‘Dir nou kan tousala pou arive?’

“Ki siny ki pou endik ou [“prezans ek konklizyon sa sistenm,” NW]?”​—MAT. 24:3.

KI OU POU REPONN?

Ki similarite i annan ant sa de lakonplisman profesi Zezi konsernan gran ladetres?

Ki lefe sa parabol konsernan mouton ek kabri i annan lo lafason nou konsider nou minister?

Dan Matye sapit 24 ek 25, avek ki letan Zezi ti pe refer kan i ti koz lo son larive?

1. Parey bann zapot, ki nou vreman anvi konnen?

ZEZI ti pros pour termin son minister lo later, e son bann disip ti vreman anvi konnen ki ti pou arive dan lavenir. Alor, zis detrwa zour avan son lanmor, kat son zapot ti demann li: “Kan tousala pou arive, e ki siny ki pou endik ou [“prezans ek konklizyon sa sistenm,” NW]?” (Mat. 24:3; Mark 13:3) Pour reponn zot, Zezi ti koz lo en profesi ki annan plizyer lakonplisman ki ganny trouve dan Matye sapit 24 ek 25. Dan sa profesi, Zezi ti predir plizyer levennman enportan. Son parol i annan en gran sinifikasyon pour nou akoz nou osi nou vreman anvi konnen ki pou arive dan lavenir.

2. (a) Diran bann lannen ki’n pase, konsernan kwa nou ti anvi konpran pli klerman? (b) Ki sa trwa kestyon nou pou egzaminen?

² Diran bann lannen ki’n pase, atraver lapriyer, bann serviter Zeova in etidye o profon profesi Zezi konsernan bann dernyen zour. Zot ti vreman anvi konpran pli klerman kan ki parol Zezi ti pou ganny akonplir. Pour vwar ki mannyer nou’n arive ganny en pli bon konprenezon, annou egzamin trwa kestyon ki konmans avek “kan.” Kan ki “gran ladetres” i konmanse? Kan ki Zezi i ziz “bann mouton” ek “bann kabri”? Kan ki Zezi i “vini” ouswa arive?​—Mat. 24:21, NW; 25:31-33.

KAN KI GRAN LADETRES I KONMANSE?

3. Dan lepase, kan ki nou ti krwar gran ladetres ti konmanse?

³ Pour plizyer lannen, nou ti krwar ki gran ladetres ti konmans avek Premye Lager Mondyal an 1914 e ki Zeova ti’n “diminyen” sa bann zour an 1918 kan sa lager ti terminen, pour ki bann Kretyen swazir ki ankor lo later i ganny sans pres sa bon nouvel avek tou nasyon. (Mat. 24:21, 22) Apre ki sa travay predikasyon ti pou terminen, lemonn Satan an antye ti pou ganny detrir. Dan sa fason, nou ti krwar ki sa gran ladetres ti pou annan trwa faz: I ti pou annan en  konmansman (1914-1918), sa ladetres ti pou ganny enteronpe (depi 1918 an montan) e i ti pou termin avek Armagedon.

4. Ki nou’n arive konpran lo profesi Zezi konsernan bann dernyen zour?

⁴ Me, kan nou’n egzamin profesi Zezi pli o profon ankor, nou’n konpran ki en parti profesi Zezi konsernan bann dernyen zour i annan de lakonplisman. (Mat. 24:4-22) I ti annan en premye lakonplisman Zide dan premye syek N.L., e i pou annan en lakonplisman global dan nou letan. Apre ki nou’n konpran sa, bokou lezot keksoz in vin pli kler ankor pour nou. *

5. (a) Ki lepok difisil ki ti konmanse an 1914? (b) Dan en sans senbolik, sa “douler” ti koresponn avek ki lepok dan premye syek?

⁵ Nou’n osi konpran ki premye parti sa gran ladetres pa ti konmans an 1914. Akoz? Parski dapre profesi Labib, sa gran ladetres ti pou konmans avek en latak lo fo larelizyon e non pa par en lager ant bann nasyon. Alor, bann levennman ki ti konmanse an 1914 pa ti konmansman gran ladetres, me plito i ti “bann premye douler” dan en sans senbolik. (Mat. 24:8) Sa “douler” i koresponn avek sa ki ti arive Zerizalenm ek Zide lannen 33 N.L. ziska 66 N.L.

6. Kwa ki pou deklans konmansman gran ladetres?

⁶ Kwa ki pou deklans konmansman gran ladetres? Zezi ti predir: “Kan zot a war sa [“keksoz degoutan ki anmenn,” NW] dezolasyon ki profet Danyel ti koz lo la, debout dan landrwa Sen, (ki sa ki lir i konpran.) Alor fodre bann ki dan Zide, sov dan montanny.” (Mat. 24:15, 16) Dan premye lakonplisman sa profesi, larme Romen (“sa keksoz degoutan”) ti “debout dan landrwa sen” an 66 N.L. ler i ti atak Zerizalenm ek son tanp (en landrwa sen pour bann Zwif). Dan pli gran lakonplisman sa profesi, Nasyon-z-ini (“sa keksoz degoutan” dan nou letan) pou “debout,” dan sa sans ki  i pou atak bann larelizyon Kretyen (ki en keksoz sen pour bann swadizan Kretyen) ek leres Gran Babilonn. Revelasyon 17:16-18 osi i dekrir sa menm latak. Gran ladetres pou konmans par sa levennman.

7. (a) Dan ki fason bann Kretyen swazir ti ganny “sove” dan premye syek? (b) Ki nou ekspekte pou arive a lavenir?

⁷ Zezi ti osi predir: “Sa bann zour [pou] ganny diminyen.” Premye lakonplisman sa profesi ti ariv an 66 N.L. ler larme Romen ti “diminyen” oubyen aret zot latak. Apre sa, bann Kretyen swazir Zerizalenm ek Zide ti kit sa lavil ek rezyon pour ki zot ganny “sove.” (Lir Matye 24:22; Mal. 3:17.) Alor, ki nou ekspekte pou arive pandan sa gran ladetres ki pe vini? Zeova pou “diminyen” oubyen aret sa latak ki Nasyon-z-ini pou fer lo fo larelizyon parski i pa pou permet ki vre larelizyon i ganny detrir ansanm avek sa ki fo. Dan sa fason, pep Bondye pou sirman ganny sove.

8. (a) Ki levennman pou arive apre ki premye parti gran ladetres i terminen? (b) Kan ki dernyen manm sa 144,000 pou aparaman ganny son rekonpans dan lesyel? (Vwar osi lezot not.)

 ⁸ Ki pou arive apre ki premye parti sa gran ladetres i terminen? Parol Zezi i endike ki i pou annan en enterval ant premye parti sa gran ladetres ziska konmansman Armagedon. Ki levennman pou arive pandan sa enterval? Larepons i dan Ezekyel 38:14-16 ek Matye 24:29-31. (Lir.) * Apre sa, nou pou temwanny Armagedon ki pou termin sa gran ladetres, e i koresponn avek destriksyon Zerizalenm lannen 70 N.L. (Mal. 4:1) Lager Armagedon, ki pou termin sa gran ladetres pou en levennman inik, i pou “pli terib ki tou sa ki’n deza annan avan, depi konmansman lemonn.” (Mat. 24:21) Apre ki i’n terminen, Renny Milener Kris pou konmanse.

9. Ki lefe profesi Zezi konsernan gran ladetres i annan lo pep Zeova?

⁹ Sa profesi konsernan gran ladetres  i vreman fortifye nou. Akoz? Parski i asir nou ki nenport ki difikilte nou pou rankontre, pep Zeova konman en group pou sirviv sa gran ladetres. (Rev. 7:9, 14) Pli enportan ankor, nou vreman kontan akoz zour Armagedon, Zeova pou zistifye son souvrennte e i pou sanktifye son non sen.​—Ps. 83:18; Ezek. 38:23.

KAN KI ZEZI I ZIZ BANN MOUTON EK BANN KABRI?

10. Dan lepase, kan ki nou ti krwar zizman bann mouton ek kabri ti konmanse?

¹⁰ Aprezan, annou egzaminen kan ki en lot parti profesi Zezi i ganny akonplir e sa i annan pour fer avek sa parabol konsernan zizman bann mouton ek kabri. (Mat. 25:31-46) Oparavan, nou ti krwar ki bann dimoun ti pou ganny zize konman mouton ouswa kabri depi o konmansman bann dernyen zour ki ti konmans an 1914. Nou ti mazinen ki sa bann ki rezet mesaz Rwayonm e ki ti mor avan konmansman gran ladetres ti pou mor konman bann kabri, san okenn lespwar pour ganny resisite.

11. Akoz i pa posib ki dimoun ti konmans ganny zize konman mouton ouswa kabri an 1914?

¹¹ An 1995, Latour Veyer ti reeksplik Matye 25:31 an dizan: “Kan Fis-de-Lonm pou vini dan son laglwar avek tou son bann lanz, i pou asiz lo son tronn laglwar.” I ti montre ki Zezi ti vin Lerwa Rwayonm Bondye an 1914, me i pa ti ankor “asiz lo son tronn laglwar” konman Ziz pour ‘tou bann nasyon.’ (Mat. 25:32; konpar Danyel 7:13.) Par kont, sa parabol konsernan bann mouton ek kabri i premyerman dekrir Zezi konman en Ziz. (Lir Matye 25:31-34, 41, 46.) Vi ki Zezi pa ti ankor aktif konman Ziz pour tou bann nasyon an 1914, i pa kapab ki bann dimoun ti pe konmans ganny zize konman mouton ouswa kabri sa lannen. * Me savedir, kan ki Zezi ti pou konmans zize?

12. (a) Kan ki Zezi pou azir konman Ziz pour tou nasyon pour premye fwa? (b) Ki levennman Matye 24:30, 31 ek Matye 25:31-33, 46 i koz lo la?

 ¹² Profesi Zezi konsernan bann dernyen zour i montre ki Zezi pou azir pour premye fwa konman Ziz pour tou bann nasyon apre destriksyon fo larelizyon. Parey  paragraf 8 in montre, serten levennman ki pou arive pandan sa letan i ganny trouve dan Matye 24:30, 31. Kan ou egzamin sa bann verse, ou pou remarke ki la Zezi pe predir bann levennman ki parey avek sa bann ki i ti koz lo la dan sa parabol lo bann mouton ek kabri. Par egzanp, Fis-de-Lonm pou vini dan son laglwar avek tou son bann lanz, tou tribi ek nasyon pou ganny rasanble devan li, e bann ki ganny zize konman mouton pou “lev zot latet anler” akoz zot pou ganny “lavi eternel.” * Sa bann ki pou ganny zize konman kabri pou “lamante,” akoz zot pou realize ki zot pou ganny “pinisyon eternel,” andotmo, detrir konpletman.​—Mat. 25:31-33, 46.

13. (a) Kan ki Zezi pou ziz bann dimoun konman mouton ouswa kabri? (b) Ki lefe sa konprenezon i annan lo lafason nou konsider nou minister?

 ¹³ Alor, ki konklizyon nou kapab tonm lo la? Zezi pou ziz tou nasyon konman mouton ouswa kabri kan i pou vini pandan gran ladetres. Apre sa, zour Armagedon, sa levennman ki pou termin sa gran ladetres, bann ki resanble kabri pou ganny detrir pour touzour. Ki lefe sa konprenezon i devret annan lo lafason nou konsider nou minister? I ed nou konpran ki predikasyon i vreman enportan. Ziska ki gran ladetres i konmanse, bann dimoun i kontinyen annan sa loportinite pour sanz zot fason panse e konmans mars lo sa semen etrwat “ki anmenn dan lavi.” (Mat. 7:13, 14) An tou ka, la konmela dimoun pe demontre bann latitid parey mouton ouswa kabri.  Me kantmenm sa, nou devret touzour rapel ki zizman final konsernan lekel ki mouton e lekel ki kabri pou arive pandan gran ladetres. Alor, nou annan bon rezon pour kontinyen ofer dimoun sa sans pour ekoute e reazir anver sa mesaz Rwayonm.

KAN KI ZEZI I VINI OUSWA ARIVE?

14, 15. Ki sa kat verse ki refer avek ler Zezi pou vini konman Ziz dan lavenir?

¹⁴ Ler nou egzamin profesi Zezi pli o profon ankor, eski nou bezwen fer lezot azisteman lo nou konprenezon an rapor avek letan ki lezot levennman enportan i arive? Larepons i dan sanmenm sa profesi. Annou vwar ki mannyer.

¹⁵ Dan sa parti son profesi dan Matye 24:29–25:46, Zezi ti premyerman met lanfaz lo sa ki ti pou arive pandan sa bann dernyen zour e pandan sa gran ladetres ki pe vini. Dan sa profesi, Zezi ti refer wit fwa avek ler ki i pou “vini” ouswa arive. * Konsernan gran ladetres, i ti dir: “Zot pou war Fis-de-Lonm vini lo nyaz.” “Zot pa konnen ki zour zot Senyer pou arive.” “Fis-de-Lonm pou vini ler ki zot pa pe ekspekte li.” Deplis, dan son parabol lo mouton ek kabri, Zezi ti dir: “Fis-de-Lonm pou vini dan son laglwar.” (Mat. 24:30, 42, 44; 25:31, nou ki’n met an italik.) Tou le kat referans i aplik avek ler Zezi pou vini konman Ziz dan lavenir. Kote dan profesi Zezi ki nou trouv sa kat lezot referans?

16. Ki sa kat lezot verse ki refer avek ler Zezi pou vini ouswa arive?

¹⁶ Konsernan lesklav fidel e pridan, Zezi ti dir: “Ere sa serviter [oubyen “lesklav,” NW] ki son met i war li pe fer son devwar ler i arive!” Dan sa parabol lo bann vyerz, Zezi ti dir: “Letan zot ti’n al aste delwil, nouvo marye ti arive [“vini,” Kingdom Interlinear].” Dan sa parabol konsernan talan, Zezi ti rakonte: “Apre en bon pe letan, met sa bann serviter ti retournen [oubyen “vini,” NW].” Dan sa menm parabol, sa met ti dir: “Ler mon ti a retournen [“vini,” Int] mon ti a ganny mon larzan.” (Mat. 24:46; 25:10, 19, 27, nou ki’n met an italik.) Sa kat moman kot Zezi i vini oubyen arive pe refer avek ki letan?

17. Ki nou ti dir konsernan larive Zezi dan Matye 24:46?

 ¹⁷ Dan lepase, dan nou bann piblikasyon nou ti dir ki sa kat dernyen referans i aplik avek larive ouswa ler Zezi ti vini an 1918. Konman legzanp, get parol Zezi konsernan “lesklav fidel e pridan.” (Lir Matye 24:45-47. *) Nou ti krwar ki sa lekspresyon “arive” dan verse 46 ti relye avek sa letan ler Zezi ti vini pour enspekte kondisyon spirityel bann Kretyen swazir an 1918 e ki sa Met ti met sa lesklav ansarz tou son byen an 1919. (Mal. 3:1) Me, apre ki profesi Zezi in ganny egzaminen pli o profon, nou’n bezwen aziste nou konprenezon lo dat ki serten laspe profesi Zezi i arive. Akoz?

18. Kan nou egzamin profesi Zezi an antye, ki konklizyon nou tonm lo la konsernan son larive?

¹⁸ Dan bann verse avan Matye 24:46, dan en fason konsistan, sa mo “arive” i refer avek sa letan ler Zezi i vini pour egzekit zizman pandan gran ladetres. (Mat. 24:30, 42, 44) An plis ki sa, parey nou ti vwar dan  paragraf 12, Matye 25:31 i dir ki Zezi pou “vini,” e sa pe refer avek sa menm letan zizman a lavenir. Alor, i fer sans pour tonm lo sa konklizyon ki ler Zezi i vini pour apwent sa lesklav fidel pour ansarz tou son byen parey Matye 24:46, 47 i dir, i pe osi aplik a lavenir kan i pou vini, pandan gran ladetres. * Anfet, kan nou egzamin profesi Zezi an antye, i kler ki tou le wit referans avek son larive i aplik a lavenir kan i pou zize pandan gran ladetres.

19. Ki azisteman dan nou konprenezon nou’n egzaminen e ki kestyon nou pou reponn dan lezot lartik ki swiv?

¹⁹ Ki nou’n aprann? O konmansman sa lartik, nou ti demann trwa kestyon ki konmans avek “kan.” Nou ti premyerman vwar ki sa gran ladetres pa ti konmans an 1914, me i pou konmanse kan Nasyon-z-ini i atak Gran Babilonn. Apre, nou ti revwar akoz ki zizman Zezi konsernan mouton ek kabri pa ti konmans an 1914 me ki i pou arive pandan gran ladetres. Finalman, nou’n vwar ki Zezi pa ti vini pour apwent sa lesklav fidel pour ansarz tou son byen an 1919, me ki sa pou ganny fer pandan gran ladetres. Alor, larepons pour tou le trwa kestyon “kan” i tonm dan menm letan a lavenir e sa se pandan gran ladetres. Ki lefe sa azisteman pou annan lo lafason ki nou konpran sa legzanp lo sa lesklav fidel? An plis ki sa, ki lefe i annan lo lafason ki nou konpran lezot parabol ouswa legzanp Zezi ki pe ganny akonplir pandan sa letan lafen? Sa bann kestyon enportan pou ganny diskite dan sa bann lartik ki swiv.

[Not anba lo paz]

LEZOT NOT: (I devret ganny lir konman not anba paz dapre son paragraf.)

[Not anba lo paz]

[Kestyon]

[Portre lo paz 3]

[Bwat lo paz 4, 5]

GRAN LADETRES E APRE

LAKONPLISMAN DAN NOU LETAN

BANN DERNYEN ZOUR

LEVENNMAN KI KORESPONN AVEK PREMYE SYEK

Nasyon-z-ini (“keksoz degoutan”) pou atak bann larelizyon Kretyen (“landrwa sen”) ek larestan fo larelizyon (Rev. 17:16-18)

DESTRIKSYON FO LARELIZYON

Larme Romen (“keksoz degoutan”) ti atak Zerizalenm ek son tanp (“landrwa sen”)

“Sa keksoz degoutan ki . . . debout dan landrwa sen” (Mat. 24:15, 16)

(Vwar paragraf 6)

Zeova pou “diminyen” oubyen aret sa latak lo fo larelizyon;

pep Bondye pou ganny sove

Larme Romen ti aret son latak; bann Kretyen Zerizalenm ek Zide ti sove

“Sa bann zour in ganny diminyen akoz son pep ki in swazir” (Mat. 24:22)

(Vwar paragraf 7)

PA KONN LONGER LETAN

Zezi pou ziz bann dimoun tou nasyon konman mouton ouswa kabri (Mat. 25:31-46)

(Vwar paragraf 12, 13)

ENTERVAL

“Deswit apre sa letan ladetres, . . . ” (Mat. 24:29-31)

(Vwar paragraf 8)

Zezi pou met sa lesklav fidel ansarz “tou son byen” (Mat. 24:46, 47)

(Vwar paragraf 18)

Destriksyon bann nasyon (Rev. 16:16)

ARMAGEDON

Destriksyon Zerizalenm

RENNY MILENER KRIS I KONMANSE

[Portre]

[Portre]

[Portre lo paz 7]

Ziska ki gran ladetres i konmanse, bann dimoun i ankor annan letan pour sanz zot fason panse (Vwar  paragraf 13)