Ed lezot pour devlop pli byen zot potansyel
Ed lezot pour devlop pli byen zot potansyel
“Mon lizye pou lo ou pour konsey ou.”—PS. 32:8.
KI OU POU REPONN?
Ki serten legzanp dan Labib ki montre ki Zeova i vwar potansyel son bann serviter?
Akoz nou devret esey vwar sa ki bon dan lezot?
Ki mannyer bann zenn frer oubyen bann frer ki fek batize i kapab ganny ede pour devlop pli byen zot potansyel?
1, 2. Ki mannyer Zeova i vwar son bann serviter lo later?
KAN paran pe get zot zanfan zwe, souvan zot etonnen pour vwar abilite ki zot zanfan i annan. Eski ou menm ou’n deza fer sa remark? En zanfan i kapab aktif oubyen sportif tandis ki son frer oubyen ser i kapab paret pli alez avek bann zwe pasyans, fer bann travay lar oubyen artizanal. Me nenport ki abilite zot zanfan i annan, paran i trouv plezir anmezir ki zot dekouver sa.
2 Zeova osi i enterese avek son bann zanfan lo later. I vwar son bann serviter ozordi konman “bann keksoz presye sorti dan tou nasyon.” (Aga. 2:7) Zot presye sirtou akoz zot lafwa ek devosyon. Me petet ou’n remarke ki bann frer ek ser ozordi i annan diferan talan. Serten frer i bann bon orater, tandis ki lezot i bann bon organizater. Plizyer ser i doue pour aprann en lot langaz e sa i servi zot dan predikasyon, tandis ki lezot i bann legzanp remarkab kot i konsernan donn sipor bann ki bezwen lankourazman oubyen pran swen avek bann malad. (Rom. 16:1, 12) Eski pa nou apresye pour dan en kongregasyon avek tou sa bann kalite Kretyen?
3. Ki kestyon nou pou egzaminen dan sa lartik?
3 Toudmenm, i paret ki serten frer ek ser enkli bann zenn oubyen nouvo batize pa ankor trouv zot plas dan kongregasyon. Ki mannyer nou kapab ed zot devlop pli byen zot potansyel? Akoz nou devret esey vwar sa ki bon dan zot e vwar zot parey Zeova i vwar?
ZEOVA I VWAR SA KI BON DAN SON BANN SERVITER
4, 5. Ki mannyer sa resi dan Ziz 6:11-16 i montre ki Zeova i vwar potansyel son bann serviter?
4 Plizyer resi dan Labib i fer resorti klerman ki Zeova pa zis vwar sa ki bon dan son bann serviter me i osi vwar zot potansyel. Par egzanp, kan Gideonn ti ganny swazir pour liber pep Bondye dan lanmen bann Madyanit ki ti pe abiz zot, dwatet i ti sirprann par salitasyon en lanz ki ti dir: “Zeova i avek ou, ou gerye pwisan.” I paret ki sa letan Gideonn pa ti santi li ditou konman en “gerye pwisan.” I ti admet ki i ti mank konfyans dan li menm e i ti santi ki i ti napa valer. Me parey sa konversasyon ki ti swiv ti montre, Zeova ti sertennman annan en pwennvi pli pozitif lo son serviter Gideonn.—Lir Ziz 6:11-16. *
5 Zeova ti annan konfyans dan Gideonn pour delivre Izrael akoz i ti’n vwar son bann abilite. En keksoz nou kapab dir se ki lanz Zeova ti’n remark lafason ki Gideonn ti bat dible avek tou son lafors. I ti annan en lot keksoz ki ti atir latansyon sa lanz. Dan letan Labib, ordinerman bann fermye ti bat lagrenn dan en landrwa o plenner kot zot bann lapay dible ti pou ganny balye par divan. I drol ki Gideonn ti pe bat dible dan preswar diven an kasyet. I ti fer sa pour ki bann Madyanit pa vwar sa ptigin rekolt ki i ti’n gannyen. Pa sa ti en bon fason fer! I pa etonan alor ki dan lizye Zeova, Gideonn pa ti zis en fermye ki ti port byen latansyon lo sa ki i ti fer, me i ti osi en dimoun pridan. Wi, Zeova ti vwar son potansyel e i ti travay avek li.
6, 7. (a) Ki mannyer pwennvi Zeova lo profet Amos ti diferan avek serten Izraelit? (b) Kwa ki montre ki Amos pa ti en dimoun ki ti napa ledikasyon?
6 Pareyman, nou vwar dan ka profet Amos ki Zeova ti remark potansyel enn son serviter, menm si i ti’n kapab paret napa valer oubyen lenportans devan lezot. Amos ti dekrir li menm konman en berze e enn ki ti pik fig sikomor lo pye, en kalite fig pour bann pov. Kan Zeova ti swazir Amos pour anons zizman kont sa dis tribi rwayonm Izrael ki ti’n tonm dan idolatri, serten Izraelit ti’n kapab panse ki Zeova ti’n fer en move swa.—Lir Amos 7:14, 15. *
7 Amos ti sorti dan en vilaz elwannyen me son konnesans lo koutim ek bann dirizan dan son letan ti montre ki i pa ti inyoran. I paret ki i ti’n ganny byen enformen konsernan kondisyon an Izrael e i ti osi konn en ta keksoz lo bann nasyon dan zalantour, lefet ki i ti pe fer tranzaksyon avek bann marsan ki ti pe vwayaze. (Amos 1:6, 9, 11, 13; 2:8; 6:4-6) Serten spesyalis Labib i rekonnet ki Amos ti en bon ekriven, pa selman akoz sa profet ti swazir bann mo senp e pwisan me i ti byen servi konparezon ek zedmo. Byensir, sa lardyes ki Amos ti annan pour reponn sa pret koronpi Amazya ti laprev ki Zeova ti’n swazir sa bon dimoun e i ti kapab servi son abilite ki o konmansman pa ti paret evidan.—Amos 7:12, 13, 16, 17.
8. (a) Ki lasirans Zeova ti donn David? (b) Akoz sa parol dan Psonm 32:8 i kapab asir bann ki mank konfyans dan zot menm oubyen zot abilite?
8 Wi, Zeova i remark potansyel sakenn son bann serviter. I ti asir Lerwa David ki i ti pou toultan gid li e ‘son lizye ti pou lo li.’ (Lir Psonm 32:8. *) Eski ou vwar akoz sa i devret ankourazan pour nou? Menm si nou mank konfyans dan nou menm, Zeova i kapab ed nou pour fer plis ki sa ki nou mazinen nou kapab fer. Zis parey en enstrikter i obzerv atantivman en nouvo zelev pe aprann grenp bann gro ros pour ed li vwar sa pli bon landrwa pour graponnen, Zeova i pare pour gid nou anmezir nou progrese spirityelman. Zeova i kapab servi nou bann frer ek ser pour ed nou devlop pli byen nou potansyel. Ki mannyer sa?
ROD SA KI BON DAN LEZOT
9. Ki mannyer nou kapab aplik sa konsey Pol pour “pran ka” avek lentere lezot?
9 Pol ti ankouraz tou Kretyen pour “pran ka” avek lentere bann frer ek ser. (Lir Filipyen 2:3, 4.) Sa ki Pol ti pe esey dir se ki nou devret obzerv abilite ki lezot i annan e rekonnet zot. Ki mannyer nou santi kan en dimoun i montre lentere dan progre ki nou’n fer? Ordinerman, sa i motiv nou pour fer plis progre e nou vin en pli bon dimoun. Pareyman, kan nou rekonnet valer nou bann frer ek ser, nou ed zot devlope e progrese spirityelman.
10. Lekel ki pli bezwen nou latansyon?
10 Lekel ki pli bezwen nou latansyon? Byensir, nou tou nou bezwen en latansyon spesyal tanzantan. Kantmenm sa, bann zenn frer oubyen frer ki fek batize i vreman bezwen santi ki zot ganny enkli dan bann aktivite kongregasyon. Sa pou ed zot konpran ki zot annan en plas parmi nou. De lot kote, kan nou pa reisi demontre lapresyasyon pour sa ki nou bann frer i fer, sa i kapab diminyen zot lanvi pour ganny plis responsabilite, en keksoz ki parol Bondye i ankouraz zot pour fer.—1 Tim. 3:1.
11. (a) Ki mannyer en ansyen ti ed en zennonm sirmont son timidite? (b) Ki leson ou kapab tire avek leksperyans Julien?
11 Ludovic, en ansyen ki ti benefisye avek sa swen kan i ti zenn i dir: “Ler mon montre lentere senser dan en frer sa i ed li pour progrese pli vitman.” Konsernan Julien en zennonm ki ti timid, Ludovic i dir: “Parski Julien parfwa ti esey fer son prezans konte dan en fason ase drol, sa ti fer ki son konportman pa ti normal. Me mon ti kapab vwar ki i ti en dimoun vreman zantiy e i ti vreman anvi ed lezot dan kongregasyon. Alor, olye kestyonn son motivasyon, mon ti plito konsantre lo son bann tre pozitif e esey ankouraz li.” Avek letan, Julien ti kalifye pour vin en asistan ministeryel e la i en pionye ordiner.
ED ZOT POUR DEVLOP PLI BYEN ZOT POTANSYEL
12. Ki kalite ki neseser pour ed en dimoun arive devlop pli byen son potansyel? Donn en legzanp.
12 Nou konpran ki si nou anvi ed lezot pour devlop pli byen zot potansyel, nou bezwen annan bon zizman. Parey nou’n vwar atraver legzanp Julien, nou bezwen pa get zis pwen feb en dimoun me arive rekonnet son bann bon kalite ek abilite ki i kapab devlop plis ankor. Sa i parey avek lafason ki Zezi ti vwar zapot Pyer. Menm si par ler Pyer ti paret en dimoun enstab, Zezi ti predir ki i ti pou vin stab parey en ros.—Zan 1:42.
13, 14. (a) Ki mannyer Barnabas ti montre bon zizman dan ka Mark? (b) Ki mannyer en zenn frer ti benefisye avek led en ansyen parey Mark? (Vwar portre lo paz 28.)
13 Barnabas ti demontre sa menm kalite disernman dan ka Zan ki ti osi ganny apele Mark ki ti en non Romen. (Akt 12:25) Pandan premye vwayaz misyonner ki Pol ti fer avek Barnabas, Mark ti servi konman en asistan, petet pour okip zot bann bezwen fizik. Me ler zot ti ariv Panfili, Mark ti kit zot an plan. Zot ti bezwen kontiny zot vwayaz san li, diriz dan direksyon nor atraver en rezyon ranpli avek bandi. (Akt 13:5, 13) Me, aparaman Barnabas ti pas lo kapris Mark e pli tar i ti sezi sa loportinite pour konplet son formasyon. (Akt 15:37-39) Sa ti ed sa zennonm pour vin en serviter Zeova ki matir. I enteresan pour note ki Mark ti avek Pol ki ti dan prizon Ronm e ansanm zot ti anvoy salitasyon pour bann Kretyen dan kongregasyon Kolos e zapot Pol ti koz an byen lo li. (Kol. 4:10) Imazin sa satisfaksyon ki Barnabas ti’n kapab annan kan Pol ti menm demann led Mark.—2 Tim. 4:11.
14 Alexandre ki ti’n fek ganny nonmen ansyen i rapel ki mannyer i ti benefisye avek en frer ki ti byen obzervan. I dir: “Kan mon ti pli zenn, i ti en vre lalit pour mwan fer lapriyer an piblik. En ansyen ti montre mwan ki mannyer pour prepar mon lekor e pour pli alez. Olye aret demann mwan pour fer lapriyer, i ti donn mwan sa privilez pour priye regilyerman dan bann renyon predikasyon. Avek letan, mon ti annan plis konfyans dan mon lekor.”
15. Ki mannyer Pol ti eksprim son lapresyasyon pour son bann frer?
15 Kan nou remark en bon kalite dan en lot Kretyen, eski nou dir li ki kantite nou apresye son bon kalite? Dan Romen sapit 16, Pol ti mansyonn plis ki 20 frer ek ser ki ti annan bann kalite ki ti fer li kontan zot. (Rom. 16:3-7, 13) Par egzanp, Pol ti admet ki Andronik ek Zinyas ti pe servi Kris pli lontan ki li e i ti met lanfaz lo zot landirans konman Kretyen. Pol ti osi koz an byen lo manman Rifis, i kapab ki Pol ti pe refer lo ki mannyer i ti pran byen swen avek li.
16. Kan nou felisit en zenn, ki rezilta sa i kapab anmennen?
16 Nou kapab ganny bann bon rezilta kan nou fer bann konpliman senser. Pran par egzanp Rico, en zenn garson sorti Lafrans, i ti dekouraze akoz son papa ki pa ti en Temwen pa ti oule i batize. Rico ti mazinen ki i ti bezwen espere ki i ganny laz mazer pour li kapab servi Zeova plennman. I ti osi tris akoz i ti ganny sikannen kot lekol. Frédéric, en ansyen ki ti ganny demande pour etidye avek Rico i rakonte: “Mon ti felisit Rico akoz sa kalite lopozisyon ki i ti gannyen ti montre ki i ti ase kouraze pour eksprim son lafwa.” Sa bann parol felisitasyon ti ranforsi determinasyon Rico pour kit en bon legzanp e ed li vin pli pros avek son papa. Rico ti batize a laz 12 an.
17. (a) Ki mannyer nou kapab ed nou frer progrese? (b) Ki lentere personnel en misyonner ti demontre dan bann zenn frer e avek ki rezilta?
17 Sak fwa ki nou montre lapresyasyon pour en size ki’n ganny byen prezante oubyen en bon zefor ki’n ganny fer, nou pe ankouraz nou bann frer ek ser pour servi Zeova pli plennman. Sylvie, * ki’n servi pour plizyer lannen dan Betel Lafrans ti dir ki bann ser osi i kapab felisit bann frer. I ti fer resorti ki bann madanm i kapab vwar bann detay ek zefor ki lezot pa vwar. Alor zot “bann parol lankourazman i al byen avek sa ki bann frer eksperyanse i dir.” I ti azoute: “Pour mwan, felisit lezot i en devwar.” (Prov. 3:27) Jérôme en misyonner Lagwiyann Franse, i’n ed bokou zenn frer pour kalifye pour servis misyonner. I dir: “Mon’n remarke ki ler mon felisit bann zenn frer lo bann keksoz spesifik dan zot minister oubyen ler zot donn bann bon komanter ki zot in byen prepare, sa i fer zot ganny plis konfyans dan zot lekor. An rezilta sa, zot devlop plis zot bann abilite.”
18. Akoz ler ou travay avek bann zenn frer sa i kapab anmenn byenfe?
18 Nou osi kapab ankouraz lezot pour progrese spirityelman par travay ansanm avek zot. En ansyen i kapab demann en zenn frer ki byen konn servi konpiter pour enprim serten lenformasyon sorti lo jw.org ki kapab ankouraz bann pli aze ki napa konpiter. Si ou pe fer en travay kot Lasal Rwayonm, akoz ou pa envit en zenn frer pour vin travay avek ou? Kan ou pran sa bann linisyativ sa pou donn ou loportinite pour obzerv bann zenn, felisit zot e vwar ki rezilta sa i anmennen.—Prov. 15:23.
PREPAR POUR LAVENIR
19, 20. Akoz nou devret ed lezot progrese?
19 Kan Zeova ti apwent Zozye pour gid bann Izraelit, i ti osi demann Moiz pour “ankouraz” e “fortifye” li. (Lir Deterononm 3:28. *) I annan deplizanpli dimoun ki pe vin dan laverite. I responsabilite tou bann Kretyen eksperyanse pour ed bann zenn frer ek bann nouvo pour devlop pli byen zot potansyel, pa zis bann ansyen. Sa pour fer ki i annan plis frer ek ser ki pran servis a plen tan e i pou annan plis ki pour kalifye pour “ansenny lezot.”—2 Tim. 2:2.
20 Ki swa nou form parti en kongregasyon byen etabli oubyen en pti group ki pe progrese pour vin en kongregasyon, annou prepar nou pour lavenir. Sa ki pli enportan se pour imit Zeova ki touzour rod sa ki bon dan son bann serviter.
[Not anba lo paz]
^ par. 4 Ziz 6:11-16: “11 Pli tar lanz Zeova ti vini e asiz anba sa gro pye dibwa ki ti Ofra, ki ti pou Yeoas sa Abyezerit. Son garson Gideonn ti pe bat dible dan preswar diven pour kasyet sa dible avek bann Madyanit. 12 Lanz Zeova ti aparet avek li e dir: ‘Zeova i avek ou, ou gerye pwisan.’ 13 Ler i ti tann sa, Gideonn ti dir li: “Pardonn mwan, mon Senyer, me si Zeova i avek nou, akoz tousala in arive avek nou? Oli tou son bann keksoz merveye ki nou zanset ti rakont nou ler zot ti dir, ‘Pa Zeova ki ti tir nou Lezip?’ La aprezan Zeova in abandonn nou e i’n donn nou dan lanmen bann Madyanit.” 14 Zeova ti get li e dir: ‘Ale avek sa lafors ki ou annan e ou pou sov Izrael dan lanmen Madyann. Pa mwan ki’n anvoy ou?’ 15 Gideonn ti reponn li: “Pardonn mwan Zeova. Ki mannyer mon kapab sov Izrael? Gete! Mon group i sa enn pli pti dan Manase e mon sa enn ki mwen enportan dan lakaz mon papa.” 16 Me Zeova ti dir li: ‘Parski mon pou avek ou, ou pou frap bann Madyanit konmsi zot ti en sel zonm.’”
^ par. 6 Amos 7:14, 15: “14 Alor Amos ti reponn e dir Amazya: ‘Mon pa ti en profet ni menm garson en profet, mon ti zis en gardyen zannimo e mon ti pik fig sikomor lo pye. 15 Me Zeova ti fer mwan aret swiv sa troupo e Zeova ti dir mwan, ‘Ale e profetiz avek mon pep Izrael.’”
^ par. 8 Psonm 32:8: “Mon pou fer ou annan bon zizman e mon pou enstrir ou dan sa semen ki ou devret pran. Mon lizye pou lo ou pour konsey ou.”
^ par. 17 Non in sanze.
^ par. 19 Deterononm 3:28: “Met Zozye ansarz, ankouraz li e fortifye li, parski i sa enn ki pou travers devan sa pep e i sa enn ki pou fer zot erit sa pei ki ou pou vwar.”
[Kestyon]
[Portre lo paz 31]
Frédéric (gos) ti ankouraz Rico pour reste determinen pour servi Zeova (Vwar paragraf 16)
[Portre lo paz 32]
Jérôme (drwat) ti ed Ryan kalifye konman en misyonner (Vwar paragraf 17)
