Zeova i en Bondye organize

“Bondye pa en Bondye dezord, me en Bondye lape.”​—1 KOR. 14:33.

KI OU POU REPONN?

Ki lorganizasyon ki egziste dan lesyel?

Akoz Noe ek Raab ti annan laprouvasyon Zeova?

Ki mannyer sa resi konsernan Izrael dan letan lontan ek bann Kretyen dan premye syek i montre ki Zeova i en Bondye organize?

1, 2. (a) Lekel ki Zeova ti kre premye e ki mannyer Bondye in servi li? (b) Kwa ki endike ki bann lanz i organize?

ZEOVA, Kreater liniver, i fer keksoz dan en fason organize. Son premye kreasyon ti son sel Garson ki ganny apele “Laparol” akoz i portparol prensipal Bondye. Laparol in servi Zeova pour plizyer lannen, akoz Labib i dir: “Okonmansman, Laparol ti egziste, e Laparol ti avek Bondye.” Labib i osi dir: “Par li [Laparol], tou keksoz ti ganny fer, e napa nanryen dan kreasyon ki’n ganny fer san li.” En pti pe plis ki 2,000 an pase, Bondye ti anvoy Laparol, setadir Zezi Kri konman en zonm parfe lo later kot i ti fidelman akonplir lavolonte son Papa.​—Zan 1:1-3, 14.

² Avan ki i ti vin lo later, Garson Bondye ti pe servi fidelman konman Son “zouvriye abil.” (Prov. 8:30) Par li, Zeova in kre plizyer milyon lezot lanz dan lesyel. (Kol. 1:16) Konsernan sa bann lanz, en resi Labib i enform nou ki: “I ti annan mil fwa mil ki ti kontinyen servi [Zeova] e dis mil fwa dis mil ki ti debout devan li.” (Dan. 7:10) Sa kantite lanz Bondye i ganny refer avek konman “bann larme” Zeova ki byen organize.​—Ps. 103:21.

3. Ki kantite zetwal ek plannet i annan e ki mannyer zot ganny organize?

 ³ Kwa ki kapab ganny dir lo kreasyon liniver, par egzanp sa kantite zetwal ek plannet ki egziste? An rapor avek bann zetwal, Houston, Texas, Chronicle in pibliy en resers ki ti ganny fer resaman. Sa rapor i dir ki petet i annan “300 sextillion oubyen trwa fwa plis lakantite zetwal ki bann syantis ti’n kalkile oparavan.” Sa rapor i azoute: “Sa i vedir 3 avek 23 zero. Oubyen 3 trilyon [savedir 3 avek 12 zero] miltipliye par 100 bilyon [savedir 100 avek 9 zero].” Sa bann zetwal in ganny organize dan bann galaksi, sakenn i annan plizyer bilyon oubyen menm plizyer trilyon zetwal e osi bokou plannet. Laplipar galaksi in ganny organize dan diferan group ki ganny apele clusters, sa bann clusters in ganny organize dan bann pli gro group ki apel super-clusters.

4. Akoz i rezonnab pour dir ki bann serviter Bondye lo later ti pou organize?

⁴ Parey bann lanz, bann zetwal ek bann plannet i osi ganny byen organize. (Iza. 40:26) Alor, i toutafe normal pour dir ki Zeova ti pou organiz son bann serviter lo later. I anvi ki zot reste annord e sa i enportan akoz zot annan bokou travay esansyel pour fer. Legzanp merveye bann serviter fidel Zeova dan lepase e ozordi i donn bann laprev solid ki in avek zot e ki i “pa en Bondye dezord, me en Bondye lape.”​—Lir 1 Korentyen 14:33, 40.

BONDYE TI ORGANIZ SON PEP DAN LEPASE

5. Ki mannyer sa laranzman pour lafanmir imen ranpli later ti ganny enteronpe?

⁵ Ler Zeova ti kre nou de premye paran, i ti dir zot: “Fer zanfan e vin bokou, ranpli later e domin li, annan kontrol lo bann pwason dan lanmer ek bann zwazo ki anvole dan lesyel ek tou zannimo ki pe marse lo later.” (Zen. 1:28) Lafanmir imen pa ti pou ranpli later en sel kou, me ptitapti zot ti pou miltipliye ziska ki later antye i vin en paradi. Akoz dezobeisans Adan ek Ev sa plan ti ganny enteronpe pour en pti pe letan. (Zen. 3:1-6) Avek letan, “Zeova ti vwar sa kantite lemal ki zonm ti pe fer lo later e tou sa ki zot ti panse dan zot leker ti toultan move.” An rezilta, “later ti’n vin koronpi dan lizye sa vre Bondye e later ti ranpli avek vyolans.” Alor Bondye ti plàn pour anmenn en deliz lo later antye ki ti pou detrir tou bann move dimoun.​—Zen. 6:5, 11-13, 17.

6, 7. (a) Akoz Noe ti ganny laprouvasyon Zeova? (Vwar portre lo paz 21.) (b) Ki ti arive avek tou bann dimoun enfidel dan letan Noe?

⁶ Par kont, “Noe ti annan laprouvasyon Zeova” parski i “ti en zonm drwat” ki ti “montre li san defo parmi son bann kontanporen.” Lefet ki “Noe ti mars avek sa vre Bondye,” Zeova ti demann li pour konstri en gran lars. (Zen. 6:8, 9, 14-16) Sa lars ti ganny konstri pour ki i kapab flote lo delo e sa ti permet ki lavi imen ek zannimo ti ganny prezerve. Noe ti obeir par “fer tou sa ki Zeova ti’n donn li lord pour fer” e avek led son fanmir zot ti byen organize pour fini konstri lars. Apre ki bann zannimo ek fanmir Noe ti antre dan lars, “Zeova ti ferm laport.”​—Zen. 7:5, 16.

⁷ An 2370 A.N.L., kan i ti annan Deliz, Zeova ti “detri tou sa ki ti vivan lo later,” me i ti gard Noe ek son fanmir ki ti fidel sen e sof dan lars. (Zen. 7:23) Tou dimoun lo later ozordi i desandans Noe, son bann garson ek zot madanm. Me tou dimoun enfidel ki ti an deor lars ti mor akoz zot ti’n refize ekout Noe “en predikater lazistis.”​—2 Pyer 2:5.

8. Kwa ki montre ki Izrael ti byen organize kan Bondye ti demann son pep pour antre dan Later Promiz?

 ⁸ Plis ki wit syek apre Deliz, Bondye ti organiz pep Izrael pour vin en nasyon. Tou laspe zot lavi ti devret byen organize, sirtou an sa ki konsern zot ladorasyon. Par egzanp, an plis ki sa kantite pret ek Levit ki ti annan Izrael, i ti annan “bann madanm ki ti’n ganny organize pour servi kot larantre tabernak.” (Egz. 38:8) Par kont, kan Zeova ti demann pep Izrael pour antre Kanaan, sa zenerasyon pa ti fidel e i ti dir zot: “Ni enn parmi zot pa pou antre dan sa later ki mon’n promet zot zot pou reste, eksepte Kaleb garson Yefoune e Zozye garson Noun,” akoz zot ti’n anmenn en bon rapor apre ki zot ti’n espyonn Later Promiz. (Nom. 14:30, 37, 38) Pli tar, Moiz ti azir an armoni avek gidans Bondye, i ti demann Zozye pour vin son sikseser. (Nom. 27:18-23) Kan Zozye ti pros pour gid bann Izraelit dan pei Kanaan, i ti ganny dir: “Fodre kouraze e for. Pa bezwen tranble e annan lafreyer, parski Zeova ou Bondye i avek ou partou kot ou ale.”​—Zoz. 1:9.

9. Ki mannyer Raab ti santi anver Zeova ek son pep?

⁹ Zeova ti vreman avek Zozye partou kot i ti ale. Par egzanp, egzamin sa ki ti arive kan bann Izraelit ti pe kanpe o bor sa lavil Kananeen, Zeriko. An 1473 A.N.L., Zozye ti anvoy de zonm pour espyonn Zeriko e laba zot ti zwenn Raab sa prostitye. I ti kasyet zot lo twa son lakaz pour ki bann dimoun ki ti’n ganny anvoye par lerwa Zeriko pa ganny sans atrap zot. Raab ti dir sa bann espyon ki ti bann Izraelit: “Mon konnen ki Zeova pou donn zot sa pei . . . parski nou’n tande ki mannyer Zeova ti fer sek delo dan Lanmer Rouz devan zot . . . e sa ki zot ti fer avek sa de lerwa Amorit.” I ti azoute: “Zeova zot Bondye i Bondye anler dan lesyel e anba lo later.” (Zoz. 2:9-11) Parski Raab ti azir anliny avek lorganizasyon Zeova sa letan, Bondye ti  fer sir ki li avek son fanmir ti ganny sove kan bann Izraelit ti konkerir Zeriko. (Zoz. 6:25) Raab ti demontre lafwa, i ti annan lakrent pour Zeova e demontre respe anver son pep.

EN LORGANIZASYON DINAMIK DAN PREMYE SYEK

10. Ki Zezi ti dir bann sef relizye Zwif dan son letan e akoz i ti dir sa?

¹⁰ Anba direksyon Zozye, bann Izraelit ti konkerir bann lavil enn apre lot e zot ti etablir zot Kanaan. Me ki ti arive pli tar? Diran bann syek, bann Izraelit ti kontinyen dezobeir lalwa Bondye. Ler Zeova ti anvoy son Garson lo later, i ti evidan ki zot pa ti’n reisi obeir Bondye e ekout son portparol, i pour sa rezon ki Zezi ti refer avek Zerizalenm konmkwa li ki’n “touy bann profet.” (Lir Matye 23:37, 38.) Bondye ti rezet bann sef relizye Zwif parski zot ti enfidel anver li. Alor Zezi ti dir zot: “Zot pou ganny arase Rwayonm Bondye, e ganny donnen a en lot nasyon ki pou prodwi son fri.”​—Mat. 21:43.

11, 12. (a) Kwa ki prouve ki Zeova ti’n tir son benediksyon lo bann Zwif e donn en lot lorganizasyon dan premye syek? (b) Lekel ki ti form parti sa nouvo lorganizasyon ki Bondye ti aprouve?

¹¹ Dan premye syek N.L., Zeova ti rezet nasyon Izrael ki ti enfidel. Par kont, sa pa ti vedir ki i ti pou nepli annan en lorganizasyon bann serviter fidel lo later. Nasyon Izrael ti perdi laprouvasyon Zeova, alor i ti donn son benediksyon en nouvo lorganizasyon dinamik ki ti santre lo Zezi ek son bann lansennyman. Sa ti konmans zour Lapannkot lannen 33 N.L. Sa letan 120 disip Zezi ti’n zwenn dan en landrwa Zerizalenm kan “toutakou ti annan en tapaz sorti dan lesyel ki ti resanble en gro divan ki ti ranpli sa lakaz.” Apre “zot ti war en keksoz ki ti resanble en bann lalang dife ki ti separe e apoz lo latet sak dimoun la prezan. Zot tou zot ti ranpli avek Sent-Espri e zot ti konmans koz dan lezot langaz, selon ki Sent-Espri ti donn zot pouvwar.” (Akt 2:1-4) Sa levennman ekstraordiner ti donn levidans konkret ki Zeova ti pe siport sa nouvo lorganizasyon, ki bann disip Zezi ti form parti.

¹² Sa zour eksitan, “anviron 3000 dimoun ti ganny azoute” parmi bann disip Zezi. Deplis, “toulezour [Zeova] ti [“kontinyen,” NW] azout avek zot group tou bann ki ti pe ganny sove.” (Akt 2:41, 47) Bann predikater dan premye syek ti sitan efikas ki “Parol Bondye ti kontinyen fannen; lakantite bann ki ti krwar dan Zezi ti ogmant bokou dan Zerizalenm.” Menm “en gran kantite pret ti aksepte lafwa.” (Akt 6:7) Alor, i ti annan bokou dimoun senser ki ti aksepte laverite ki ti pe ganny anonse par bann manm sa nouvo lorganizasyon. Pli tar, Zeova ti donn menm levidans pour montre ki i ti siport sa lorganizasyon ler i ti konmans anmenn “bann non-Zwif” dan kongregasyon Kretyen.​—Lir Akt 10:44, 45.

13. Ki travay Bondye ti donn son nouvo lorganizasyon pour fer?

¹³ I ti napa okenn dout konsernan kalite travay ki Bondye ti’n donn bann disip Kris pour fer. Zezi ti kit en legzanp pour zot, zis apre son batenm i ti konmans pres lo “Rwayonm lesyel.” (Mat. 4:17) Zezi ti ansenny son bann disip pour fer menm travay. I ti dir zot: “Zot a vin mon bann temwen dan Zerizalenm, dan tou rezyon Zide ek Samari e ziska tou bann landrwa pli elwannyen lo later.” (Akt 1:8) Bann premye disip Kris ti konpran kwa ki i ti pe ekspekte avek zot. Par egzanp, kan Pol ek Barnabas ti Antyos dan Pisidi, avek kouraz zot ti dir bann Zwif ki ti opoz zot: “I ti neseser ki  Parol Bondye i ganny anonse avek zot premye, me parski zot rezet li e ki zot pa konsider zot diny pour lavi eternel alor, aprezan, nou tourn nou ver bann ki non-Zwif. Sanmenm sa ki [Zeova] in ordonn nou: ‘Mon’n etabli ou konman lalimyer pour bann nasyon, Pour ki ou anmenn konnesans delivrans ziska landrwa pli lwen lo later.’” (Akt 13:14, 45-47) Depi premye syek, parti lorganizasyon Bondye lo later pe fer konnen ki laranzman i’n fer pour sov lavi bann dimoun.

BOKOU TI MOR ME SERVITER BONDYE TI SIRVIV

14. Ki ti arive Zerizalenm dan premye syek, me lekel ki ti sirviv?

¹⁴ Bann Zwif an zeneral pa ti aksepte sa bon nouvel e maler ti pou tonm lo zot. Zezi ti’n averti son bann disip: “Kan zot a war Zerizalenm antoure par bann larme, zot a konnen ki son destriksyon i pros. Alor, ki bann ki dan Zide i sov dan montanny, e ki bann ki dan lavil i sorti, e pa les bann ki dan lakanpanny antre dan lavil.” (Lik 21:20, 21) Sa ki Zezi ti predir ti arive. Parski bann Zwif ti revolte lannen 66 N.L. larme Romen anba kontrol Sestis Galis ti antour Zerizalenm. Par kont, sa bann larme ti ale en sel kou e sa ti donn loportinite bann disip Zezi pour kit Zerizalenm ek Zide. Dapre istoryen Eusebius bokou ti travers Larivyer Zourden pour al Pela ki ti dan lavil Pere. Lannen 70 N.L. anba Zeneral Titis larme Romen ti retournen e detri Zerizalenm. Sepandan, bann Kretyen fidel ti sirviv akoz zot ti swiv lavertisman Zezi.

15. Larelizyon Kretyen ti progrese malgre kwa?

¹⁵ Malgre ki bann disip Zezi ti eksperyans difikilte, persekisyon e lezot leprev ki ti teste zot lafwa, sa pa ti anpes larelizyon Kretyen kontinyen progrese dan premye syek. (Akt 11:19-21; 19:1, 19, 20) Sa bann premye Kretyen ti prospere spirityelman akoz zot ti annan benediksyon Bondye.​—Prov. 10:22.

16. Ki sak Kretyen ti devret fer pour reste for spirityelman?

¹⁶ Pour reste spirityelman for, sak Kretyen ti bezwen fer bann zefor personnel. I ti esansyel ki zot etidye parol Bondye o profon, asiste renyon regilyerman pour ador Bondye e pres bon nouvel Rwayonm avek devouman. Sa bann aktivite ti kontribye pour ki pep Zeova dan sa letan ti an bonn sante spirityelman e ini zis parey sa i leka ozordi. Bann dimoun ki ti asosye avek bann premye kongregasyon byen organize ti benefisye en kantite avek sa zefor volonter e itil ki bann sirveyan ek asistan ministeryel ti fer. (Fili. 1:1; 1 Pyer 5:1-4) Pa sa ti bezwen en plezir kan bann ansyen ki ti vwayaze parey Pol, ti vizit bann kongregasyon! (Akt 15:36, 40, 41) Bann similarite ant nou ladorasyon ek ladorasyon bann Kretyen dan premye syek i remarkab. Pa nou apresye ki Zeova i organiz son bann serviter ozordi parey i ti fer dan lepase! *

17. Ki nou pou diskit lo la dan sa lot lartik?

¹⁷ Anmezir ki lemonn Satan i pros pour ariv ver son lafen dan sa bann dernyen zour, parti lorganizasyon Zeova ki lo later pe al annavan vitman. Eski ou azour avek li? Eski ou pe fer progre spirityel? Sa lot lartik pou montre ki mannyer nou kapab fer li.

[Not anba lo paz]

[Kestyon]

[Portre lo paz 23]

Bon lorganizasyon ti ed wit dimoun sirviv sa Deliz (Vwar paragraf 6, 7)