Zeova nou pli bon zanmi

“[Abraam] ti ganny apele zanmi Bondye.”​—ZAK 2:23.

KI OU POU REPONN?

Kwa ki kapab fer Zeova vin ou Zanmi?

Dapre Psonm 15:3, 5, ki Bondye i ekspekte avek nou si nou pou ganny konsidere konman son zanmi?

Kwa ki pou ed nou pour devid nou leker avek nou pli bon Zanmi?

1. Vi ki nou’n ganny kree dan resanblans Bondye, ki abilite nou annan?

“TEL papa, tel piti” i en parol ki souvan dimoun i dir. Anfet, bokou zanfan i parey zot paran. Apre tou, en zanfan i erit bann kalite son papa ek son manman. Zeova, nou Papa dan lesyel i Sours lavi. (Ps. 36:9) Nou, son bann zanfan lo later, nou resanble li a en serten degre. Vi ki nou’n ganny kree dan son resanblans, nou annan sa abilite pour rezonnen, tir konklizyon, devlop e gard lanmitye avek lezot.​—Zen. 1:26.

2. Kwa ki fer li posib pour Zeova vin nou zanmi?

² Zeova i kapab vin nou pli bon zanmi. Sa lanmitye i akoz Bondye i kontan nou e nou nou annan lafwa dan li ek son Garson. Zezi ti dir: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) I annan bokou serviter Bondye ki ti annan en relasyon pros avek li. Annou egzamin de legzanp.

“ABRAAM MON ZANMI”

3, 4. Kwa ki ti fer relasyon Abraam avek Zeova diferan avek sa ki pour nasyon Izrael?

³ Zeova ti refer avek papa e zanset bann Izraelit konman “Abraam mon zanmi.” (Iza. 41:8) Dezyenm Kronik 20:7 i osi  apel Abraam en zanmi Bondye. Kwa ki ti ed sa zonm fidel pour kontinyen gard son lanmitye avek son Kreater? I ti son lafwa.​—Zen. 15:6; lir Zak 2:21-23.

⁴ Desandans Abraam ki ti vin nasyon ansyen Izrael ti annan Zeova konman zot Papa ek Zanmi. Me malerezman, zot ti perdi zot relasyon avek Bondye. Akoz? Parski zot pa ti gard zot lafwa dan bann promes Zeova.

5, 6. (a) Ki mannyer Zeova in vin ou Zanmi? (b) Ki kestyon i ti a byen nou demande?

⁵ Pli ou aprann konsernan Zeova, pli ou lafwa dan li i vin pli for e ou lanmour pour li i vin pli profon. Esey mazin kan ou ti dekouver ki Bondye i en Personnaz reel, enn ki ou ti kapab annan en relasyon pros avek. Ou ti osi aprann ki nou tou nou’n ne avek pese akoz dezobeisans Adan. Ou ti arive konpran ki limanite in elwannyen avek Bondye. (Kol. 1:21) Apre, ou ti realize ki i posib pour nou vin pros avek nou Papa lanmour dan lesyel e ki i enterese avek nou. Kan nou ti aprann konsernan sakrifis Zezi e demontre lafwa dan sa sakrifis, nou ti konmans devlop en lanmitye avek Bondye.

⁶ Kan nou mazin tousala, nou kapab demann nou lekor: ‘Eski mon lanmitye avek Bondye in vin pli for? Eski sak zour, mon konfyans dan Zeova e mon lanmour pour li pe vin pli solid?’ En lot dimoun dan lepase ki ti annan en relasyon pros avek Zeova ti Gideonn. Annou egzamin son bon legzanp e pran li aker.

“ZEOVA I LAPE”

7-9. (a) Ki leksperyans remarkab Gideonn ti annan e avek ki rezilta? (Vwar portre lo paz 21.) (b) Kwa ki kontribye anver en bon lanmitye avek Zeova?

⁷ Ziz Gideonn ti servi Zeova dan en letan difisil dan listwar Izrael apre ki sa nasyon ti’n antre dan Later Promiz. Ziz sapit 6 i dir ki lanz Zeova ti vizit Gideonn dan lavil Ofra. Sa letan, bann Madyanit ti en vre menas pour Izrael. Sanmenm ki Gideonn ti pe bat dible dan en preswar pour diven kot i ti pou kapab kasyet son bann bon lagrenn vitman e non pa dan en laplenn kot dimoun ti kapab vwar li. Gideonn ti sirprann ki sa lanz ti’n aparet e adres li konman en “gran gerye” e i ti demande si Zeova ki ti’n delivre bann Izraelit Lezip ti pou vreman ed zot aprezan. Atraver sa lanz, Zeova ti asir Gideonn ki i ti pou vreman ed li.

⁸ Gideonn ti pe mazinen ki mannyer i ti pou posib pour li “sov Izrael dan lanmen bann Madyanit.” Larepons ti kler. Zeova ti dir: “Parski mon pou avek ou, ou pou defet bann Madyanit konmsi zot ti en sel zonm.” (Ziz 6:11-16) San dout, Gideonn ti ankor pe mazinen ki mannyer sa ti pou arive, alor i ti demann Zeova pour donn li en siny. Remarke ki dan sa konversasyon, i ti napa okenn dout ki Gideonn ti vwar Zeova konman en Personnaz reel.

⁹ Sa ki ti arive apre ti fortifye lafwa Gideonn e fer li vin pli pros avek Bondye. Gideonn ti prepar en repa e ti donn sa lanz pour manze. Kan sa lanz ti tous sa repa avek son baton e sa repa ti brile dan en fason mirakile, la Gideonn ti realize ki sa lanz ti vreman reprezantan Zeova. Gideonn ti per alor i ti dir: “A Souvren Senyer Zeova, mon’n vwar lanz Zeova fas a fas.” (Ziz 6:17-22) Me eski sa lensidan ti met en baryer ant Gideonn ek son Bondye? Me non! Sa ki ti arive ti tou le kontrer. Gideonn ti arive konn Zeova dan en fason ki ti fer li anpe avek Bondye. Nou konn sa akoz sa non ki Gideonn ti donn sa lotel ki i ti fer dan sa landrwa ti “Zeova-Salonm.” Sa non i  vedir “Zeova i lape.” (Lir Ziz 6:23, 24 *; not.) Kan nou medit lo sa ki Zeova i fer pour nou sak zour, nou realize ki i en vre Zanmi. Ler nou priy Bondye regilyerman, sa i fer nou santi nou pli anpe e nou lanmitye avek li i vin pli for.

LEKEL KI POU VIN ‘EN ENVITE DAN LATANT ZEOVA’?

10. Dapre Psonm 15:3, 5, ki Zeova i ekspekte avek nou pour ki nou vin son zanmi?

¹⁰ Me pour ki Zeova i vin nou Zanmi, nou bezwen ranpli serten kondisyon. Parey i’n ganny ekrir dan Psonm 15, David ti sant lo sa ki nou bezwen fer pour vin ‘en envite dan latant Zeova,’ setadir vin en zanmi Bondye. (Ps. 15:1) Annou egzamin de kondisyon. Sa de kondisyon i: Pa fer kalonmni e azir onnetman dan tou sa ki nou fer. Konsernan sa bann kondisyon, David ti dir sa konsernan en envite dan latant Zeova: “I pa fer kalonmni avek son lalang . . . I pa aksepte gous kont sa enn inosan.”​—Ps. 15:3, 5.

11. Akoz nou pa devret fer kalonmni lo personn?

¹¹ Dan en lot psonm, David ti averti nou: “Protez ou lalang kont sa ki move.” (Ps. 34:13) Si nou pa ekout sa konsey enspire, sa pou elwanny nou avek nou Papa ki drwat. Anfet, kalonmni i en move tre ki Satan, sa gran lennmi Zeova i annan. Sa mo “Dyab” i sorti dan en mo Grek ki vedir “sa enn ki fer kalonmni.” Ler nou veye ki nou dir lezot oubyen lo lezot, nou ede kontribye pour ki nou reste pros avek Zeova. I sirtou enportan ki nou veye sa ki nou dir lo bann ki annan responsabilite dan kongregasyon.​—Lir Ebre 13:17; Zid 8.

12, 13. (a) Akoz nou devret onnet dan tou sa ki nou fer? (b) Ki lefe nou lonnekte i kapab annan lo lezot?

¹² Olye profit lo lezot, bann serviter Zeova i devret onnet. Zapot Pol ti ekrir: “Priy pour nou. Nou sir ki nou annan en konsyans kler, parski nou oule fer sa ki byen [oubyen “nou onnet,” NW] dan tou sirkonstans.” (Ebr. 13:18) Parski nou determinen pour ‘fer sa ki byen oubyen nou onnet dan tou sirkonstans,’ nou pou evite profit lo nou bann frer ek ser Kretyen. Par egzanp, si zot anploye avek nou, nou devret fer sir ki nou tret zot byen e pey zot dapre lagreman ki nou’n fer avek zot. Konman bann Kretyen, nou azir onnetman avek nou bann anplwaye ensi ki tou lezot dimoun. Si nou’n ganny anploye avek enn nou frer oubyen ser Kretyen, nou bezwen fer atansyon ki nou pa profit lo li par demann li bann faver.

¹³ Pa bann dimoun lemonn ki travay avek bann Temwen Zeova i souvan dir ki zot apresye nou! Par egzanp, direkter en gran lakonpannyen konstriksyon ti remarke ki bann Temwen Zeova i gard zot parol. I ti dir: “Zot toultan gard zot parol.” (Ps. 15:4) Kan nou azir dan sa fason, sa i ede pour ki nou reste zanmi avek Zeova. Deplis, i anmenn laglwar lo nou Papa ki dan lesyel.

ED LEZOT VIN ZANMI ZEOVA

14, 15. Ki mannyer nou kapab ed lezot vin zanmi Zeova dan predikasyon?

¹⁴ Bokou dimoun ki nou zwenn dan predikasyon i krwar ki Bondye i egziste, me zot pa konsider li konman zot pli bon zanmi. Ki mannyer nou kapab ed zot? Reflesir lo lenstriksyon ki Zezi ti donn son 70 disip ler i ti anvoy zot pour  prese par de: “Nenport ki lakaz ki zot antre, premye keksoz dir: ‘Lape pour sa lakaz!’ Si i annan la en dimoun ki posed lape, ou swe lape i a reste avek li, sinon, ou swe lape i a retourn avek ou.” (Lik 10:5, 6) Nou kapab atir dimoun anver laverite kan nou amikal avek zot. Dan ka bann ki opoz nou, sa i kapab ede pour redwir friksyon pour ki laprosenn fwa nou a ganny pli byen resevwar.

¹⁵ Kan nou zwenn bann dimoun ki anfonse dan fo larelizyon oubyen ki swiv bann koutim ki pa baze lo Labib, nou devret kontinyen azir dan en fason amikal e anpe anver zot. Nou akeyir dan nou renyon tou bann ki pa satisfe avek sa ki sa lemonn i annan pour ofer e ki anvi konn plis lo sa Bondye ki nou adore. I annan en kantite zoli legzanp dan sa seri lartik “Labib i sanz lavi.”

NOU TRAVAY AVEK NOU PLI BON ZANMI

16. Dan ki sans nou ganny konsidere konman zanmi Zeova ek bann ki ‘travay ansanm avek li’?

¹⁶ Dimoun ki travay ansanm i souvan devlop bann bon lanmitye. Tou bann ki’n dedye zot lavi avek Zeova i annan sa privilez pour ganny konsidere konman son zanmi ek bann ki ‘travay ansanm avek li.’ (Lir 1 Korentyen 3:9.) Anfet, ler nou partisip dan sa travay pour anons sa bon nouvel e fer disip, nou pli byen konpran bann zoli kalite nou Papa ki dan lesyel. Nou vwar konman lespri sen i ed nou pour pli byen anons sa bon nouvel.

17. Ki mannyer sa nouritir spirityel ki nou gannyen dan nou bann lasanble i montre ki Zeova i nou Zanmi?

¹⁷ Pli nou partisip dan sa travay predikasyon, pli nou pou santi nou pros avek Zeova. Par egzanp, nou remark lafason ki Zeova i opoz nou bann lennmi. Ler nou reflesir lo tou sa ki Zeova in fer pour nou dan lepase, eski pa i kler ki Bondye pe gid nou? Nou enpresyonnen pour sa bon nouritir spirityel ki nou kontinyelman gannyen. Nou bann progranm lasanble ki nou gannyen i montre ki nou Papa i konn byen nou bann problenm ek bezwen. Pour montre zot lapresyasyon pour en lasanble distrik, en fanmir ti ekrir: “Sa lasanble ti vreman tous nou leker. Nou ti santi ki kantite Zeova i kontan sakenn ant nou e ki kantite i anvi nou reisi.” Apre ki zot ti’n asiste en lasanble distrik spesyal Irlann, en koup sorti Lalmanny ti eksprim zot rekonesans pour swen ek lakey ki zot ti resevwar. Zot ti azoute: “Me nou pli rekonesan anver Zeova ek son Lerwa Zezi Kri. Zot in envit nou pour form parti sa nasyon ki vreman ini. Nou pa pe zis koz lo linite me nou pe apresye li tou le zour. Sa ki nou’n eksperyanse  dan sa lasanble distrik spesyal Dublin pou toultan rapel nou sa privilez presye ki nou annan pour servi nou Bondye ansanm avek zot tou.”

BANN ZANMI I KOMINIKE

18. Ki nou kapab demann nou lekor konsernan kominikasyon avek Zeova?

¹⁸ Bann zanmi i vin pli pros ler i annan bon kominikasyon. Konmela, en kantite dimoun i kominike atraver sit sosyal lo Enternet oubyen anvoy mesaz par telefonn. Me, nou personnelman, ki mannyer nou kominikasyon avek nou pli bon Zanmi Zeova i ete? I vre, i “sa Enn ki ekout lapriyer.” (Ps. 65:2) Me ki kantite fwa nou pran linisyativ pour koz avek li?

19. Kwa ki kapab ed nou si nou vwar li difisil pour devid nou leker avek Zeova?

¹⁹ Serten serviter Bondye pa vwar li fasil pour devid zot leker e eksprim zot santiman pli profon. Pourtan, se sanmenm ki Zeova i anvi nou fer. (Ps. 119:145; Lam. 3:41) Menm si nou kapab vwar li difisil pour eksprim nou santiman, nou annan led. Pol ti ekrir bann Kretyen Ronm: “Nou pa konnen sa ki bon pour demande kan nou fer lapriyer. Me Lespri i pled pour nou avek bann soupir ki nou pa kapab eksprimen par parol. E Bondye ki war dan leker i konpran sa ki Lespri i oule demande, parski Lespri i priy an faver bann sen.” (Rom. 8:26, 27) Ler nou medit lo sa ki dan Labib, tel parey liv Zob, Psonm ek Proverb, sa pou ed nou eksprim nou santiman pli profon avek Zeova.

20, 21. Ki mannyer sa parol dan Filipyen 4:6, 7 i rekonfort nou?

²⁰ Ler nou fer fas avek bann sityasyon difisil, annou pran aker sa konsey enspire ki Pol ti donn bann Filipyen: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan.” Kan nou kominik dan sa fason avek nou pli bon Zanmi, sirman sa pou rekonfort e konsol nou. Pol i kontinyen dir: “Ki lape Bondye ki depas tou konpreansyon imen i ava gard zot leker ek zot lespri dan Kris-Zezi.” (Fili. 4:6, 7) Annou touzour apresye sa “lape Bondye” ki napa son parey, ki vreman gard nou leker ek lespri.

²¹ Lapriyer pou ed nou devlop en lanmitye avek Zeova. Alor annou “priye tou letan!” (1 Tesa. 5:17) Ki sa letid i ava ranforsi nou relasyon avek Bondye ek nou determinasyon pour swiv son bann lalwa drwat. Annou pran letan pour medit lo bann benediksyon ki nou gannyen akoz Zeova i nou Papa, nou Bondye e nou pli bon Zanmi.

[Not anba lo paz]

[Kestyon]

[Portre lo paz 24]

Nou ed lezot pour vin zanmi Zeova (Vwar paragraf 14, 15)

[Portre lo paz 25]

Ki mannyer lapriyer i ranforsi nou lanmitye avek Bondye? (Vwar paragraf 21)