Bann rapel Zeova i diny konfyans

“Rapel Zeova i diny konfyans, i fer sa ki napa leksperyans saz.”​—PS. 19:7.

KI OU POU REPONN?

Ki kalite rapel Zeova i donnen dan Lekritir?

Ki mannyer rapel Zeova i kapab ed bann Kretyen ozordi?

Ki rezon nou annan pour annan konfyans dan bann rapel Zeova?

1. Ki size ki souvan ganny diskite par pep Bondye, e ki mannyer nou benefisye ler nou revwar zot?

LER ou pe prepare pour Letid Latour Veyer, eski par ler ou fer sa refleksyon, ‘Pa nou’n deza etidye sa size?’ Si i fer en pe letan ki ou vin Lasal, petet ou’n remarke souvan menm topik i ganny repete. Letid lo Rwayonm Bondye, ranson, travay predikasyon, e bann kalite tel parey lanmour ek lafwa i form par nou nouritir spirityel ki nou gannyen regilyerman. Ler nou revwar sa bann size, sa i ed nou pour gard nou lafwa solid e “pa zis ekout laparol me osi met li an pratik.”​—Zak 1:22.

2. (a) Bann rapel Bondye i souvan refer avek kwa? (b) Ki mannyer rapel Bondye i diferan avek sa ki pour zonm?

² Sa mo Ebre ki’n ganny tradwir “rapel” i souvan refer avek bann lalwa, komannman ek regilasyon ki Bondye i donn son pep. Kontrerman avek lalwa imen, ki souvan bezwen ganny ranplase oubyen revize, bann lalwa ek regilasyon Zeova i touzour diny konfyans. Kantmenm serten sa bann lalwa oubyen regilasyon i ganny donnen an rapor avek en letan oubyen sityasyon partikilye, zot toultan bon e parfe. En psalmis ti dir: “Ou bann rapel drwat i pour en letan endefini.”​—Ps. 119:144.

3, 4. (a) Rapel Zeova i enkli kwa? (b) Ki mannyer bann Izraelit ti pou benefisye si zot ti ekout sa bann rapel?

³ Petet ou’n remarke ki par ler rapel Zeova i enkli bann mesaz lavertisman. Nasyon Izrael ti souvan resevwar bann mesaz lavertisman atraver bann profet Bondye. Par egzanp, pa tro lontan avan ki bann Izraelit ti antre dan later Promiz, Moiz ti averti zot: “Vey byen zot lekor akoz zot leker i kapab ganny tante, e fer zot vreman elwannyen e ador lezot bondye e prostern devan zot, e ki Zeova i vreman ankoler avek zot.” (Det. 11:16, 17) Labib i dir ki Bondye ti donn son pep en kantite rapel ki itil.

⁴ Plizyer fwa, Zeova ti ankouraz bann Izraelit pour annan lakrent pour li, ekout son lavwa e sanktifye son non. (Det. 4:29-31; 5:28, 29) Si zot ti ekout sa  bann rapel, zot ti pou sirman ganny en kantite benediksyon.​—Lev. 26:3-6; Det. 28:1-4.

REAKSYON BANN IZRAELIT ANVER RAPEL BONDYE

5. Akoz Zeova ti lager pour Lerwa Izkiya?

⁵ Tou dilon listwar boulverse pep Izrael, Bondye ti toultan gard son promes. Par egzanp, kan lerwa Asiryen, Senakerib ti anvair Zida e menase pour ranvers Lerwa Izkiya, Zeova ti entervenir par anvoy en lanz. Dan zis en lannwit, lanz Bondye ti detrir “tou bann zonm pwisan e for” dan larme Asiryen, e Senakerib ti oblize retourn dan son pei avek laont. (2 Kron. 32:21; 2 Rwa. 19:35) Akoz Bondye ti lager pour Lerwa Izkiya? Parski [Izkiya] “ti reste atase avek Zeova. I pa ti aret swiv li, me i ti kontinyen obeir son bann komannman.”​—2 Rwa. 18:1, 5, 6.

6. Ki mannyer Lerwa Yosiya ti demontre konfyans dan Zeova?

⁶ En lot dimoun ki ti obei komannman Zeova i Lerwa Yosiya. Depi byen zenn a laz wit an, “i ti konmans fer sa ki byen devan lizye Zeova . . . I pa ti al ni dan kote drwat ni dan kote gos.” (2 Kron. 34:1, 2) Yosiya ti demontre konfyans dan Zeova par detri tou bann zidol dan sa pei e reetablir vre ladorasyon. Akoz i ti fer sa, pa zis Yosiya ki ti ganny beni, me osi sa nasyon antye.​—Lir 2 Kronik 34:31-33. *

7. Ler pep Izrael ti inyor bann rapel Zeova, ki rezilta sa ti anmennen?

⁷ Me malerezman, pep Bondye pa ti touzour met tou zot konfyans dan bann rapel Zeova. Diran bann syek, par ler zot ti obeir, me par ler non. Zis parey zapot Pol ti dir, ler zot lafwa ti diminyen, zot ti ganny “pouse partou par nenport divan lansennyman.” (Efe. 4:13, 14) Zis parey i ti ganny predir, ler zot pa ti met konfyans dan bann rapel Bondye zot ti rekolte move fri.​—Lev. 26:23-25; Zer. 5:23-25.

8. Ki nou kapab aprann avek legzanp pep Izrael?

⁸ Dan ki fason nou kapab benefisye avek legzanp pep Izrael? Bann serviter  Zeova ozordi i resevwar konsey ek disiplin, parey i ti le ka pour pep Izrael. (2 Pyer 1:12) Parol Bondye i kapab vin en rapel pour nou sak fwa ki nou lir li. Lefet ki nou annan sa abilite pour swazir, nou kapab swa obeir gidans Zeova oubyen fer sa ki paret byen dan nou prop lizye. (Prov. 14:12) Annou egzamin serten rezon akoz nou kapab met konfyans dan bann rapel Zeova e ki mannyer nou kapab benefisye ler nou ekout zot.

SOUMET AVEK BONDYE E VIV

9. Kan bann Izraelit ti dan dezer, ki mannyer Zeova ti asir zot ki i ti pou siport zot?

⁹ Ler bann Izraelit ti konmans zot vwayaz ki ti dir pour karant an dan en “gran dezer efreyan,” Zeova pa ti donn zot okenn detay spesifik avan lo ki mannyer i ti pou gid, protez e pran swen avek zot. Me kantmenm sa, i ti regilyerman donn zot laprev ki zot ti kapab annan konfyans dan li ek son lenstriksyon. Par servi en kolonn nyaz lizour ek en kolonn dife aswar, Zeova ti rapel bann Izraelit ki zot ti annan son sipor anmezir ki i ti ed zot travers sa landrwa danzere. (Det. 1:19; Egz. 40:36-38) I ti osi donn zot sa ki zot ti bezwen pour viv. “Zot lenz pa ti ize, e zot lipye pa ti vin anfle.” Vreman, “zot pa ti mank nanryen.”​—Nee. 9:19-21.

10. Ki mannyer Zeova i gid son pep ozordi?

¹⁰ Bann serviter Bondye ozordi i pros pour antre dan nouvo lemonn kot pou annan lazistis. Eski nou annan konfyans ki Zeova pou donn nou sa ki nou bezwen pour ki nou kapab fer fas avek “gran ladetres”? (Mat. 24:21, NW, 22; Ps. 119:40, 41) I vre, Zeova pa servi en kolonn nyaz oubyen dife pour gid nou ver nouvo lemonn. Me i pe servi son lorganizasyon pour ed nou reste vizilan. Par egzanp, nou’n ganny ankouraze pour batir nou spirityalite atraver nou lektir Labib, Ladorasyon fanmir, par asiste renyon e prese regilyerman. Eski nou’n fer bann sanzman pour arive swiv sa bann lenstriksyon? Si nou fer sa, nou pou kapab devlop en lafwa solid ki pou gard nou vivan e antre dan nouvo lemonn.

11. Dan ki fason Bondye i montre ki i enterese avek nou byennet?

¹¹ An plis ki ed nou reste eveye spirityelman, sa bann lenstriksyon i ed nou dan nou lavi tou le zour. Sa i enkli par egzanp, gard en bon pwennvi lo bann keksoz materyel, annan en lavi senp e annan mwens lenkyetid. Nou’n osi benefisye avek gidans konsernan nou resanz ek laparans, swazir bann bon divertisman, e deside ki nivo ledikasyon i apropriye pour nou. Mazin osi bann rapel ki nou’n gannyen konsernan sekirite nou lakour, transpor, Lasal Rwayonm ek preparasyon pour bann ka dirzans. Sa bann konsey i montre ki Bondye i enterese avek nou byennet.

BANN RAPEL TI ED BANN PREMYE KRETYEN POUR RESTE FIDEL

12. (a) Kwa ki Zezi ti souvan koz lo la avek son bann disip? (b) Ki Zezi ti fer ki ti annan en lefe dirab lo zapot Pyer e ki mannyer sa i devret annan en lefe lo nou?

¹² Bann Kretyen dan premye syek ti ganny bann rapel regilyerman. Zezi ti souvan rapel son bann disip sa nesesite pour devlop limilite. Me i ti fer plis ki zis dir zot ki si sa limilite, i ti osi montre konman pour demontre sa kalite. Dernyen zour son lavi lo later konman en imen, Zezi ti rasanble son bann zapot pour selebre Lapak. Pandan ki bann zapot ti pe manze, Zezi ti leve e lav zot lipye, en latas ki ti souvan ganny fer par en serviter. (Zan 13:1-17) Sa ki Zezi ti fer ti annan en lefe dirab lo zot. Apepre 30 an pli tar, zapot Pyer ki ti la pandan sa repa ti donn son bann konpanyon Kretyen konsey lo limilite. (1 Pyer 5:5) Legzanp Zezi i devret  pous nou tou pour demontre limilite dan lafason ki nou azir anver kanmarad.​—Fili. 2:5-8.

13. Ki kalite enportan ki Zezi ti rapel son bann disip pour devlope?

¹³ Zezi ti souvan koz lo en lot topik avek son bann disip, sa i sa nesesite pour annan en lafwa solid. Apre ki zot pa ti’n arive sas en demon dan en zonm, bann disip ti demann Zezi: “Akoz nou pa ti kapab sas sa demon?” Zezi ti reponn zot, “Akoz zot lafwa i feb. An realite, mon asir zot ki si zot annan lafwa groser en lagrenn moutard . . . napa nanryen ki pou enposib pour zot.” (Mat. 17:14-20) Tou dilon son minister, Zezi ti ansenny son bann disip ki lafwa i en kalite enportan. (Lir Matye 21:18-22.) Eski nou pe profit bann loportinite ki nou annan pour ranforsi nou lafwa atraver bann lansennyman ki batir nou spirityalite dan bann lasanble e dan bann renyon? Sa bann lasanble ek renyon i pa zis bann moman zwaye kot nou zwenn ansanm, me zot bann moman kot nou kapab demontre konfyans dan Zeova.

14. Akoz i enportan pour devlop sa kalite lanmour ki Kris ti annan ozordi?

¹⁴ Dan Lekritir Grek Kretyen i annan en kantite rapel ki ankouraz nou pour demontre lanmour pour kanmarad. Zezi ti dir ki sa dezyenm pli gran komannman i: “Kontan ou prosen parey ou kontan ou prop lekor.” (Mat. 22:39) Pareyman, Zak demi frer Zezi ti apel lanmour “lalwa Royal.” (Zak 2:8) Zapot Zan osi ti ekrir: “Byenneme, mon pa pe ekri en konmannman nouvo pour zot, me en vye konmannman ki zot in [gannyen] depi okonmansman.” (1 Zan 2:7, 8) Kwa ki Zan ti pe refer avek ler i mansyonn sa “vye konmannman”? I ti pe refer avek sa konmann pour kontan. I ti “vye” dan sa sans ki Zezi ti donn li plizyer dizenn lannen pli boner, andotmo, “depi okonmansman.” Me i ti osi “nouvo” dan sa sans ki i en kalite lanmour kot nou met lentere lezot avan sa ki pour nou, sa kalite lanmour ki bann disip ti pou bezwen annan pour fer fas avek zot nouvo sirkonstans. Konman disip Kris, eski nou apresye bann lavertisman ki anpes nou devlop en leta lespri egois ki komen dan sa lemonn, e ki kapab fer ki nou nepli annan lanmour pour nou prosen?

15. Ki sa travay pli enportan Zezi ti’n vin fer lo later?

¹⁵ Zezi ti demontre lentere personnel dan bann dimoun. Nou vwar son lentere senser dan lezot kan i ti geri bann ki ti malad e andikape e ler i ti resisit bann mor. Menm si Zezi ti geri bann dimoun, sa pa ti sa travay pli enportan pour li. Pres sa bon nouvel e ansenny dimoun ti  annan en lefe pli dirab lo bann dimoun. Ki mannyer sa? Par egzanp, nou konnen ki bann dimoun ki Zezi ti geri e resisite dan premye syek, zot ti vin vye e mor, tandis ki sa bann ki ti byen reazir anver sa mesaz ki i ti prese, zot ti annan sa lespwar pour ganny lavi eternel.​—Zan 11:25, 26.

16. Ziska ki degre predikasyon e fer disip pe ganny fer ozordi?

¹⁶ Sa travay ki Zezi ti konmanse dan premye syek pe ganny fer lo en pli gran lanpler ozordi. Wi, Zezi ti dir avek son bann disip: “Ale e fer tou pep vin mon bann disip.” (Mat. 28:19) Anfet zot in fer, e nou kapab dir, wi nou’n fer! Plis ki set milyon Temwen Zeova pe anons sa mesaz Rwayonm avek devouman dan plis ki 230 pei, e zot etidye regilyerman avek plizyer milyon. Predikasyon i en laprev ki nou pe viv dan bann dernyen zour.

ANNAN KONFYANS DAN ZEOVA OZORDI

17. Ki konsey Pol ek Pyer ti donnen?

¹⁷ I kler alor ki sa bann rapel ti ed bann premye Kretyen pour reste ferm dan lafwa. Zis mazinen ki mannyer Timote ti’n bezwen ganny ankouraze kan zapot Pol ki ti dan prizon Ronm ti dir li: “Tenir byen for konman en model, parol laverite ki mon’n ansenny ou.” (2 Tim. 1:13) Apre ki i ti’n ankouraz son bann konpanyon Kretyen pour devlop bann kalite parey landirans, lafeksyon fraternel e kontrol lo zot lekor, zapot Pyer ti dir: “Pour sa rezon ki mon pour touzour fer zot rapel sa bann keksoz menm si zot deza konnen e ki zot in byen etabli dan laverite.”​—2 Pyer 1:5-8, 12.

18. Ki mannyer bann premye Kretyen ti konsider bann rapel?

¹⁸ Wi, bann let ki Pol ek Pyer ti ekrir ti transmet “bann parol ki bann profet sen in anonse.” (2 Pyer 3:2) Eski nou bann frer dan premye syek ti refize swiv sa bann gidans? Non, akoz sa bann gidans ti en laprev lanmour Bondye, ki ti ed zot pour “grandi dan lagras ek konnesans nou Senyer e Sover Zezi-Kri.”​—2 Pyer 3:18.

19, 20. Akoz nou devret annan konfyans dan bann rapel Zeova e ki mannyer nou benefisye si nou fer sa?

¹⁹ Ozordi nou annan sifizaman rezon pour annan konfyans dan rapel Zeova, ki trouve dan son Parol Labib. (Lir Zozye 23:14. *) Dan Labib nou vwar lafason ki Bondye in azir avek imen enparfe depi plizyer milye lannen. Sa bann resi in ganny rikorde pour nou profi. (Rom. 15:4; 1 Kor. 10:11) Nou’n vwar lakonplisman bann profesi Labib. Nou kapab konsider bann profesi parey bann rapel ki ganny donnen davans. Par egzanp, plizyer milyon dimoun in zwenn ansanm dan vre ladorasyon Zeova, parey profesi in dir ti pou arive dan “bann dernyen zour.” (Iza. 2:2, 3) Bann move kondisyon ki egziste dan sa lemonn i osi pe akonpli profesi Labib. Parey i’n ganny mansyonnen, sa gran kanpanny predikasyon ki pe ganny fer dan lemonn antye i en laprev konkret lakonplisman parol Zezi.​—Mat. 24:14.

²⁰ Diran plizyer syek, nou Kreater in klerman montre ki nou kapab met konfyans dan li. Eski nou pe benefisye avek son bann rapel? Nou bezwen annan lafwa dan son bann rapel. Sanmenm ki Rosellen ti fer. I rakonte: “Kan mon ti konmans met tou mon konfyans dan Zeova, mon ti konmans remark pli byen ki mannyer i ti soutenir mwan avek lanmour e donn mwan lafors.” Nou osi, annou benefisye par ekout bann rapel Zeova.

[Not anba lo paz]

[Kestyon]

[Portre lo paz 7]

[Portre lo paz 8]

Bann rapel Zeova ti pous Yosiya pour azir an faver vre ladorasyon (Vwar paragraf 6)

[Portre lo paz 10]

Ekout bann rapel Zeova i ed nou gard Lasal Rwayonm an sekirite e aksesib (Vwar paragraf 11)