Eski ou vwar bann febles imen parey Zeova i vwar?
Eski ou vwar bann febles imen parey Zeova i vwar?
“Sa bann parti lekor ki paret pli feb, zot an realite byen neseser.”—1 KOR. 12:22.
KI OU POU REPONN?
Ki mannyer Zeova i vwar bann ki paret pli feb dan kongregasyon?
Kwa ki pou ed nou annan menm pwennvi ki Zeova lo febles imen?
Ki mannyer ler nou ed bann ki santi zot feb, sa i anmenn bann byenfe pour bokou?
1, 2. Akoz Pol ti kapab senpatiz avek bann ki feb?
NOU tou nou santi nou fay fay par ler. En pti lerim, latou oubyen alerzi i kapab fer nou sitan fay ki nou vwar li difisil menm pour fer bann keksoz ki nou abitye fer tou le zour. Aprezan zis mazinen ou’n santi ou pa byen, pa zis enn oubyen de semenn me pour plizyer mwan. Dan en sityasyon parey, pa ou ti pou apresye si lezot i konpran ou e demontre konpasyon anver ou?
2 Zapot Pol ti konnen ki savedir ganny afekte oubyen afeblir par bann presyon dan kongregasyon e an deor kongregasyon. Plis ki enn fwa, i ti krwar ki i ti nepli kapab. (2 Kor. 1:8; 7:5) Kan Pol ti reflesir lo son lavi e sa kantite difikilte ki i ti’n pas ladan konman en Kretyen fidel, i ti dir: “Lekel ki feb e ki mwan mon pa santi lafebles?” (2 Kor. 11:29) Konsernan lezot manm kongregasyon Kretyen ki ganny konpare avek bann parti lekor, Pol ti dir ki bann ki “paret pli feb, zot an realite byen neseser.” (1 Kor. 12:22) Ki i ti pe esey dir? Akoz nou bezwen vwar bann ki paret pli feb parey Zeova i vwar zot? Si nou fer sa ki mannyer sa pou benefisye nou?
PWENNVI ZEOVA LO FEBLES IMEN
3. Kwa ki kapab enfliyans nou pwennvi lo bann ki bezwen led dan kongregasyon?
3 Nou pe viv dan en lemonn ki annan bokou konpetisyon, kot lafors ek lazenes i souvan ganny konsidere konman pli enportan. Bokou i pare pour fer nenport kwa pour ganny sa ki zot anvi, souvan zot kas anba bann ki pli feb. Nou pa toler sa bann konportman, me san realize nou kapab devlop en move pwennvi lo bann ki bezwen led regilyerman, menm bann dan kongregasyon. Me nou kapab devlop en pwennvi pli rezonnab, parey Bondye.
4, 5. (a) Ki mannyer sa legzanp dan 1 Korentyen 12:21-23 i ed nou konpran pwennvi Zeova konsernan febles imen? (b) Ki mannyer nou benefisye kan nou ed bann ki feb?
4 Nou kapab konpran pwennvi Zeova lo febles imen atraver en legzanp dan premye let Pol pour bann Korentyen. Dan sapit 12, Pol i rapel nou ki menm bann parti lekor ki mwen enportan oubyen pli feb i annan zot fonksyon. (Lir 1 Korentyen 12:12, 18, 21-23.) Serten dimoun ki krwar dan evolisyon pa toutafe dakor avek sa. Toutfwa, bann dekouvert atraver letid ki’n ganny fer lo lekor imen, i montre ki bann parti lekor ki pa ti ganny konsidere konman enportan i annan bann fonksyon vreman neseser. * Par egzanp, serten in kestyonn litilite nou pti ledwa lipye, par kont, konmela zot in trouve ki i annan en lenpak lo balans nou lekor antye.
5 Legzanp Pol i fer resorti ki tou manm kongregasyon Kretyen i itil. Kontrerman avek Satan ki fer dimoun perdi zot dinyite, Zeova i konsider tou son bann serviter, enkli bann ki paret pli feb konman “neseser.” (Zob 4:18, 19) Sa i vedir ki nou kapab santi nou byen dan nou plas dan nou kongregasyon e ki nou form parti pep Bondye dan lemonn antye. Par egzanp, mazin en zour kot en dimoun aze in bezwen ou led pour tyonbo ou lanmen pour marse. Petet ou ti bezwen mars en pti pe pli dousman. Eski lefet ki ou ti ede, pa sa ti en keksoz itil ki ti fer ou santi ou byen? Wi, ler nou ed lezot nou santi nou kontan pour pran swen avek zot e sa i ed nou pour annan plis pasyans, lanmour e vin pli matir. (Efe. 4:15, 16) Nou Papa ki kontan nou i konnen ki en kongregasyon ki apresye sak manm malgre zot bann limit i montre ki zot rezonnab e annan lanmour.
6. Parfwa ki mannyer Pol ti servi sa mo “feb”ek “for”?
6 I enteresan ki dan let Pol pour bann Korentyen, i ti servi sa mo “feb” pour refer avek lafason ki bann ki pa Kretyen ti konsider bann Kretyen dan premye syek e osi lafason ki i ti santi lo li menm. (1 Kor. 1:26, 27; 2:3) Kan Pol ti koz lo bann ki ti “for,” i ti napa lentansyon fer serten Kretyen santi ki zot pli siperyer. (Rom. 15:1) O kontrer, i ti pe dir ki bann Kretyen ki annan plis leksperyans i devret pran pasyans avek bann ki pa ti ankor vin solid dan lafwa.
ESKI NOU BEZWEN SANZ NOU PWENNVI?
7. Kwa ki kapab anpes nou ed bann ki dan bezwen?
7 Kan nou ed “sa enn ki pli pti,” nou pa zis imit Zeova me nou osi ganny son laprouvasyon. (Ps. 41:1; Efe. 5:1) Me si nou annan en move pwennvi lo sa bann ki bezwen led, sa i kapab tant pour anpes nou ed zot. I kapab osi akoz nou pa asire ki nou devret dir, nou santi nou anbarase e nou evit bann ki dan problenm. Cynthia, * en ser ki son msye ti kit li i dir: “Si bann frer ek ser i evit ou oubyen pa azir parey ou ekspekte ki bann zanmi pros i devret azir, sa i kapab bles ou. Kan ou pe pas dan difikilte ou bezwen sipor lezot.” Lerwa David in deza pas dan sa menm sityasyon, i ti santi li blese ler son bann zanmi ti evit li.—Ps. 31:12.
8. Kwa ki pou ed nou pour montre plis konpasyon anver lezot?
8 Nou pou demontre plis konpasyon si nou rapel ki serten nou bann frer ek ser in vin feb akoz bann sityasyon difisil ki zot in pas ladan, parey problenm lasante, viv avek bann dimoun ki pa Temwen oubyen depresyon. Nou kapab trouv nou dan sa menm sityasyon en zour. Avan ki bann Izraelit ki ti’n vin pov e feb Lezip ti antre dan Later Promiz, zot ti ganny demande pour pa ‘andirsi zot leker’ anver zot bann frer ki ti dan bezwen. Zeova ti ekspekte ki zot konsider bann pov konman bann dimoun ki merit ganny ede.—Det. 15:7, 11; Lev. 25:35-38.
9. Kwa ki devret nou priyorite ler nou pe ed bann ki pe pas dan difikilte? Donn legzanp.
9 Olye ziz oubyen annan doutans lo lezot, nou devret donn lankourazman spirityel bann ki pe pas dan sityasyon difisil. (Zob 33:6, 7; Mat. 7:1) Par egzanp: Kan en dimoun ki’n fer aksidan loto i ariv kot emergency, eski bann ners ek dokter pou rode si li ki ti lafot sa aksidan? Non, deswit zot donn li lasistans medikal ki i bezwen. Pareyman, si en konpanyon Kretyen in vin feb akoz son bann problenm personnel, nou priyorite se pour ed li spirityelman.—Lir 1 Tesalonisyen 5:14, NW. *
10. Ki mannyer serten ki paret pli feb i kapab vreman “ris dan lafwa”?
10 Nou kapab vwar sa ki paret en febles dan nou bann frer ek ser dan en lot fason, si nou reflesir lo zot sirkonstans. Mazin bann ser ki pe andir lopozisyon dan zot fanmir pour plizyer lannen. Serten i kapab senp e paret frazil, pourtan pa zot demontre en lafwa for e zot kouraze? Kan ou vwar en manman tousel vin renyon regilyerman avek son bann zanfan, pa ou enpresyonnen par son lafwa ek determinasyon? Ki nou pou dir lo bann zenn ki reste atase avek laverite malgre bann move lenfliyans kot lekol? Nou bezwen rekonnet ki sa bann ki paret feb i kapab osi “ris dan lafwa” parey bann ki dan bann sityasyon pli favorab.—Zak 2:5.
AZISTE OU PWENNVI DAPRE PWENNVI ZEOVA
11, 12. (a) Kwa ki pou ed nou aziste nou pwennvi konsernan bann febles imen? (b) Ki nou aprann par lafason ki Zeova ti azir avek Aaron?
11 Nou ganny ede pour aziste nou pwennvi konsernan febles imen dapre pwennvi Zeova par egzamin lafason ki i ti azir anver serten son bann serviter. (Lir Psonm 130:3. *) Par egzanp, si ou ti la avek Moiz kan Aaron ti fer en pti bef annor, ki ou ti pou santi anver Aaron ler ou ti pou tann son leskiz ki pa ti fer sans? (Egz. 32:21-24) Ki mannyer ou ti pou vwar latitid Aaron kan i ti ganny enfliyanse avek son ser Miryam pour kritik Moiz akoz i ti’n marye avek en madanm etranze? (Nom. 12:1, 2) Ki mannyer ou ti pou reazir kan Aaron ek Moiz pa ti reisi onor Zeova ler I ti donn zot delo Meriba atraver en mirak?—Nom. 20:10-13.
12 Dan sak sa bann sityasyon, Zeova ti pou’n kapab pini Aaron deswit. Me i ti rekonnet ki Aaron pa ti en move dimoun oubyen ki i pa ti zis son lafot. I paret ki Aaron ti les bann sityasyon oubyen lenfliyans lezot fer li fer sa ki mal. Par kont, kan i ti ganny dir ki i ti’n fer en fot, deswit i ti admet e i ti aksepte konsey Zeova. (Egz. 32:26; Nom. 12:11; 20:23-27) Zeova ti prefere konsantre lo lafwa ek repantans Aaron. Plizyer syek pli tar, Aaron ek son desandans ti ankor renonmen konman bann dimoun ki ti annan lakrent pour Zeova.—Ps. 115:10-12; 135:19, 20.
13. Ki mannyer nou kapab egzamin pwennvi ki nou annan lo febles imen?
13 Pour nou kapab aziste nou fason panse avek sa ki pour Zeova, nou devret egzamin nou pwennvi anver bann ki paret feb. (1 Sam. 16:7) Par egzanp, ki mannyer nou reakte ler en adolesan pa fer bann bon swa konsernan divertisman oubyen ler i annan en latitid lese fer? Dan plas kritike, akoz nou pa mazin sa ki nou kapab fer pour ed li vin matir? Nou kapab pran linisyativ pour ed en dimoun ki dan bezwen e kan nou fer sa nou pou konpran lezot pli byen e nou lanmour pour zot pour vin pli for.
14, 15. (a) Ki mannyer Zeova ti santi ler Eliya ti dekouraze? (b) Ki nou aprann atraver leksperyans Eliya?
14 Kan nou konpar nou fason panse avek lafason ki Zeova ti vwar serten son bann serviter ki ti dekouraze, sa i ed nou pour sanz nou pwennvi lo lezot. Eliya ti enn parmi zot. Menm si i ti kapab fer fas avek 450 profet Baal, i ti taye kan i ti konnen ki Larenn Zezabel ti pe fer konplo pour touy li. Apre ki i ti’n mars 150 kilomet pour al Beer-Seba, i ti al dan dezer. Sa profet ti byen fatige akoz sa traze ki i ti’n fer dan sa gro ker soley, i ti asiz anba en pye dibwa e i ti demande “pour li mor.”—1 Rwa. 18:19; 19:1-4.
15 Ki mannyer Zeova ti santi ler i ti vwar ki son profet fidel ti dan dezespwar? Eski i ti rezet son serviter akoz i ti deprimen e dekouraze dan sa moman? Pa ditou! Zeova ti pran an konsiderasyon limit Eliya e i ti anvoy en lanz pour ed li. De fwa sa lanz ti ankouraz Eliya pour manze. Sa ti pou fer ki, sa lot traze pa ti pou “tro long pour [li].” (Lir 1 Lerwa 19:5-8. *) Wi, menm avan ki Zeova ti donn li okenn gidans, i ti ekout son profet e pran bann pa neseser pour soutenir li.
16, 17. Ki mannyer nou kapab imit lafason ki Zeova ti pran swen avek Eliya?
16 Ki mannyer nou kapab imit nou Papa ki pran swen avek nou? Nou pa devret taye pour donn konsey. (Prov. 18:13) Avan tou, i ti pou mye ki nou demontre konpasyon anver bann ki santi zot annan ‘mwens lenportans’ akoz zot sirkonstans personnel. (1 Kor. 12:23) Apre nou pou dan en pli bon pozisyon pour azir dapre son bezwen.
17 Par egzanp, mazin Cynthia ki nou ti koz lo la avan, ki son msye ti’n kit li avek son de fiy. Zot ti tousel. Ki mannyer serten Temwen ti azir? I eksplike: “Apre ki nou ti’n dir zot lo telefonn sa ki ti’n arive, 45 minit pli tar zot ti kot nou. Zot ti pe plere. Zot pa ti kit nou tousel pour sa detrwa premye zour. Nou pa ti pe manz byen e nou ti vreman emosyonnel, alor zot ti les nou vin reste kot zot pour en pe letan.” I kapab ki sa leksperyans i fer ou rapel sa ki Zak ti ekrir: “Si i annan en frer ou ser ki bezwen lenz e napa ase manze, ki benefis i annan pour ou dir avek li, ‘Ale, Bondye i a beni ou! Gard ou so, e manz byen,’ si an atandan ou pa donn li nanryen sa ki son lekor i bezwen. Lafwa alor par limenm, si i pa akonpannyen par laksyon, i mor.” (Zak 2:15-17) Sipor bann frer ek ser ki ti vin dan sa bon moman, ti donn Cynthia ek son de fiy lafors pour servi konman pionye asistan zis sis mwan apre zot leksperyans sokan.—2 Kor. 12:10.
BYENFE POUR BOKOU
18, 19. (a) Ki mannyer nou kapab ed bann ki feb? (b) Lekel ki benefisye ler nou ed bann ki santi zot feb?
18 Petet ou konnen atraver ou prop leksperyans ki i pran letan pour refer apre en maladi grav. Pareyman, en Kretyen ki’n vin feb akoz bann difikilte personnel oubyen bann sirkonstans difisil i kapab bezwen letan pour reganny lafors spirityel. I vre, nou frer oubyen ser pou bezwen ranforsi son prop lafwa atraver letid personnel, lapriyer ek lezot aktivite Kretyen. Me eski nou pou demontre pasyans ziska ki i reganny son lekilib spirityel? Pandan ki i pe refer, eski nou pou kontinyen demontre lanmour? Eski nou pou fer zefor pour ed bann ki feb santi ki zot annan valer e ki nou kontan zot?—2 Kor. 8:8.
19 Pa bliye ki ler nou pe ed nou bann frer ek ser, nou eksperyans sa lazwa ki nou gannyen ler nou donnen. Nou osi devlop nou abilite pour demontre konpasyon ek pasyans anver lezot. Me pa zis nou ki benefisye. Sa i fer ki tou dimoun dan kongregasyon i annan plis lanmour pour kanmarad. Par lao tou, nou imit Zeova ki vwar sak dimoun presye. Wi, pa nou tou nou annan bon rezon pour aplik sa konsey pour ‘ed bann ki pli feb’!—Akt 20:35.
[Not anba lo paz]
^ par. 4 Dan sa liv The Descent of Man, Charles Darwin ti mansyonn plizyer parti lekor konman “initil.” Enn son reprezantan ti dir ki i annan plis ki en douzenn “lorgann ki pa neseser,” sa i enkli appendix ek thymus.
^ par. 7 Non in ganny sanze.
^ par. 9 1 Tesalonisyen 5:14: “De lot kote, nou sipliy zot frer, averti bann ki fer dezord, koz dan en fason konsolan avek bann ki dan depresyon, ed bann ki feb, pran pasyans avek zot tou.”
^ par. 11 Psonm 130:3: “O Ya, si ou ti vey bann fot. O Zeova, lekel ki ti pou kapab debout?”
^ par. 15 1 Lerwa 19:5-8: “5 Apre i ti alonze e tonm dormi anba sa pye dibwa. Me en sel kou en lanz ti tous li e i ti dir li: ‘Leve e manze.’ 6 Ler i ti gete, kot son latet ti annan en dipen ron lo bann ros so e en brok delo. I ti manze e bwar e ankor enn fwa i ti alonze. 7 Pli tar, lanz Zeova ti vin en dezyenm fwa, tous li e dir: ‘Leve e manze, akoz sa traze pou tro long pour ou.’ 8 Alor i ti leve, manze e bwar e sa manze ti donn li lafors pour kapab kontinyen ale pour 40 zour ek 40 nwit ziska ki i ti ariv Oreb kot montanny sa vre Bondye.”
[Kestyon]
[Portre lo paz 26]
Zeova ti pran an konsiderasyon limit Eliya e i ti anvoy en lanz pour ankouraz li (Vwar paragraf 14, 15)
