BIOGRAFI

Perdi en Papa​—Trouv en Papa

Rakonte par Gerrit Lösch

MON Papa ti ne Graz, Lotris, lannen 1899, alor i ti en zenn garson pandan Premye Lager Mondyal. Pa bokou letan apre ki Dezyenm Lager Mondyal ti deklare lannen 1939 i ti ganny apele pour al lager pour larme Alman. I ti ganny touye an 1943 dan lager Larisi. Malerezman, koumsa ki mon ti perdi mon papa ler mon ti apepre zis de-z-an. Mon pa ti zanmen annan sa sans pour konn li e mon ti vreman mank en papa dan mon lavi, sirtou ler mon ti realize ki laplipar bann garson dan lekol ti annan zot papa. Pli tar, ler mon ti en adolesan, mon ti ganny rekonforte kan mon ti aprann konsernan nou Papa dan lesyel, en Papa pli siperyer ki pa kapab mor.​—Aba. 1:12.

MON LEKSPERYANS DAN BOY SCOUTS

Kan mon ti annan set an, mon ti antre dan Boy Scouts, en group pour bann zenn. Boy Scouts i en lorganizasyon mondyal ki ti ganny formen an 1908, Grannbretanny, par en zeneral dan larme Britanik ki ti apel Robert Stephenson Smyth Baden-Powell. An 1916 i ti form Wolf Cubs (oubyen Cub Scouts) pour bann garson pli zenn ki ti dan mon laz.

Mon ti kontan bann kanpman ki nou ti fer wikenn dan lakanpanny, dormi dan latant, met liniform e parade avek tanbour. An partikilye, mon ti kontan letan ki nou ti pase avek lezot Scouts e osi ler nou ti asiz otour en dife aswar pour sante e zwe dan lafore. Nou ti osi aprann bokou lo lanatir, sa ti fer mwan apresye travay nou Kreater.

Boy Scouts i ganny ankouraze pour fer en bon keksoz sak zour. Sa i zot moto. Ler nou ti vwar kanmarad nou ti dir “Touzour Pare.” Sa ti atir mwan. Dan nou group ki ti annan plis ki san garson, apepre lanmwatye ti Katolik, lanmwatye ti Protestan e enn ti Boudis.

Depi 1920, bann Scout meeting enternasyonal oubyen bann parti kot i annan en ta lanmizman (jamboree), i ganny fer tou le detrwa zan. Mon ti asiste setyenm World Scout Jamboree ki ti ganny fer Bad Ischl, Lotris, an Out 1951 e nevyenm World Scout Jamboree ki ti ganny fer Sutton Park, o bor Birmingham, Langleter, an Out 1957. Pandan sa nevyenm jamboree, i ti annan apepre 33,000 Scouts ki ti asiste, sorti dan 85 pei e teritwar. I ti osi annan apepre 750,000 dimoun ki ti vizit nou jamboree, enkli Larenn Elizabeth Langleter. Pour mwan, i ti konmsi i en fanmir ki sorti dan lemonn antye. Mon pa ti konnen sa letan ki byento mon ti pou konn en fanmir ki sorti dan lemonn antye ki pli enpresyonan, enn spirityel.

 ZWENN EN TEMWEN ZEOVA POUR PREMYE FWA

Pandan prentan lannen 1958, mon ti pres pour mon fini mon aprantisaz konman en server kot Grand Hotel Wiesler Graz, Lotris. Laba, Rudolf Tschiggerl, en koleg travay ki ti kwizinyen patisye ti rann mwan en temwannyaz enformel. Zanmen mon ti’n deza tann okenn keksoz lo laverite avan sa. Premyerman i ti koz lo doktrin Trinite e dir mwan ki Labib pa ansenny sa. Mon ti defann sa doktrin e mon ti anvi montre li ki i ti mal. Mon ti kontan mon koleg travay e mon ti anvi persyad li pour retourn dan Legliz Katolik.

Rudolf, ki nou ti donn li sa pti non Rudi, ti donn mwan en Labib. Mon ti ensiste ki sa Labib ti pou bezwen en Labib Katolik. Mon ti konmans lir sa Labib e deswit mon ti bat avek en trak ki ti’n ganny enprimen par Watchtower Society ki Rudi ti’n met ladan. Mon pa ti dakor akoz mon ti santi ki lafason ki sa trak ti’n ganny ekrir ti kapab paret vre me kekfwa i pa ti leka. Me mon ti pare pour koz lo Labib avek li. Rudi ti demontre bon zizman e i pa ti ofer mwan okenn lezot keksoz ki ti’n ganny enprimen. Pour apepre trwa mwan, nou ti koz koz lo Labib e sa ti souvan ale ziska tar dan lannwit.

Apre ki mon ti’n fini mon aprantisaz kot sa lotel dan lavil Graz, sa landrwa kot mon ti’n grandi, mon manman ti peye pour ki mon al kot en lekol pour aprann ki mannyer pour vin manedyer en lotel. Alor mon ti al reste Bad Hofgastein, en lavil dan en vale dan Alps, sa landrwa kot sa lekol ti sitye. Sa lekol ti menm brans avek Grand Hotel ki ti Bad Hofgastein e par ler mon ti al travay laba pour ganny plis leksperyans par met an pratik sa ki mon ti’n aprann dan laklas.

GANNY VIZITE PAR DE SER MISYONNER

Rudi ti’n anvoy mon nouvo ladres kot biro brans Vienna e an retour biro brans ti anvoy mon ladres kot de ser misyonner, Ilse Unterdörfer ek Elfriede Löhr. * En zour resepsyonnis kot lotel ti kriy mwan e dir ki i annan de madanm deor dan loto e ki zot ti anvi koz avek mwan. Mon ti en pti pe konfize akoz mon pa ti konn zot. Me mon ti al deor pour konnen lekel zot. Pli tar, mon ti aprann ki zot ti bann Temwen ki ti’n anmenn piblikasyon Lalmanny ki ti’n ganny enterdi, avan Dezyenm Lager Mondyal kan zot ti anba bann Nazi. Menm avan lager ti konmanse, zot ti’n ganny arete par lapolis sekre Lalmanny (Gestapo) e ganny anvoye kan konsantrasyon Lichtenburg. Apre, pandan lager, zot ti ganny anvoye dan en kan Ravensbrück, o bor Berlen.

Sa bann ser ti apepre menm laz avek mon manman, alor mon ti sirman annan respe pour zot. Sanmenm sa ki mon pa ti anvi gat zot letan pour fer bann diskisyon avek zot pandan detrwa semen oubyen mwan apre pour dir zot ki mon pa anvi kontinyen. Alor mon ti demann zot si zot ti zis kapab donn mwan en lalis bann verse Labib lo sa doktrin Katolik siksesyon bann zapot. Mon  ti dir zot ki mon ti pou anmenn sa kot en pret e diskit avek li. Mon ti krwar ki apre mon ti pou vwar laverite.

APRANN KONSERNAN SA VRE BONDYE SEN DAN LESYEL

Lansennyman Katolik Romen lo siksesyon bann zapot i dir ki depi zapot Pyer in toultan annan en siksesyon bann lepap ki pa’n zanmen ganny enteronpe. (Legliz i mal enterpret parol Zezi dan Matye 16:18, 19.) Larelizyon Katolik i osi dir ki lepap pa zanmen mal dan son bann doktrin kan i koz ex cathedra oubyen dan zot fonksyon. Mon ti krwar sa e mon ti krwar ki si lepap, ki bann Katolik i apel Papa Sen, pa zanmen mal dan bann doktrin ki zot ansennyen konmkwa ki Trinite i vre, alor i bezwen vre. Me si i kapab mal, alor sa doktrin i kapab pa vre. I pa drol alor ki pour bokou Katolik sa lansennyman lo siksesyon bann zapot i sa enn ki pli enportan, vi ki tou lezot doktrin Katolik i depan lo la.

Kan mon ti vizit pret, i pa ti kapab reponn mon bann kestyon, me i ti donn mwan en liv baze lo bann doktrin Katolik ki ti koz lo siksesyon bann zapot. Mon ti al avek dan lakour parey i ti sizere, mon ti lir li e retourn kot li avek plis kestyon. Finalman, sa pret pa ti kapab reponn mon bann kestyon, alor i ti dir: “Mon pa kapab konvenk ou e ou pa kapab konvenk mwan. . . . Mon swet ou bonn sans!” I ti nepli anvi diskit nanryen avek mwan.

Aprezan, mon ti pare pour etidye Labib avek Ilse ek Elfriede. Zot ti ansenny mwan bokou konsernan Zeova, sa vre Papa Sen dan lesyel. (Zan 17:11) Dan sa letan ti napa en kongregasyon dan sa rezyon, alor sa de ser ti kondwir bann renyon dan lakaz en fanmir ki ti enterese. Zis detrwa dimoun ki ti asiste. Sa bann ser ti diskit laplipar lenformasyon avek kanmarad, vi ki i ti napa okenn frer batize pour dirize. Par ler, en frer sorti dan en lot landrwa ti pou vin fer en diskour piblik dan en landrwa ki nou ti lwe.

KONMANS PRESE

Ilse ek Elfriede ti konmans etidye Labib avek mwan an Oktob 1958 e mon ti batize trwa mwan pli tar, an Zanvye 1959. Avan ki mon ti batize, mon ti demann zot si mon kapab al avek zot portanport pour vwar zis ki mannyer travay predikasyon ti ganny fer. (Akt 20:20) Apre ki mon ti’n al avek zot pour premye fwa, mon ti demann zot si mon kapab annan mon prop teritwar pour prese. Zot ti donn mwan en vilaz e mon ti al prese mon tousel portanport e osi fer bann retourn vizit kot bann ki enterese. Sa premye frer ki mon ti akonpannyen dan predikasyon ti en sirveyan rezyonal ki ti vizit nou pli tar.

An 1960, apre ki mon ti’n fini mon lekol pour lotel, mon ti retourn dan lavil kot mon ti ne pour esey ed mon fanmir pour konn laverite dan Labib. Menm ziska aprezan, napa ni enn ki’n vin dan laverite, me serten pe montre lentere.

EN LAVI DAN SERVIS A PLEN TAN

An 1961 bann let sorti kot biro brans ti ganny lir dan bann kongregasyon pour ankouraz bann frer ek ser pour pran servis pionye. Mon ti en selibater e an bonn sante, alor mon ti panse ki mon ti napa okenn leskiz pour pa fer servis pionye. Mon ti koz avek sirveyan rezyonal, Kurt Kuhn, pour demann li ki i panse si mon travay zis detrwa mwan pour mon kapab aste en loto ki ti pou itil pour mwan fer pionye. Ki i ti dir? “Eski Zezi ek bann zapot ti bezwen en loto pour fer servis a  plen tan?” Sanmenm sa ki mon ti bezwen tande pour pran en desizyon! Mon ti deside pour konmans fer servis pionye osito posib. Me vi ki mon ti travay 72 erdtan sak semenn dan en restoran dan en lotel, mon ti bezwen fer serten sanzman avan.

Mon ti demann mon bourzwa si i ti pou kapab les mwan travay 60 erdtan. I ti dakor avek sa e i ti pey mwan menm lapey. En pti pe pli tar, mon ti demann li si mon ti kapab travay zis 48 erdtan par semenn. I ti dakor avek sa e i ti pey mwan menm parey. Apre mon ti demande pour mon kapab travay zis 36 erdtan par semenn oubyen 6 erdtan pour 6 zour e i ti osi dakor avek sa. Mon ti sirprann akoz mon ti ankor pe ganny menm lapey. I ti paret ki mon bourzwa pa ti oule mon aret travay pour li. Avek sa progranm, mon ti konmans fer servis pionye ordiner. Sa lepok, bann pionye ti bezwen fer 100 erdtan sak mwan.

Kat mwan pli tar, mon ti ganny apwente konman en pionye spesyal e serviter kongregasyon dan en pti kongregasyon dan provens Carinthia dan lavil Spittal an der Drau. Sa bann letan, en pionye spesyal ti bezwen fer 150 erdtan sak mwan. Mon ti napa en konpanyon servis, me mon ti apresye led ki mon ti gannyen dan predikasyon avek en ser ki ti apel Gertrude Lobner, ki ti pe servi konman asistan serviter kongregasyon. *

BANN NOUVO RESPONSABILITE

An 1963, mon ti ganny envite pour vin sirveyan rezyonal. Parfwa mon ti vwayaz dan tren an pasan dan en kongregasyon enn apre lot avek bann valiz lour. Laplipar frer ti napa en loto, alor ti napa personn pour vin zwenn mwan kot stasyon tren. Pour mwan pa fer vantar mon pa ti anvi pran en taksi pour al ziska kot sa lakaz ki mon ti pou reste, alor mon ti marse ziska laba.

An 1965, mon ti ankor selibater e mon ti ganny envite pour asiste 41 tyenm laklas Lekol Gilead. Bokou parmi bann ki ti asiste sa lekol ti osi selibater. Mon ti sirprann ki pandan graduation mon ti ganny anvoye dan mon pei natal, Lotris, pour kontinyen servi konman sirveyan rezyonal. Par kont, avan ki mon ti kit Leta-z-ini, mon ti ganny demande pour akonpanny en sirveyan rezyonal pour kat semenn. Mon ti vreman apresye servi avek Anthony Conte, en bon frer ki ti kontan predikasyon e pres byen. Nou ti servi ansanm dan nor New York dan zanmirant Cornwall.

Kan mon ti ariv Lotris, mon ti ganny demande pour okip en rezyon kot mon ti zwenn Tove Merete, en zoli ser selibater. I ti’n grandi dan laverite depi a laz senk an. Kan bann frer i demann nou ki mannyer nou ti zwenn, nou fer fars an dizan, “Biro brans ki ti fer laranzman pour nou zwenn.” Enn an pli tar nou ti marye an Avril 1967 e nou ti ganny permet pour kontinyen dan servis rezyonal.

Son lannen apre, mon ti realize ki par labonte ekstraordiner Zeova i ti’n adopte mon konman enn son garson spirityel. Alor mon ti konmans  annan en relasyon spesyal avek mon Papa dan lesyel e osi avek tou sa bann ki dapre Romen 8:15 i “kriy: ‘Aba! Papa!’”

Mwan avek Merete nou ti kontinyen dan servis rezyonal ek distrik ziska 1976. Par ler pandan liver tanperatir ti anba zero degre e nou ti bezwen dormi dan bann lasanm kot ti napa sofaz. En zour, nou ti leve e vwar ki nou tapi ti’n red e blan akoz nou respirasyon. Finalman nou ti deside anmenn en pti sofaz elektrik avek nou pour ki nou kapab dormi aswar. Dan serten landrwa, nou ti bezwen mars dan lanez deor pour al dan lasal de ben kot i ti souvandfwa vante. Nou ti osi napa en apartman pour nou servi, alor dan Lendi nou ti souvan reste dan sa menm lakaz kot nou ti’n reste ladan pandan lasemenn. Apre, Mardi bomaten nou ti al dan lot kongregasyon.

Mon kontan ki tou sa bann lannen, mon madanm in toultan siport mwan. I zis kontan predikasyon, mon pa’n zanmen bezwen ankouraz li pour al prese. I osi kontan bann frer ek ser e i vreman enterese avek lezot. Sa in en gran led.

An 1976 nou ti ganny envite pour al servi biro brans Vienna, Lotris e mon ti ganny apwente konman en menm Konmite Brans. Sa letan, serten pei Les Lerop ti tonm anba brans Lotris e ti organiz pour bann piblikasyon ganny transporte diskretman dan sa bann pei. Frer Jürgen Rundel ti responsab sa e i ti pran linisyativ pou fer sa travay. Mon ti annan sa privilez pour travay avek li e pli tar mon ti ganny demande pour responsab travay tradiksyon dan 10 langaz pei Les Lerop. Jürgen ek son madanm Gertrude i ankor pe servi fidelman konman pionye spesyal Lalmanny. Depi 1978, biro brans Lotris ti konmans prepar bann magazin e enprim zot dan sis langaz lo en pti offset press. Nou ti osi anvoy labonnman dan bann diferan pei ki ti demande. Otto Kuglitsch ki aprezan pe servi avek son madanm Ingrid biro brans Lalmanny ti responsab sa bann zafer.

Bann frer dan Les Lerop ti osi prodwir bann piblikasyon dan zot prop pei an servan bann masin mimeograph oubyen par servi bann negatif. Kantmenm sa, zot ti bezwen led an deor zot pei. Zeova ti protez sa aktivite e kot biro brans nou ti kontan bann frer ki ti pe servi dan bann sirkonstans difisil kot sa travay ti’n ganny enterdi pour bokou lannen.

 EN VIZIT SPESYAL LAROUMANI

An 1989, mon ti annan sa privilez pour al Laroumani avek Frer Theodore Jaracz, en manm Konsey Direkter. Sa vizit ti annan pour bi ed en gran group frer pour rezwenn avek lorganizasyon. Depi 1949, zot ti’n aret asosye avek lorganizasyon pour diferan rezon e form zot prop kongregasyon. Me, zot ti kontinyen prese e batiz bann dimoun. Zot ti osi al dan prizon akoz zot pa ti pran okenn kote dan bann zafer politik, zis parey bann frer ki ti form parti sa lorganizasyon ki ti ganny aprouve par biro prensipal. Nou travay ti ankor enterdi Laroumani, alor nou ti zwenn an kasyet dan lakaz Frer Pamfil Albu avek kat ansyen e bann reprezantan ki ti’n ganny aprouve par Komite Pei Laroumani. Nou ti osi anmenn en enterpret avek nou sorti Lotris, ki ti apel Rolf Kellner.

Lo dezyenm swar sa diskisyon, Frer Albu ti persyad sa kat ansyen ki ti avek li pour zwenn avek nou ler i ti dir: “Si nou pa fer li la, i kapab ki nou pa zanmen ganny sa sans ankor.” Apre sa, apepre 5,000 frer ti retourn dan lorganizasyon. Pa sa ti en laviktwar pour Zeova e en kalot dan figir Satan!

Ver lafen 1989, avan ki Kominis ti ganny retire dan Les Lerop, Konsey Direkter ti envit mwan ek mon madanm pour transfer e vin biro prensipal New York. Sa ti en gro sirpriz pour nou. Nou ti al servi Betel Brooklyn an Zilyet 1990. An 1992 mon ti ganny apwente pour ede dan Konmite Servis Konsey Direkter e depi Zilyet 1994 mon’n annan sa privilez pour servi lo Konsey Direkter.

REFLESIR LO LEPASE E MAZIN LAVENIR

I fer en bon pe letan depi ki mon ti en server dan en lotel. Konmela mon annan sa privilez pour ede prepar e donn sa nouritir spirityel nou bann frer ek ser dan lemonn antye. (Mat. 24:45-47) Kan mon mazin sa plis ki 50 an dan servis spesyal a plen tan, mon zis kapab eksprim mon gran lapresyasyon ek lazwa pour benediksyon Zeova lo nou bann frer ek ser dan lemonn antye. Mon kontan pour asiste nou bann lasanble enternasyonal kot lanfaz i lo aprann lo Zeova, nou Papa dan lesyel e bann laverite sorti dan Labib.

Mon priye ki plizyer milyon lezot dimoun pou etidye Labib, aksepte laverite e servi Zeova ansanm avek nou bann frer ek ser dan lemonn antye. (1 Pyer 2:17, NW; not.) Mon pe esper avek pasyans kan mon pou dan lesyel e vwar bann ki pe resisite lo later e pour a lafen de fen vwar mon papa ganny resisite. Mon swete ki mon papa, mon manman ek lezot mon bann fanmir pros pou anvi ador Zeova dan Paradi.

[Not anba lo paz]

[Ekstre lo paz 22]

Mon pe esper avek pasyans kan mon pou dan lesyel e vwar bann ki pe resisite lo later e pour a lafen de fen vwar mon papa ganny resisite

[Portre lo paz 17]

Ler mon ti en zenn garson

[Portre lo paz 18]

Rudi Tschiggerl en kwizinyen patisye ti sa premye dimoun pour pres avek mwan

[Portre lo paz 19]

Ilse Unterdörfer ek Elfriede Löhr ti konmans etidye Labib avek mwan an 1958

[Portre lo paz 17]

Dan mon 20 an

[Portre lo paz 20]

Zour nou maryaz

[Portre lo paz 21]

Lotris, mon ti kapab fer diferan form temwannyaz, enkli pres lo semen

[Portre lo paz 22]

Avek mon madanm Brooklyn, New York