‘Mon Nouritir Se Pour Fer Lavolonte Bondye’

Kwa ki donn ou bokou plezir? Eski se serten laspe dan relasyon imen, parey maryaz, elve en fanmir oubyen pran swen avek ou lanmitye? I tre probab, i en plezir pour ou ler ou partaz en repa avek bann dimoun ki ou kontan. Me, konman serviter Zeova, pa nou vreman ganny bokou byenfe pour fer lavolonte Bondye, etidye son Parol e pres sa bon nouvel?

Dan en kantik pour loue son Kreater, David, lerwa Izrael ti sante: “O mon Bondye, mon’n pran plezir pour fer ou lavolonte e ou lalwa i o profon dan mwan.” (Ps. 40:8) Malgre bann difikilte ek presyon ki David ti fer fas avek dan lavi, i ti pran plezir pour fer lavolonte Bondye. Byensir, David pa ti sa sel adorater Zeova ki ti pran plezir pour servi sa vre Bondye.

Zapot Pol ti aplik sa parol dan Psonm 40:8 avek Mesi oubyen Kris. Pol ti ekrir: “Kan i ti pe vin dan lemonn, Kris ti dir: ‘Ou pa oule ni sakrifis, ni lofrann, Me ou’n prepar en lekor pour mwan. Ou pa’n aksepte ni zannimo brile lo lotel, ni sakrifis pour pardon pese. Alor mon’n dir: ‘La mon la, mon vin fer ou volonte, mon Bondye,’ Parey i’n ekri lo mon size dan roulo Lekritir.’”​—Ebr. 10:5-7.

Kan i ti lo later, Zezi ti kontan obzerv kreasyon, pas letan avek son bann zanmi e partaz en repa avek zot. (Mat. 6:26-29; Zan 2:1, 2; 12:1, 2) Par kont, sa ki ti pli enteres li e fer li plis plezir se fer lavolonte son Papa ki dan lesyel. Anfet Zezi ti dir: “Mon nouritir se pour obei lavolonte sa enn ki’n anvoy mwan, e fini travay ki i’n donn mwan.” (Zan 4:34; 6:38) Bann disip Zezi ti aprann sekre vre boner avek zot Met. Zot ti pare e anvi anons mesaz Rwayonm avek lezot e zot ti fer sa avek bokou lazwa.​—Lik 10:1, 8, 9, 17.

‘ALE E FER DISIP’

Zezi ti demann son bann disip: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei tou sa ki mon’n konmande. E konnen ki mwan mon avek zot toulezour, ziska lafen dimoun.” (Mat. 28:19, 20) Pour akonplir sa misyon i enplik, pres avek bann dimoun nenport landrwa kot nou kapab zwenn zot, retournen pour vwar bann dimoun ki enterese e kondwir bann letid Labib  avek zot. Par fer sa, nou kapab ganny bokou lazwa.

Ki swa dimoun i demontre lentere dan nou mesaz oubyen non, nou latitid i zwe en rol prensipal pour trouv lazwa dan nou predikasyon. Akoz nou kontinyen anons sa bon nouvel menm si nou kapab rankontre serten dimoun ki pa enterese oubyen opoz nou? Parski nou realize ki partisip dan sa travay predikasyon e fer disip i demontre nou lanmour pour Bondye e pour nou prosen. An realite, lavi bann dimoun i dan risk e nou lavi osi. (Ezek. 3:17-21; 1 Tim. 4:16) Annou vwar serten pwen ki’n ed plizyer nou bann konpanyon travay pour gard oubyen renouvle zot devouman pour pres dan bann teritwar difisil.

SERVI TOU LOPORTINITE

Kan nou servi bann kestyon apropriye dan nou predikasyon, sa i souvan anmenn bon rezilta. En zour bomaten, Amalia ti vwar en msye dan en zarden piblik pe lir en zournal. I ti apros li e i ti demann li si i’n lir okenn bon nouvel. Ler i ti reponn li ki non, Amalia ti dir: “Mon’n vin anmenn ou en bon nouvel konsernan Rwayonm Bondye.” Sa ti evey lentere sa msye e i ti aksepte en letid Labib. Anfet, Amalia ti arive konmans trwa letid Labib dan sa zarden.

Janice in fer son landrwa travay vin son teritwar predikasyon. Ler en gard sekirite ek en koleg travay ti demontre lentere dan en lartik ki ti’n ganny pibliye dan Latour Veyer, Janice ti ofer pour anmenn lezot magazin regilyerman. I ti fer parey pour en lot koleg travay, ki ti etonnen par sa kantite varyete size ki Latour Veyer ek Awake! i koz lo la. Sa ti fer ki en lot koleg travay ti demann bann magazin. Janice i dir: “Sa i vreman en benediksyon sorti kot Zeova!” Avek letan, i ti pe anmenn magazin pour 11 dimoun dan son travay.

ANNAN EN LATITID POZITIF

En sirveyan ti sizere ki dan predikasyon portanport bann proklanmater pa termin zot konversasyon avek en met lakour senpleman par dir ki zot ti pou retournen en lot zour. O kontrer, zot kapab demann sa dimoun: “Eski ou ti a kontan ki mon montre ou ki mannyer en letid Labib i ganny fer?” oubyen “Ki zour e ki ler ou ti a kontan ki mon retournen pour kontiny nou konversasyon?” Sa sirveyan ti dir ki par servi sa lapros, bann frer ek ser dan en kongregasyon kot i ti pe servi ti konmans 44 letid Labib dan en semenn.

Kan nou fer bann retourn vizit deswit, menm zis detrwa zour apre ki nou’n zwenn sa dimoun i kapab anmenn bon rezilta. Akoz? Parski kan nou fer sa nou montre ki nou vreman enterese pour ed bann dimoun ki annan en leker senser pour konpran Labib. Kan en madanm ti ganny demande akoz i ti aksepte en letid Labib avek bann  Temwen Zeova, i ti dir: “Mon ti konmans etidye akoz zot ti montre lentere senser dan mwan e zot ti kontan mwan.”

Pa bokou letan apre ki Madaí ti’n asiste Lekol Servis Pionye, i ti pe kondwir 15 letid Labib e i ti’n donn 5 letid Labib avek lezot proklanmater. Detrwa son bann etidyan Labib ti konmans asiste renyon regilyerman. Kwa ki ti ed Madaí pour konmans sa kantite letid Labib? Sa lekol ti’n montre li lenportans pour kontinyen retournen ziska ki i vwar bann ki’n montre lentere. En lot Temwen ki’n ed bokou dimoun pour konn sa laverite lo Labib i dir: “Mon’n aprann ki kan ou persevere pour fer bann retourn vizit, sa i sa keksoz prensipal pour ed dimoun ki anvi konn Zeova.”

I demann bokou zefor pour fer bann retourn vizit e kondwir bann letid Labib. Me, rekonpans ki nou gannyen i bokou plis ki sa zefor. Kan nou devoue dan predikasyon, nou kapab ed lezot pour “ganny konnesans laverite” e sa i kapab sov zot lavi. (1 Tim. 2:3, 4) Pour nou, sa i kapab donn nou satisfaksyon e en gran lazwa.

[Ekstre lo paz 4]

Lanmour i pous nou pour kontinyen prese menm si nou zwenn bann dimoun ki pa enterese

[Ekstre lo paz 5]

Kan nou fer bann retourn vizit deswit, sa i montre ki nou vreman enterese avek bann dimoun ki anvi konpran Labib

[Ekstre lo paz 5]

Ou kapab demann sa met lakour, “Eski ou ti a kontan ki mon montre ou ki mannyer en letid Labib i ganny fer?”