Eski ou pe ganny “manze kan i ler”?

NOU pe viv dan sa letan pli difisil dan listwar imen. (2 Tim. 3:1-5) Nou lanmour pour Zeova e nou determinasyon pour viv annakor avek son bann standar drwat i ganny teste tou le zour. Zezi ti konnen davans ki i ti pou annan sa letan difisil e i ti asir son bann disip ki zot ti pou ganny lankourazman ki zot ti bezwen pour andire ziska lafen. (Mat. 24:3, 13; 28:20) Pour fortifye zot, i ti apwent en lesklav fidel pour donn zot “manze [spirityel] kan i ler.”​—Mat. 24:45, 46.

Depi ki sa lesklav fidel ti ganny apwente an 1919, plizyer milyon “lezot serviter” dan tou langaz in ganny reini dan lorganizasyon Bondye e pe ganny nouri spirityelman. (Mat. 24:14; Rev. 22:17) Par kont, napa menm kantite piblikasyon ki disponib dan tou langaz e pa tou dimoun ki annan akse avek nou bann piblikasyon ki dan laform elektronik. Par egzanp, bokou dimoun napa bann video ek lartik ki ganny pibliye zis lo jw.org. Eski sa i vedir ki serten i mank sa manze spirityel ki zot bezwen pour reste an bonn sante spirityelman? Pour tonm lo sa bon konklizyon, annou vwar larepons kat kestyon enportan.

 1. Ki sa zengredyen prensipal dan sa manze spirityel ki Zeova i donnen?

Kan Satan ti esey tant Zezi pour fer ros vin dipen, Zezi ti reponn: “Zonm pa viv zis lo dipen tousel me lo tou parol ki sorti dan labous Bondye.” (Mat. 4:3, 4) Parol Zeova in ganny ekrir dan Labib. (2 Pyer 1:20, 21) Alor, Labib i sa zengredyen prensipal dan nou manze spirityel.​—2 Tim. 3:16, 17.

Lorganizasyon Zeova in fer ki nou ganny New World Translation of the Holy Scriptures antye ouswa en serten parti dan plis ki 120 langaz e sak lannen i pe ganny tradwir dan lezot langaz ankor. An plis ki sa tradiksyon Labib, plizyer bilyon kopi lezot tradiksyon Labib i disponib an antye oubyen en serten parti, dan plizyer milye langaz. Tou sa ki’n ganny akonpli i an armoni avek lavolonte Bondye ki “tou [“sort kalite,” NW] dimoun i ganny sove e ganny konnesans laverite.” (1 Tim. 2:3, 4) Vi ki “napa nanryen ki kasyet devan [Zeova],” nou kapab asire ki i pou fer bann ki “konsyan zot bezwen spirityel” apros avek son lorganizasyon e donn zot manze spirityel.​—Ebr. 4:13; Mat. 5:3, NW 6; Zan 6:44; 10:14.

2. Ki rol nou bann piblikasyon i zwe pour donn manze spirityel?

Pour en dimoun devlop lafwa for, i bezwen fer plis ki lir Labib. I bezwen konpran sa ki i lir e aplik sa ki i aprann. (Zak 1:22-25) En Etyopyen dan premye syek ti apresye sa laverite. I ti pe lir Parol Bondye kan Filip en evanzelizater ti demann li: “Eski ou konpran sa ki ou pe lir?” Sa Etyopyen ti reponn: “Ki mannyer mon kapab konpran si personn pa eksplik mwan.” (Akt 8:26-31) Filip ti ed sa Etyopyen ganny konnesans egzakt lo Parol Bondye. Sa Etyopyen ti ganny touse en kantite avek sa ki i ti’n aprann ki i ti deside pour batize. (Akt 8:32-38) Pareyman, nou bann piblikasyon baze lo Labib in ed nou ganny konnesans egzakt lo laverite. Nou leker ti touse e sa ti motiv nou pour aplik sa ki nou’n aprann.​—Kol. 1:9, 10.

Atraver bann piblikasyon, bann serviter Zeova i ganny bokou keksoz spirityel pour bwar e manze. (Iza. 65:13) Par egzanp, Latour Veyer ki disponib dan plis ki 210 langaz, i eksplik bann profesi Labib, ogmant nou konprenezon lo bann laverite profon e motiv nou pour viv dapre bann prensip Labib. Magazin Awake! ki ganny pibliye dan apepre 100 langaz i ogmant nou konnesans lo kreasyon Zeova e montre nou ki mannyer nou kapab aplik bann konsey Labib ki pratik. (Prov. 3:21-23; Rom. 1:20) Lesklav fidel e pridan i donn nou bann piblikasyon baze lo Labib dan plis ki 680 langaz. Eski ou met letan dekote sak zour pour lir ou Labib? Eski ou lir tou bann nouvo magazin ek tou bann nouvo piblikasyon disponib dan ou langaz ki ou gannyen sak lannen?

Apard bann piblikasyon, lorganizasyon Zeova i prepar bann plan diskour baze lo Labib ki ganny fer dan nou renyon ek lasanble. Eski ou apresye sa bann diskour, dram ek entervyou ki ganny prezante dan sa bann rasanbleman? Pa Zeova i sertennman fer ki nou ganny en festen spirityel!​—Iza. 25:6.

 3. Si napa tou bann piblikasyon dan ou langaz, eski ou pou mor lafen spirityelman?

Larepons i non. I pa devret sirprann nou ki par ler serten serviter Zeova i kapab annan plis manze spirityel ki lezot. Akoz? Annou vwar legzanp bann zapot. Zot ti ganny plis lenstriksyon ki lezot disip ti gannyen dan premye syek. (Mark 4:10; 9:35-37) Kantmenm sa, lezot disip pa ti pe mor lafen spirityelman, zot ti ganny sa ki zot ti bezwen.​—Efe. 4:20-24; 1 Pyer 1:8.

Remarke osi ki laplipar keksoz ki Zezi ti dir e fer kan i ti lo later pa’n ganny ekrir dan Levanzil. Zapot Zan ti ekrir: “Zezi in fer ankor bokou lezot keksoz. Si nou ti pou met tou an-ekri, mon mazinen ki lemonn antye pa ti pou kapab kontenir tou sa bann liv.” (Zan 21:25) Menm si bann disip Zezi dan premye syek ti annan plis lenformasyon ki nou lo Zezi sa zonm parfe, nou pa mank nanryen. Zeova in fer sir ki nou konn ase lo Zezi pour ki nou kapab swiv son legzanp.​—1 Pyer 2:21.

Mazin osi let ki bann zapot ti anvoy bann kongregasyon dan premye syek. I annan omwen en let ki Pol ti ekrir ki pa’n ganny rikorde dan Labib. (Kol. 4:16) Eski nou napa ase manze spirityel akoz nou pa’n ganny sa let? Non. Zeova i konn sa ki nou bezwen e i’n donn nou ase manze spirityel pour nou reste for spirityelman.​—Mat. 6:8.

Ozordi, serten group serviter Zeova i ganny plis manze spirityel ki lezot. Eski ou koz en langaz ki annan zis detrwa piblikasyon ki disponib? Si wi, konnen ki Zeova i enterese avek ou. Etidye bann piblikasyon ki ou annan e si i posib, asiste renyon dan en langaz ki ou konpran. Ou kapab asire ki Zeova pou fer ou reste for spirityelman.​—Ps. 1:2; Ebr. 10:24, 25.

4. Si ou napa akse avek bann piblikasyon ki ganny pibliye lo jw.org, eski ou pou vin feb spirityelman?

Lo nou sit Enternet, nou pibliy bann magazin ek lezot piblikasyon pour etidye Labib. Sa sit Enternet i osi annan bann piblikasyon ki ed bann koup, adolesan e bann ki annan pli pti zanfan. Bann fanmir i benefisye kan zot etidye sa bann piblikasyon pandan zot Ladorasyon Fanmir. An plis, nou sit Enternet i enform nou konsernan bann progranm spesyal, parey graduation lekol Gilead ek renyon annyel e i enform bann frer ek ser dan lemonn antye konsernan bann dezas natirel e bann devlopman legal ki afekte pep Zeova. (1 Pyer 5:8, 9) Nou sit Enternet i osi en bon zouti ki ede rann temwannyaz e fer sa bon nouvel disponib menm dan bann pei kot nou travay in ganny restrikte oubyen enterdi.

Par kont, ou kapab reste for spirityelman ki swa ou annan akse avek nou sit Enternet oubyen non. Lesklav fidel e pridan in travay dir pour ki ase piblikasyon in ganny enprimen pour ki tou lezot serviter i reste byen nouri spirityelman. Alor, ou pa devret santi ou oblize pour aste en lekipman elektronik zis pour ganny akse avek jw.org. I annan ki fer zot prop laranzman pour enprim en serten kantite lartik ki ganny pibliye lo nou sit Enternet pour donn avek serten ki napa akse avek Enternet, me bann kongregasyon pa ganny demande pour fer sa.

Nou rekonesan ki Zezi in gard son promes pour pran swen avek nou bann bezwen spirityel. Anmezir sa bann dernyen zour pe apros ver son lafen, nou kapab annan konfyans ki Zeova pou kontinyen donn nou “manze [spirityel] kan i ler.”

[Esktre lo paz 4]

Zeova i konn sa ki nou bezwen e i’n donn nou ase manze spirityel pour nou reste for spirityelman