Zeova ‘i anmenn mon fardo sak zour’

Maretha Du Raan

Malgre serten problenm lasante ki ti kapab difisil pour siporte, mon’n santi sipor nou Papa lanmour dan lesyel tou dilon mon lavi. Pour plis ki 20 an mon’n ganny en kantite lazwa pour servi Zeova konman en pionye.

Mon ti ne an 1956 avek en maladi ki apel spina bifida. Lefet ki sa tib dan mon kolonn vertebral pa ti ferm byen, mon nerf in ganny andomaze e sa in fer li difisil pour mwan marse e i’n fer mwan ganny lezot problenm lasante.

En pe letan avan mon nesans, en koup misyonner Temwen Zeova ti konmans etidye Labib avek mon paran. Pandan mon lanfans i ti annan zis en ptigin proklanmater ki ti reste dan mon lavil Usakos, Namibi. Alor, nou ti egzamin bann lenformasyon pour renyon an fanmir. A laz set an, mon ti fer Urostomy, en loperasyon pour fer en trou dan mon lekor pour ki mon kapab pas lirin. A laz 14 an, mon ti konmans ganny bebelouka. Vi ki lekol ti vreman lwen e mon ti bezwen led spesyal avek mon paran, mon pa ti kapab fini lekol.

Toudmenm, mon ti deside fortifye mon spirityalite. Plizyer nou bann piblikasyon pa ti disponib dan langaz Afrikaans, mon lalang maternel. Alor, mon ti aprann lir Angle pour ki mon kapab etidye plizyer nou bann liv. Mon ti vin en proklanmater e a laz 19 an mon ti batize. Pandan sa kat lannen ki ti swiv, mon ti ganny plizyer problenm lasante e emosyonnel. Deplis, lafreyer pour zonm dan en kominote kot tou dimoun i pros avek kanmarad ti anpes mwan pres avek devouman.

Dan mon bann 20 an an montan, nou ti kit Namibi e al reste Sidafrik, e pour premye fwa, mon ti kapab asosye avek en kongregasyon. Sa ti vreman merveye! Par kont, mon ti bezwen fer ankor en lot loperasyon, safwasi en colostomy.

En pe letan pli tar, mon ti tann en sirveyan rezyonal pe koz lo servis pionye. Son parol ti tous mon leker. Mon ti konnen ki mon ti annan bann problenm lasante, me mon ti’n vwar lafason ki Zeova ti’n protez mwan pandan bann moman difisil. Alor, mon ti fer laplikasyon pour vin en pionye ordiner. Par kont, akoz mon problenm lasante, bann ansyen ti ezite pour aprouve.

Kantmenm sa, mon ti deside pour fer tou mon mye dan predikasyon. Avek led mon manman ek lezot, mon ti arive ganny lakantite erdtan en pionye pour sis mwan. Sa ti prouv mon determinasyon pour fer pionye e montre ki mon ti kapab fer fas avek mon problenm lasante. Alor, mon ti refer laplikasyon pour pionye e safwasi i ti ganny aprouve. Mon ti vin en pionye ordiner le 1 Septanm 1988.

Konman en pionye, mon’n touzour eksperyans sipor Zeova. Ansenny bann nouvo laverite olye mazin mon problenm lasante in protez mwan, konsol mwan e ed mwan progrese spirityelman. Mon’n ganny bokou lazwa pour ed plizyer dimoun dedye zot lavi avek Bondye e batize.

Mon lasante i ankor parey. Me Zeova ‘i anmenn mon fardo sak zour.’ (Ps. 68:19) I fer plis ki zis ed mwan siport mon sityasyon, i fer li en plezir pour mwan viv!

[Portre lo paz 9]