Apresye plennman bann kalite Zeova
Apresye plennman bann kalite Zeova
“Parski zot bann zanfan ki Bondye i kontan, . . . fer tou parey li.”—EFE. 5:1.
KI OU POU REPONN?
Ki mannyer nou kapab ogmant nou lapresyasyon pour bann kalite Zeova?
Kwa ki fer en dimoun abordab?
Ki mannyer nou kapab imit legzanp Zeova pour pa fer lapliferans?
1. (a) Ki bann kalite Zeova en Kretyen i mazin pli souvan? (b) Ki byenfe nou pou gannyen ler nou egzamin bann kalite Bondye?
KI BANN kalite Zeova ki vin dan ou lespri ler ou mazin konsernan son personnalite? Laplipar nou i mazin son lanmour, lazistis, lasazes ek pwisans. Me, nou konnen ki Zeova i annan plizyer kalite atiran. Anfet, Zeova i annan plis ki 40 diferan kalite, e nou’n deza koz lo sak sa bann kalite dan nou piblikasyon. Zis mazin sa kantite zoli keksoz nou kapab aprann lo personnalite Zeova atraver nou letid personnel oubyen ladorasyon fanmir! Ki mannyer nou kapab benefisye ler nou fer sa? I kapab ogmant nou lapresyasyon pour nou Papa dan lesyel. An retour, pli nou demontre en gran lapresyasyon pour Zeova, pli nou anvi vin pros avek li e imit li.—Zoz. 23:8; Ps. 73:28.
2. (a) Donn legzanp pour montre ki mannyer nou kapab ogmant nou lapresyasyon pour bann kalite Zeova. (b) Ki nou pou egzaminen?
2 Me ki savedir “apresye” en keksoz? Dan konteks ki nou pou servi sa mo isi, i vedir rekonnet vre valer en keksoz. Nou kapab ogmant nou lapresyasyon pour en keksoz ptitapti. Pour donn en legzanp: Nou lapresyasyon pour en nouvo kalite manze i ptitapti ogmante kan nou santi son loder, nou pran letan pour gout li byen e apre nou menm nou esey prepar sa manze. Pareyman, nou ogmant nou lapresyasyon pour en kalite ki Zeova i annan kan nou familyariz nou avek sa kalite, reflesir lo la, e imit sa kalite dan nou lavi. (Efe. 5:1) Bi sa lartik ek sa de lartik ki swiv pou ed nou ogmant nou lapresyasyon pour bann kalite Bondye ki nou pa souvan mazinen konpare avek son bann kalite prensipal. Pour sak sa bann kalite nou pou vwar: Ki i vedir? Ki mannyer Zeova i demontre sa kalite e ki mannyer nou kapab imit Zeova par demontre sa kalite?
ZEOVA I ABORDAB
3, 4. (a) Konman ou ti pou dekrir en dimoun ki abordab? (b) Dan ki fason Zeova i asir nou ki i abordab?
3 Annou egzamin sa enn premye, i abordab. Ki mannyer ou ti pou dekrir en dimoun ki abordab? Petet ou ti pou dir, ‘I en dimoun zantiy, toultan la letan ou bezwen li, e fasil pour koz avek.’ Souvan i fasil pour rekonnet si en dimoun i abordab oubyen non par ekout sa ki i dir, obzerv bann zes ki i fer avek son lekor, tel ki lekspresyon lo son figir ouswa lezot zes ki i fer kantmenm i pa dir nanryen.
4 Ki mannyer Zeova i montre ki i abordab? Menm si Zeova i sa Kreater tou pwisan ki’n kre sa gran liniver, i asir nou ki i pare e vreman anvi ekout e reponn nou bann lapriyer. (Lir Psonm 145:18; Izai 30:18, 19. *) Nou kapab koz avek li nenport ki kantite letan, nenport ki ler, e nenport ki landrwa. Nou lib pour apros li, nou konnen i pa pou zanmen repros nou si nou fer li. (Ps. 65:2; Zak 1:5) Parol Bondye i servi bann term ki nou konpran pour montre ki Zeova i anvi nou apros li. Par egzanp, David ti ekrir ki “lizye Zeova i lo” nou e avek son “lanmen drwat i tyonbo [nou] for.” (Ps. 34:15; 63:8) Profet Izai ti konpar Zeova avek en berze, i ti dir: “Avek son lebra i pou rasanble bann pti mouton ansanm; e i pou anmenn zot dan son lebra.” (Iza. 40:11) Zis mazin sa! Zeova i anvi ki nou vin pros avek li zis parey en pti mouton ki byen konfortab dan lebra en berze ki pran byen swen avek li. Pa nou vreman annan en Papa ki abordab! Konman nou kapab imit sa enn kalite ki Zeova i annan?
EN KALITE KI BOKOU I KONTAN
5. Akoz i enportan ki bann ansyen i abordab?
5 Pa tro lontan pase, Temwen Zeova lo diferan kontinan ti ganny demande sa kestyon, “Ki kalite ou pli kontan dan en ansyen?” Preski tou ti dir, “Ki i abordab.” I vre, sak Kretyen i bezwen fer bokou zefor pour devlop sa kalite, me i sirtou enportan ki bann ansyen i abordab. (Iza. 32:1, 2) En ser ti fer resorti akoz i vwar sa kalite vreman enportan, i ti dir: “Nou kapab benefisye avek lezot kalite ki en ansyen i annan si selman i abordab.” Eski ou vwar sa bon rezonnman par deryer sa remark? Me kwa ki fer en dimoun abordab?
6. Kwa ki fer en dimoun abordab?
6 En fakter ki fer en dimoun abordab i ler i demontre lentere senser dan lezot. Si en ansyen i annan lentere dan lezot e pare pour ofer son lekor pour son bann frer ek ser, enkli bann zenn, zot pou santi sa. (Mark 10:13-16) Carlos ki annan 12 an i dir: “Mon obzerv bann ansyen dan lasal e mon vwar zot pe sourir e pe azir dan en fason zantiy, sanmenm ki mon kontan avek zot.” Byensir, i pa sifi pour en ansyen zis dir ki i abordab, me i devret osi demontre sa kalite. (1 Zan 3:18) Ki mannyer i kapab fer sa?
7. Akoz ler nou met badz lasanble sa i souvan fer nou ganny konversasyon e ki leson nou aprann avek sa?
7 Annou vwar en konparezon. Resaman en frer ki ti’n asiste en lasanble aletranze, e ki ti pe retourn se li par avyon, ti gard son badz lo li. Ler en cabin crew ti vwar sa ki ti’n ganny ekrir lo sa badz, “Ki ou Rwayonm i vini!,” i ti dir avek sa frer, “Wi, les li vini,” apre i ti azoute, “Nou bezwen koz plis lo sa size.” Pli tar, zot ti ganny en konversasyon e sa cabin crew ti aksepte nou bann magazin. Bokou parmi nou in deza ganny bann leksperyans parey. Me akoz badz lasanble i souvan fer nou ganny konversasyon avek lezot? Parski dan en sans i dir dimoun: “Santi zot alez pour apros mwan. Demann mwan kote mon pe ale.” Sa badz i en lendikasyon ki fer dimoun konnen ki nou anvi koz lo nou krwayans avek zot. Pareyman, bann ansyen i anvi donn zot konpanyon bann lendikasyon ki dir zot: “Santi zot alez pour apros mwan.” Ki serten sa bann lendikasyon?
8. Ki mannyer bann ansyen i montre ki zot vreman enterese avek lezot, e ki mannyer sa i annan en lefe lo kongregasyon?
8 Sak pei i annan son koutim, me ler nou sourir avek nou frer ek ser, donn zot en ponnyendmen, dir zot bonzour zantiman, nou pe montre ki nou vreman enterese avek zot. Lekel ki devret pran linisyativ pour fer sa? Remark legzanp ki Zezi in kite. Matye i rakonte ki dan en renyon avek son bann disip, “Zezi ti al kot zot e dir zot.” (Mat. 28:18) Pareyman, bann ansyen ozordi i pran linisyativ pour al kot zot bann konpanyon e koz avek zot. Ki mannyer sa i annan en lefe lo kongregasyon? En ser pionye ki annan 88 an ti fer sa remark: “Zot sourir ek lankourazman ki zot donn mwan ler mon antre dan Lasal Rwayonm i fer mwan apresye zot en kantite.” En lot ser fidel i azoute: “I kapab paret en pti keksoz, me ler en ansyen i akey mwan avek en sourir kot renyon, sa i annan en gran valer pour mwan.”
ABORDAB E DISPONIB
9, 10. (a) Ki bon legzanp Zeova in kite? (b) Ki mannyer bann ansyen i kapab montre ki zot toultan disponib?
9 I evidan ki nou pa kapab vin en dimoun abordab si nou pa disponib. Zeova in kit en bon legzanp dan sa domenn. “I pa lwen avek sakenn parmi nou.” (Akt 17:27) En fason bann ansyen i kapab montre ki zot disponib i ler zot met letan dekote avan e apre renyon pour koz avek zot bann frer ek ser, zenn konman vye. En frer pionye ti fer sa remark: “Ler en ansyen i demann mwan ki mannyer mon ete e esper mwan reponn, mon santi ki i apresye mwan.” En ser ki pe servi Zeova pour apepre 50 an ti dir: “Bann ansyen ki pran letan pour koz avek mwan apre renyon i fer mwan santi ki mon annan valer.”
10 I vre, bann ansyen i bezwen osi desarz lezot responsabilite ki zot annan. Me ler zot asiste renyon, zot bi avan tou i devret pour demontre lentere dan zot bann frer ek ser.
ZEOVA PA FER LAPLIFERANS
11, 12. (a) Ki i enplike pour pa fer lapliferans? (b) Ki legzanp Zeova in kite pour nou dan sa domenn?
11 Zeova pa fer lapliferans, sa i en lot kalite atiran ki i annan. Ki savedir pa fer lapliferans? En dimoun ki pa fer lapliferans pa soutir ouswa pli kontan en dimoun ouswa keksoz plis ki en lot. I annan de laspe ki enplike ladan: latitid ek aksyon. Akoz sa de laspe i enportan? Parski zis ler en dimoun i annan sa latitid pour pa fer lapliferans ki i ganny motive pour tret lezot dan sa fason. Dan Lekritir Grek Kretyen, sa lekspresyon “pa fer preferans” i literalman vedir “pa get zis figir,” setadir pa pli kontan en figir plis ki en lot. (Akt 10:34; Kingdom Interlinear) En dimoun ki pa fer lapliferans pa konsantre lo laparans ek sityasyon en dimoun, me plito lo sa ki i vreman ete.
12 Zeova i sa pli bon legzanp pour pa fer lapliferans. Son Parol i dir ki i “pa fer preferans.” (Lir Akt 10:34, 35; Deterononm 10:17. *) En sityasyon ki ti leve dan letan Moiz i donn laprev ki Zeova pa fer lapliferans.
13, 14. (a) Ki sityasyon difisil sa senk fiy Zelofead ti fer fas avek? (b) Ki mannyer Zeova ti demontre ki i pa fer lapliferans?
13 Zis avan ki bann Izraelit ti antre dan Later Promiz, senk ser selibater ti fer fas avek en sityasyon difisil. Ki ti sa sityasyon? Zot ti konnen ki zot fanmir, parey lezot fanmir Izraelit ti pou resevwar en bout later ki ti’n ganny met dekote pour zot papa. (Nom. 26:52-55) Me, zot papa Zelofead ki ti sorti dan tribi Manase ti’n mor. Dapre koutim, propriyete Zelofead ti pou vin pour son bann garson, me malerezman i ti annan zis fiy. (Nom. 26:33) Vi ki i ti napa garson pour pran son propriyete, eski enn son fanmir pros ki ti pou erit sa propriyete e non pa son bann fiy?
14 Sa senk ser ti al vwar Moiz e ti demann li: “Akoz non nou papa i bezwen ganny oubliye parmi son bann fanmir lefet ki i napa garson?” Zot ti sipliye: “Donn nou en propriyete parmi bann frer nou papa.” Eski Moiz ti dir: ‘Mon pa kapab fer okenn leksepsyon an rapor avek sa lareg?’ Non, o kontrer i “ti prezant zot ka devan Zeova.” (Nom. 27:2-5) Avek ki rezilta? Zeova ti dir avek Moiz: “Bann fiy Zelofead in byen koze. Ou devret donn zot en propriyete konman leritaz parmi bann frer zot papa e ou devret pas leritaz zot papa avek zot.” Zeova ti fer plis ki sa. I ti fer sa leksepsyon vin en lareg par dir avek Moiz: “Si nenport ki zonm i mor e i napa okenn garson, alor ou devret pas son leritaz avek son bann fiy.” (Nom. 27:6-8; Zoz. 17:1-6) Apartir sa moman, tou bann madanm Izraelit ki ti fer fas avek menm sityasyon ti ganny proteze par sa lalwa.
15. (a) Ki mannyer Zeova i tret son pep, sirtou bann ki san proteksyon? (b) Ki lezot resi Labib ki montre ki Zeova pa fer lapliferans?
15 Pa sa i en bon desizyon ki montre ki Zeova pa fer lapliferans! Zeova ti tret sa bann madanm ki ti san proteksyon avek dinyite, zis parey i ti fer pour lezot Izraelit. (Ps. 68:5) Sa i enn parmi bann plizyer resi ki montre sa laverite ki tous leker: Zeova i tret tou son bann serviter san fer lapliferans.—1 Sam. 16:1-13; Akt 10:30-35, 44-48.
NOU KAPAB IMIT ZEOVA
16. Ki mannyer nou kapab imit Zeova pour pa fer lapliferans?
16 Ki mannyer nou kapab imit Zeova pour pa fer lapliferans? Pa oubliye, pa fer lapliferans i enplik de laspe. Si nou pa fer lapliferans nou pou tret lezot san fer okenn preferans. I vre, nou tou nou krwar ki nou annan en lespri ouver e ki nou pa fer lapliferans. Me ou pou dakor ki i pa touzour fasil pour egzamin nou santiman dan en fason onnet. Alor, ki nou kapab fer pour konnen si nou en dimoun ki pa fer lapliferans? Kan Zezi ti anvi konnen ki dimoun ti pe dir lo li, i ti demann avek son bann zanmi fidel: “Ki dimoun i dir lo Fis-de-Lonm?” (Mat. 16:13, 14) Akoz nou pa swiv legzanp Zezi? Ou kapab demann en zanmi ki pou onnet avek ou si ou en dimoun ki annan tandans pour fer lapliferans. Si i dir ou ki ou annan sa tandans pour annan lapliferans pour dimoun en serten ras, ran sosyal ouswa ki ris, ki ou pou fer? Priy Zeova par devid ou leker avek li, sipliy li pour ed ou imit li pour pa fer lapliferans.—Mat. 7:7; Kol. 3:10, 11.
17. Dan ki fason nou kapab tret lezot san fer lapliferans?
17 Dan kongregasyon, nou montre ki nou annan sa dezir pour pa fer lapliferans kan nou tret bann frer ek ser avek respe ek labonte leker. Par egzanp, ler nou demontre lospitalite i ti a byen pour envit nou bann frer ek ser, enkli bann ki annan diferan lorizin ki nou, osi byen ki bann pov, orfelen ouswa vev. (Lir Galat 2:10; Zak 1:27.) Deplis, ler nou prese, nou anons sa bon nouvel san fer okenn lapliferans, nou pres avek dimoun diferan lorizin, enkli bann ki sorti dan bann pei etranze. Nou kontan ki nou kapab ganny akse avek bann piblikasyon baze lo Labib dan plis ki 600 langaz. Pa sa i en laprev vizib ki Zeova pa fer lapliferans!
18. Ki mannyer ou pou montre ki ou apresye ki Zeova i abordab e i pa fer lapliferans?
18 An realite, si nou pran letan pour reflesir lo lefet ki Zeova i abordab e pa fer lapliferans, nou lapresyasyon pour li pou ogmante. An retour, sa pou fer nou imit plennman bann kalite Zeova e demontre sa bann kalite dan lafason ki nou azir anver nou bann frer ek ser, ek bann dimoun ki nou pres avek.
[Not anba lo paz]
^ par. 4 Psonm 145:18: “Zeova i pros avek tou bann ki kriy li, avek tou bann ki kriy li avek senserite.” Izai 30:18, 19: “18 E alor Zeova pou kontinyen espere pour demontre faver anver zot, e alor i pou leve pour demontre mizerikord anver zot. Parski Zeova i en Bondye zizman. Ere tou bann ki kontinyen esper li. 19 Kan sa pep ki Siyon pou reste Zerizalenm, sertennman ou pa pou plere. San fot i pou demontre faver anver ou kan i pou antann ou plere; zis konman i antann ou i pou reponn ou deswit.”
^ par. 12 Deterononm 10:17: “Akoz Zeova ou Bondye i Bondye bann bondye, e Senyer bann senyer, en gran Bondye, for e ekstraordiner, ki pa fer lapliferans anver personn e ki pa aksepte gous.”
[Kestyon]
[Portre lo paz 7]
[Portre lo paz 8]
“Zeova i pros avek tou bann ki kriy li.”—Ps. 145:18 (Vwar paragraf 9)
“Zeova ou Bondye . . . pa fer lapliferans pour personn.”—Det. 10:17 (Vwar paragraf 17)
[Portre lo paz 10]
Bann fiy Zelofead ti apresye ki Zeova pa fer lapliferans (Vwar paragraf 13, 14)
