“Pa Arete”
“Pa Arete”
“Annou pa aret fer sa ki byen.”—GAL. 6:9.
KI OU POU REPONN?
Ki provizyon ki ed nou reste devoue pour laverite?
Kan nou met ladorasyon Zeova premye plas dan nou lavi, ki lefe sa pou annan lo nou lasistans renyon?
Ki mannyer nou desizyon i kapab montre si nou pou andire oubyen arete dan nou servis?
1, 2. Ki mannyer nou konfyans i ogmante kan nou reflesir lo lorganizasyon Zeova?
I VREMAN enpresyonan pour konnen ki nou form parti en sitan gran lorganizasyon iniversel. Sa vizyon dan Ezekyel sapit 1 ek Danyel sapit 7 i montre klerman ki Zeova pe diriz bann levennman pour akonpli son plan. Zezi pe diriz lorganizasyon Zeova lo later pour anons sa bon nouvel, pran swen avek bann ki pe fer sa travay, e promot vre ladorasyon Zeova. Pa sa i fer nou annan konfyans dan lorganizasyon Zeova!—Mat. 24:45.
2 Eski nou mars menm pa avek sa lorganizasyon merveye? Eski nou devouman pour laverite pe kontinyen ogmante oubyen i pe diminyen? Kan pe egzamin sa bann kestyon, petet nou pou remarke ki nou’n konmans fatige oubyen perdi en pe nou devouman. Sa i kapab arive. Dan premye syek, zapot Pol ti bezwen ankouraz son bann konpanyon Kretyen pour imit devouman Zezi. I ti dir zot ki sa ti pou ed zot pour “pa dekouraze, ni dezespere.” (Ebr. 12:3) Pareyman, si nou’n egzamin byen lartik presedan ki montre sa ki lorganizasyon Bondye pe akonplir, tre probab sa in ankouraz nou pour gard nou devouman e pour andire.
3. Ki nou bezwen fer pour nou pa arete, e ki nou pou egzaminen dan sa lartik?
3 Par kont, Pol ti montre ki i annan lezot keksoz ki neseser pour ed nou pour pa arete. I ti dir ki nou bezwen fer bokou zefor pour “fer sa ki byen.” (Gal. 6:9) Alor, sa i enplik pran aksyon lo nou par. Annou egzamin senk laspe dan nou ladorasyon ki kapab ed nou reste ferm e mars menm pa avek lorganizasyon Zeova. Apre vwar si i annan okenn laspe kot nou oubyen nou fanmir i kapab fer plis zefor pour amelyore.
RASANBLE POUR LADORASYON E ANKOURAZ KANMARAD
4. Akoz nou kapab dir ki rasanbleman i en laspe enportan vre ladorasyon?
4 Rasanble ansanm in toultan en laspe enportan dan ladorasyon bann serviter Zeova. Dan lesyel, bann lanz i ganny envite pour rasanble devan Zeova dan bann moman apropriye. (1 Rwa. 22:19; Zob 1:6; 2:1; Dan. 7:10) Dan letan lontan Izrael, sa nasyon ti zwenn ansanm “pour zot kapab ekoute e ki zot kapab aprann.” (Det. 31:10-12) Bann Zwif dan premye syek ti annan labitid al dan sinagog pour lir Lekritir. (Lik 4:16; Akt 15:21) Plitar, kan kongregasyon Kretyen ti formen, zot ti kontinyen rasanble ansanm, e sa i ankor en laspe enportan vre ladorasyon ozordi. Bann vre Kretyen i “rode konman [pour] pous kanmarad pour annan lanmour e fer sa ki byen.” Nou bezwen kontinyen “ankouraz kanmarad sirtou ki la sa Zour [Zeova] pe aprose.”—Ebr. 10:24, 25.
5. Ki mannyer nou kapab ankouraz kanmarad dan renyon?
5 En fason enportan ki nou kapab ankouraz kanmarad se kan nou partisipe dan renyon. Nou kapab eksprim nou lafwa an piblik ler nou reponn bann kestyon ki’n ganny enprimen, fer laplikasyon bann verse Labib, rakont en leksperyans bref ki montre akoz i saz pour swiv bann prensip Labib, ouswa dan lezot fason. (Ps. 22:22; 40:9) Sirman ou pou dakor ki nenport kantite lannen ki nou pe asiste renyon, komanter ki nou bann frer ek ser ki swa aze oubyen zenn i fer avek tou zot leker, i touzour en sours lankourazman!
6. Ki mannyer nou renyon i ed nou reste aktif spirityelman?
6 Akoz Bondye i oule nou rasanble ansanm regilyerman? Nou renyon ek lasanble i ed nou pour ganny kouraz pour pres avek lardyes e fer fas avek lopozisyon oubyen dimoun dan teritwar ki pa demontre lentere. (Akt 4:23, 31) Nou ganny ankouraze e nou lafwa i vin pli for atraver bann konversasyon lo Labib. (Akt 15:32; Rom. 1:11, 12) Bann lansennyman ek lesanz lankourazman ki nou gannyen kan nou rasanble i ed nou pour ganny sa vre lazwa e donn nou “trankilite dan bann zour maler.” (Ps. 94:12, 13) Komite Lansennyman anba gidans Konsey Direkter i sirvey preparasyon tou bann progranm spirityel pour enstrir pep Zeova lo later antye. Pa nou apresye sa bann provizyon ki ganny fer pour nou kapab ganny bann lansennyman ankourazan dan nou renyon tou le semenn, lannen apre lannen!
7, 8. (a) Ki bi prensipal nou bann renyon? (b) Ki mannyer renyon i ed ou spirityelman?
7 Me, i annan en keksoz pli enportan ankor apard sa byenfe personnel ki nou gannyen dan nou renyon. Rezon prensipal pour rasanble ansanm i pour ador Zeova. (Lir Psonm 95:6. *) Pa i en gran privilez pour loue nou Bondye merveye! (Kol. 3:16) Nou merit ador Zeova regilyerman par asiste e partisip dan bann renyon. (Rev. 4:11) Alor, i pour sa rezon ki nou ganny ankouraze pour ‘pa abandonn nou lasanble parey labitid serten.’—Ebr. 10:25.
8 Eski nou vwar nou renyon Kretyen konman en provizyon pour ed nou andire ziska ki Zeova i detrir sa move lemonn? Si wi, nou renyon pou parmi bann keksoz “pli enportan” dan nou progranm sarze. (Fili. 1:10, NW) Fodre en keksoz vreman enportan ki pou fer nou mank sa loportinite pour rasanble ansanm avek nou bann frer ek ser pour ador Zeova.
ROD BANN KI ANNAN LEKER SENSER
9. Ki mannyer nou konnen predikasyon i enportan?
9 Partisip plennman dan sa travay predikasyon, i en lot fason ki ed nou mars menm pa avek lorganizasyon Zeova. Zezi ti konmans sa travay kan i ti lo later. (Mat. 28:19, 20) Depi sa, pres lo Rwayonm e fer disip in vin sa travay prensipal tou le de parti lorganizasyon Zeova. I annan bokou leksperyans denozour ki prouve ki bann lanz pe siport nou travay e pe gid nou ver bann ki “annan sa bon kondisyon leker pour lavi eternel.” (Akt 13:48, NW; Rev. 14:6, 7) Lorganizasyon Zeova lo later i an plas ozordi e i byen organize pour fer sa travay vreman enportan. Eski predikasyon i sa keksoz pli enportan dan ou lavi?
10. (a) Donn legzanp pour montre ki mannyer nou kapab toultan gard nou devouman pour laverite. (b) Ki mannyer predikasyon in ed ou pour pa arete?
10 Kan nou devoue dan predikasyon, sa i ed nou pour toultan gard nou devouman pour laverite. Remark sa ki Mitchel, en frer ki pe servi konman ansyen ek pionye ordiner pour plizyer lannen i dir: “Mon kontan koz lo laverite avek lezot. Kan mon reflesir lo en nouvo lartik dan Latour Veyer oubyen Awake!, mon zis enpresyonnen par sa lasazes, konprenezon, ek larmoni ki dan sa bann magazin. Mon anvi sorti dan predikasyon pour vwar ki mannyer dimoun pou reakte e pour mwan kapab evey zot lentere. Predikasyon i ed mwan pour pa perdi lekilib. Mon fer sir ki tou larestan keksoz i ganny fer avan oubyen apre sa letan ki mon met dekote pour predikasyon.” Pareyman, si nou reste okipe dan nou servis sakre, sa i kapab ed nou pour kontinyen reste ferm dan sa bann dernyen zour.—Lir 1 Korentyen 15:58.
PRAN NOURITIR SPIRITYEL
11. Akoz nou bezwen profit tou sa bann nouritir spirityel ki nou gannyen avek Zeova?
11 Zeova in fourni nou en kantite nouritir spirityel atraver bann piblikasyon pour fortifye nou. San dout, in arive ki apre ki ou’n lir en magazin ou’n dir, ‘Sa magazin in ganny fer ekspreseman pour mwan! I konmsi Zeova in fer sa ganny ekrir zis pour mwan!’ Sa i pa en koensidans. Atraver sa bann provizyon, Zeova pe enstrir e gid nou. I’n dir: “Mon pou fer ou annan bon zizman e mon pou enstrir ou dan sa semen ki ou devret pran.” (Ps. 32:8) Eski nou esey fer tou nou posib pour pran tou sa bann nouritir spirityel e medit lo la? Si nou fer li, nou pou kontinyen devlop bann kalite ki pou ed nou pour pa dekouraze spirityelman dan sa bann dernyen zour difisil.—Lir Psonm 1:1-3; 35:28; 119:97. *
12. Kwa ki kapab ed nou pour pa pran nou bann provizyon spirityel alalezer?
12 I byen pour nou egzamin sa travay ki ganny fer pour ki nou kapab regilyerman ganny nou bann provizyon spirityel ki nourisan. Komite Redaksyon anba gidans Konsey Direkter i okip seksyon resers, ekrir, relir, met portre, e sirvey tradiksyon nou bann piblikasyon ki ganny enprimen e osi bann lartik ki ganny mete lo nou sit Internet. Bann biro brans ki enprim bann piblikasyon, i anvoy sa bann piblikasyon dan tou kongregasyon. Akoz tou sa travay i ganny fer? Pour ki pep Zeova i ganny byen nouri spirityelman. (Iza. 65:13) Annou etidye byen sa bann nouritir spirityel ki nou gannyen atraver lorganizasyon Zeova.—Ps. 119:27.
SIPORT LARANZMAN LORGANIZASYON BONDYE
13, 14. Lekel ki pe siport laranzman Zeova dan lesyel, e ki mannyer nou kapab fer parey lo later?
13 Dan vizyon ki zapot Zan ti gannyen, i ti vwar Zezi pe mont en seval blan pour ranport laviktwar lo bann ki pe rebel kont Zeova. (Rev. 19:11-15) Pa i ranforsi nou lafwa pour konnen ki bann lanz fidel ensi ki bann Kretyen swazir ki’n fini ganny zot rekonpans dan lesyel pe siport Zezi! (Rev. 2:26, 27) Pa sa i sa pli bon legzanp lo konman pour siport laranzman Zeova!
14 Pareyman, sa gran lafoul pe donn tou zot sipor bann frer Kris ki pe diriz lorganizasyon Zeova lo later ozordi. (Lir Zekarya 8:23. *) Ki mannyer sakenn nou i kapab montre ki nou pe siport laranzman Zeova? En fason i par soumet avek bann ki pe dirize. (Ebr. 13:7, 17) Sa i konmans dan nou prop kongregasyon. Eski sa ki nou dir lo bann ansyen i montre ki nou annan respe pour zot ek zot responsabilite? Eski nou ankouraz nou zanfan pour annan respe pour sa bann zonm fidel e pour demann zot bann konsey Labib? An plis ki sa, konman en fanmir, eski nou diskit lo ki mannyer nou kapab siport sa travay mondyal finansyerman atraver bann kontribisyon? (Prov. 3:9; 1 Kor. 16:2; 2 Kor. 8:12) Eski nou vwar li en privilez enportan pour gard Lasal Rwayonm dan en bon leta? Lespri sen Zeova i fasilman azir kot i annan respe ek linite. Atraver lespri sen, nou ganny lafors pour pa arete dan sa bann dernyen zour.—Iza. 40:29-31.
VIV AN ARMONI AVEK NOU MESAZ
15. Akoz nou bezwen kontinyen lite pour viv an armoni avek plan Zeova?
15 Finalman, pour andire e mars menm pa avek lorganizasyon Zeova, nou bezwen viv an armoni avek sa mesaz ki nou prese par “disteng sa ki fer plezir Bondye.” (Efe. 5:10, 11) Akoz nou lenperfeksyon, latak sorti kot Satan ek son move lemonn, nou bezwen kontinyelman lalit kont sa bann move lenfliyans. Serten parmi nou bann frer ek ser i lite tou le zour pour gard zot relasyon avek Zeova. Zeova i kontan ou pour zefor ki ou fer. Pa bezwen dekouraze! Si nou viv an armoni avek plan Zeova, nou pou ganny satisfaksyon e nou kapab asire ki nou ladorasyon pa pou anven.—1 Kor. 9:24-27.
16, 17. (a) Ki nou devret fer si nou komet en pese grav? (b) Ki leson nou kapab aprann avek legzanp Anne?
16 Me ki nou devret fer si nou komet en pese grav? Nou bezwen rod led deswit. Si nou kasyet nou pese, sa pou fer keksoz vin pli pir. Kan David pa ti konfes son pese, i ti dir ki son ‘lezo ti ize par son zemisman tou dilon lazournen.’ (Ps. 32:3) Wi, si nou kasyet nou bann pese, sa pou fer nou epwize emosyonnelman e spirityelman, me sa ki “konfese e pe kit zot pou ganny demontre mizerikord.”—Prov. 28:13.
17 Annou vwar legzanp Anne. * Kan i ti adolesan i ti servi konman pionye ordiner. Par kont, i ti konmans viv de kalite lavi. Sa ti afekte li en kantite. I dir: “Mon konsyans ti sarze. Mon ti tris e toultan dan depresyon.” Ki i ti fer? I dir ki en fwa dan renyon, Zak 5:14, 15 ti ganny diskite e sa ti fer li realize ki i ti bezwen led bann ansyen. I dir: “Sa bann verse i en preskripsyon sorti kot Zeova pour geri nou spirityelman. Sa latizann pa bon dan labous me selman i kapab geri ou. Mon ti ekout sa konsey dan sa verse, e i ti marse.” Aprezan Anne in reganny lafors e pe servi Zeova avek devouman ek en konsyans kler.
18. Ki nou devret determinen pour fer?
18 Pa i en privilez pour viv pandan sa bann dernyen zour e pour form parti lorganizasyon merveye Zeova! Annou determinen pour pa pran sa ki nou annan alalezer. O kontrer, annou travay ansanm konman en fanmir pour asiste renyon regilyerman, rod bann ki annan leker senser dan teritwar, e apresye nouritir spirityel ki nou gannyen regilyerman. Annou osi siport bann ki pe diriz kongregasyon e viv an armoni avek sa mesaz ki nou anonse. Si nou fer sa, nou pou mars menm pa avek lorganizasyon Zeova, e nou pa pou zanmen aret fer sa ki byen!
[Not anba lo paz]
^ par. 7 Psonm 95:6: “Antre, annou adore e prosternen; Annou azenou devan Zeova nou Kreater.”
^ par. 11 Psonm 1:1-3: “1 Byennere sa zonm ki pa’n swiv konsey bann move dimoun, ki pa’n debout dan semen bann peser, e ki pa’n asiz dan plas bann ki kontan sikannen. 2 Me i pran plezir dan lalwa Zeova, e i lir son lalwa avwabas lizour konman aswar. 3 Sirman i pou vin parey en pye dibwa ki’n ganny plante o bor bann larivyer, ki raport son fri pandan son sezon e ki son fey pa fletri. Tou sa ki i fer pou reisi.” 35:28: “Ki mon lalang i eksprim avwabas ou ladrwatir, tou dilon lazournen ou laglwar.” 119:97: “Pa mon vreman kontan ou lalwa! Tou dilon lazournen mon mazin sanmenm.”
^ par. 14 Zekarya 8:23: “La sa ki Zeova bann larme in dir, ‘Dan sanmenm sa bann zour dis zonm sorti dan tou langaz bann nasyon pou tyonbo, wi zot pou vreman tyonbo rob en zonm ki en Zwif, an dizan: “Nou pou al avek zot, akoz nou’n antann ki Bondye i avek zot.”’”
^ par. 17 Non in ganny sanze.
[Kestyon]
[Portre lo paz 27]
[Portre lo paz 29]
[Bwat lo paz 29]
LORGANIZASYON ZEOVA LO LATER I ENKLI:
1. Konsey Direkter
2. Komite Biro Brans
3. Sirveyan rezyonal
4. Konsey ansyen
5. Kongregasyon
6. Sak proklanmater
[Portre]
[Portre lo paz 31]
Avek devouman ed lezot apresye ki zot osi zot kapab form parti gran lorganizasyon Zeova
