Kestyon Lekter

Zezi ti dir bann Sadiseen ki bann ki resisite “pa pou ni marye ni ganny donnen an maryaz.” (Lik 20:34-36) Eski i ti pe koz konsernan rezireksyon lo later?

▪ Sa kestyon i enportan, sirtou pour bann ki’n perdi zot konzwen ki zot ti kontan. Sa bann dimoun i kapab vreman anvi remarye avek zot konzwen ki’n ganny resisite dan nouvo lemonn. En vef i dir: “Mon madanm ek mwan pa ti swazir pour ki nou nepli ansanm en zour. Nou ti vreman annan sa dezir pour ador Zeova konman msye ek madanm pour touzour. Mon bann santiman pa’n sanze.” Eski i annan bon rezon pour krwar ki sa bann ki resisite pou kapab marye? Nou zis pa kapab dir.

Pour plizyer lannen nou bann piblikasyon in dir ki parol Zezi konsernan rezireksyon ek maryaz pe tre probableman refer avek rezireksyon lo later e ki i paret ki bann ki ganny resisite dan nouvo lemonn pa pou marye. * (Mat. 22:29, 30; Mark 12:24, 25; Lik 20:34-36) Menm si nou pa san poursan sir, eski i posib ki parol Zezi pe refer avek rezireksyon dan lesyel? Annou egzamin sa ki Zezi ti dir.

Annou vwar konteks. (Lir Lik 20:27-33.) Bann Sadiseen ki pa ti krwar dan rezireksyon ti esey met Zezi dan en latrap avek en kestyon lo rezireksyon e maryaz bofrer. * Zezi ti reponn: “Bann dimoun sa monn i marye e ganny donnen an maryaz. Me sa bann ki’n ganny zize diny pou resisite, e pou viv dan sa nouvo monn, zot pa pou ni marye ni ganny donnen an maryaz. Zot pa kapab mor ankor, akoz zot parey bann lanz, e zot in vin bann zanfan Bondye, akoz zot in resisite.”​—Lik 20:34-36.

Akoz nou bann piblikasyon in dir ki probableman Zezi ti pe koz lo rezireksyon lo later? Sa konklizyon i prensipalman baze lo de rezonnman. Premyerman, i tre probab ki bann Sadiseen ti pe mazin rezireksyon lo later e Zezi ti pou’n reponn zot dapre sa. Dezyenmman, Zezi ti konklir par refer avek Abraam, Izaak ek Zakob ki ti bann patrias fidel ki pou ganny resisite lo later.​—Lik 20:37, 38.

Par kont, i paret posib ki Zezi ti pe refer avek rezireksyon dan lesyel. Kwa ki kapab fer nou tonm lo sa konklizyon? Annou egzamin de fraz prensipal.

“Sa bann ki’n ganny zize diny pou resisite.” Bann Kretyen swazir fidel ‘zot diny pour Rwayonm Bondye.’ (2 Tesa. 1:5, 11) Zot in ganny konsidere konman drwat pour ganny lavi lo baz ranson Zezi, alor zot pa mor konman bann peser. (Rom. 5:1, 18; 8:1) Zot ganny apele “byennere e beni” e zot diny pour ganny resisite dan lesyel. (Rev. 20:5, 6) O kontrer, bann ki pou ganny resisite pour viv lo later pou enkli bann “move.” (Akt 24:15) Eski nou kapab dir ki zot “diny” pour ganny resisite?

 “Zot pa kapab mor ankor.” Zezi pa ti dir: “Zot pa pou mor ankor.” Plito, i ti dir: “Zot pa kapab mor ankor.” Dan en lot tradiksyon sa fraz i ganny tradwir, “lanmor i nepli annan pouvwar lo zot.” Bann Kretyen swazir ki fini zot lavi lo later fidelman i ganny resisite dan lesyel e ganny lavi imortel, setadir lavi ki pa zanmen fini e pa kapab ganny detri. (1 Kor. 15:53, 54) Lanmor i nepli annan okenn pouvwar lo bann ki ganny resisite dan lesyel. *

Dapre sa lenformasyon ki nou’n diskite ziska aprezan, ki nou kapab dir? I posib ki parol Zezi konsernan maryaz ek rezireksyon i aplik pour rezireksyon dan lesyel. Si sa i leka, alor son parol pe dir nou plizyer keksoz konsernan bann ki ganny resisite pour viv dan lesyel: Zot pa marye, zot pa kapab mor e dan serten laspe zot parey bann lanz ki viv dan lesyel. Par kont, sa konklizyon i soulev plizyer kestyon.

Premyerman, akoz Zezi ti pou refer avek rezireksyon dan lesyel ler i ti pe reponn bann Sadiseen ki tre probab ti pe mazin rezireksyon lo later? Zezi pa ti toultan reponn son bann opozan annakor avek sa ki zot ti pe mazinen. Par egzanp, avek bann Zwif ki ti demann li en siny i ti dir: “Detri sa Tanp, e mon a rekonstri li dan trwa zour.” I tre probab ki Zezi ti konnen ki zot ti pe mazin lo sa tanp li menm, me ‘tanp ki Zezi ti pe koz lo la ti son lekor.’ (Zan 2:18-21) Petet Zezi pa ti vwar li neseser pour reponn bann Sadiseen ipokrit ki pa ti krwar dan rezireksyon oubyen legzistans lanz. (Prov. 23:9; Mat. 7:6; Akt 23:8) O kontrer, i kapab ki i ti anvi revel laverite lo rezireksyon dan lesyel pour benefisye son bann disip senser ki en zour ti pou kapab ganny sa menm rezireksyon.

Dezyenmman, akoz Zezi ti pou fini son diskisyon par refer avek Abraam, Izaak ek Zakob ki pou ganny resisite lo later? (Lir Matye 22:31, 32.) Remarke, avan ki Zezi ti koz konsernan sa bann patrias i ti dir “kot i konsern larezireksyon.” Sa fraz i kapab pe montre en sanzman dan sa diskisyon, olye refer avek rezireksyon dan lesyel, aprezan i pe refer avek rezireksyon lo later. Apre, par sit lekritir Moiz ki bann Sadiseen ti aksepte, Zezi ti servi parol ki Zeova ti dir Moiz kot sa brousay ki ti pe brile pour donn plis laprev ki rezireksyon, setadir sa enn lo later i sirman plan Bondye.​—Egz. 3:1-6.

Trwazyenmman, si parol Zezi konsernan rezireksyon ek maryaz i aplik avek rezireksyon dan lesyel, eski sa i vedir ki bann ki ganny resisite lo later pou kapab marye? Parol Bondye pa donn okenn larepons kler pour sa kestyon. Alor, si Zezi ti pe koz konsernan rezireksyon dan lesyel, son parol pa donn okenn nide konsernan si bann ki ganny resisite lo later pou kapab marye dan nouvo lemonn.

Antretan, nou konnen ki Parol Bondye i definitivman dir ki lanmor i met en lafen avek en maryaz. Alor, en vef oubyen en vev pa devret santi zot anbarase si zot deside pour remarye. Sa i en desizyon personnel e zot pa devret ganny kritike si zot anvi remarye.​—Rom. 7:2, 3; 1 Kor. 7:39.

I normal ki nou kapab annan bokou kestyon konsernan ki mannyer lavi pou ete dan nouvo lemonn. Dan plas esey mazin larepons sa bann kestyon, nou zis bezwen espere pour vwar. Me sa ki nou kapab asire se ki: Bann imen obeisan pou ere parski Zeova pou satisfer tou zot bezwen ek dezir dan sa pli bon fason posib.​—Ps. 145:16.

[Not anba lo paz]