ti verifye son parol avek sa ki zot ti konnen lo Lekritir. Avek ki rezilta? Bokou ti konvenki ki i ti pe ansenny laverite e zot “ti krwar.” (Akt 17:10-12) Sa i montre ki lir Labib tou le zour i fer ou lafwa dan Zeova vin pli solid. Sa lafwa ki donn “lasirans dan keksoz ki ou pe espere” i vreman enportan si ou anvi viv dan nouvo lemonn Bondye.—Ebr 11:1
17, 18. (a) Ki mannyer lafwa ek lanmour i kapab protez leker senbolik en Kretyen? (b) Ki mannyer lespwar i protez nou avek danze?
17 Pol ti ekrir: “Parski nou fer parti lizour, annou reste azen e abiy nou dan lafwa ek lanmour parey en lenz proteksyon; [konman] kas proteksyon lo nou latet nou annan lesperans dan delivrans.” (1 Tesa. 5:8) En solda i bezwen protez son leker pour anpes son lennmi touy li. Pareyman, leker senbolik en Kretyen i bezwen ganny proteze kont pouvwar pese. Ki arive kan en serviter Zeova i devlop en lafwa for dan promes Bondye ek lanmour pour Li ek lezot? Sa serviter Bondye pe met sa pli bon kalite lenz proteksyon lo son pwatrin. I pa pou fer nenport kwa pour perdi faver Zeova.
18 Pol ti osi mansyonn en kas ki refer avek “lesperans dan delivrans.” San protez son latet, en solda dan letan lontan ti kapab fasilman perdi son lavi dan lager. Me avek en bon kas, i ti pou kapab reziste bann kou dan latet san ganny dimal. Nou devlop lespwar dan abilite Zeova pour delivre kan nou etidye Labib. En lespwar solid i ed nou reziste bann aposta ek zot bann “diskisyon vid.” (2 Tim. 2:16-19) Nou lespwar pou osi ed nou reziste bann ki esey antrenn nou dan bann pratik ki Zeova i deteste.
LAKLE POUR SIRVIV
19, 20. Akoz Parol Bondye i presye pour nou e ki mannyer nou demontre nou lapresyasyon? (Vwar bwat “Zeova i donn mwan zis sa ki mon bezwen.”)
19 Pli nou apros avek lafen, nou pli bezwen depan lo Parol Zeova. Son konsey i ed nou pour aret nou bann move labitid e kontrol nou tandans pour fer pese. Avek son lankourazman ek rekonfor, nou pou reisi reziste lenfliyans Satan ek son lemonn. Avek gidans ki Zeova i donnen dan son Parol, nou pou kapab reste lo semen lavi.
20 Rapel ki i lavolonte Bondye ki “tou [“sort kalite,” NW] dimoun i ganny sove.” Bann serviter Zeova i parmi sa tou sort kalite dimoun. Sa i osi enkli bann ki nou ede atraver predikasyon. Me, tou bann ki anvi ganny sove i bezwen “ganny konnesans [egzakt lo] laverite.” (1 Tim. 2:4) Pour sirviv sa bann dernyen zour, nou devret absoliman lir e aplik bann konsey Labib. Wi, nou lektir Labib tou le zour i montre ki kantite presye nou vwar Parol laverite.—Zan 17:17.
[Not anba lo paz]
^ par. 5 Osea 4:11-13: “11 Fornikasyon, diven, ek diven dou i fer nou perdi nou bon motivasyon. 12 Mon prop pep pe kontinyen konsilte zot zidol anbwa e zot baton dan zot lanmen pe kontinyen dir zot. Parski sa latitid fornikasyon in fer zot egare, e fornikasyon i fer zot kit zot Bondye. 13 Lo latet bann montanny zot ofer sakrifis, e lo bann pti montanny zot ofer lafimen sakrifisyel, anba bann gro pye dibwa, pye stirak ek bann gran pye dibwa, akoz i donn bon lonbraz. Se pour sa rezon ki zot bann fiy i komet fornikasyon, e zot bann belfiy i komet adilter.”
^ par. 6 Yoel 2:13: “Desir zot leker, e non pa zot lenz, e retourn kot Zeova zot Bondye, parski i annan mizerikord ek konpasyon, i pa ankoler vitman, e i annan en kantite labonte leker e i pou sertennman santi regre akoz sa maler.”
^ par. 7 Naoum 1:15: “Get lipye sa enn ki pe anmenn bon nouvel lo montanny, sa enn ki pe anons lape. O Zida, selebre zot bann lafet. Akonplir ou ve; akoz pou napa okenn bon nanryen ki pou travers ou. Sirman, i pou ganny detrir konpletman.”
^ par. 12 Byensir, nou pa servi konsey Labib pour met presyon ouswa kondann lezot. Nou sipoze pasyan e pran swen avek nou bann etidyan Labib parey Zeova i fer avek nou.—Ps. 103:8.
^ par. 13 1 Lerwa 18:21: “Apre Eliya ti apros sa pep e i ti dir: ‘Ziska kan zot pou bwate lo de diferan lopinyon? Si Zeova i sa vre Bondye, ale swiv li; me si i Baal, ale swiv li.’ Sa pep pa ti dir li en parol.”
^ par. 13 Izai 51:12, 13: “12 Mwan, mon sanmenm sa Enn ki pou rekonfort zot. ‘Lekel ou ki ou devret per en zonm ki pou mor, ek en garson bann imen ki pou vin konman zerb ver? 13 E ki ou devret oubliy Zeova sa Enn ki’n fer ou, sa Enn ki’n redi lesyel e ki’n poz fondasyon later, pour ki ou toultan dan lafreyer lazournen antye akoz gran lakoler sa enn ki’n anserkle ou, konmsi i ti’n fini pare pour detrir ou? Oli gran lakoler sa enn ki ti’n anserkle ou?’”
^ par. 14 Me ki ou pou fer si ou konn zis sa mo kle me ou’n oubliy liv, sapit ek verse? Ou pou kapab trouv sa verse, si ou get sa bann mo kle dan lendeks Labib, dan Watchtower Library oubyen dan konkordans New World Translation.
[Kestyon]
[Portre lo paz 7]
[Bwat lo paz 9]
ESKI Ou LANSENNYMAN I AZOUR?
Nou anvi reste azour avek nou konprenezon lo Labib pour kapab partaz sa konnesans egzakt avek lezot. Avek sa antet, ki mannyer ou ti pou reponn sa bann kestyon swivan?
▪ Lo lekel Zezi ti pe koze kan i ti mansyonn “sa zenerasyon” dan Matye 24:34? —Latour Veyer le 1 Avril 2010 paz 22-23.
▪ Kan ki sa separasyon “mouton ek bann kabri” ki ganny dekrir dan Matye 25:32 pou arive? —Latour Veyer le 15 Oktob 1995 an Angle paz 21-23.
▪ Parey i’n ganny ekrir dan Lik 21:26, kan ki “zonm pou tonm feb avek lafreyer dan lenkyetid konsernan sa ki pou arive lo later”?—Latour Veyer le 15 Fevriye 1994 an Angle paz 19-20.
Par lir Labib tou le zour e etidye personnelman o profon, nou pou kapab ed lezot konpran pli byen Parol Zeova.—Prov. 4:18.
[Portre]
Apolos ti ganny led pour vin pli efikas dan predikasyon
[Bwat lo paz 11]
‘ZEOVA I DONN MWAN ZIS SA KI MON BEZWEN’
En zenn ser Kretyen ti ekrir: “Parmi tou sa bann rapel ki Zeova pe donn nou, lir Labib tou le zour i sa enn ki’n annan plis lenfliyans lo mon lavi. Mon ti konmans lir Labib pandan mon dernyen lannen lekol e in pran mwan apepre de-z-an pour lir li antye. Pandan sa letan, dan Parol Zeova mon ti vwar tou sa ki mon ti bezwen pour deside ki pour fer avek mon lavi. La mon pe lir Labib pour en dezyenm fwa, me i paret ki mon pe lir keksoz ki mon pa’n zanmen lir avan. Lir Labib i osi eksitan la konmela parey i ti ete premye fwa! Mon enpresyonnen avek sa abilite Zeova pour donn mwan zis sa ki mon bezwen.”
