Eski ou kapab fer plis pour averti lezot?

En zoli film ki napa son e ki annan pour tit A Trip Down Market Street i enteres bann telespektater ler i montre ki mannyer lavi ti ete San Francisco, Leta-z-ini, o konmansman ventyenm syek. Bann dimoun ki ti fer sa film ti met en kamera devan en cable car e viz li lo en semen piblik ki byen okipe. Dan sa film i annan bann saret ki pe ganny trennen par seval e diferan transpor ki ti egziste dan sa letan, e an menm tan i montre dimoun pe fer konmisyon e bann garson pe delivre zournal parey zot labitid.

Sa ki fer sa film pli tris ankor, i petet akoz i ti ganny filmen an Avril 1906, zis avan sa gro tranblemandter ek dife ki ti arive le 18 Avril, ki ti touy plizyer milye dimoun e preski detri sa bout dan sa lavil. Probableman, serten sa bann ki ti ganny filmen ti annan zis detrwa zour pour viv. Scott Miles, en desandans enn sa bann dimoun ki ti fer sa film i dir, “Mon zis vwar sa bann dimoun la e zot pa okouran sa maler ki ti pe al frap zot. Ou zis kapab pran lapenn pour zot.”

Nou kapab konpar sa ki ti arive avek nou letan. Nou osi, nou zis kapab pran lapenn pour bann dimoun. Zot okipe avek zot bann aktivite tou le zour e zot pa pe realize ki i annan en maler ki pou tonm lo zot tre byento, setadir destriksyon sa sistenm e zot fason viv. Parey avek sa tranblemandter ki personn pa ti pe ekspekte, i pa reste bokou letan pour averti lezot otour nou konsernan zour zizman Zeova. Petet ou met en pe letan dekote sak semenn pour pres portanport, me eski ou kapab fer plis pour averti lezot?

ZEZI TI TOULTAN PARE POUR TRAVAY

Legzanp Zezi i remarkab dan sa sans ki i ti toultan pare pour travay. I ti pres avek tou dimoun ki i ti zwenn, ki swa en kolekter taks ki i ti rankontre lo semen oubyen en madanm ki i ti zwenn kot en pwi pandan en poz midi. (Lik 19:1-5; Zan 4:5-10, 21-24) Menm ler i ti’n deside repoze, Zezi ti servi sa letan pour ansenny lezot. Konpasyon ki i ti annan pour lezot ti fer li pare pour fer plis ki zis rann en pti temwannyaz. (Mark 6:30-34) Parey Zezi, eski nou montre ki nou konsider travay predikasyon irzan ozordi?

ZOT ROD TOU LOPORTINITE

Melika i reste dan en batiman avek plizyer apartman ki ekipe avek en sistenm sekirite. En kantite son bann vwazen i bann etidyan etranze ki  servi mobayl e zot non pa lo lalis dan larantre. I apresye sa loportinite spesyal ki i annan pour konmans bann diskisyon spirityel avek bann lokater dan larantre ouswa dan lift. I dir: “Dan en sans, mon konsider li konman mon teritwar.” Melika i mars avek piblikasyon dan diferan langaz e bokou zot i aksepte bann trak ek magazin. I osi diriz zot latansyon lo nou sit Enternet, jw.org. I’n konmans plizyer letid Labib.

Sonia osi i profit tou moman pour pres avek nenport dimoun ki i zwenn. I travay kot en klinik e i fikse sa lobzektif pour donn en bon temwannyaz avek tou son koleg travay. Premyerman, i pran letan pour konn bezwen ek lentere sak dimoun. Apre, i servi son letan pandan ler manze pour annan en konversasyon spirityel avek zot endividyelman. An rezilta sa, Sonia in kapab konmans de letid Labib. I pe osi fer plan pour servi en pe son letan pandan ler manze pour koz avek bann dimoun ki pe esper zot apwentman avek dokter.

SEZI LOPORTINITE KI OU GANNYEN

En sirvivan sa tranblemandter an 1906 ti apel sa ki ti arive “sa dezas pli terib ki’n deza annan dan en leta oubyen lavil.” Me kantmenm sa, tou sa bann dezas pa pou parey avek sa zour vanzans ki pe vini “lo tou bann ki pa konn Bondye.” (2 Tesa. 1:8) Zeova i anvi ki dimoun i sanz zot fason panse ek leker e pran o serye sa mesaz lavertisman ki pe ganny anonse par son bann Temwen.​—2 Pyer 3:9; Rev. 14:6, 7.

Ou annan sa privilez pour met bann dimoun okouran konsernan sa letan kritik ki nou pe viv ladan e ed zot pour rezet bann dezir egois e pour rod Zeova. (Tsef. 2:2, 3) Eski ou kapab sezi tou loportinite pour rann temwannyaz avek ou bann koleg travay, vwazen ek bann ki ou zwenn ler ou pe fer ou bann aktivite tou le zour? Eski ou pou fer plis pour averti lezot?

[Portre lo paz 31]

San okenn lavertisman, sa tranblemandter an 1906 ki ti koz en dife ti detri en bon bout lavil San Francisco

[Sorti kot]

Portre U.S. National Archives

[Portre lo paz 32]

Eski ou kapab sezi tou loportinite pour rann temwannyaz ler ou pe fer ou bann aktivite tou le zour?