Zezi i servi en ptigin pour nouri en kantite

“[Zezi] ti kas sa bann dipen an morso e donn son bann disip. Bann disip ti partaz avek lafoul.”​—MAT. 14:19.

KI OU POU REPONN?

Ki metod Zezi ti servi pour nouri lafoul?

Ki mannyer Zezi ti servi bann zapot ek ansyen Zerizalenm?

Kan ki i ti’n ariv ler pour Kris apwent en mwayen organize pour fourni nouritir spirityel?

1-3. Dekrir ki mannyer Zezi ti nouri en lafoul o bor Betsayda. (Vwar portre anler.)

ESEY vwar sa senn dan ou lespri. (Lir Matye 14:14-21.) Zis avan Lapak lannen 32 N.L. En lafoul apepre 5,000 zonm, san kont bann madanm ek zanfan i avek Zezi ek son bann disip dan en landrwa izole o bor Betsayda, en vilaz dan nor lakot Lanmer Galile.

² Apre ki i vwar lafoul, Zezi i pran pitye pour zot, alor i geri bann malad parmi zot e ansenny zot en kantite keksoz konsernan Rwayonm Bondye. Ler tar pe fer, bann disip i sipliy Zezi pour les lafoul ale pour ki zot al dan bann vilaz dan zanmirant pour aste zot manze. Me Zezi i dir son bann disip: “Zot menm donn sa bann dimoun keksoz pour manze.” Son parol i sirprann zot akoz sa ki zot ti annan avek zot pa ti bokou. Zot ti annan zis senk dipen ek de pti pwason.

³ Pouse par pitye, Zezi i fer en mirak. Sa sel mirak ki tou le kat ekriven Levanzil i koz lo la. (Mark 6:35-44; Lik 9:10-17; Zan 6:1-13) Zezi i fer son disip dir lafoul asiz lo zerb par group 50 ek 100. Apre ki i fer en lapriyer, i konmans kas dipen ek pwason an morso. Desito i fini, olye donn sa bann dimoun manze li menm, Zezi i “donn son bann disip pour distribye avek bann dimoun.” Dan en fason mirakile, i annan plis ki ase manze pour tou dimoun! Zis mazinen: Zezi ti servi en ptigin disip pour nouri en lafoul. *

4. (a) Zezi ti pli konsernen avek donn ki kalite nouritir e akoz? (b) Ki nou pou diskite dan sa lartik ek lot ki swiv?

⁴ Zezi ti pli enterese pour donn nouritir spirityel son bann disip. I ti konnen ki pran nouritir spirityel, sa laverite dan Parol Bondye, i anmenn ver lavi eternel. (Zan 6:26, 27; 17:3) Pouse par sa menm konpasyon ki ti motiv li pour donn lafoul dipen ek  pwason, Zezi ti pran en ta letan pour personnelman ansenny son bann disip. (Mark 6:34) Me i ti konnen ki son letan lo later ti kourt e ki i ti pou retourn dan lesyel. (Mat. 16:21; Zan 14:12) Apre ki i ti pou’n retourn dan lesyel, ki mannyer Zezi ti pou kontinyen nouri son bann disip lo later spirityelman? I ti pou swiv menm metod. I ti pou servi en ptigin pour nouri en kantite. Me, lekel sa ptigin ki i ti pou servi? Annou vwar ki mannyer Zezi ti servi en ptigin zapot pour nouri en kantite Kretyen swazir dan premye syek. Apre, dan lot lartik nou pou reponn sa kestyon ki annan en gran lenportans pour nou tou: Ki mannyer nou kapab idantifye sa ptigin ki Kris i servi pour nouri nou ozordi?

ZEZI I SWAZIR SA PTIGIN

5, 6. (a) Ki gro desizyon Zezi ti fer pour fer sir ki son bann disip i ganny byen nouri spirityelman apre son lanmor? (b) Ki mannyer Zezi ti prepar son bann zapot pour zot rol enportan apre son lanmor?

⁵ En sef fanmir responsab i fer laranzman pour ki son fanmir i ganny pran swen avek apre son lanmor. Pareyman, Zezi, ki plitar ti pou vin Sef kongregasyon Kretyen ti fer laranzman pour ki son bann disip i ganny pran swen avek spirityelman apre son lanmor. (Efe. 1:22) Par egzanp, apepre de-z-an avan i mor, Zezi ti fer en gro desizyon. I ti swazir sa premye ptigin dimoun ki plitar i ti pou servi pour nouri en kantite dimoun. Get sa ki ti arive.

⁶ Apre ki i ti’n priye tou lannwit, Zezi ti rasanble son bann disip e i ti swazir 12 parmi pour vin son zapot. (Lik 6:12-16) Pour sa de-z-an ki ti swiv, i ti pli pros avek sa 12 zapot, i ti ansenny zot par son parol ek legzanp. I ti konnen ki i ti annan bokou pour zot aprann. Anfet, zot ti kontinyen ganny apele “disip.” (Mat. 11:1; 20:17) I ti donn zot bann konsey personnel ki ti presye e i ti form zot bokou dan predikasyon. (Mat. 10:1-42; 20:20-23; Lik 8:1; 9:52-55) I evidan ki i ti pe prepar zot pour en rol enportan ki zot ti pou zwe apre son lanmor e kan i retourn dan lesyel.

7. Ki mannyer Zezi in donn nou en lide konsernan priyorite son bann zapot?

⁷ Ki rol son bann zapot ti pou annan? Anmezir Lapannkot lannen 33 N.L. ti aprose, i ti kler ki bann zapot ti pou annan en “fonksyon konman sirveyan.” (Akt 1:20, NW) Me, kwa ki ti pou zot priyorite? Apre son rezireksyon, Zezi ti donn nou en lide dan en konversasyon ki i ti annan avek zapot Pyer. (Lir Zan 21:1, 2, 15-17.) Dan prezans serten lezot zapot, Zezi ti dir Pyer: “Pran swen avek mon bann mouton.” An dizan sa parol, Zezi ti pe endike ki son bann zapot ti pou parmi sa ptigin ki ti pou ganny servi pour donn nouritir spirityel bokou dimoun. Sa i vreman tousan e pe montre nou ki mannyer Zezi i santi anver son bann pti “mouton,” pa i vre? *

NOURI EN KANTITE DEPI LAPANNKOT

8. Ki mannyer bann nouvo krwayan zour Lapannkot ti montre ki zot ti rekonnet klerman sa mwayen ki Kris ti pe servi?

⁸ Konmansman Lapannkot 33 N.L., Zezi ki ti’n resisite ti servi son bann zapot konman en mwayen par ki i ti pou nouri leres Kretyen swazir lo later. (Lir Akt 2:41, 42.) Sa mwayen ti klerman ganny rekonnet par bann Zwif ek bann ki ti’n konverti dan larelizyon Zwif ki ti vin Kretyen swazir sa zour. San okenn lezitasyon, zot ti “pas bokou letan pour aprann avek bann zapot.” Dapre en spesyalis Labib, sa mo Grek ki’n ganny tradwir “pas bokou letan” i kapab vedir  “vreman fidel e annan en sel panse anver en serten aksyon.” Sa bann nouvo krwayan ti annan en gran lanvi pour nouritir spirityel e zot ti konnen egzakteman kote zot ti pou ganny li. Zot ti touzour rod led bann zapot pour eksplik zot parol ek aksyon Zezi e pour ed zot konpran sinifikasyon lekritir ki ti aplik avek li. *​—Akt 2:22-36.

9. Ki mannyer bann zapot ti montre ki zot ti pran o serye zot responsabilite pour nouri mouton Zezi?

⁹ Bann zapot ti pran o serye zot responsabilite pour nouri troupo Zezi. Par egzanp, remarke ki mannyer zot ti rezourd en problenm delika ki ti’n kapab diviz sa kongregasyon ki ti’n fek formen. Anfet, sa problenm ti enplik nouritir e sa se nouritir fizik. Bann vev ki ti koz Grek ti pe ganny neglize dan distribisyon manze, me bann vev ki ti koz Ebre pa ti pe ganny neglize. Ki mannyer bann zapot ti rezourd sa problenm? Sa “douz zapot” ti apwent set frer kalifye pour desarz sa “responsabilite,” setadir, pour distribye manze. Sa bann zapot ki petet laplipar ti partisipe pour donn manze sa lafoul ki Zezi ti nouri atraver mirak ti trouve ki i ti pli enportan pour zot konsantre lo nouritir spirityel. Alor, zot ti devoue dan “predikasyon.”​—Akt 6:1-6.

10. Ki mannyer Kris ti servi bann zapot ek ansyen ki ti Zerizalenm?

¹⁰ Ver lannen 49 N.L., i ti annan serten ansyen kalifye ki ti zwenn ansanm avek bann zapot ki ti ankor vivan. (Lir Akt 15:1, 2.) “Bann zapot ek bann ansyen” Zerizalenm ti servi konman konsey direkter. Konman Sef kongregasyon, Kris ti servi sa pti group zonm kalifye pour regle bann problenm ki annan pour fer avek krwayans bann Kretyen, pour sirvey e diriz predikasyon e ansenny sa bon nouvel lo Rwayonm.​—Akt 15:6-29; 21:17-19; Kol. 1:18.

11, 12. (a) Kwa ki montre ki Zeova ti pe beni sa mwayen ki son Garson ti servi pour nouri bann kongregasyon dan premye syek? (b) Ki mannyer sa mwayen ki Kris ti servi pour donn nouritir spirityel ti klerman ganny rekonnet?

¹¹ Eski Zeova ti beni sa mwayen ki son Garson ti servi pour nouri bann kongregasyon dan premye syek? Definitivman! Ki mannyer nou kapab asire? Liv Akt i eksplike: “Dan bann lavil kot [zapot Pol ek bann ki ti vwayaz avek li] ti pase, zot ti konminik desizyon  ki bann zapot ek bann ansyen dan Zerizalenm ti pran. Ensi bann [“kongregasyon,” NW] ti grandi e vin pli for e la kantite manm ti ogmante toulezour.” (Akt 16:4, 5) Remarke ki sa bann kongregasyon ti pe prospere akoz zot ti pe fidelman korpere avek konsey direkter Zerizalenm. Eski pa sa i en laprev ki Zeova i beni sa mwayen ki son Garson i servi pour nouri kongregasyon? Rapel byen ki prosperite spirityel i posib zis avek benediksyon Zeova.​—Prov. 10:22; 1 Kor. 3:6, 7.

¹² Ziska aprezan, nou’n vwar ki Zezi ti swiv en metod kan i ti pe nouri son bann disip: I ti servi en ptigin pour nouri en kantite. Sa mwayen ki i ti servi pour donn nouritir spirityel ti klerman ganny rekonnet. Apre tou, bann zapot, andotmo bann premye manm konsey direkter ti pe donn laprev vizib ki Bondye ti pe siport zot. Akt 5:12 i dir: “Bann zapot ti fer en kantite siny ek mirak parmi lepep.” * Alor, i ti napa rezon pour bann ki ti vin Kretyen pour mazinen, ‘Lekel ki Kris pe servi pour nouri son bann mouton?’ Me, ver lafen premye syek, sityasyon ti sanze.

KAN MOVE ZERB TI BOKOU E TIZ DIBLE TI PTIGIN

13, 14. (a) Ki lavertisman Zezi ti donnen konsernan en latak e kan ki son parol ti konmans vin vre? (b) Kote sa latak ti pou sorti? (Vwar lezot not.)

¹³ Zezi ti predir ki kongregasyon Kretyen ti pou ganny atake. Rapel byen, dan son parabol profetik konsernan dible ek move zerb, Zezi ti averti ki en nouvo plantasyon dible (Kretyen swazir) ti pou ganny anvair par bann move zerb (swadizan Kretyen). I ti dir ki sa de group ti pou grandi ansanm, zot pa ti pou ganny derasinen ziska rekolt, ki ti pou arive pandan ‘konklizyon en sistenm.’ (Mat. 13:24-30, 36-43) Parol Zezi pa ti tarde pour vin vre. *

¹⁴ Sa lapostazi ti pe konmans enfiltre kongregasyon dan premye syek, me bann zapot fidel Zezi ti “retenir,” zot ti reste ferm e zot pa ti les kongregasyon ganny kontaminen, ni enfliyanse par fo lansennyman. (2 Tesa. 2:3, 6, 7) Me, enn fwa ki dernyen zapot ti mor, i ti annan en kantite lapostazi dan kongregasyon, e sa ti kontinyen ogmante pour plizyer syek. An plis ki sa, pandan sa letan, i ti annan en kantite move zerb ki ti pouse e i ti napa bokou tiz dible. I ti napa en mwayen konsistan e organize ki ti pe fourni nouritir spirityel. Me, sa ti pou sanze finalman. Kestyon se, Kan?

LETAN REKOLT, LEKEL KI TI POU DONN NOURITIR?

15, 16. Letid o profon Lekritir ki bann Etidyan Labib ti fer ti anmenn ki rezilta e ki kestyon ki ganny souleve?

¹⁵ Anmezir konmansman rekolt ti aprose, i ti annan serten ki ti pe demontre gran lentere dan laverite ki dan Labib. Rapel byen ki an 1870 an montan, en pti group dimoun ki ti anvi konn laverite ti rasanble ansanm e form en laklas pour etidye Labib. Zot pa ti fer li ansanm avek bann move zerb, setadir, bann swadizan Kretyen. Avek limilite ek en lespri ouver, sa bann Etidyan Labib senser ti priye e egzamin Labib o profon.​—Mat. 11:25.

¹⁶ Bann Etidyan Labib ti ganny bann bon rezilta par etidye Labib o profon. Sa bann msye ek madanm fidel ti devwal bann fo lansennyman e propaz laverite, zot ti pibliy e distribye bann piblikasyon baze lo Labib partou kote. Bokou dimoun ki ti lafen e swaf laverite ti ganny touse par zot travay. En kestyon  enportan i ganny souleve: Eski sa bann Etidyan Labib ki ti pe viv avan 1914 ti sa mwayen ki Kris ti pe servi pour nouri son bann mouton? Non. Rekolt pa ti ankor pare, ni konmanse e laranzman pour en mwayen organize pour donn nouritir spirityel pa ti ankor fini ganny met an plas. Letan pa ti ankor arive pour bann swadizan Kretyen separe avek bann vre Kretyen.

17. Ki devlopman enportan ti arive an 1914?

¹⁷ Parey nou ti aprann dan lartik avan, sezon rekolt ti konmans an 1914. Sa lannen, serten devlopman ti arive. Zezi ti ganny kouronnen Lerwa e bann dernyen zour ti konmanse. (Rev. 11:15) Depi 1914 ziska bann premye mwan 1919, Zezi ti akonpanny son Papa kot tanp spirityel pour fer en lenspeksyon neseser e pour pirifye tanp spirityel. * (Mal. 3:1-4) Apre sa, konmansman 1919, i ti’n ariv ler pour konmans rasanble dible. Eski finalman i ti’n ariv ler pour Kris apwent en mwayen organize ki i ti pou servi pour donn nouritir spirityel? Byensir!

18. Ki Zezi ti dir i pou apwente e ki kestyon enportan i ti annan anmezir letan lafen ti aprose?

¹⁸ Dan son profesi konsernan letan lafen, Zezi ti predir ki i ti pou apwent en mwayen pour donn nouritir spirityel “kan i ler.” (Mat. 24:45-47) Lekel sa mwayen i ti pou servi? An servan menm metod ki dan premye syek, Zezi pou ankor enn fwa servi en ptigin pour nouri en kantite. Me, anmezir bann dernyen zour ti pe konmanse, en kestyon enportan ti, Lekel sa ptigin? Sa kestyon ek lezot ankor konsernan profesi Zezi pou ganny diskite dan lot lartik.

LEZOT NOT: (I devret ganny lir konman not anba paz dapre son paragraf.)

[Not]

[Kestyon]

[Portre lo paz 15]

[Portre lo paz 17]

Zezi ti servi en ptigin pour nouri plizyer milye (Vwar paragraf 4)

[Portre lo paz 19]

Dan premye syek, i ti annan levidans kler konsernan lekel ki Zezi ti pe servi pour nouri kongregasyon (Vwar paragraf 12)