Ed bann frer ek ser ki’n divorse Koman?

I tre probab ki ou konn en dimoun ki’n divorse, petet menm detrwa. Sa i akoz i annan en kantite divors. Par egzanp, en resers ki ti ganny fer Lapolonny ti montre ki dimoun dan zot trant an ki’n marye pour trwa a si-z-an pou tre probab divorse, me i pa zis bann dimoun sa laz ki divorse.

Anfet, Institute for Family Policy Lespanny i raporte ki “bann statistik i montre ki [Lerop] lanmwatye bann ki marye pou divorse.” Dan lezot pei devlope sa i osi leka.

BANN LEMOSYON KI KONTREDIR KANMARAD

Akoz sa kantite divors? En konseyer eksperyanse dan maryaz Les Lerop in obzerve ki: “Divors i fer ofisyel sa ki’n deza arive, setadir ki sa relasyon in kase e sa i fer ki zot separe, en keksoz ki fermal emosyonnelman.” I ti azoute ki souvan, “sa bann dimoun i boulverse avek diferan lemosyon parey lakoler, regre, dezapwentman, dezespwar ek lakanmizri.” Parfwa sa i fer ki serten i anvi komet swisid. “Kan divors i vin ofisyel ankour, en nouvo letap i konmanse. Sa dimoun ki’n divorse i santi li anvair par sa santiman ki i tousel e vid i kapab demande: ‘Aprezan, lekel mwan? Ki bi mon lavi?’”

Pour eksprim fason ki i ti santi detrwa lannen pase, Ewa ti dir: “Mon ti vreman kanmi apre ki mon divors ti’n vin ofisyel, ler mon bann vwazen ek mon bann koleg ti refer avek mwan konman ‘enn ki’n divorse.’ Mon ti vreman ankoler. Vi ki mon msye ti kit mwan avek de zanfan, mon ti bezwen vin papa ek manman an menm tan.” * Adam ki ti ansyen pour 12 an i dir: “Mon’n perdi sitan respe pour mon lekor ki par ler mon vreman ankoler e mon pa anvi koz avek personn.”

SA LALIT POUR REKIPERE

Vi ki zot enkyet pour zot lavenir, serten in lalit pour rekipere, menm bokou lannen apre zot divors. Finalman zot kapab krwar ki lezot pa enterese avek zot. Deplis, en zournalis dan sa domenn i dir ki aprezan “zot bezwen sanz zot bann labitid e aprann ki mannyer pour fer fas avek zot bann problenm lo zot menm.”

Stanisław i rapel: “Apre nou divors manman mon de pti fiy ti anpes mon vwar zot. Sa ti fer mon santi ki personn ti nepli enterese avek mwan e ki menm Zeova ti’n bezwen abandonn mwan. Mon ti nepli anvi viv. Avek letan, mon ti realize ki mon fason panse ti mal.” Wanda ki’n divorse, ti osi trakas pour son lavenir. I dir: “Mon ti asire ki apre en pe letan bann  dimoun, enkli bann frer ek ser ti pou nepli enterese avek mwan ni avek mon bann zanfan. Sepandan aprezan mon kapab vwar ki mannyer bann frer ek ser ti toultan la pour nou e ed mwan anmezir ki mon ti fer zefor pour elve mon bann zanfan pour vin bann serviter Zeova.”

Ou kapab remarke par sa bann komanter ki apre divors serten i ganny anvair avek bann santiman negatif. Zot kapab santi ki zot pa vo nanryen e ki zot pa merit okenn latansyon. An menm tan zot kapab tant pour kritik lezot. An rezilta sa, zot kapab mazinen ki bann frer ek ser dan kongregasyon i fre fre avek zot e ki zot pa konpran zot. Pourtan, leksperyans Stanisław ek Wanda i montre ki avek letan bann ki’n divorse i kapab rekonnet ki bann frer ek ser i vreman enterese e konsernen avek zot. An realite, bann frer ek ser in ed zot dan en fason remarkab, menm si o konmansman zot pa’n remarke.

LER NOU KONMANS SANTI TOUSEL E REZETE

Gard antet ki malgre tou nou zefor, tanzantan en frer oubyen en ser divorse i kapab santi li tousel. Bann ser ki’n divorse i partikilyerman kapab ganny lenpresyon ki napa bokou ki enterese avek zot. Alicja i admet: “I annan wit an depi ki mon’n divorse. Pourtan, par ler mon ankor santi mon enferyer. Pandan sa bann moman mon zis anvi tousel pour plere e plenny mon sor.”

Menm si sa bann kalite santiman i komen parmi bann dimoun ki’n divorse, Labib i konsey nou pour pa izol nou lekor. Si en dimoun pa azir an armoni avek sa konsey, sa i kapab fer li al kont “tou lasazes pratik.” (Prov. 18:1) Kantmenm sa, sa enn ki santi li tousel i devret konpran ki i saz pour evite toultan rod konsey oubyen rekonfor avek en dimoun lot sèks. Alor sa pou fer ki ava napa okenn lanvi pour devlop en santiman romantik malapropo avek sa dimoun.

Sa bann frer oubyen ser ki’n divorse i kapab pe ganny anvair avek diferan lemosyon, sa i enkli lenkyetid konsernan zot lavenir e santi zot tousel oubyen menm rezete. Lefet ki nou rekonnet ki bokou i santi koumsa e an menm tan ki i difisil pour fer fas avek sa bann santiman, nou devret imit Zeova par donn sa bann frer ek ser tou nou sipor. (Ps. 55:22; 1 Pyer 5:6, 7) Nou kapab asire ki nenport led ki nou donn zot, zot pou byen apresye. Zot pou sertennman vwar bann vre zanmi dan kongregasyon.​—Prov. 17:17; 18:24.

[Not anba lo paz]

[Bwat lo paz 9]

Gard en bon pwennvi lo divors

Bann serviter Zeova i vwar maryaz konman en keksoz vreman serye. Sa i akoz nou baz nou panse lo sa ki Lekritir i dir. Par egzanp, dapre Malaki 2:16 Bondye i dir klerman: “Mon ay divors.” Sel rezon ki Labib i donnen pour divorse i si en konzwen i’n komet adilter. Alor i pou en gro fot lo ou par si ou mazin pour divorse pour en rezon ki pa baze lo Labib e petet an menm tan pe mazin pour marye avek en lot dimoun.​—Zen. 2:22-24; Det. 5:21; Mat. 19:4-6, 9.

Me kan en divors i arive, par egzanp apre ki en konzwen in vin enfidel, bann frer ek ser dan kongregasyon i siport zot. Zot imit Zeova par fer tou sa ki zot kapab pour aport zot led pour sa “bann ki zot lespri i fatige.”​—Ps. 34:15, 18; Iza. 41:10.

 [Bwat lo paz 10, 11]

KI MANNYER OU KAPAB EDE?

Eski ou kapab ed bann ki dan bezwen? Ki ou kapab fer pour ed en dimoun ki annan bann santiman ki nou’n mansyonnen pli boner dan sa lartik? Annou vwar ki Labib i dir e remarke ki mannyer bann Kretyen fidel in ofer bann led pratik.

Ekout avek bon zizman. (Prov. 16:20, 23)

Ou kapab konpran ki apre en divors en dimoun pa pou anvi rakont bann detay lo kwa ki’n fer li divorse. An realite, si i konplent pour eksprim son fristrasyon sa pa pou anmenn okenn byenfe ni retir son bann lenkyetid. (Prov. 12:25; Rom. 12:15) Michał ki ti ed Adam ki’n ganny mansyonnen avan, i dakor ki nou kapab demontre konpasyon e ekout avek bon zizman san ki nou konn tou detay. Michał i dir: “Mon’n esey ed Adam pour vwar ki ler i dekouraze e annan bokou santiman negatif i kapab dir mon en keksoz ki pli tar i regrete.” Alor Michał ti fer kler ki i pa pe rod tou detay. Pourtan, i ti ekoute konman en vre zanmi. Nou kapab ed zot bokou avan oubyen apre bann renyon par dir en keksoz senp parey: “Ki mannyer ou santi ozordi? Mon konnen ki ou pe pas dan bann moman difisil. Mon pou la pour ou.”

Montre ki ou enterese. (Fili. 2:4)

Mirosław i rapel: “Nou de mon madanm nou ti fer en progranm pour ed en ser ki’n divorse. Par egzanp, nou ti repar son lok laport. Nou ti osi donn li en pasaz pour al kot dokter.” Sa i kapab paret bann pti keksoz, pourtan i ti pratik e i ti ed li. Sa ser ki sa koup ti ede ti rekipere gradyelman. An plis, pli tar sa ser ti vin pionye e son fiy ki ti annan 11 an ti batize.

Reasir sa dimoun ki’n divorse ki Zeova i konpran son sityasyon.

Si en dimoun pe soufer avek sa santiman ki i krwar i pa vo nanryen, ou kapab asir li ki Bondye i kontan son bann serviter. Sertennman nou “vo bokou plis ki en kantite sren,” nou inik e presye dan son lizye. (Mat. 10:29-31) “Zeova i sa enn ki egzamin leker” alor i kapab konpran bann ki’n divorse. I pa pou abandonn okenn son bann serviter fidel. (Prov. 17:3; Ps. 145:18; Ebr. 13:5) Alor anmezir ki ou montre ki ou enterese, asir sa dimoun ki Bondye i apresye son lanmour pour laverite e son zefor pour siport vre ladorasyon.​—Fili. 2:29.

 Ankouraz sa enn ki’n divorse pour reste pros avek kongregasyon.

Kan zot ganny anvair par sa bann diferan lemosyon, serten i vwar li difisil pour asiste renyon. Me bi bann renyon se pour fortifye e ankouraze, setadir pour batir. (1 Kor. 14:26; Ps. 122:1) Dan sa ka, bann ansyen i bezwen pran linisyativ pour ed zot. Wanda ki mansyonnen pli boner i dir: “Nou ankor rapel zot lanmour ek swen.”

Ankouraz sa enn ki’n divorse pour ranforsi son relasyon avek Bondye atraver lapriyer, letid personnel ek meditasyon. (Zak 4:8)

Menm si Zeova i tou pwisan e i reste dan lesyel, i ed “bann ki abes zot, dekouraze e ki tranble avek [Son] bann parol.” Reasir bann ki’n divorse konsernan sa e fer resorti ki mannyer sakenn de nou i ganny ede pour vin pli pros avek Bondye par fer lapriyer ek letid personnel.​—Iza. 66:2.

Demann zot pour pres ansanm avek ou dan predikasyon oubyen pour prepar renyon ansanm.

Sa pour ed sa Kretyen ki’n divorse pour vin pli konfidan anmezir ki i kontinyen son lavi. Marta, ki’n ed en ser devoue ki ti ekraze apre son divors i dir: “Souvandfwa nou pres ansanm. I en lazwa ler nou vwar ki nou’n atenn lobzektif ki nou’n fikse. Parfwa nou etidye ansanm pour prepar renyon e apre nou kapab prepar en repa byen goute ansanm.”