Rezouir akoz maryaz Lanyo!
Rezouir akoz maryaz Lanyo!
“Annou rezoui, annou selebre. . . . Parski maryaz Lanyo in arive.”—REV. 19:7.
PWEN ENPORTAN POUR MAZINEN
Konsernan maryaz Lanyo, lekel nouvel marye e ki mannyer Kris in prepar nouvel marye pour sa maryaz?
Kan ki maryaz Lanyo pou ganny fer?
Ki mannyer nou konnen ki ‘lezot mouton’ osi pou dan en lakontantman parey tou bann lanz ler Lanyo pou marye?
1, 2. (a) Maryaz lekel ki pou anmenn lazwa dan lesyel? (b) Ki kestyon ki ganny souleve?
I TOUZOUR pran letan pour prepar en maryaz. Me nou, nou pou konsantre lo en maryaz vreman spesyal, en maryaz rwayal. Zis mazin sa! I fer preski 2,000 an depi ki i pe ganny prepare. La aprezan letan pe apros byen vit pour sa nouvo ek nouvel marye reini ansanm. Byento, i pou annan bann zoli lanmizik ki pou rezonnen dan pale Lerwa e en gran lafoul dan lesyel pou sante: “Alelouya! Nou Senyer [Zeova] nou Bondye Toupisan i Lerwa. Annou rezoui, annou selebre, annou rann glwar Bondye. Parski maryaz Lanyo in arive, e son Nouvel-Marye in prepar li.”—Rev. 19:6, 7.
2 Sa “Lanyo” ki son maryaz pou anmenn lazwa dan lesyel i pa lot ki Zezi Kri. (Zan 1:29) Ki mannyer i’n abiye pour son maryaz? Lekel son nouvel marye? Ki mannyer sa nouvel marye in ganny prepare pour sa maryaz? Kan ki sa maryaz i ganny fer? Sa maryaz pou anmenn lazwa dan lesyel, me eski sa bann ki annan lespwar pour viv lo later pou zwaye zot osi? Sirman, ou vreman anvi konnen, alor nou pou vwar larepons sa bann kestyon anmezir nou kontinyen egzamin Psonm 45.
‘SON RESANZ IN GANNY PARFIMEN’
3, 4. (a) Kwa ki ganny dir konsernan lenz maryaz sa Nouvo Marye e kwa ki fer li pli zwaye ankor? (b) Lekel “fiy bann lerwa” ek sa “larenn” ki zwaye parey Nouvo Marye?
3 Lir Psonm 45:8, 9. * Nouvo Marye, Zezi Kri i met son lenz maryaz. Sirman, son lenz i anvoy en bon loder parey “bann pli bon kalite lesans,” tel ki lamir ek kasya (Myrrh ek Cassia an Angle), ki ti parmi bann zengredyen ki ti ganny servi pour fer delwil sen pour apwent en lerwa Izrael.—Egz. 30:23-25.
4 Sa zoli lanmizik ki pe rezonnen dan son pale i ogmant lazwa nouvo marye anmezir ki son maryaz i aprose. “Larenn,” setadir parti envizib lorganizasyon Bondye, ki enkli “fiy bann lerwa” andotmo, bann lanz, zot osi zot zwaye. Pa i vreman en plezir pour tann bann lavwa dan lesyel ki dir: ‘Annou rezoui, annou selebre, parski maryaz Lanyo in arive’!
NOUVEL MARYE IN GANNY PREPARE POUR MARYAZ
5. Lekel “madanm Lanyo”?
5 Lir Psonm 45:10, 11. * Nou’n fini konnen lekel Nouvo Marye, me lekel nouvel marye? I sa 144,000 Kretyen swazir konman en group, ki Zezi i zot sef. (Lir Efezyen 5:23, 24.) Zot pou form parti sa Rwayonm kot Kris i dirize konman Lerwa. (Lik 12:32) Sa 144,000 Kretyen swazir i “swiv Lanyo partou kot i ale.” (Rev. 14:1-4) Zot vin “madanm Lanyo” e zot al reste avek li dan lesyel.—Rev. 21:9; Zan 14:2, 3.
6. Akoz bann Kretyen swazir i ganny apele “fiy lerwa” e akoz zot ganny demande pour ‘oubliy zot pep’?
6 Sa nouvel marye pa zis ganny adrese konman “O fiy” me osi konman “fiy lerwa.” (Ps. 45:13) Lekel sa “lerwa”? Bann Kretyen swazir i ganny adopte konman “bann zanfan” Zeova. (Rom. 8:15-17) Vi ki zot pou vin nouvel marye dan lesyel, bann Kretyen swazir i ganny dir: “Oubliy ou pep ek lakour ou papa [natirel].” Zot devret gard zot lespri ‘fikse lo bann keksoz ki dan lesyel, e non pa lo bann keksoz ki lo later.’—Kol. 3:1-4.
7. (a) Dan ki fason Kris in prepar son fitir nouvel marye? (b) Ki mannyer nouvel marye i konsider son fitir Nouvo Marye?
7 Pour plizyer syek, Kris ti pe prepar son fitir nouvel marye pour sa maryaz dan lesyel. Zapot Pol ti eksplike ki Kris ti “kontan [“kongregasyon,” NW] e i’n donn son lavi pour li. I’n fer sa pour [“sanktifye kongregasyon,” NW] pour Bondye, apre ki i’n pirifye li par delo ek son parol. Parski i’n oule prezant [“kongregasyon,” NW] devan li dan tou son labote, sen, san defo, san okenn tas, dan tou laperfeksyon.” (Efe. 5:25-27) Pol ti dir bann Kretyen swazir Korent: “Mon zalou pour zot, avek en zalouzi ki sorti kot Bondye, parski mon’n prezant zot konman en zenn fiy vyerz ki mon’n fiyanse avek en sel zonm, Kris.” (2 Kor. 11:2) Lerwa Zezi Kri, sa Nouvo Marye i apresye “labote” spirityel son fitir nouvel marye. Nouvel marye osi i konsider li konman son “senyer” e i ‘prostern devan li’ konman son fitir msye.
SA NOUVEL MARYE I “GANNY ANMENNEN KOT LERWA”
8. Akoz i apropriye ki sa nouvel marye i ganny dekrir konman “vreman zoli”?
8 Lir Psonm 45:13, 14a. * Sa nouvel marye i “vreman zoli” pour sa maryaz rwayal. Dan Revelasyon 21:2, sa nouvel marye i ganny konpare avek en lavil, Nouvel Zerizalenm, ki’n “abiye pour son msye.” Sa lavil ki dan lesyel i annan “laglwar Bondye” e ‘son lekla i resanble en pyer presyez byen rar, parey zasp, transparan parey kristal.’ (Rev. 21:10, 11) Labote Nouvel Zerizalenm i ganny dekrir dan en zoli fason dan liv Revelasyon. (Rev. 21:18-21) I pa drol alor ki sa psalmis i dekrir sa nouvel marye konman “vreman zoli”! Apre tou, sa maryaz rwayal pe ganny fer dan lesyel.
9. Lekel sa “lerwa” ki nouvel marye in ganny anmennen kot li e ki mannyer nouvel marye in abiye?
9 Sa nouvel marye i ganny anmennen kot Nouvo Marye, setadir Lerwa sa Rwayonm. I’n prepar nouvel marye, par “pirifye li par delo ek son parol.” I “san okenn tas, dan tou laperfeksyon.” (Efe. 5:26, 27) Son nouvel marye i devret osi sanz dan en fason apropriye pour sa lokazyon. Sanmenm sa ki i’n fer! Parski “son lenz in ganny dekore avek lor” e “i pou ganny anmennen devan lerwa dan bann zoli lenz ki’n ganny koud.” Pour son maryaz avek Lanyo, ‘i’n ganny akorde pour abiy dan linenn fen klate e pir parski linenn fen i, annefe reprezant, bann laksyon lazistis bann sen.’—Rev. 19:8.
‘MARYAZ IN ARIVE’
10. Kan ki maryaz Lanyo pou ganny fer?
10 Lir Revelasyon 19:7. Kan maryaz Lanyo? Menm si “son madanm in prepar son lekor” pour sa maryaz, sa ki ganny dir apre pa pe dekrir sa maryaz li menm. Plito, i klerman donn nou en bon deskripsyon konsernan dernyen faz gran ladetres. (Rev. 19:11-21) Eski sa i vedir ki sa maryaz pou ganny fer avan sa Nouvo Marye ki Lerwa i fini ranport laviktwar? Non. Bann vizyon dan liv Revelasyon i pa dan lord kronolozik. Dan karannsenkyenm Psonm, sa maryaz rwayal i ganny fer apre ki sa Lerwa, Zezi Kri, i pran son lepe e ‘ale pour ranport laviktwar’ lo son lennmi.—Ps. 45:3, 4.
11. Dan ki lord Kris pou ranport son laviktwar?
11 Alor, nou kapab tonm lo sa konklizyon ki lord sa bann levennman pou koumsa: Premyerman, sa “gran prostitye,” Gran Babilonn, setadir tou bann fo larelizyon pou ganny detrir. (Rev. 17:1, 5, 16, 17; 19:1, 2) Apre sa, Kris pou ale pour egzekit zizman Bondye lo larestan sa move lemonn Satan lo later par detri li pandan Armagedon, ‘konba sa gran zour Bondye Toupisan.’ (Rev. 16:14-16; 19:19-21) Finalman, sa Lerwa e Gerye pou ranport son laviktwar par zet Satan ek son bann demon dan labim, kot zot pou inaktif dan zar konmsi zot pou’n mor.—Rev. 20:1-3.
12, 13. (a) Kan ki Lanyo pou marye? (b) Dan lesyel, lekel ki pou dan lazwa akoz maryaz Lanyo?
12 Ler bann Kretyen swazir i termin zot lavi lo later pandan prezans Kris, zot ganny resisite pour al viv dan lesyel. En pe letan apre destriksyon Gran Babilonn, Zezi pou rasanble larestan manm sa nouvel marye. (1 Tesa. 4:16, 17) Alor, avan ki Armagedon i konmanse, tou manm sa “nouvel marye” pou dan lesyel. Apre sa lager, Lanyo pou kapab marye. Pa maryaz Lanyo pou en lokazyon vreman zwaye! Revelasyon 19:9 i dir: “Byennere, bann ki ganny envite pour festen maryaz Lanyo.” Sirman sa 144,000 manm sa nouvel marye pou dan en gran lazwa. Nouvo Marye ki Lerwa pou osi dan en gran lazwa akoz tou son bann asosye rwayal pou la pour ‘manze e bwar atab avek li dan son Rwayonm’ dan en sans senbolik. (Lik 22:18, 28-30) Me, pa zis Nouvo Marye ek nouvel marye ki pou zwaye akoz maryaz Lanyo.
13 Parey nou ti vwar pli boner, bann lafoul dan lesyel osi i sant ansanm: “Annou rezoui, annou selebre, annou rann glwar Bondye. Parski maryaz Lanyo in arive, e son Nouvel-Marye in prepar li.” (Rev. 19:6, 7) Me, ki nou pou dir konsernan bann serviter Zeova lo later? Eski zot pou dan menm lazwa?
“ZOT POU GANNY ANMENNEN AVEK LAKONTANTMAN”
14. Parey i ganny mansyonnen dan Psonm 45, lekel sa “bann fiydoner” nouvel marye?
14 Lir Psonm 45:12, 14b, 15. * Profet Zekarya ti predir ki pandan letan lafen, bann dimoun dan tou nasyon pou kontan pour asosye avek larestan Izrael spirityel. I ti ekrir: “Pandan sa bann letan, dis zonm sorti dan tou langaz bann nasyon pou tyonbo, wi, zot pou vreman tyonbo for rob en Zwif, an dizan: ‘Nou anvi al avek zot, akoz nou’n antann ki Bondye i avek zot.’” (Zeka. 8:23) Dan Psonm 45:12, sa “dis zonm” senbolik i ganny apele “fiy Tir” ek “bann zonm pli ris.” Zot anmenn bann kado kot bann Kretyen swazir ki ankor lo later pour ki zot ganny faver ek led spirityel. Depi 1935, plizyer milyon dimoun in les sa bann Kretyen swazir ‘anmenn zot ver ladrwatir.’ (Dan. 12:3) Sa bann konpanyon ki fidel avek bann Kretyen swazir in pirifye zot lavi e dan sa sans zot in vin bann vyerz spirityel. Sa “bann fiydoner” nouvel marye in dedye zot lekor avek Zeova e zot in prouve ki zot bann sitwayen fidel Nouvo Marye ki Lerwa.
15. Ki mannyer “bann fiydoner” in travay ansanm avek nouvel marye ki ankor lo later?
15 Larestan Kretyen swazir ki ankor lo later ki form parti nouvel marye i pli rekonesan ankor anver sa “bann fiydoner” akoz zot pres “sa Bonn Nouvel Rwayonm” avek devouman lo later antye. (Mat. 24:14) Pa zis “Lespri avek Nouvel-Marye” ki dir “Vini!” me bann ki tande osi i dir: “Vini!” (Rev. 22:17) Wi, ‘lezot mouton’ i tann manm sa nouvel marye dir “Vini!” e zot osi zot in zwenn ansanm pour dir “Vini!” avek bann zabitan later.—Zan 10:16.
16. Ki privilez Zeova in donn lezot mouton?
16 Bann Kretyen swazir ki ankor lo later i kontan zot bann konpanyon e zot kontan ki Zeova, Papa Nouvo Marye in donn lezot mouton lo later sa privilez pour eksperyans lazwa pour maryaz Lanyo dan lesyel. I ti’n ganny predir ki sa “bann fiydoner” ti pou “ganny anmennen avek lakontantman ek lazwa.” Wi, lezot mouton, ki annan lespwar pour viv pour touzour lo later pou osi dan sa lakontantman iniversel zour maryaz Lanyo dan lesyel. I apropriye alor, ki liv Revelasyon i idantifye bann manm “gran lafoul” konman bann ki pe “debout devan tronn e devan Lanyo.” Zot ofer Zeova en servis sakre dan lakour son tanp spirityel lo later.—Rev. 7:9, 15.
“OU BANN GARSON POU RANPLAS OU BANN ZANSET”
17, 18. Ki benediksyon maryaz Lanyo pou anmennen e Kris pou vin papa lekel pandan son Renny Milener?
17 Lir Psonm 45:16. * Sa “bann fiydoner” nouvel marye Kris pou dan plis lazwa ankor kan sa maryaz pou anmenn benediksyon dan nouvo lemonn. Nouvo Marye ki Lerwa pou port latansyon lo later e i pou resisit son bann “zanset” ki pou vin son “bann garson.” (Zan 5:25-29; Ebr. 11:35) Parmi sa bann garson i pou apwent serten konman “bann prens lo later antye.” San okenn dout, Kris pou apwent serten parmi bann ansyen fidel dan nou letan pour desarz bann responsabilite dan nouvo lemonn.—Iza. 32:1.
18 Pandan son Renny Milener, Kris pou vin papa pour lezot osi. Anfet, tou bann ki demontre lafwa dan sakrifis Zezi pou viv pour touzour lo later. (Zan 3:16) Alor Kris pou vin zot “Papa Eternel.”—Iza. 9:6, 7.
MOTIVE ‘POUR FER KONNEN SON NON’
19, 20. Ki lefe bann levennman eksitan dan Psonm 45 i annan lo tou vre Kretyen ozordi?
19 Lir Psonm 45:1, 17. * Byensir, bann levennman dan Psonm 45 i konsern tou Kretyen. Bann Kretyen swazir ki ankor lo later i apresye bokou sa lespwar ki byento zot pou reini dan lesyel avek zot bann frer ek Nouvo Marye. Lezot mouton i ganny motive pour soumet plis ankor avek zot Lerwa glorye e zot rekonesan pour sa privilez ki zot annan pour asosye avek larestan manm sa nouvel marye ki ankor lo later. Apre zot maryaz, Kris ek bann asosye dan son Rwayonm pou devers benediksyon lo bann zabitan later.—Rev. 7:17; 21:1-4.
20 Anmezir nou pe esper “en bon keksoz” arive konsernan Lerwa sa Rwayonm, pa nou ganny motive pour ‘fer konnen son non’! Annou fer sir ki nou parmi sa bann ki pou ‘loue sa Lerwa pour touzour.’
[Not anba lo paz]
^ par. 3 Psonm 45:8, 9: “8 Tou ou bann lenz i lamir, dibwa aloes ek kasya; dan sa zoli pale ivwar, bann lenstriman lakord in fer ou zwaye. 9 Bann fiy lerwa i parmi ou bann madanm presye. Larenn in pran son plas dan ou kote drwat dekore avek lor Ofir.”
^ par. 5 Psonm 45:10, 11: “10 Ekoute, O fiy e gete, ouver ou zorey; e oubliy ou pep ek lakaz ou papa. 11 E lerwa pou anvi ou labote, parski i ou senyer, alor prostern devan li.”
^ par. 8 Psonm 45:13, 14a: “13 Fiy lerwa i vreman glorye dan son lakaz; son lenz in ganny dekore avek lor. 14a I pou ganny anmennen devan lerwa dan bann zoli lenz ki’n ganny koud.”
^ par. 14 Psonm 45:12, 14b, 15 “12 Fiy Tir osi i vin avek en kado; bann zonm pli ris pou fer ou plezir.” “14b Bann vyerz ki pe swiv li konman son bann fiydoner pe ganny anmennen kot ou. 15 Zot pou ganny anmennen avek lakontantman ek lazwa; zot pou antre dan pale lerwa.”
^ par. 17 Psonm 45:16: “Ou bann garson pou ranplas ou bann zanset, ou pou apwent zot konman bann prens lo later antye.”
^ par. 19 Psonm 45:1, 17: “1 En bon keksoz in tous mon leker. Mon pe dir: ‘Sa ki mon fer i annan pour fer avek en lerwa.’ Ki sa ki mon lalang i dir i parey sa ki en sekreter kalifye i ekrir.” “17 Mon pou mansyonn ou non tou dilon tou bann zenerasyon ki pe vini. Pour sa rezon ki dimoun pou loue ou pour en letan endefini, wi pour touzour.”
[Kestyon]
[Portre lo paz 11]
Maryaz Lanyo i fer “bann fiydoner” nouvel marye zwaye (Vwar paragraf 16)
