Pep Zeova i “devret aret fer sa ki mal”

“Tou dimoun ki kriy non Zeova i devret aret fer sa ki mal.”​—2 TIM. 2:19, NW.

KI OU POU REPONN?

Kwa ki kapab soulev bann “diskisyon ensanse e bet” e ki mannyer nou kapab evit zot?

Ki mannyer nou “aret fer sa ki mal” an sa ki konsern move frekantasyon?

Ki mannyer nou kapab azir deswit kan nou “aret fer sa ki mal”?

1. Kwa ki annan en plas spesyal dan nou ladorasyon?

ESKI ou’n deza vwar non Zeova grave lo en batiman kekpar oubyen lo en keksoz dan mize? Mon asire ki ou ti vwar sa enteresan e eksitan. Pa non Zeova i annan en plas spesyal dan nou ladorasyon, apre tou, nou bann Temwen Zeova! Dan lemonn antye, napa okenn group ozordi ki servi non Zeova parey nou. Me nou konnen ki sa privilez pour port non Bondye i vin avek en responsabilite.

2. Nou privilez pour port non Bondye i vin avek ki responsabilite?

² I pa zis akoz nou servi non Zeova ki otomatikman nou pou ganny son laprouvasyon. Nou bezwen viv an armoni avek son bann standar moral. I pour sa rezon ki Labib i rapel nou ki pep Zeova i devret “rezet sa ki move.” (Ps. 34:14) Zapot Pol ti fer kler sa prensip kan i ti ekrir: “Tou dimoun ki kriy non Zeova i devret aret fer sa ki mal.” (Lir 2 Timote 2:19, NW. *) Konman son Temwen, nou renonmen pour kriy  non Zeova. Me ki mannyer nou kapab aret fer sa ki mal?

“DEKILE” AVEK SA KI MAL

3, 4. Ki verse ki’n enteres bann spesyalis Labib pour bokou lannen e akoz?

³ Annou vwar konteks parol Pol dan 2 Timote 2:19. Sa verse i refer avek “fondasyon solid ki Bondye in poze” e apre i mansyonn de fraz ki ti’n ganny grave lo la. I paret ki sa premye fraz i dapre Nonm 16:5, ki dir: “Zeova i konn bann ki pour li.” (Vwar lartik avan.) Sa dezyenm fraz ki’n enteres bann spesyalis Labib pour bokou lannen i dir: “Tou dimoun ki kriy non Zeova i devret aret fer sa ki mal.” Akoz?

⁴ Ondire sa ki Pol ti dir i sorti dan en verse dan Lekritir Ebre. Me i paret ki napa okenn verse dan Lekritir Ebre ki koresponn avek sa ki Pol ti’n dir. Alor, ki sa zapot ti pe refer avek kan i ti dir: “Tou dimoun ki kriy non Zeova i devret aret fer sa ki mal”? Zis avan ki i ti dir sa parol, Pol ti sit resi rebelyon Kora dan Nonm sapit 16. Eski pareyman sa dezyenm parol ki i ti dir ti kapab pe refer avek sa rebelyon?

5-7. Ki levennman dan letan Moiz, Pol ti pe refer avek dan 2 Timote 2:19? (Vwar portre lo paz 12.)

⁵ Labib i dir ki bann garson Eliab, Datann ek Abiram, ti sef pour zwenn ansanm avek Kora pour rebel kont Moiz ek Aaron. (Nom. 16:1-5) Zot pa ti kanmi pour mank respe anver Moiz e par fer sa zot ti rezet lotorite ki i ti’n gannyen avek Bondye. Sa bann rebel ti kontinyen viv parmi pep Bondye e zot ti en danze spirityel pour bann ki ti fidel. Kan i ti’n ariv ler pour Zeova separ son bann adorater fidel ek bann rebel, i ti donn zot en lord kler.

⁶ Sa resi i dir: “Apre Zeova ti dir Moiz: ‘Koz avek bann ki’n rasanble e dir zot, “Sorti o bor latant Kora, Datann ek Abiram!”’ Apre Moiz ti leve e al kot Datann ek Abiram e bann ansyen Izrael ti al avek li. I ti dir bann ki ti’n rasanble: ‘Dekile silvouple kot latant sa bann move zonm e pa tous nanryen ki pour zot, pour ki zot pa ganny balye dan tou zot pese.’ Deswit partou kote zot ti dekile avek latant Kora, Datann ek Abiram.” (Nom. 16:23-27) Apre sa, Zeova ti touy tou bann ki ti’n rebel. De lot kote, bann adorater fidel ki ti dekile avek bann rebel ti aret fer sa ki mal e zot ti sirviv.

⁷ Zeova i vwar dan leker. Zeova i konn bann ki pour li e ki fidel anver li. Kantmenm sa, son bann fidel ti bezwen azir deswit e separ zot avek bann dimoun ki ti pe fer sa ki mal. Alor, i posib ki Pol ti pe refer avek sa resi dan Nonm 16:23-27 kan i ti ekrir: “Tou dimoun ki kriy non Zeova i devret aret fer sa ki mal.” Pol ti osi pe sit Nonm 16:5 kan i ti dir: “Zeova i konn bann ki pour li.” I toutafe normal alor, pour tonm lo sa konklizyon ki tou le de fraz pe refer avek menm levennman.​—2 Tim. 2:19.

“PA PARTISIP DAN BANN DISKISYON ENSANSE E BET”

8. Akoz i pa sifi zis pour servi non Zeova oubyen form parti kongregasyon Kretyen?

⁸ Kan i ti pe refer avek sa levennman dan letan Moiz, Pol ti pe fer Timote rapel sa nesesite pour azir deswit pour protez son relasyon presye avek Zeova. I pa ti sifi zis pour form parti kongregasyon Kretyen, zis parey i pa ti sifi zis pour kriy non Zeova dan letan Moiz. Bann adorater fidel i devret azir deswit pour aret fer sa ki mal. Ki sa ti vedir pour Timote? Ki leson pep Zeova ozordi i kapab aprann atraver konsey enspire Pol?

9. Ki mannyer “bann diskisyon ensanse e bet” ti afekte kongregasyon Kretyen dan premye syek?

 ⁹ Parol Bondye i donn bann konsey presi konsernan bann keksoz mal ki bann Kretyen i devret aret fer oubyen pa partisip ladan. Par egzanp, dan konteks 2 Timote 2:19 nou vwar ki Pol ti dir Timote pour “evit tou diskisyon, paryaz parol” e “evit bann diskisyon vid.” (Lir 2 Timote 2:14, 16, 23.) Serten manm dan kongregasyon ti pe promot bann lansennyman aposta. I paret osi ki lezot ti pe entrodwir bann nide ki anmenn konfizyon. Menm si sa bann nide pa ti toutafe lekontrer avek sa ki Labib i dir, sa ti kree divizyon. Sa ti provok bann deba, zot ti argimante e pour fini kont, i ti annan en latmosfer ki pa ti bon pour zot spirityalite. Alor, Pol ti met lanfaz lo nesesite pour “pa partisip dan bann diskisyon ensanse e bet.”

10. Ki mannyer nou devret reazir kan nou fer fas avek lapostazi?

¹⁰ Ozordi i pa souvan ki pep Zeova i bezwen fer fas avek bann aposta dan kongregasyon. Kantmenm sa, kan nou ganny ekspoze avek bann lansennyman ki pa baze lo Labib, nenport ki kote zot sorti, nou devret rezet zot deswit. I pa ti pou saz pour annan bann deba avek bann aposta, swa kan nou vwar zot ouswa pour azout nou komanter lo zot blog oubyen nenport lezot mwayen kominikasyon. Menm kan nou annan lentansyon pour ed sa dimoun, annan en tel konversasyon i pou tou lekontrer avek gidans ki nou’n gannyen dapre Labib parey nou’n fek vwar. O kontrer, konman pep Zeova, nou evit e rezet konpletman lapostazi.

11. Kwa ki kapab soulev bann “diskisyon ensanse” e ki mannyer bann ansyen i kapab kit en bon legzanp?

¹¹ I annan lezot keksoz apard lapostazi ki kapab gat lape dan kongregasyon. Par egzanp, diferan lopinyon konsernan divertisman i kapab soulev “bann diskisyon ensanse e bet.” Byensir, kan en dimoun i promot bann divertisman ki kas standar moral Zeova, bann ansyen pa devret toler sa bann konportman zis pour evit diskisyon. (Ps. 11:5; Efe. 5:3-5) Kantmenm sa, bann ansyen i fer atansyon ki zot pa promot zot prop lopinyon. Zot reste atase avek sa konsey ki Labib i donnen: “Pran byen swen troupo Bondye ki’n ganny konfye avek zot . . . Pa bezwen domin lo bann ki’n ganny konfye dan zot responsabilite, me zotmenm, zot devre vin en model pour troupo.”​—1 Pyer 5:2, 3; Lir 2 Korentyen 1:24.

12, 13. (a) Ki pwennvi bann Temwen Zeova konsernan swa divertisman e ki bann prensip Labib nou kapab aplike? (b) Ki mannyer sa prensip ki nou’n vwar dan paragraf 12 i kapab ganny aplike dan diferan sirkonstans personnel?

¹² Konsernan divertisman, nou lorganizasyon pa fer en lalis bann kalite film, zwe video, liv oubyen sanson ki nou pa devret gete ni ekoute. Akoz? Labib i ankouraz sak dimoun pour antrenn zot abilite pour “konn fer diferans ant sa ki byen ek sa ki mal.” (Ebr. 5:14) Dan Labib i annan bann prensip ki bann Kretyen i kapab swiv ler zot pe swazir bann divertisman. Dan tou laspe nou lavi, nou lobzektif i devret pour “konn disteng sa ki fer plezir Bondye.” (Efe. 5:10) Labib i ansenny nou ki bann sef fanmir i annan serten lotorite, alor sa i fer ki kot zot lakour zot kapab swazir pour evit serten divertisman. *​—1 Kor. 11:3; Efe. 6:1-4.

 ¹³ Sa bann prensip Labib ki nou’n vwar avan pa aplik zis kan nou pe fer bann swa pour divertisman. Diferan lopinyon lo lenz ek laparans, lasante, lo sa ki nou manze ek lezot keksoz personnel i kapab osi anmenn dezakor. Anfet, si napa okenn prensip Labib ki pe ganny kase, pep Zeova i byen fer ler zot evite argimant lo sa bann tel size, akoz “serviter Senyer pa devret en dimoun ki fer kerel. Okontrer, i devre byen avek tou dimoun.”​—2 Tim. 2:24.

EVIT MOVE FREKANTASYON!

14. Ki legzanp Pol ti servi pour montre nesesite pour evit move frekantasyon?

¹⁴ Dan ki lezot fason bann ki “kriy non Zeova i devret aret fer sa ki mal”? Par evite annan en relasyon pros avek bann dimoun ki fer sa ki mal. I enteresan ki apre ki Pol ti’n servi sa legzanp lo “fondasyon solid ki Bondye in poze” i ti servi en lot legzanp. I ti koz konsernan “en gran lakaz” ki “napa zis vesel an-or ek an-arzan, me i annan osi ki an-bwa ek sa ki an later; serten pour bann lokazyon spesyal e lezot pour servis pli ordiner.” (2 Tim. 2:20, 21) Apre sa, i ti konsey bann Kretyen pour ‘prezerv zot’ oubyen separ zot avek bann vesel ki ganny servi pour en “servis pli ordiner.”

15, 16. Ki nou kapab aprann avek sa legzanp konsernan “en gran lakaz”?

¹⁵ Ki sa legzanp i vedir? Pol i konpar kongregasyon Kretyen avek “en gran lakaz” e sak manm kongregasyon i ganny konpare avek bann “vesel” oubyen bann resipyan dan sa lakaz. Dan en lakaz, serten vesel i kapab ganny kontaminen avek bann sibstans danzere oubyen sal. Sa met lakour pou separ sa bann resipyan avek bann ki prop, par egzanp bann ki i servi pour kwi ladan.

¹⁶ Pareyman, pep Zeova ozordi ki pe fer zefor pour anmenn en lavi prop, i devret evite annan en relasyon pros  avek bann dimoun dan kongregasyon ki kontinyen negliz bann prensip Zeova. (Lir 1 Korentyen 15:33.) Si nou devret azir dan sa fason avek bann ki dan kongregasyon, konbyen plis nou “pa [devret] asosye” avek bann ki an deor kongregasyon, ki bokou parmi zot i ‘kontan larzan, dezobeisan anver zot paran, kalomni zot prosen, kriel, lennmi sa ki fer dibyen, zot tret, kontan plezir plis ki Bondye’!​—2 Tim. 3:1-5.

ZEOVA I BENI LER NOU AZIR DESWIT

17. Ki mannyer bann Izraelit fidel ti swiv tou sa ki zot ti’n ganny demande kan zot ti pe siport Zeova kont sa ki mal?

¹⁷ Labib i mansyonn spesifikman ki mannyer bann Izraelit ti azir deswit kan zot ti ganny demande pour “sorti o bor latant Kora, Datann ek Abiram.” Sa resi i dir ki ‘deswit zot ti dekile.’ (Nom. 16:24, 27) Zot pa ti ezite oubyen anvoy pour pli tar. Sa verse i osi fer resorti ki mannyer zot ti swiv tou sa ki zot ti’n ganny demande pour fer. Labib i dir: “Partou kote zot ti dekile.” Bann dimoun ki ti fidel pa ti oule pran okenn risk. Zot ti obeir avek tou zot leker. Zot ti montre klerman ki zot ti siport Zeova e ki zot ti kont sa ki mal. Ki leson nou kapab aprann atraver sa legzanp?

18. Ki Pol ti pe esey dir kan i ti konsey Timote pour ‘gard son lekor kont sa bann pasyon lazenes’?

¹⁸ Pour protez nou lanmitye avek Zeova, nou devret azir deswit. Sanmenm sa ki Pol ti pe esey dir kan i ti konsey Timote pour ‘gard son lekor kont sa bann pasyon lazenes.’ (2 Tim. 2:22) Sa letan, Timote ti deza en adilt, petet dan son bann 30 an. Kantmenm sa, bann “pasyon lazenes” bet pa swazir laz. Kan i ti fer fas avek sa bann dezir, Timote ti pou bezwen ‘gard son lekor’ kont sa. Andotmo, Timote ti pou bezwen “aret fer sa ki mal.” Dan menm laliny, Zezi ti dir: “Si ou lizye i fer ou fer pese, aras li e zet li lwen avek ou.” (Mat. 18:9) Ozordi, bann Kretyen ki pran aker sa konsey i azir deswit kan zot spirityalite i an danze, zot pa anvoy pour pli tar e zot fer li san okenn ezitasyon.

19. Ki mannyer serten ozordi in azir deswit pour protez zot lekor kont bann danze spirityel?

¹⁹ Serten ki ti annan problenm lalkol avan vin Temwen in deside pour nepli pran okenn lalkol. Lezot i evit serten divertisman ki pa mal dan li menm me ki kapab eksit zot move dezir. (Ps. 101:3) Par egzanp, avan ki i ti vin en Temwen, en frer ti kontan sa lanbyans imoral dan bann parti ki i ti ale. Me apre ki i ti’n konn laverite, i ti deside pour pa dans ditou, menm kot bann rankont ki bann Temwen i fer akoz i per pangar i reganny bann dezir oubyen panse ki pa apropriye. I vre ki bann Kretyen pa ganny enterdi pour bwar lalkol, danse, oubyen lezot keksoz ki pa mal dan li menm. Annefe, nou tou nou devret azir deswit e fer tou sa ki nou kapab pour protez nou kont bann danze spirityel.

20. Menm si petet i pa fasil pour “aret fer sa ki mal,” kwa ki donn nou konfyans ek rekonfor?

²⁰ Sa privilez pour port non Bondye i vin avek responsabilite. Nou devret “aret fer sa ki mal” e “rezet sa ki move.” (Ps. 34:14) I vre, i pa toultan fasil pour fer sa. Pa i rekonfortan pour konnen ki Zeova pou touzour kontan “bann ki pour li” e ki reste atase avek son bann standar drwat!​—2 Tim. 2:19; Lir 2 Kronik 16:9a. *

[Not anba lo paz]

[Kestyon]

[Portre lo paz 15]

Evite fer bann deba avek bann aposta (Vwar paragraf 10)