Ki mannyer nou kapab ‘kontinyen espere’?
Ki mannyer nou kapab ‘kontinyen espere’?
‘Mon oule kontinyen espere.’—MIK. 7:7.
KI OU POU REPONN?
Ki nou aprann avek legzanp Mika?
Ki levennman nou pe espere pour vwar?
Dan ki fason nou kapab demontre lapresyasyon pour pasyans Zeova?
1. Akoz nou kapab vin enpasyan?
LER Rwayonm Bondye ti ganny etablir an 1914, bann dernyen zour lemonn Satan ti konmanse. I ti annan en lager dan lesyel kot Zezi ti zet Dyab ek son bann demon lo later. (Lir Revelasyon 12:7-9.) Satan i konnen ki i annan “zis en pti pe letan” ki reste li. (Rev. 12:12) Par kont, i fer plizyer dizenn lannen depi ki sa “pti pe letan” in konmanse, e serten i kapab mazinen ki bann dernyen zour in al pour bokou lannen olye en ptigin. Anmezir ki nou esper Zeova azir, eski nou osi nou’n vin enpasyan?
2. Ki nou pou egzaminen dan sa lartik?
2 I danzere pour perdi pasyans akoz i kapab fer nou azir san reflesir. Ki mannyer nou kapab kontinyen espere? Sa lartik pou ed nou fer li akoz i pou reponn sa trwa kestyon ki swiv. (1) Ki nou aprann lo pasyans atraver legzanp profet Mika? (2) Ki levennman ki pou en lendikasyon ki sa letan pour espere in terminen? (3) Ki mannyer nou kapab demontre lapresyasyon pour pasyans Zeova?
KI NOU APRANN AVEK LEGZANP MIKA?
3. Dan letan Mika, ki ti kondisyon bann Izraelit?
3 Lir Mika 7:2-6. * Profet Mika ti vwar kondisyon spirityel bann Izraelit deteryore ziska ki i ti vin pli pir pandan renny Aab, sa move lerwa. Mika i konpar bann Izraelit enfidel avek “en touf pikan” ek “en baraz pikan.” Zis parey en touf pikan ouswa en baraz pikan i fer dimal sa ki pas ladan, sa bann move Izraelit ti pe fer ditor nenport ki ki ti annan relasyon avek zot. Koripsyon ti telman bokou ki menm bann fanmir ti kase. Mika ti konpran ki i pa ti pou kapab fer nanryen pour sanz sityasyon, alor i ti devid son leker avek Zeova. Apre sa, avek pasyans, i ti esper Bondye azir. Mika ti asire ki dan Son letan apropriye, Zeova ti pou pran aksyon.
4. Ki difikilte nou rankontre?
4 Parey Mika, nou bezwen viv parmi bann dimoun egois. Bokou dimoun i “engra, mank respe pour keksoz sen, [e] zot . . . annan leker dir.” (2 Tim. 3:2, 3) Nou tris kan nou bann koleg travay, kanmarad lekol ek vwazen i konsernen zis avek zot prop lentere. Me, serten serviter Bondye i fer fas avek bann sityasyon pli difisil ki sa. Zezi ti dir ki son bann disip ti pou ganny opoze avek zot prop fanmir e i ti servi menm parol ki dan Mika 7:6 pour dekrir lenpak ki son mesaz ti pou annan. Zezi ti dir: “Mon’n vin met en garson kont son papa, en fiy kont son manman; en belfiy kont son belmer; Ou lennmi pou trouv parmi manm ou prop fanmir.” (Mat. 10:35, 36) Pa i vreman difisil pour ganny sikannen e opoze par ou prop fanmir ki napa menm krwayans ki ou! Si nou fer fas avek sa leprev, pa bezwen les nou fanmir met presyon lo nou. Plito, reste fidel e esper avek pasyans ziska ki Zeova i regle sa bann problenm. Si nou touzour demann li led, i pou donn nou sa lafors ek lasazes ki nou bezwen pour kapab andire.
5, 6. Ki mannyer Zeova ti rekonpans Mika? Ki Mika pa ti reisi trouve?
5 Zeova ti rekonpans Mika pour son pasyans. Anfet, Mika ti ankor vivan kan Lerwa Aaz ti mor. I ti osi vwar ler Izkiya, garson Lerwa Aaz ti vin lerwa e reetablir vre ladorasyon. Sa mesaz zizman Zeova ki Mika ti pe anonse ti ganny akonplir kan bann Asiryen ti anvair rwayonm nor Izrael.—Mik. 1:6.
6 Me, Mika pa ti vwar lakonplisman tou bann profesi ki Zeova ti’n enspir li pour anonse. Par egzanp, Mika ti ekrir: “Dan bann dernyen zour . . . montanny lakaz Zeova pou ganny etablir solidman par lao latet bann montanny e i pou sirman ganny met par lao tou bann pti montanny e en kantite dimoun pou al laba. E bokou nasyon pou sertennman ale e dir: ‘Vini, zot lepep, e annou mont lo montanny Zeova.’” (Mik. 4:1, 2) Mika ti mor en bann letan avan ki sa profesi ti ganny akonplir. Kantmenm sa, i ti determinen pour reste fidel avek Zeova, menm ziska lanmor, malgre sa ki lezot otour li ti pe fer. Dan sa domenn, Mika ti ekrir: “Tou bann pep zot, zot pou mars sakenn o non zot bondye, me nou, nou pou mars o non nou Bondye Zeova pour en letan endefini, wi pour touzour.” (Mik. 4:5) Mika ti reisi espere avek pasyans pandan tou sa bann moman difisil akoz i ti asire ki Zeova ti pou akonpli tou Son promes. Sa profet fidel ti annan konfyans dan Zeova.
7, 8. (a) Akoz nou annan rezon pour annan konfyans dan Zeova? (b) Kwa ki pou fer letan pas pli vit?
7 Eski nou annan sa menm konfyans dan Zeova? Nou annan bon rezon pour annan sa kalite konfyans. Nou menm nou’n vwar lakonplisman profesi Mika. Pandan “bann dernyen zour,” plizyer milyon dimoun sorti dan tou nasyon, tribi ek langaz in al kot “montanny lakaz Zeova.” Menm si zot sorti dan bann nasyon ki an konfli avek kanmarad, sa bann adorater in “forz zot lepe an pyos” e zot “nepli aprann lager.” (Mik. 4:3) I en gran privilez ki nou form parti pep Zeova ki anpe ansanm, pa i vre?
8 I toutafe normal pour anvi ki Zeova i detri sa move lemonn. Me, si nou anvi esper avek pasyans, nou bezwen vwar keksoz parey Zeova i vwar. I’n fini etablir en dat pour ziz limanite atraver Zezi Kri, sa “zonm ki i’n swazir.” (Akt 17:31) Me avan sa, Bondye pe donn sans tou sort kalite dimoun pour ganny en ‘konnesans egzakt’ lo laverite e azir an armoni avek sa konnesans pour zot ganny sove. Lavi bann dimoun i presye e i an danze. (Lir 1 Timote 2:3, 4. *) Si nou vreman okipe pe ed lezot pour ganny sa konnesans egzakt lo Bondye, sa letan ki reste avan ki Zeova i ziz sa lemonn pou pas pli vit. Tre byento e menm en sel kou, lafen pou arive. Kan sa i arive, pa nou pou vreman kontan ki nou ti byen okipe dan predikasyon!
KI LEVENNMAN KI POU EN LENDIKASYON KI SA LETAN POUR ESPERE IN TERMINEN?
9-11. Eski 1 Tesalonisyen 5:3 in fini ganny akonplir? Eksplike.
9 Lir 1 Tesalonisyen 5:1-3. Tre byento, bann nasyon pou dir: “Tou i an-pe e an sekirite.” Si nou pa oule ganny sirprann par sa lanons, nou bezwen “reste vizilan e azen.” (1 Tesa. 5:6) Pour ed nou reste vizilan spirityelman, annou vwar an bref bann levennman ki’n dan en sans prepar semen pour sa deklarasyon enportan.
10 Apre premye ek dezyenm lager mondyal, bann nasyon ti anvi lape. Apre premye lager mondyal, Lasosyete bann Nasyon ti ganny formen avek lespwar pour anmenn lape. Pli tar, apre dezyenm lager mondyal, bokou ti krwar ki Nasyon-z-ini ti pou anmenn lape lo later. Bann dirizan politik ek sef relizye in depan lo sa bann lorganizasyon pour anmenn lape lo later. Par egzanp, Nasyon-z-ini ti deklar 1986 konman Lannen enternasyonal pour lape. Sa menm lannen, bann dirizan ek sef relizye diferan nasyon ti zwenn ansanm avek Legliz Katolik Assisi, Itali pour fer lapriyer pour lape.
11 Me, ni sa deklarasyon lape ek sekirite, ni lezot deklarasyon parey pa’n akonplir sa profesi dan 1 Tesalonisyen 5:3. Akoz? Parski sa profesi konsernan sa ‘destriksyon ki ti pou ariv en sel kou’ pa ankor arive.
12. Ki nou konnen konsernan sa deklarasyon “Tou i an-pe e an sekirite”?
12 Lekel ki pou vreman dir sa parol “Tou i an-pe e an sekirite”? Ki rol bann sef relizye dan bann larelizyon Kretyen oubyen lezot larelizyon pou zwe? Dan ki fason dirizan bann gouvernman pou enplike? Labib pa dir. Sa ki nou konnen se ki nenport ki fason sa proklanmasyon pou ganny fer, ouswa ki degre konvenkan i pou paret ete, i pou zis en mansonz. Satan ki pou ankor pe diriz sa lemonn ki’n vreman gate depi latet ziska lipye e i pou reste koumsanmenm. Pa i pou vreman tris si serten parmi nou ti pou krwar dan sa propagann e pran kote dan sa lemonn!
13. Akoz bann lanz pe tenir divan destriksyon?
13 Lir Revelasyon 7:1-4. Anmezir nou esper lakonplisman 1 Tesalonisyen 5:3, bann lanz pwisan pe tenir divan destriksyon, andotmo, gran ladetres. Ki zot pe espere? Zapot Zan i dekrir en levennman pli enportan e sa se kan bann Kretyen swazir i finalman ganny marke avek sele Bondye lo zot fron. * Enn fwa ki bann Kretyen swazir in finalman ganny marke avek sele, bann lanz pou larg bann divan destriksyon. Ki pou arive alor?
14. Kwa ki montre ki Gran Babilonn pros pour ganny detrir?
14 Gran Babilonn, setadir tou bann fo larelizyon pou ganny zot destriksyon ki zot merite. “Bann pep, bann lafoul dimoun, bann nasyon ek bann lalang” pa pou kapab ed li. Nou deza pe vwar bann laprev ki i pros pour ganny eliminen. (Rev. 16:12; 17:15-18; 18:7, 8, 21) Anfet, nou deza pe vwar dan nouvel ki zot napa gran sipor. Bann larelizyon ek sef relizye pe kontinyelman ganny atake. Me toudmenm, bann sef Gran Babilonn i santi ki zot pa dan okenn danze. Zot vreman dan lerer. Apre sa proklanmasyon “Tou i an-pe e an sekirite,” bann eleman politik dan sa lemonn Satan pou vir kont fo larelizyon en sel kou e detri zot. Gran Babilonn pa pou ganny trouve zanmen ankor! Sirman, i vo lapenn esper sa bann levennman enportan avek pasyans.—Rev. 18:8, 10.
KI MANNYER NOU KAPAB DEMONTRE LAPRESYASYON POUR PASYANS BONDYE?
15. Akoz Zeova pa’n taye pour azir?
15 Menm si bann dimoun in anmenn en kantite repros lo son non, Zeova pe esper avek pasyans sa pli bon letan pour azir. Zeova pa oule ki okenn dimoun ki annan en leker senser i ganny detrir. (2 Pyer 3:9, 10) Eski nou osi nou santi parey? Avan ki son zour i arive, nou kapab demontre nou lapresyasyon pour pasyans Zeova dan sa bann fason ki swiv.
16, 17. (a) Akoz nou devret anvi ed sa bann ki inaktif? (b) Akoz i irzan pour bann inaktif retourn ver Zeova?
16 Ed sa bann ki inaktif. Zezi ti dir ki i annan lazwa dan lesyel kan zis en mouton ki ti’n perdi i ganny retrouve. (Mat. 18:14; Lik 15:3-7) Evidaman, Zeova i vreman enterese avek tou sa bann ki’n kontan li, menm si zot pa pe servi li aktivman la pour lemoman. Kan nou ed sa bann dimoun pour retourn dan kongregasyon, nou ede pour ki Zeova ek bann lanz i zwaye.
17 Eski ou parmi sa bann ki konmela pa pe servi Bondye aktivman? Petet en dimoun dan kongregasyon in fer ou ditor e akoz sa ou’n aret asosye avek lorganizasyon Zeova. Vi ki petet serten letan in pase, demann ou lekor, ‘Eski mon lavi i annan plis sans la konmela? Eski mon pli ere? Eski Zeova ki’n ofans mwan ouswa en imen enparfe? Eski Zeova in deza fer okenn keksoz pour fer mwan ditor?’ Fransman, i’n touzour fer sa ki byen pour nou. Menm si nou pa pe viv an armoni avek nou dedikasyon anver li, i les nou rezouir bann bon keksoz ki i fourni. (Zak 1:16, 17) Byento, zour Zeova pou arive. La konmela, i lemoman pour retourn dan lebra nou Papa ki dan lesyel e dan kongregasyon, sel landrwa ki sen e sof pandan sa bann dernyen zour.—Det. 33:27; Ebr. 10:24, 25.
18. Akoz nou devret siport sa bann ki annan responsabilite?
18 Fidelman siport sa bann ki annan responsabilite. Konman en bon Berze, Zeova i gid e protez nou. I’n apwent son Garson konman Sef Berze son troupo. (1 Pyer 5:4) Bann ansyen dan plis ki 100,000 kongregasyon i pran swen avek troupo Bondye endividyelman. (Akt 20:28) Kan nou fidelman siport sa bann ki annan responsabilite dan kongregasyon, nou pe demontre nou lapresyasyon pour Zeova ek Zezi pour tou sa ki zot fer pour nou.
19. Akoz i enportan pour reste pros avek kanmarad?
19 Vin pli pros avek kanmarad. Ki sa i vedir? Kan en larme byen antrennen i ganny atake par en lennmi, sak solda i koste avek kanmarad zepol kont zepol, andotmo zot vin pli pros avek kanmarad. Dan sa fason, zot form en defans ki preski enposib pour penetre. Satan pe entansifye son latak lo pep Bondye. La i pa lemoman pour lager antre nou. Plito, i lemoman pour koste pli pre ansanm, pa konsantre lo lenperfeksyon lezot e demontre konfyans dan dominasyon Zeova.
20. Ki nou devret fer la konmela?
20 Annou reste vizilan spirityelman e kontinyen espere. Avek pasyans, annou esper sa deklarasyon “Tou i an-pe e an sekirite” e osi ler bann Kretyen swazir i ganny marke avek dernyen sele Bondye. Apre sa, sa kat lanz pou larg bann divan destriksyon e Gran Babilonn pou ganny detrir. Anmezir nou esper sa bann levennman enportan arive, annou aksepte gidans sa bann ki’n ganny apwente pour diriz lorganizasyon Zeova. Ansanm, annou koste pour lit kont Dyab ek son bann demon! La i lemoman pour swiv konsey sa psalmis: “Pran kouraz e zot bezwen for dan zot leker, zot tou ki pe esper Zeova.”—Ps. 31:24.
[Not anba lo paz]
^ par. 3 Mika 7:2-6: “2 Dimoun fidel in disparet lo later, e napa ni menm en zonm drwat parmi bann imen. Zot tou, zot pe misouk pour vers disan. Sakenn i sas son prop frer pour fer li pri dan lasenn. 3 Zot lanmen pe fer sa ki mal e zot anvi fer li byen. Prens pe demann en keksoz e sa enn ki pe zize pe fer li pour ganny gous. Dimoun enportan pe koz lo sa ki li i an dezir, e zot tou zot pe konplote ansanm. 4 Sa enn pli meyer parmi zot i parey en touf pikan e sa enn pli drwat i pli pir ki en baraz pikan. Zour ki ou bann gardyen in anonse pou bezwen vini, kot zot pou bezwen rann kont, se la ki zot pou dan konfizyon. 5 Pa bezwen met zot konfyans dan en konpanyon oubyen dan en zanmi pros. Pa ouver ou labous avek sa madanm ki dormi o bor ou. 6 Parski en garson pou pe mepriz son papa, en fiy pou pe rebel kont son manman, en belfiy kont son belmer, lennmi en zonm pou bann zonm ki dan son lakour.”
^ par. 8 1 Timote 2:3, 4: “3 Sa i bon e i fer plezir Bondye nou sover, 4 ki oule ki tou [“sort kalite,” NW] dimoun i ganny sove e ganny konnesans laverite.”
^ par. 13 Pour plis leksplikasyon konsernan diferans ant premye fwa ki bann Kretyen swazir i ganny marke avek sele Bondye e ler zot finalman ganny marke, vwar Latour Veyer le 1 Zanvye 2007 paz 30-31 an Angle.
[Kestyon]
[Portre lo paz 10]
[Portre lo paz 12]
Pep Zeova i fer tou mannyer pour ed bann inaktif retourn kot Zeova (Vwar paragraf 16, 17)
[Portre lo paz 14]
La i lemoman pour koste ansanm pour lit kont Dyab ek son bann demon (Vwar paragraf 19)
