Fer bann bon desizyon personnel

“Met ou konfyans dan Zeova avek tou ou leker e pa apiy lo ou prop konprenezon.”​—PROV. 3:5.

KI OU POU REPONN?

Ki i vedir pour annan bon zizman ler nou pe fer bann desizyon?

Ki mannyer nou kapab devlop sa abilite pour fer bann bon desizyon?

Kwa ki kapab ed nou pour azir annakor avek nou bann desizyon?

1, 2. Eski ou kontan fer desizyon e ki mannyer ou santi anver serten desizyon ki ou’n fer?

DESIZYON! Tou le zour nou annan en ta desizyon pour fer. Ki mannyer ou santi anver bann desizyon ki ou annan pour fer? Serten dimoun i oule fer tou zot desizyon zot menm. Zot ensiste ki zot devret fer zot prop desizyon e personn pa devret fer li dan zot plas. Par kont, serten i per pour fer serten desizyon dan lavi. Serten i menm rod led dan bann liv oubyen kot bann konseye e menm depans bokou larzan pour ganny bann konsey ki zot santi zot bezwen.

² Bokou parmi nou i tonm dan enn ant sa de kategori dimoun. Nou realize ki i annan desizyon ki nou napa drwa pran e ki nou pa kapab fer nanryen konsernan zot, me nou kontan ki dan serten domenn dan lavi nou kapab pran bann desizyon dapre sa ki fer nou plezir. (Gal. 6:5) Kantmenm sa, nou pou dakor ki pa tou desizyon ki nou fer ki neseserman saz oubyen anmenn bann bon rezilta.

3. Kwa ki pou ed nou fer bann bon desizyon e kwa ki kapab en defi?

³ Konman serviter Zeova, nou kontan ki i’n donn nou gidans lo bann keksoz ki enportan dan lavi. Nou konnen ki si nou swiv sa bann gidans, nou pou fer bann desizyon ki fer plezir Zeova e benefisye nou menm. Me kantmenm sa, nou kapab fer fas avek bann sityasyon ki pa ganny adrese spesifikman dan Parol Bondye. Ki mannyer nou pou konnen ki pou fer dan bann ka parey? Par egzanp, nou konnen ki nou pa devret vole. (Efe. 4:28) Me ki savedir vole? Eski i ganny determinen dapre valer sa keksoz, motivasyon sa dimoun oubyen par en lot keksoz? Ki desizyon nou pou fer dan bann sityasyon kot Labib pa koz lo la direkteman? Kwa ki pou gid nou dan en tel sityasyon?

 ANNAN BON ZIZMAN

4. Ki konsey nou’n kapab gannyen par ler kan nou pe fer desizyon?

⁴ Kan nou dir ki nou pe al fer en desizyon enportan, en lot Kretyen i kapab dir ki nou devret annan bon zizman. Definitivman, sa i en bon konsey. Labib i donn nou sa konsey: “Dimoun ki azir tro vit i sirman tonm dan lapovrete.” (Prov. 21:5) Me ki savedir servi bon zizman? Eski i zis vedir ki nou devret pran letan, reflesir byen, e montre nou rezonnab? Tou sa bann fakter i kapab ed nou pour fer en bon desizyon, me pour annan bon zizman i enplik plis ki sa.​—Rom. 12:3; 1 Pyer 4:7.

5. Akoz nou napa en lespri parfe?

⁵ Nou bezwen admet ki napa personn parmi nou ki’n ne avek en lespri parfe. Akoz sa? Parski nou tou nou’n ne dan pese e nou enparfe, alor nou pa kapab annan en lespri ek en lekor parfe. (Ps. 51:5; Rom. 3:23) An plis ki sa, bokou parmi nou avan ti parmi sa bann ki ti’n ganny “avegle” par Satan e pa ti konn Zeova ek son bann standar. (2 Kor. 4:4; Tit 3:3) Alor, si nou ti pou pran desizyon baze zis lo sa ki nou krwar i bon e rezonnab, nou pe anbet nou lekor, menm si nou ti pou pran en kantite letan pour reflesir avan pran sa desizyon.​—Prov. 14:12.

6. Kwa ki kapab ed nou pour annan bon zizman?

⁶ Menm si nou napa en lekor ek lespri parfe, Zeova nou Papa dan lesyel i parfe dan tou laspe. (Det. 32:4) Pa i en lazwa pour konnen ki i’n fer li posib pou nou sanz nou fason panse e pour devlop bon zizman! (Lir 2 Timote 1:7.) Konman Kretyen nou bezwen reflesir, rezonn dan en bon fason, e azir dapre sa ki nou’n aprann. Nou devret kontrol nou fason panse ek santiman e imit fason panse Zeova, son santiman ek son fason azir.

7, 8. Rakont en leksperyans ki montre ki nou kapab fer bann bon desizyon menm ler nou fer fas avek presyon ek difikilte.

⁷ Annou vwar en legzanp. Bokou imigran i kontan anvoy zot pti baba kot zot fanmir pour zot pran swen avek li pour ki sa paran imigran i kapab kontinyen travay e ganny larzan. * En madanm imigran ti ganny en zoli pti garson. Pandan sa letan, i ti konmans etidye Labib e fer bon progre spirityel. Son bann zanmi ek fanmir pros ti met presyon lo li ek son msye pour anvoy zot pti baba kot son gran paran. Me, atraver son letid sa madanm ti realize ki konman en paran, i son responsabilite pour elve son zanfan. (Ps. 127:3; Efe. 6:4) Eski i devret swiv sa koutim ki bokou i vwar konman en keksoz pli rezonnab pour fer? Ouswa, eski i devret swiv sa ki i’n aprann dan Labib ki pou riske fer li ganny bann problenm finansyel e ganny kritike par serten dimoun? Ki ou ti pou fer si ou ti dan son plas?

⁸ Anba bokou presyon, sa zenn madanm ti devid son leker avek Zeova e rod son gidans. Ler i ti koz avek sa ser ki ti pe etidye li ek lezot dan kongregasyon lo sa sityasyon, i ti konmans konpran pwennvi Zeova lo sa size. I ti osi mazin lefe emosyonnel ki i kapab annan lo bann pti zanfan si zot pa avek zot paran sa letan. Apre ki i ti’n reflesir e egzamin pwennvi Labib lo sa size, i ti realize ki i pa ti pou byen pour anvoy son pti baba laba. Son msye ti remark  lafason ki bann manm dan kongregasyon ti korpere pour ede e ki son pti baba ti zwaye e an bonn sante. Sa ti fer ki i ti aksepte en letid Labib e konmans asiste renyon avek son madanm.

9, 10. Ki savedir annan bon zizman e ki mannyer nou kapab servi li?

⁹ Sa i zis en ka, me i montre ki kan nou annan bon zizman i pa vedir zis azir dapre sa ki nou oubyen lezot dimoun i panse i rezonnab oubyen dapre sa ki pli fasil. Nou lespri ek leker enparfe i parey en mont ki pe mars swa tro vit oubyen tro dousman. Si nou les zot gid nou sa i kapab anmenn bann problenm grav. (Zer. 17:9) Nou bezwen les nou lespri ek leker ganny gide par bann prensip Bondye.​—Lir Izai 55:8, 9. *

¹⁰ Nou trouv sa konsey saz dan Labib: “Met ou konfyans dan Zeova avek tou ou leker e pa apiy lo ou prop konprenezon. Dan tou ou semen pran li an konsiderasyon e li i pou fer drwat ou bann santye.” (Prov. 3:5, 6) Eski ou remark sa lekspresyon “pa apiy lo ou prop konprenezon”? I swiv avek “pran [Zeova] an konsiderasyon.” Zeova i sa Enn ki vreman annan bon zizman. Alor, sak fwa nou annan en desizyon pour fer, nou bezwen egzamin Labib pour konn fason panse Bondye. Apre, nou devret baz nou desizyon lo la? Se sanmenm sa vre bon zizman, i vedir imit fason panse Zeova.

ANTRENN OU ABILITE POUR KONN FER DIFERANS

11. Kwa ki pou ed nou fer bann bon desizyon?

¹¹ Aprann pour fer bann bon desizyon e apre fer sa ki nou’n deside pa fasil. I kapab difisil sirtou pour bann ki nouvo dan laverite oubyen bann ki’n fek konmans fer bann progre spirityel. Me, i posib pour zot fer progre. Reflesir lo ki mannyer en zanfan i kapab  aprann marse san ki i tonbe. Pour li reisi, fodre sa zanfan i kontinyen fer bann pti pa. I parey pour bann ki ankor zanfan lo plan spirityel kan zot pe fer bann desizyon. Mazinen ki Pol ti dekrir bann dimoun matir konman bann ki “par leksperyans zot konn fer diferans ant sa ki byen ek sa ki mal.” Sa lekspresyon “par leksperyans” i enplik fer bann zefor kontinyel e sanmenm ki bann nouvo i bezwen fer.​—Lir Ebre 5:13, 14.

12. Ki mannyer nou kapab devlop nou abilite pour fer bon desizyon?

¹² Parey in ganny mansyonnen pli boner, tou le zour nou fer bokou desizyon swa gro swa pti. Dapre en letid, plis ki 40 poursan nou bann aksyon i baze lo sa ki nou abitye fer san ki nou reflesir avan ki nou fer li. Par egzanp, tou le bomaten petet ou bezwen deside ki lenz ou pou mete. Petet ou vwar sa pa enportan, san bezwen tro reflesir, espesyalman si ou pe depese. Me i enportan pour mazinen si sa ki ou mete i apropriye pour en serviter Zeova. (2 Kor. 6:3, 4) Ler ou aste lenz, petet ou souvan mazin lanmod ek mark. Me eski ou get son pri? Eski i en lenz ki modes? En bon desizyon dan sa domenn pou kontribye pour ki nou konn fer diferans ant sa ki byen ek sa ki mal konsernan bann keksoz pli enportan.​—Lik 16:10; 1 Kor. 10:31.

DETERMINEN POUR FER SA KI BYEN

13. Kwa ki neseser pour fer sir ki nou fer sa ki nou’n deside?

¹³ Nou tou nou konnen ki i pa sifi zis pour fer sa bon desizyon, me nou bezwen fer sa ki nou’n deside. Par egzanp, serten ki anvi aret fimen pa reisi akoz zot pa ase motive pour fer li. Zot bezwen sa determinasyon pour fer sa ki zot in deside. Serten i krwar ki nou liberte pour swazir i parey en misk. Pli nou servi li oubyen fer legzersis, pli i pou vin pli for. Si nou servi li byen rar, i pou flak. Alor, kwa ki kapab ed nou devlop oubyen ogmant nou dezir pour fer sa ki nou’n fini deside? Rod led avek Zeova.​—Lir Filipyen 2:13.

14. Akoz Pol ti annan sa lafors pour fer sa ki i ti konnen i devret fer?

¹⁴ Pol ti konn sa par son prop leksperyans. En fwa i ti plennyen: “Mon oule fer sa ki byen, mon pa kapab fer li.” I ti konnen ki i ti anvi fer ouswa sa ki i ti devret fer, me par ler i pa ti kapab fer li. I ti dir: “Dan mwan menm, mon ganny plezir dan lalwa Bondye. Me mon trouv en lot lalwa dan mwan ki lit kont lalwa ki mon lespri i aprouve e ki fer mwan prizonnyen lalwa pese ki dan mwan.” Eski son sityasyon ti san en lespwar? Ditou. I ti dir: “Gran mersi Bondye par Zezi-Kri nou Senyer!” (Rom. 7:18, 22-25) I ti osi ekrir: “Mon kapab fer fas avek tou par Kris ki donn mwan lafors.”​—Fili. 4:13.

15. Si nou azir deswit oubyen non, ki lefe sa pou annan lo lezot?

¹⁵ I kler ki pour fer plezir Bondye, nou bezwen pran aksyon deswit. Eski ou rapel sa ki Eliya ti dir bann adorater Baal ek bann Izraelit aposta lo Montanny Karmel? I ti dir: “Ziska kan zot pou bwete lo de lopinyon diferan? Si Zeova i sa vre Bondye, ale swiv li; me si i Baal, ale swiv li.” (1 Rwa. 18:21) Bann Izraelit ti konnen ki zot ti devret fer, me zot ti pe “bwete,” zot pa ti konnen ki desizyon pour fer. Kontrerman avek zot, en bann lannen pli boner, Zozye ti kit en bon legzanp kan i ti dir bann Izraelit: “Si i pa byen dan  zot lizye pour servi Zeova, swazir pour zot menm ozordi lekel ki zot pou servi, . . . Me mwan ek mon fanmir, nou pou servi Zeova.” (Zoz. 24:15) Ki rezilta sa ti anmennen? Zozye ek bann ki ti avek li ti ganny beni par viv dan Later Promiz, “en pei ki koul dile ek dimyel.”​—Zoz. 5:6.

FER BANN BON DESIZYON E GANNY BENI

16, 17. Donn en legzanp ki montre ki nou ganny byenfe kan nou fer desizyon ki annakor avek lavolonte Bondye.

¹⁶ Annou vwar en sityasyon modern. En frer ki’n fek batize in marye e zot annan trwa zanfan. En zour, en koleg travay ti anvi ki sa frer i al travay ansanm avek li dan en lot lakonpannyen ki pey pli byen e donn plis benefis. Alor, sa frer ti reflesir e priy lo sa sityasyon. I ti swazir sa louvraz ki i pe fer la, ki pa pey bokou pour ki i kapab ganny son bann wikenn ki ti pou permet li asiste son bann renyon e al predikasyon avek son fanmir. I ti realize ki si i aksepte sa nouvo louvraz, petet i pa ti pou parey. Ki ou ti pou’n fer?

¹⁷ Apre ki i ti’n reflesir, i ti deside pour pa aksepte sa louvraz akoz i ti plifere ganny bann byenfe spirityel plito ki en gro lapey. Eski ou krwar ki i ti regret desizyon ki i ti’n fer? Pa ditou. I santi ki sa bann benediksyon spirityel ti pli byen benefisye li ek son fanmir ki en pli gro saler. Li ek son madanm ti kontan kan zot premye fiy ki annan zis di-z-an ti dir zot ki i kontan zot, i kontan bann frer ek ser e i kontan Zeova bokou. I ti dir ki i anvi dedye son lavi avek Zeova e batize. I ti’n bezwen byen apresye bon legzanp ki son papa in kite pour met Zeova premye dan son lavi!

18. Akoz i enportan pour fer bann bon desizyon personnel tou le zour?

¹⁸ Pour plizyer deseni, Zezi Kri sa pli gran Moiz in touzour gid bann vre adorater Bondye dan sa move lemonn Satan. Zezi konman sa pli gran Zozye in pare pour detri sa move lemonn e gid son bann disip dan sa nouvo lemonn kot pou annan lazistis. (2 Pyer 3:13) Alor la i pa letan pour kontinyen avek nou vye fason panse, vye labitid ki nou ti annan, vye valer ek aspirasyon. Me i letan pour nou konpran pli klerman ki lavolonte Zeova pour nou. (Rom. 12:2; 2 Kor. 13:5) Les ou bann swa ek desizyon ki ou fer sak zour montre ki ou sa kalite dimoun ki diny pour ganny bann benediksyon eternel ki Zeova in promet.​—Lir Ebre 10:38, 39.

[Not anba lo paz]

[Kestyon]

[Portre lo paz 22]

[Portre lo paz 24]

Kan nou fer bann bon desizyon sak zour, nou devlop nou abilite pour konn fer diferans (Vwar paragraf 11)

[Portre lo paz 26]

Fer bann bon desizyon e trouv lazwa parmi pep Bondye (Vwar paragraf 18)