“Admir labote Zeova”

Bann sityasyon difisil i kapab annan en move lefe lo nou. Zot kapab preokip nou lespri, pran tou nou lafors e afekte nou fason vwar lavi. David ki ti lerwa Izrael ti ganny anvair avek bokou difikilte. Ki mannyer i ti fer fas avek tousala? Dan en psonm tousan, David i reponn: “Avek mon lavwa, mon ti kriy Zeova o sekour; avek mon lavwa, mon ti demann Zeova faver. Devan li, mon ti dir tou mon problenm. Devan li, mon ti dir mon bann lenkyetid, kan mon ti santi mon nepli kapab. Alor, ou ti vey mon semen.” Wi, avek limilite David ti priy Zeova pour son led.​—Ps. 142:1-3.

Dan en lot psonm, David ti sante: “Mon’n demann Zeova en keksoz, sanmenm ki mon pou rode, se pour mwan kapab reste dan lakaz Zeova tou mon lavi, pour admir labote Zeova e pour get son tanp avek lapresyasyon.” (Ps. 27:4) David pa ti en Levit, me imazin li pe debout an deor lakour sen, pros avek sa landrwa vre ladorasyon. Leker David i sitan ranpli avek rekonesans ki i anvi pas larestan son lavi laba e “admir labote Zeova.”

Sa mo Ebre ki ganny tradwir “labote” i fer resorti sa nide en keksoz ki “agreab oubyen ki fer plezir lespri, nou bann santiman ouswa nou bann sans.” David ti toultan apresye laranzman ki Zeova in fer pour vre ladorasyon. I ti a byen pour demann nou lekor, ‘Eski mon santi parey David?’

“GET . . . AVEK LAPRESYASYON” LARANZMAN BONDYE

Denozour, laranzman Zeova pour ador li pa depan lo en batiman. O kontrer, i annan pour fer avek gran tanp spirityel Bondye, setadir laranzman sakre pour vre ladorasyon. * Si nou ‘get avek lapresyasyon’ sa laranzman, nou osi nou kapab “admir labote Zeova.”

Mazin sa lotel an kwiv o bor larantre tabernak kot lofrann brile ti ganny fer. (Egz. 38:1, 2; 40:6) Sa lotel ti reprezant sa laranzman ki Bondye in met an plas pour aksepte lavi Zezi konman en sakrifis. (Ebr. 10:5-10) Zis mazinen ki sa i vedir pour nou! Zapot Pol ti ekrir: “Nou ti ganny rekonsilye avek li par lanmor son Garson.” (Rom. 5:10) Kan nou demontre lafwa dan disan Zezi ki’n ganny verse, nou kapab ganny sa laprouvasyon ek konfyans ki bann zanmi Bondye i gannyen. An rezilta, nou vin “pros avek” Zeova.​—Ps. 25:14.

Parski nou ganny “pardonnen nou pese” nou lafors spirityel i ganny renouvle. (Akt 3:19, 20) Nou sityasyon i parey en prizonnyen ki regret sa ki in fer dan lepase e i fer bann gran sanzman anmezir i pe esper son egzekisyon. Ler en bon ziz i vwar sa, i ganny motive pour akit li, setadir retir sa santans lanmor. Pa sa prizonnyen ti pou santi li soulaze e ere! Parey sa ziz, Zeova i donn son laprouvasyon bann imen ki repantir e retir kondannasyon lanmor lo zot.

PRAN PLEZIR DAN VRE LADORASYON

Parmi bann laspe vre ladorasyon ki David ti kapab obzerve kot lakaz Zeova, ti sa gran lafoul bann Izraelit ki ti’n rasanble, Lalwa ki ti pe ganny lir e eksplike an piblik, lansan ki ti  pe brile e bann pret ek Levit ti pe fer servis sakre. (Egz. 30:34-38; Nom. 3:5-8; Det. 31:9-12) Sa bann laspe vre ladorasyon an Izrael dan letan lontan i relye avek nou letan.

Denozour, parey dan lepase, ‘i bon e i agreab pour bann frer reste ansanm dan linite!’ (Ps. 133:1) I annan en gran logmantasyon dan nou “lasosyasyon bann frer” dan lemonn antye. (1 Pyer 2:17) Parol Bondye i ganny lir e eksplike piblikman pandan nou bann renyon. Atraver son lorganizasyon, Zeova i donn nou bann bon lenstriksyon. I osi annan en kantite nouritir spirityel atraver bann piblikasyon ki nou kapab servi dan nou letid personnel e ladorasyon fanmir. En manm Konsey Direkter ti dir: “Medit lo Parol Zeova, reflesir lo son sinifikasyon e fer resers pour ganny konprenezon ek bon zizman in fer mwan vin ris spirityelman e trouv lazwa.” Wi, “konnesans i vin en keksoz agreab dan nou lavi.”​—Prov. 2:10.

Dan nou letan, tou le zour Zeova i ekout lapriyer son bann serviter. Pour Zeova, sa bann lapriyer i parey lansan ki anvoy en bon loder. (Ps. 141:2) Pa i agreab pour nou kan nou realize ki Zeova i pran plezir dan nou ler nou apros li avek limilite dan lapriyer!

Dan son lapriyer, Moiz ti dir: “Ki Zeova nou Bondye i donn nou son laprouvasyon, e ki ou fer reisi sa ki nou fer.” (Ps. 90:17) Anmezir nou devoue dan nou minister, Zeova i beni nou travay. (Prov. 10:22) I kapab ki nou’n ed serten pour aprann laverite. Petet nou’n bezwen andire pour plizyer lannen dan nou minister malgre maladi, problenm emosyonnel, persekisyon e ler dimoun pa demontre lentere. (1 Tesa. 2:2) Kantmenm sa, pa nou’n vwar “labote Zeova” e realize ki nou Papa dan lesyel i vreman apresye nou zefor!

David ti sante: “Zeova i mon par, sa par ki i’n donn mwan e mon lakoup. Ou protez mon leritaz. Bann zoli landrwa in ganny rezerve pour mwan.” (Ps. 16:5, 6) David ti apresye son “par,” savedir, pour annan en bon relasyon avek Zeova e sa privilez pour servi li. Parey David, nou kapab pas dan bann moman difisil, me nou annan bokou benediksyon spirityel. Alor, annou kontinyen pran plezir dan vre ladorasyon e touzour ‘get avek lapresyasyon’ tanp spirityel Zeova.

[Not anba lo paz]

[Ekstre lo paz 29]

Dan bann moman difisil, David ti priy avek limilite pour ganny led Zeova