Protez ou leritaz par fer bann bon desizyon
Protez ou leritaz par fer bann bon desizyon
“Deteste sa ki mal e reste atase avek sa ki byen.”—ROM. 12:9.
KI OU POU REPONN?
Ki mannyer ou pou dekrir nou leritaz spirityel?
Ki leson nou aprann avek bann aksyon Ezai?
Ki mannyer nou kapab protez nou leritaz?
1, 2. (a) Ki mannyer ou’n arive fer sa desizyon pour servi Bondye? (b) Ki kestyon nou kapab demande konsernan nou leritaz spirityel?
BOKOU parmi nou in fer sa bon desizyon pour servi Zeova e swiv legzanp Zezi Kri. (Mat. 16:24; 1 Pyer 2:21) Nou pran nou dedikasyon anver Bondye vreman o serye. Nou ti fer sa swa apre ki nou’n etidye Parol Bondye o profon e non pa akoz en konnesans anler anler lo detrwa verse Labib. Atraver sa letid, nou’n aprann en kantite detay ki ranforsi nou lafwa an rapor avek sa leritaz ki Zeova pou donn sa bann ki aprann ‘konn li konman sel vre Bondye, ek Zezi-Kri ki i’n anvoye.’—Zan 17:3; Rom. 12:2.
2 Konman Kretyen nou devret fer bann swa ki fer plezir nou Papa ki dan lesyel. Alor, sa lartik pou egzamin sa bann kestyon enportan: Ki nou leritaz? Ki mannyer nou devret konsider li? Ki mannyer nou kapab fer sir ki nou ganny nou leritaz? Kwa ki pou ed nou fer bann bon swa?
KI NOU LERITAZ?
3. Ki leritaz bann (a) Kretyen swazir e (b) ‘lezot mouton’?
3 I annan en pti group Kretyen ki pe esper avek enpasyans pour ganny “en leritaz . . . ki pa kapab ni gate, ni sali, ni fletri,” e sa se sa privilez pour renny avek Zezi dan lesyel. (1 Pyer 1:3, 4) Pour ganny sa leritaz, sa bann endividi i bezwen “ne de nouvo.” (Zan 3:1-3) Me ki leritaz sa plizyer milyon ‘lezot mouton’ Zezi ki ed son bann frer swazir pour pres sa bon nouvel lo Rwayonm Bondye? (Zan 10:16) Lezot mouton pou resevwar sa leritaz ki nou premye paran Adan ek Ev pa ti’n zanmen gannyen, zot pou resevwar lavi eternel dan paradi lo later kot pou napa ni soufrans, ni lanmor e ni dey. (Rev. 21:1-4) Zezi ti vreman kapab fer sa promes avek sa zonm ki ti akote li lo poto: ‘An verite, mon dir ou ozordi, ou pou avek mwan dan paradi.’—Lik 23:43.
4. Ki benediksyon nou deza pe gannyen?
4 Menm la konmela nou pe benefisye avek serten laspe nou leritaz. Lefet ki nou egzers lafwa dan sakrifis Zezi, nou annan lape lespri e en relasyon pros avek Bondye. (Rom. 3:23-25) Nou annan en konprenezon kler lo bann zoli promes ki dan Parol Bondye. Deplis, nou vreman zwaye vi ki nou form parti en lasosyasyon frer ek ser ki enternasyonal. Pa i en gran privilez ki nou en Temwen Zeova! Sanmenm i pa drol ki nou kontan nou leritaz!
5. Ki Satan in esey fer avek pep Bondye e kwa ki kapab ed nou reziste son bann riz?
5 Me, pour gard nou leritaz, fodre nou reste eveye kont bann taktik Satan. Satan in touzour esey enfliyans pep Bondye pour fer bann swa ki kapab fer zot perdi zot leritaz. (Nom. 25:1-3, 9) Vi ki i konnen i reste li en ptigin letan, Satan pe fer plis zefor ankor pour anbet nou. (Lir Revelasyon 12:12, 17.) Pour kapab kontinyen “reziste kont tou bann riz Dyab,” nou devret atoupri apresye nou leritaz. (Efe. 6:11) Dan sa domenn, nou kapab pran aker e tir en leson atraver move legzanp Ezai, premye garson Izaak.
PA BEZWEN VIN PAREY EZAI
6, 7. Lekel Ezai e ki leritaz i ti kapab gannyen?
6 Pros 4,000 an pase, Izaak ek Rebeka ti ganny en zimo ki ti apel Ezai ek Zakob. Anmezir sa zimo ti grandi, zot tanperaman ek zot kalite aktivite ti diferan. “Ezai ti vin en zonm ki ti konn fer lasas, i ti en zonm lakanpanny,” tandis ki “Zakob li i [ti] san repros, i ti reste dan latant.” (Zen. 25:27) En tradikter Labib apele Robert Alter i dir ki sa mo Ebre ki’n ganny tradwir “san repros” i “donn sa lide lentegrite oubyen menm linosans.”
7 Kan Ezai ek Zakob ti annan 15 an, zot granpapa Abraam ti mor, me sa promes ki Zeova ti fer avek Abraam pa ti mor. Plitar, Zeova ti repet sa promes avek Izaak. I ti montre li ki tou bann nasyon lo later ti pou ganny beni atraver desandans Abraam. (Lir Zenez 26:3-5. *) Sa promes ti pe montre ki Mesi, sa “desandans” fidel dan Zenez 3:15 ti pou sorti dan fanmir Abraam. Konman premye garson Izaak, Ezai ki ti annan drwa legal an rapor avek sa promes. Ezai ti annan en gran privilez, pa i vre! Eski i ti kontan sa privilez?
8, 9. (a) Ki desizyon Ezai ti fer an rapor avek son leritaz? (b) Plizyer lannen plitar, ki Ezai ti realize konsernan son swa e ki mannyer i ti reazir?
8 En zour, ler Ezai ti vini sorti dan lakanpanny, i ti vwar Zakob pe “fer en styou.” Ezai ti dir: “Depese silvouple, donn mwan en pe sa rouz la, sa rouz ki la akoz mon fatige!” Pour reponn li Zakob ti dir: “Premyerman, vann mwan ou drwa premye ne!” Ki desizyon Ezai ti fer? I ti dir: “Ki valer drwa premye ne i annan pour mwan?” Wi, Ezai ti pli vomye swazir en bol styou dan plas son drwa premye ne! Pour legaliz sa tranzaksyon, Zakob ti ensiste: “Avan tou, fer serman!” San okenn lezitasyon Ezai ti abandonn son drwa konman premye ne. Apre sa, “Zakob ti donn Ezai dipen ek styou lantiy e i ti konmans manze e bwar. Apre sa i ti leve e fer son semen. Dan sa fason, Ezai ti mepriz son drwa konman premye ne.”—Zen. 25:29-34.
9 Plizyer lannen plitar, ler Izaak ti mazinen i ti pros pour mor, Rebeka ti fer en laranzman pour fer sir ki Zakob i ganny sa drwa premye ne ki Ezai ti’n perdi. Kan Ezai ti realize plitar ki i ti’n fer en desizyon bet, i ti sipliy Izaak: “Beni mwan, menm mwan osi, mon papa! . . . Ou pa’n anmas okenn benediksyon pour mwan?” Letan Izaak ti dir li ki i pa ti pou kapab sanz sa benediksyon ki i ti’n fini donn Zakob, “Ezai ti kriye e konmans plere.”—Zen. 27:30-38.
10. Ki mannyer Zeova ti konsider Ezai ek Zakob e akoz?
10 Ki laspe dan latitid Ezai ki pli evidan dan Labib? I ti demontre ki satisfer son dezir laser ti pli enportan ki bann benediksyon ki i ti pou gannyen atraver son leritaz. Ezai pa ti apresye son drwa konman premye ne e i evidan ki i pa ti vreman kontan Bondye. Deplis, Ezai pa ti fatig li avek lefe ki son aksyon ti pou annan lo son desandans. De lot kote, Zakob li i ti apresye son leritaz. Par egzanp, pour swazir en madanm, Zakob ti azir an armoni avek lenstriksyon son paran. (Zen. 27:46–28:3) Anliny avek sa, Zakob ti demontre pasyans ek en leta lespri sakrifis, e sa ti fer li vin en zanset Mesi. Ki mannyer Bondye ti konsider Ezai ek Zakob? Atraver profet Malaki, Zeova ti dir: “Mon ti kontan Zakob, e mon ti ay Ezai.”—Mal. 1:2, 3.
11. (a) Akoz legzanp Ezai i aplikab pour nou konman Kretyen? (b) Akoz Pol ti refer avek fornikasyon an rapor avek aksyon Ezai?
11 Eski dan sa ki Labib i dir lo Ezai i annan en leson pour bann Kretyen ozordi? Definitivman wi. Zapot Pol ti averti son bann konpanyon Kretyen pour fer atansyon ki “personn pa anmenn en lavi imoral e mank respe pour keksoz sakre parey Ezai ki pour en sel repa ti vann son drwa konman en garson premye ne.” (Ebr. 12:16) Sa lavertisman i ankor aplikab pour bann Kretyen. Nou devret touzour demontre lapresyasyon pour bann keksoz sakre pour ki nou pa les nou ganny anvair par bann dezir natir imen ki pou fer nou perdi nou leritaz spirityel. Me, akoz Pol ti pe refer avek fornikasyon an rapor avek aksyon Ezai? Parski parey Ezai, dezir natir imen i kapab fer en dimoun fer fornikasyon e abandonn bann keksoz sakre zis pour li satisfer son bann dezir.
PREPAR OU LEKER LA KONMELA
12. (a) Dan ki fason Satan i met tantasyon dan nou semen? (b) Donn bann legzanp dan Labib ki kapab ed nou kan nou annan desizyon difisil pour fer.
12 Konman serviter Zeova, nou definitivman pa oule met nou dan bann sityasyon ki kapab fer nou fer bann keksoz imoral. Plito, nou priye ki Zeova i pa permet ki nou tonbe kan en dimoun i tant nou pour dezobeir li. (Mat. 6:13) Me, Satan i touzour pe esey afeblir nou spirityalite anmezir nou fer tou pour gard nou lentegrite dan sa lemonn koronpi. (Efe. 6:12) Konman bondye sa move lemonn, Dyab i konnen ki mannyer i pou eksplwat nou bann dezir enparfe par diriz nou ver bann tantasyon ki souvan marse lo bann imen. (1 Kor. 10:8, 13) Par egzanp, meton ou dan en sityasyon kot ou annan sa loportinite pour satisfer en kek dezir dan en fason imoral? Ki desizyon ou ti pou fer? Eski ou ti pou parey Ezai e dir: ‘Depese, donn mwan!’ Ouswa ou ti pou reziste sa tantasyon e tay lwen avek li parey Zozef, garson Zakob ti fer ler i ti pe ganny tante avek madanm Potifar?—Lir Zenez 39:10-12. *
13. (a) Dan nou letan, ki mannyer bokou in azir parey Zozef, e ki mannyer serten in azir parey Ezai? (b) Legzanp bann ki azir parey Ezai i fer nou konsyan kwa?
13 En kantite nou bann frer ek ser in tonm dan bann sityasyon kot zot ti bezwen swazir ant azir parey Ezai ouswa parey Zozef. Laplipar ti azir avek lasazes e rezwir leker Zeova. (Prov. 27:11) Me, kan zot fer fas avek tantasyon, serten konpanyon Kretyen i deside pour azir parey Ezai, zot met zot leritaz spirityel an danze. Anfet, sak lannen, i annan en kantite aksyon disipliner ki ganny pran e bokou dimoun i ganny ekskli akoz limoralite seksyel. Pa i vreman enportan alor pour prepar nou leker la konmela, avan ki nou trouv nou dan bann sityasyon ki teste nou lentegrite! (Ps. 78:8) Nou kapab pran omwen de pa konman en proteksyon kont tantasyon ki pou ed nou fer bann bon swa plitar.
REFLESIR E RANFORSI
14. Ki kestyon nou devret reflesir lo la ki pou ed nou “deteste sa ki mal e reste atase avek sa ki byen”?
14 Premye pa i enplik reflesir lo konsekans nou aksyon. Nou lapresyasyon pour nou leritaz spirityel i depan bokou lo profonder nou lanmour pour Zeova, sa Enn ki donn sa leritaz. Apre tou, si nou kontan en dimoun, nou pa pou anvi fer li ditor. Plito, nou fer tou pour ganny son laprouvasyon. Vi ki sa i le ka, i byen pour pran en pe letan pour reflesir lo konsekans i pou annan lo nou ek lezot si nou les nou dezir imoral fer nou fer pese. Nou devret demann nou lekor: ‘Ki mannyer mon aksyon egois pou afekte mon relasyon avek Zeova? Ki lefe mon move aksyon pou annan lo mon fanmir? Ki lefe i pou annan lo mon bann frer ek ser spirityel? Eski mon kapab fer tonbe lezot?’ (Fili. 1:10) Nou osi kapab demande: ‘Eski satisfer mon dezir pour detrwa minit plezir i kapab ranplas sa lapenn ki mon swa pou anmennen? Eski mon vreman anvi rann lapel parey Ezai ki ti plere kan i ti realiz sa ki i ti’n fer?’ (Ebr. 12:17) Si nou reflesir lo bann kestyon parey, sa pou ed nou “deteste sa ki mal e reste atase avek sa ki byen.” (Rom. 12:9) Wi, lanmour pour Zeova pou sirman motiv nou pour reste atase avek nou leritaz.—Ps. 73:28.
15. Kwa ki pou ranforsi nou defans kont bann danze spirityel?
15 Dezyenm pa i enplik ranforsi nou defans. Zeova in fer bokou provizyon pour ranforsi nou defans kont bann fakter dan sa lemonn ki kapab en danze pour nou spirityalite. Sa bann provizyon i enplik letid Labib, renyon, predikasyon ek lapriyer. (1 Kor. 15:58) Sak fwa nou devid nou leker avek Zeova dan lapriyer e sak fwa ki nou partisip aktivman dan predikasyon, nou pe ranforsi nou defans kont tantasyon. (Lir 1 Timote 6:12, 19.) Ziska en serten degre, se nou zefor ki pou determinen ki degre for nou defans pou ete. (Gal. 6:7) Proverb sapit de i met lanfaz lo sa pwen.
“KONTINYEN ROD LI”
16, 17. Dan ki fason nou kapab reisi devlop nou abilite pour fer bann bon desizyon?
16 Proverb sapit 2 i ankouraz nou pour rod lasazes ek konprenezon. Sa bann abilite i ed nou pour swazir ant sa ki byen ek sa ki mal, ant kontrol nou lekor e satisfer zis nou dezir. Pour arive fer sa i tou depan lo nou lanvi pour fer zefor. Pour met lanfaz lo sa laverite, Labib i dir: “Mon garson, si ou obei mon parol, apresye mon bann komannman parey en trezor, port latansyon lo lasazes avek ou zorey, afen ki ou a ouver ou leker ver disernman; si, an plis ki sa, ou kriy konprenezon e ou fer tande ou lavwa ver disernman, si ou kontinyen rod li konmsi larzan, e si ou kontinyen rod li konmsi ou pe rod bann trezor kasyet, alor, ou pou konpran ki si sa lakrent pour Zeova, e ou pou trouv konnesans konsernan Bondye. Parski Zeova i donn lasazes; dan son labous i annan konnesans ek disernman.”—Prov. 2:1-6.
17 Alor, i kler ki pour reisi annan sa abilite ki nou bezwen pour fer bann bon desizyon i depan lo si nou atenn sa bann rekomandasyon ki Proverb i koz lo la. Nou kapab reisi reste ferm kont tantasyon si nou les parol Zeova moul sa dimoun ki nou ete anndan, si nou persevere dan lapriyer pour ganny gidans Bondye e si nou kontinyen rod konnesans Bondye konmsi nou pe rod en trezor kasyet.
18. Ki ou determinen pour kontinyen fer e akoz?
18 Zeova i donn konnesans, konprenezon, disernman ek lasazes sa bann ki fer bokou zefor pour rod sa bann abilite. Pli nou rod e servi zot, nou pou vin pli pros avek Zeova, sa Enn ki donn sa bann abilite. An retour, nou relasyon pros avek Zeova pou konman sa proteksyon kan nou pe ganny tante. Ler nou apros avek Zeova e annan lakrent pour li, sa pou protez nou e anpes nou tonm dan pese. (Ps. 25:14; Zak 4:8) Annou kontinyen annan en lanmitye avek Zeova e aplik lasazes Bondye pour ki nou ava kontinyen fer bann desizyon ki pou fer leker Zeova rezwir e protez nou leritaz.
[Not anba lo paz]
^ par. 7 Zenez 26:3-5: “3 Reste konman en etranze dan sa pei, e mon pou kontinyen avek ou e beni ou, akoz avek ou ek ou desandans mon pou donn tou sa pei, e mon pou akonplir sa promes ki mon ti fer avek ou papa Abraam, 4 E mon pou miltipliy ou desandans parey zetwal dan lesyel e mon pou donn ou desandans tou sa pei e par mwayen ou desandans tou nasyon lo later pou ganny beni, 5 lefet ki Abraam ti ekout mon lavwa e kontinyen respekte son lobligasyon anver mwan, mon bann komannman, mon bann regilasyon e mon bann lalwa.”
^ par. 12 Zenez 39:10-12: “10 Alor, i ti arive ki [madanm Potifar] ti koz avek Zozef zour apre zour e [Zozef] pa ti zanmen ekout li pour dormi avek li, e pour reste avek li. 11 E i ti arive ki sa zour, parey lezot zour, i ti antre dan lakaz pour fer son travay, e ni menm enn bann serviter pa ti la dan lakaz. 12 Alor, [madanm Potifar] ti graponn [Zozef] par son lenz, an dizan: ‘Dormi avek mwan!’ Me i ti kit son lenz dan lanmen [madanm Potifar], taye e al deor.”
[Kestyon]
[Portre lo paz 26]
[Portre lo paz 28]
Pa met ou leritaz spirityel an danze
[Portre lo paz 30]
Nou ranforsi nou defans par rod lasazes Zeova
