Eski ou rapel?

Eski ou’n lir byen bann dernyen nimero Latour Veyer? Be, vwar si ou kapab reponn sa bann kestyon swivan:

Kan ki mouton Lapak ti pou ganny touye le 14 Nizan?

Serten tradiksyon Labib i dir ki i ti pou ganny touye “ant sa de swar,” ki vedir dan labrin ouswa kan soley pe kouse, setadir apre soley kouse me avan ki fernwanr i fer. (Egz. 12:6)​—15/12-SC, paz 18-19.

Ki prensip Labib bann zenn i kapab servi pour fer bann swa ki saz?

Trwa prensip (1) Rod plito Rwayonm Bondye ek son lazistis. (Mat. 6:19-34) (2) Trouv lazwa par servi lezot. (Akt 20:35) (3) Kontan pour servi Bondye letan ou ankor zenn. (Ekle. 12:1)​—15/1-SC, paz 19-20.

Lekel sa kat kavalye ki’n mont zot seval depi 1914?

Zezi, konman sa kavalye lo sa seval blan, i’n tir Satan ek son bann demon dan lesyel. Sa kavalye lo sa seval rouz konman dife i reprezant bann lager ki’n fer soufer limanite. Sa kavalye lo sa seval nwanr i reprezant lafamin. Sa kavalye lo sa seval kouler pal pe anmenn lanmor par bann lepidemi, ki’n touy plizyer milyon dimoun. (Rev. 6:2-8)​—1/2-E, paz 6-7.

Kan ki “maryaz Lanyo” pou ganny fer? (Rev. 19:7)

“Maryaz Lanyo” i ganny fer apre ki Lerwa, Zezi Kri, i ale pour ranport laviktwar, savedir apre ki Gran Babilonn in ganny detrir e lager Armagedon in fini.​—15/2-SC, paz 10.

Akoz bann Zwif dan letan Zezi ti “dan lespektasyon” sa Mesi? (Lik 3:15)

Nou pa kapab konfirmen ki bann Zwif dan premye syek ti konpran profesi Danyel lo sa Mesi parey nou nou konpran. (Dan. 9:24-27) Me, petet zot ti’n antann koz lo sa lanons ki lanz ti fer avek bann berze ouswa sa ki Ann sa madanm ki ti en profet ti dir ler i ti vwar Zezi ankor en pti baba dan tanp. Bann savan osi ti vin rod “sa lerwa pep Zwif ki fek ne.” (Mat. 2:1, 2) Pli tar, Zan Batis ti endike ki Kris ti pou vini byento.​—15/2-SC, paz 26-27.

Ki mannyer nou kapab anpes nou Wi vin Non? (2 Kor. 1:18)

Nou bezwen rekonnet ki parfwa en keksoz an deor nou kontrol i kapab fer li enposib pour nou gard nou parol. Me si nou fer en promes ouswa en langazman, nou devret fer tou sa ki nou kapab pour gard li.​—15/3-SC, paz 32.

Ki mannyer nou kapab reziste sa tantasyon pour get pornografi?

Trwa letap itil (1) Deswit vir laba ler nou vwar bann zimaz provokan. (2) Annou preokip nou lespri avek bann panse pozitif e priy Bondye. (3) Vey nou lepa par evite get bann film ouswa sit web ki annan pornografi ladan.​—1/5-SC, paz 12-14.

Ki konsekans ki ou pa pe ekspekte i annan ler en Kretyen i kit son fanmir deryer pour al travay dan en lot pei?

Ler bann paran i swazir pour pa viv ansanm konman en fanmir, bann zanfan i kapab soufer emosyonnelman e moralman. Zot kapab rezet zot paran. Bann adilt osi ki reste lwen avek zot konzwen i kapab fer fas avek bann tantasyon seksyel.​—15/4-SC, paz 19-20.

Akoz lazanm bann kriminel ki ti ganny egzekite lo en poto ti ganny kase?

Bann Romen ti egzekit serten kriminel lo en poto. Bann Zwif ti demande ki lazanm bann kriminel ki ti o bor Zezi i ganny kase. Sa ti pou fer li pli difisil pour sa bann viktim kapab respire e zot ti mor pli vit. Koumsa, zot pa ti pou bezwen fer lannwit lo sa poto. (Det. 21:22, 23)​—1/5-E, paz 11.

Ki sa kat kestyon ou devret gard antet ler ou pe apros dimoun dan predikasyon?

Lekel zot? Kote mon pou rankontre zot? Kan ki mon pour rankontre zot? Ki mannyer mon devret apros zot?​—15/5-SC, paz 12-15.

Ki kantite dimoun in mor akoz fim sigaret?

Pandan sa dernyen syek, sigaret in touy 100,000,000 dimoun. Aktyelman, sigaret i pran lavi 6,000,000 dimoun dan en lannen.​—1/6-E, paz 3.