Les ou ganny moule par disiplin Zeova
Les ou ganny moule par disiplin Zeova
“Avek ou konsey, ou pou gid mwan, e apre ou pou anmenn mwan ver laglwar.”—PS. 73:24.
KI OU POU REPONN?
Kwa ki montre ki sa Gran Potye pa fer nanryen par azar e pa fer lapliferans ler i disiplin en dimoun?
Akoz nou kontan ki nou Potye i “regrete”?
Ki mannyer nou devret reazir ler Zeova i konsey oubyen disiplin nou?
1, 2. (a) Ki nou bezwen fer si nou anvi annan en bon relasyon avek Zeova? (b) Ki mannyer nou pou benefisye si nou egzamin bann resi Labib lo lafason ki dimoun in reazir anver disiplin Bondye?
“TANDIS ki mwan, i bon pour mwan apros avek Bondye. Mon’n pran refiz dan Souvren Senyer Zeova, pour anons tou son travay.” (Ps. 73:28) La, sa psalmis ti pe eksprim son konfyans dan Bondye. Kwa ki ti fer li tonm lo sa bon konklizyon? Ler i ti vwar ki bann move dimoun ti paret pe viv anpe, o konmansman i ti dezapwente. I ti konplent: “I pour nanryen ki mon’n pirifye mon leker e lav mon lanmen dan linosans.” (Ps. 73:2, 3, 13, 21) Me ler i ti antre dan “gran sanktyer Bondye,” i ti dan en landrwa ki ti ed li koriz son fason panse e reste pros avek Bondye. (Ps. 73:16-18) Sa leksperyans ti montre sa zonm ki ti annan lakrent pour Bondye en leson enportan: Pour annan en relasyon pros avek Zeova, en dimoun i bezwen form parti pep Bondye, aksepte e aplik son konsey.—Ps. 73:24.
2 Nou osi nou ti a kontan annan en relasyon pros avek sa vre Bondye vivan. Pour atenn sa lobzektif, i enportan pour les son konsey oubyen disiplin moul nou pour ki nou vin bann dimoun ki fer li plezir. Dan lepase, Bondye ti demontre mizerikord anver bann dimoun, parler menm en nasyon antye, par donn zot sa loportinite pour aksepte son disiplin. Lafason ki zot ti reazir in ganny rikorde dan Labib “pour nou lansennyman” e “konman en lavertisman pour nou, ki’n ariv dan letan lafen.” (Rom. 15:4; 1 Kor. 10:11) Si nou egzamin o profon sa bann resi, nou pou konpran personnalite Zeova e nou pou vwar ki mannyer nou kapab benefisye ler nou les li moul nou.
KI MANNYER SA POTYE I EGZERS SON LOTORITE
3. Ki mannyer Izai 64:8 ek Zeremi 18:1-6 i dekrir lotorite Zeova lo bann dimoun? (Vwar portre anler.)
3 Pour dekrir lotorite Zeova lo serten dimoun ek nasyon, Izai 64:8 i dir: “O Zeova, ou nou Papa. Nou, nou larzil, e ou, ou nou Potye; e nou tou nou travay ou lanmen.” (Iza. 64:8) En potye i kapab fer sa ki i anvi avek larzil. Larzil pa kapab dir avek potye ki pou fer avek li. I parey pour imen ek Bondye. Imen pa kapab dir Bondye konman pour moul li, zis parey larzil pa kapab dir avek potye ki resipyan i pou fer avek li.—Lir Zeremi 18:1-6. *
4. Eski Bondye ti moul dimoun oubyen nasyon par azar? Eksplike.
4 Avek nasyon Izrael, Zeova ti demontre son abilite pour moul zot parey en potye i moul larzil. Me i annan en diferans ant en potye imen avek Zeova. En potye i kapab fer nenport kalite resipyan ki i konnen. Eski Zeova i moul dimoun oubyen nasyon par azar, setadir fer serten bon e serten move? Labib i dir non. Zeova in donn imen en kado presye, sa i sa liberte pour swazir. I pa egzers son lotorite dan en fason ki sa kado pa servi dan nanryen. Bann imen i devret swazir pour les Zeova, zot Kreater moul zot.—Lir Zeremi 18:7-10. *
5. Ler bann imen pa les Zeova moul zot, ki mannyer i egzers son lotorite lo zot?
5 Ki pou arive si imen pa les sa Gran Potye moul zot? Me, ki mannyer Bondye i egzers son lotorite konman en potye? Mazin sa ki arive avek larzil si sa potye pa arive fer sa resipyan ki i ti oule fer. I fer en lot resipyan avek ouswa i pa servi li. Ler larzil i nepli bon, normalman i lafot sa potye. Me, sa pa zanmen le ka avek nou Potye. (Det. 32:4) Ler en dimoun pa les Zeova moul li, i touzour son lafot. Zeova i adapte lafason ki i egzers son lotorite pour moul bann imen depandan lo lafason ki zot reazir. Bann ki byen reazir i ganny formen dan en bon fason. Par egzanp, bann Kretyen swazir in ‘ganny montre pitye’ akoz zot in ganny formen konman bann “vaz presye.” De lot kote, sa bann ki refize les Bondye moul zot “i merit son lakoler e pare pour destriksyon.”—Rom. 9:19-23.
6, 7. Ki mannyer Lerwa David ek Lerwa Sail ti diferan dan lafason ki zot ti reazir anver konsey Zeova?
6 En fason ki Zeova i moul bann imen i atraver konsey oubyen disiplin. Nou kapab vwar ki mannyer i egzers son lotorite lo bann ki i moule ler nou get legzanp sa de premye lerwa Izrael, Sail ek David. Kan Lerwa David ti komet adilter avek Bat-Seba, sa ti annan en move lefe lo li ek lezot. Kantmenm David ti lerwa, Zeova pa ti ezite pour disiplin li severman. Bondye ti anvoy profet Natann kot li avek en mesaz pwisan. (2 Sam. 12:1-12) Ki mannyer David ti reazir? Son leker ti ganny touse e i ti repantir. Lefet ki David ti repantir, Zeova ti demontre mizerikord anver li.—Lir 2 Samyel 12:13. *
7 Par kont, Lerwa Sail pa ti reazir dan en bon fason kan Zeova ti konsey li. Atraver profet Samyel, Zeova ti donn en lord kler avek Sail: Detrir tou bann Amalekit ek zot zannimo. Sail ti dezobeir lord Bondye. I pa ti touy Lerwa Agag ek bann pli bon zannimo. Akoz? I paret ki i ti fer sa pour anmenn laglwar lo li menm. (1 Sam. 15:1-3, 7-9, 12) Ler Sail ti ganny konseye, i ti’n devret les sa Gran Potye form li. Plito, Sail pa ti les Zeova moul li e i ti zistifye son move aksyon. I ti esey rod rezon pour sa ki i ti’n fer par dir ki i ti napa nanryen mal avek son aksyon vi ki sa bann zannimo ti pou ganny ofer konman en sakrifis, e pour li, konsey Samyel pa ti enportan. Zeova ti rezet Sail konman lerwa e Sail pa ti zanmen reganny son bon relasyon avek sa vre Bondye.—Lir 1 Samyel 15:13-15, 20-23. *
BONDYE PA FER LAPLIFERANS
8. Ki leson nou aprann atraver lafason ki nasyon Izrael ti azir ler Zeova ti moul zot?
8 Zeova i donn sak dimoun e osi bann nasyon sa loportinite pour les li moul zot. An 1513 A.N.L., bann garson Izrael ki ti’n ganny libere Lezip ti fer en lalyans pour annan en bon relasyon avek Bondye. Pep Izrael ti sa nasyon ki i ti’n swazir e zot ti annan sa privilez pour les sa Gran Potye moul zot lo son larou lapotri. Me, sa pep ti kontinyen fer sa ki move dan lizye Zeova, menm ador fo bondye bann nasyon ki ti dan zalantour. Zeova ti pe toultan anvoy bann profet pour fer zot sanz zot latitid, me bann Izraelit pa ti ekoute. (Zer. 35:12-15) Lefet ki zot ti teti, bann Izraelit ti bezwen ganny severman disiplinen. Parey en vaz oubyen resipyan ki merit destriksyon, sa dis tribi dan rwayonm nor ti ganny detrir par bann Asiryen e bann Babilonnyen ti fer parey avek sa de tribi dan sid. Pa sa i vreman en bon leson pour nou! Zeova pou moul nou si nou reazir dan sa bon fason.
9, 10. Ki mannyer bann zabitan Niniv ti reazir anver lavertisman Bondye?
9 Zeova ti osi donn bann dimoun dan lavil Niniv, kapital Lasiri sa loportinite pour reazir dan en bon fason anver son lavertisman. I ti dir avek Yona: “Leve, al Niniv sa gran lavil, e dir li ki son bann mesanste i devan mon lizye.” Niniv ti merit ganny detrir.—Yona 1:1, 2; 3:1-4.
10 Me ler Yona ti anons sa mesaz destriksyon, “bann zonm Niniv ti konmans met lafwa dan Bondye, e zot ti konmans zennen e met lenz goni, depi sa ki pli gran ziska sa ki pli pti parmi zot.” Zot lerwa “ti leve lo son tronn, i ti tir son lenz ofisyel lo li, i ti kouver li avek lenz goni e i ti asiz dan lasann.” Bann zabitan Niniv ti reazir dan en bon fason ler Zeova ti esey moul zot e zot ti repantir. An retour, Zeova pa ti anmenn maler lo zot.—Yona 3:5-10.
11. Ki kalite Zeova ti demontre ler i ti pe azir avek Izrael e avek Niniv?
11 Vi ki pep Izrael ti en nasyon ki Bondye ti’n swazir, sa pa vedir ki zot pa ti merit ganny disiplinen. De lot kote, bann zabitan Niniv pa ti dan en lalyans avek Bondye. Kantmenm sa, Zeova ti pas son mesaz zizman avek zot, e vi ki zot ti les Zeova moul zot parey larzil dan son lanmen, i ti demontre mizerikord anver zot. Pa sa de legzanp i montre klerman ki Zeova nou Bondye “pa fer lapliferans anver personn”!—Det. 10:17.
ZEOVA I REZONNAB E PARE POUR ADAPTE
12, 13. (a) Akoz Bondye i sanz son desizyon ler bann dimoun i les li moul zot? (b) Lefet ki Zeova ‘i regrete,’ ki sa ti vedir pour Sail e bann zabitan Niniv?
12 Lafason ki Bondye i anvi moul nou i montre ki i rezonnab e pare pour adapte. Nou vwar sa dan bann sityasyon kot Zeova i determinen pour pran aksyon baze lo son lazistis parfe kont bann dimoun, me apre i sanz son desizyon akoz lafason ki zot reazir. Konsernan premye lerwa Izrael, Labib i dir nou ki Zeova ‘ti regrete ki i ti’n fer Sail vin lerwa.’ (1 Sam. 15:11) Ler bann zabitan Niniv ti repantir e revin ver Bondye, Labib i dir: “Sa vre Bondye ti regrete akoz i ti’n dir i pou anmenn maler lo zot e i pa ti fer sa maler ariv lo zot.”—Yona 3:10.
13 Sa term Ebre ki’n ganny tradwir “ti regrete” i vedir en sanzman latitid oubyen lentansyon. Latitid Zeova anver Sail ti sanze, o konmansman i ti swazir li konman lerwa e apre i ti rezet li. Sa sanzman pa ti arive akoz Zeova ti’n tronpe dan son swa, me akoz Sail pa ti azir avek lafwa e i ti vin dezobeisan. Dan ka bann zabitan Niniv, sa vre Bondye ti regrete, andotmo i ti sanz son lentansyon anver zot. Pa i rekonfortan pour konnen ki Zeova nou Potye i rezonnab, pare pour adapte, i annan konpasyon ek mizerikord, e i pare pour sanz son desizyon ler bann ki pe fer sa ki mal i sanz zot latitid!
ANNOU PA REZET DISIPLIN ZEOVA
14. (a) Ki mannyer Zeova i moul nou ozordi? (b) Ki mannyer nou devret reazir ler Bondye i moul nou?
14 Ozordi, Zeova i moul nou premyerman par mwayen son Parol ek son lorganizasyon. (2 Tim. 3:16, 17) Eski pa nou devret aksepte nenport konsey oubyen disiplin ki nou resevwar par sa de mwayen? Nenport ki kantite lannen ki nou’n batize ouswa privilez ki nou’n gannyen, nou devret kontinyen ekout konsey Zeova par les li form nou e fer nou vin en vaz presye.
15, 16. (a) Ki santiman negatif en dimoun i kapab annan ler disiplin i enplik perdi privilez? Donn legzanp. (b) Kwa ki kapab ed nou sirmont bann santiman negatif ler nou ganny disiplinen?
15 Dan serten ka nou ganny disiplinen atraver lenstriksyon ouswa koreksyon. Me parler, nou ganny disiplinen akoz nou pa’n fer sa ki byen. Petet nou pou perdi serten privilez. Annou pran legzanp Dennis * ki ti en ansyen. I ti fer sa ki mal akoz en move zizman dan zafer biznes, e i ti ganny reprimande an prive. Ki mannyer Dennis ti santi sa zour swar kan i ti ganny anonse dan kongregasyon ki i ti nepli ansyen? I dir: “Mon ti santi konmsi mon ti’n fel. Diran plis ki 30 an, mon’n annan plizyer privilez. Mon’n fer pionye ordiner, servi dan Betel, ganny apwente konman asistan ministeryel e apre vin en ansyen. Mon ti’n fek fer mon premye diskour dan lasanble distrik. En sel kou, tou ti’n fini. Apard santi mwan onte e anbarase, mon ti mazinen ki mon ti nepli annan en plas dan lorganizasyon.”
16 Dennis ti bezwen sanz son latitid, aret fer sa keksoz mal ki ti’n fer li ganny korize. Me kwa ki ti ed li fer fas avek bann santiman negatif? I eksplike: “Mon ti determinen pour gard en bon labitid spirityel. Sa ki enportan osi i sipor ki mon ti gannyen avek bann frer ek ser ensi ki lankourazman dan nou bann piblikasyon. Sa lartik ‘Did You Once Serve? Can You Serve Again?’ (Eski ou’n deza servi? Eski ou kapab servi ankor?) dan Latour Veyer le 15 Out 2009 ti parey en let ki ti’n ganny ekrir espesyalman pour reponn mon lapriyer. Sa konsey ki mon ti pli apresye ti: ‘Vi ki ou napa bokou responsabilite dan kongregasyon, konsantre lo ranforsi ou spirityalite.’” Ki mannyer Dennis ti benefisye avek sa disiplin? Apre en serten lannen, i ti dir, “Zeova in beni mwan ankor akoz i’n donn mwan sa privilez pour servi konman en asistan ministeryel.”
17. Ler en dimoun i ganny ekskli, ki mannyer sa i kapab ed li retourn ver Zeova? Donn legzanp.
17 Ganny ekskli i en lot fason ki en dimoun i kapab ganny disiplinen avek Zeova. I protez kongregasyon kont move lenfliyans e ed sa enn ki’n fer pese pour retourn ver Zeova. (1 Kor. 5:6, 7, 11) Robert ti ekskli pour apepre 16 an. Son paran ek son bann frer ti ferm e ti aplik fidelman sa lord dan Parol Bondye pour pa asosye avek bann ki fer sa ki mal, e pour pa ni menm dir zot bonzour. I fer detrwa lannen depi ki Robert in ganny reentegre e i pe byen progrese spirityelman. Ler i ti ganny demande kwa ki ti motiv li pour retourn ver Zeova ek Son pep apre tou sa lannen, i ti reponn ki sa ti akoz lafason ki son fanmir ti respekte standar Zeova konsernan en dimoun ekskli. I ti osi dir: “Si mon fanmir ti pas zis en ptigin letan avek mwan zis pour gete ki mannyer mon ete, sa ptigin letan ti pou sifi pour fer mwan kontan e sa pa ti pou donn mwan okenn lanvi pour fer zefor pour retourn ver Bondye.”
18. Ki kalite larzil nou devret ete dan lanmen sa pli Gran Potye?
18 Petet nou pa pou bezwen ganny menm disiplin, me ki kalite larzil nou pou ete dan lanmen sa Gran Potye? Ki mannyer nou pou reazir ler nou ganny disiplinen? Eski nou pou fer parey David oubyen Sail? Sa Gran Potye i nou Papa. Pa zanmen oubliye ki “Zeova i reprimann sa enn ki i kontan, parey en papa ki pran plezir dan son garson i fer.” Alor, “pa rezet disiplin Zeova, e pa deteste son reprimann.”—Prov. 3:11, 12.
[Not anba lo paz]
^ par. 3 Zeremi 18:1-6: “1 Zeova ti koz avek Zeremi, an dizan: 2 ‘Leve, e ou bezwen desann kot lakaz sa potye, e laba mon pou fer ou antann mon parol.’ 3 Alor, mon ti desann kot lakaz sa potye, e la i ti pe travay lo larou lapotri. 4 Sa resipyan ki i ti pe fer avek larzil ti gate dan lanmen sa potye, i ti rekonmanse e i ti konmans fer en lot resipyan, enn ki ti paret bon dan lizye sa potye pour fer. 5 Zeova ti koz ankor en fwa avek mwan an dizan: 6 ‘O pep Izrael, eski mon pa kapab azir anver zot parey sa potye?’ se sa ki Zeova i dir. ‘Gete! O pep Izrael! Zis parey larzil dan lanmen sa potye, zot parey dan mon lanmen.’”
^ par. 4 Zeremi 18:7-10: “7 Nenport moman ki mon koz kont en nasyon e kont en rwayonm pour derasin li, zet li ater, e detri li, 8 wi si sa nasyon i aret fer sa ki mon dir i mal, mon pou regret sa maler ki mon ti’n mazinen pour anmenn lo li. 9 Me nenport moman ki mon koz lo en nasyon e lo en rwayonm pour konstri li e plant li, 10 wi si sa nasyon i fer sa ki mal dan mon lizye e pa obeir mon parol, alor mon pou vreman regret dibyen ki mon’n dir mon ti pou fer pour son byennet.”
^ par. 6 2 Samyel 12:13: “Alor David ti dir avek Natann: ‘Mon’n fer pese kont Zeova.’ Me Natann ti dir avek David: ‘Lo son kote Zeova in vreman pardonn ou pese. Ou pa pou mor.’”
^ par. 7 1 Samyel 15:13-15: “13 Finalman Samyel ti al kot Sail, e Sail ti dir li: ‘Ki ou ganny beni avek Zeova. Mon’n fer sa ki Zeova in dir.’ 14 Me Samyel ti dir: ‘Be, ki sa tapaz mouton dan mon zorey i vedir, e akoz mon pe tann bef kriye?’ 15 Alor, Sail ti reponn: ‘Zot in vin avek sorti kot bann Amalekit, akoz sa pep ti annan konpasyon pour bann pli bon mouton ek bann pli bon bef, pour zot sakrifye pour Zeova ou Bondye; me sa ki ti reste nou’n detrir.’” 20-23: “20 Me Sail ti dir avek Samyel: ‘Mon’n obeir lavwa Zeova vi ki mon’n al sa misyon, sa ki Zeova ti anvoy mwan fer, e mon’n anmenn Agag lerwa Amalek, me mon’n detrir Amalek. 21 Sa pep ti pran bann pli bon mouton ek bef parmi bann depouy ki ti merit ganny detrir, pour sakrifye avek Zeova ou Bondye, Gilgal.’ 22 Alor Samyel ti dir: ‘Eski Zeova i pran plis plezir dan bann lofrann brile ek bann sakrifis ki dan obeir lavwa Zeova? Ekoute! Obeir Bondye i pli bon ki ofer en sakrifis, i pli bon ekoute ki ofer lagres mouton; 23 akoz rebelyon i parey pese pour devinen e lorgey i parey avek servi pouvwar mazik ek terafim. Vi ki ou’n rezet parol Zeova, li osi in rezet ou pour ki ou nepli lerwa.’”
^ par. 15 Non in ganny sanze.
[Kestyon]
[Portre lo paz 24]
[Portre lo paz 26]
Sail ti rod leskiz e pa ekout konsey. I pa ti les Bondye moul li (Vwar paragraf 7)
David ti regrete e i ti aksepte konsey. I ti les Bondye moul li. Eski ou koumsa? (Vwar paragraf 6)
