Ou’n dir “‘Wi’ ek ‘Non’”?

Egzamin sa senaryo: En ansyen ki lo komite lyezon lopital i fer laranzman pour pres avek en zenn frer dan predikasyon Dimans bomaten. Son bomaten, sa frer ki ansyen i ganny en kout telefonn irzan sorti kot en frer ki son madanm fek ganny en aksidan loto e deswit i’n ganny anmennen lopital. Sa frer i demann li pour rod en dokter ki pou oper son madanm san transfizyon disan. Alor sa ansyen i kennsel son randevou ki i ti’n fer avek sa frer pour predikasyon pour li kapab al donn son sipor sa fanmir ki pe fer fas avek sa ka irzan.

Imazin en lot senaryo: En ser ki tousel, ki annan de zanfan i ganny en lenvitasyon sorti kot en koup dan son kongregasyon ki’n envit li kot zot en zour swar. Bann zanfan ti kontan pour konnen ki zot ti’n ganny envite. Zot ti pe esper sa zour avek enpasyans. Par kont, en zour avan, sa koup i dir avek zot manman ki en keksoz san ekspekte in arive e zot bezwen kennsel sa lenvitasyon. Pli tar, i aprann akoz sa koup in kennsel sa lenvitasyon. Apre ki sa koup ti’n envit li, sa menm zour swar zot ti ganny envite kot detrwa zanmi e zot ti aksepte sa lenvitasyon.

Konman Kretyen nou bezwen gard nou parol. Nou pa devret vwar nou pe dir ‘wi ek non’ oubyen en wi ki vin non. (2 Kor. 1:18) Sepandan, parey sa de legzanp i montre, pa tou sityasyon ki parey. I kapab annan bann moman kot i paret nou napa swa e nou bezwen kennsel laranzman ki nou’n fer. En fwa Zapot Pol ti vwar li dan menm sityasyon.

POL I GANNY AKIZE KONMAN EN DIMOUN KI PA GARD SON PAROL

An 55 N.L., kan Pol ti Efez pandan son trwazyenm vwayaz misyonner, i ti anvi travers Lanmer Eze pour al Korent e ler i ti pou ariv laba i ti pou al Masedwann. Ler i ti pou retourn Zerizalenm i ti planifye pour vizit kongregasyon Korent en dezyenm fwa, evidaman pour anmas bann kado ki i ti pou’n gannyen pour donn bann frer Zerizalenm. (1 Kor. 16:3) Sa i kler dan 2 Korentyen 1:15, 16 ki dir: “Se avek en tel konfyans ki mon ti oule vin kot zot, dabor, pour ki zot ganny lagras ankor en dezyenm fwa. Mon ti oule pas kot zot pour al an Masedwann, epi retourn kot zot e alor zot ti a kapab fer leneseser pour mon vwayaz an Zide.”

 I paret ki dan son let avan sa, Pol ti’n enform bann frer Korent konsernan sa ki i ti’n plàn. (1 Kor. 5:9) Pa bokou letan apre ki i ti’n ekri sa let, Pol ti tande atraver fanmir Kloe ek lezot ki i ti annan diskord dan kongregasyon. (1 Kor. 1:10, 11) Pol ti deside fer serten azisteman dan son plan e i ti ekri sa let ki nou konn konman 1 Korentyen. Dan sa let Pol ti donn bann konsey ek koreksyon avek lanmour. I ti osi mansyonnen ki i ti pou sanz son traze e enform zot ki i ti pou al Masedwann avan e apre Korent.​—1 Kor. 16:5, 6. *

I paret ki kan bann frer Korent ti ganny son let, serten swadizan pli bon zapot dan sa kongregasyon ti akiz li konman en dimoun ki pa gard son parol oubyen promes. Pour defann son lekor Pol ti demande: “Eski an fezan en tel plan mon pa ti serye? Oubyen mon bann proze i en bann proze zonm de sort ki i annan ‘Wi’ ek ‘Non’ dan mwan?”​—2 Kor. 1:17; 11:5.

Nou kapab demande, dan sa bann sirkonstans, eski Pol ti pran o serye sa bann keksoz? Byensir ki wi! Sa lekspresyon “pa ti serye” ki ganny tradwir dan langaz orizinal konman “alalezer” i vedir en dimoun ki pa gard son parol, en dimoun ki ou pa kapab kont lo la e ki pa tenir son promes. Pol ti demann sa kestyon pour fer zot reflesir ‘eski mon bann proze i en bann proze zonm?’ Sa ti devret fer kler bann Kretyen Korent ki desizyon Pol pour sanz son plan pa ti akoz zot pa ti kapab kont lo li.

Pol ti severman refiz sa lakizasyon, par dir: “Osi vre ki Bondye i fidel sa ki mon’n anons zot i pa ‘Wi’ ek ‘Non.’” (2 Kor. 1:18) Sertennman, kan Pol ti sanz son plan, i ti annan lentere son bann frer ek ser Korent aker. Pol ti sanz son plan orizinal pour al Korent akoz dapre 2 Korentyen 1:23, i ti anvi “eparny zot.” An realite, i ti donn zot sa loportinite pour remet keksoz drwat, avan i vin vizit zot. Parey i ti pe swete, ler i ti Masedwann, Tit ti dir Pol ki son let ti fer zot sagren e anvi repantir e sa ti fer Pol zwaye.​—2 Kor. 6:11; 7:5-7.

“AMENN” TI DIR AVEK BONDYE

Sa lakizasyon ki Pol pa gard son parol ti kapab vedir ki si zot pa ti kapab depan lo li pour gard son promes dan lavi tou le zour, zot pa ti pou kapab ni menm annan konfyans dan son travay predikasyon. Me, Pol ti rapel bann Korentyen ki i ti’n pres konsernan Zezi Kri avek zot. I ti dir: “Parski Garson Bondye, Kris-Zezi, ki Silven, Timote ek mwanmenm nou’n anonse parmi zot pa ti ‘Wi’ ek ‘Non’. Me okontrer dan li i annan zis ‘Wi.’” (2 Kor. 1:19) Lefet ki Pol ti imit legzanp Zezi, eski nou kapab imit legzanp Pol? Definitivman! Tou dilon son lavi e son minister Zezi ti toultan koz laverite. (Zan 14:6; 18:37) Si sa ki Zezi ti prese ti toutafe vre e kapab depan lo la e Pol ti pres menm mesaz, alor nou kapab annan konfyans dan sa ki Pol ti prese.

Sirman, Zeova i sa “Bondye laverite.” (Ps. 31:5) Sa i vin evidan atraver sa ki Pol ti dir answit: “Tou bann promes Bondye i trouv dan li zot ‘Wi’ dan Zezi-Kri.” Lentegrite parfe Zezi ler i ti lo later i retir okenn dout konsernan bann promes Zeova. Pol i kontinyen, “se pour sa rezon ki se par Zezi-Kri ki nou dir Amenn pour rann glwar Bondye.” (2 Kor. 1:20) Zezi i sa garanti oubyen “Amenn” ki tou promes ki Zeova in fer pou vin vre.

Zis parey Zeova ek Zezi i toultan gard zot parol, pareyman Pol ti toultan koz avek senserite. (2 Kor. 1:19) I pa ti sanz son nide parey bann ki fer promes “dapre  laser.” (2 Kor. 1:17) O kontrer, i ti ‘les lespri diriz son lavi.’ (Gal. 5:16) I ti annan lentere lezot aker dan lafason ki i ti tret zot. Son Wi ti vedir Wi.

ESKI OU WI I VEDIR WI?

Denozour, pour bann dimoun ki pa pe viv annakor avek prensip Labib i normal pour zot fer bann promes ki apre zot kase si en pti problenm i arive oubyen pour fer en keksoz pli gou. Dan bann tranzaksyon biznes ‘wi’ pa toultan reste ‘wi’ menm ler bann lagreman in fini ganny sinyen. Bokou pa vwar maryaz konman en lagreman kot de dimoun i reste ansanm pour lavi. O kontrer, sa kantite divors i montre ki bokou i vwar maryaz konman en langazman ki kapab fasilman ganny kase.​—2 Tim. 3:1, 2.

Me ou, eski ou Wi i vedir Wi? I vre, parey nou’n vwar konmansman sa lartik, i kapab arive ki ou bezwen kennsel en apwentman, pa akoz ou pa serye me akoz serten sirkonstans an deor ou kontrol. Me si ou konman Kretyen ou fer en promes oubyen en langazman ou bezwen fer tou sa ki ou kapab pour gard li. (Ps. 15:4; Mat. 5:37) Si ou fer sa, ou pou ganny rekonnet konman en dimoun ki lezot i kapab annan konfyans ladan, en dimoun ki gard son parol e enn ki kontinyen koz laverite. (Efe. 4:15, 25; Zak 5:12) Kan bann dimoun i realize ki zot kapab annan konfyans dan ou dan bann keksoz dan lavi tou le zour, zot pou pli pare pour ekoute kan ou partaz laverite konsernan Rwayonm Bondye avek zot. Alor fer sir ki ou Wi i vedir Wi.

[Not anba lo paz]