Ki rol bann madanm dan plan Zeova?

“Bann madanm ki pe anons sa bon nouvel i en gran larme.”​—Ps. 68:11.

KI OU POU REPONN?

Ki sa rebelyon dan zarden Edenn in vedir pour msye ek madanm?

Ki mannyer bann madanm ti servi Zeova dan lepase?

Ki rol bann madanm i zwe pour pres sa bon nouvel ozordi?

1, 2. (a) Ki bann kado Bondye ti donn Adan? (b) Akoz Bondye ti donn Adan en madanm? (Vwar portre anler.)

ZEOVA ti kree later avek en bi. I’n “fer li pour dimoun reste lo la.” (Iza. 45:18) Adan sa premye imen ki Bondye ti kree ti parfe e Bondye ti donn li en zoli landrwa reste, sa ti zarden Edenn. Pa Adan ti kontan dan zarden Edenn kot i ti annan bann gran pye dibwa, bann pti larivyer pe koule ek bann zannimo pe tay taye partou! Me i ti mank en keksoz vreman enportan. Zeova ti montre kwa ki i ti manke ler i ti dir: “I pa bon pour zonm kontinyen reste li tousel. Mon pou fer en led pour li, enn ki pou al byen avek li.” Apre Bondye ti fer Adan tonm dan en profon sonmey, pran enn son kot e “kree en madanm avek sa kot.” Pa Adan ti bezwen kontan pour vwar son madanm ler i ti leve! Adan ti dir: “Lala anfen lezo sorti dan mon lezo e laser sorti dan mon laser. Sa enn pou ganny apele Madanm, akoz in ganny tire avek zonm.”​—Zen. 2:18-23.

² Kado ki Bondye ti donnen, setadir sa madanm, ti sa led parfe pour sa zonm. I ti pou osi annan sa privilez spesyal pour ganny zanfan. Anfet, “Adan ti apel son madanm Ev, parski i ti pou vin manman tou dimoun.” (Zen. 3:20; not.) Pa sa ti en zoli kado ki Bondye ti donn sa premye koup imen! Zot ti annan sa abilite pour donn nesans lezot imen parfe. Dan sa  fason, avek letan later ti pou vin en paradi ranpli avek bann dimoun parfe e zot ti pou annan kontrol lo lezot keksoz vivan.​—Zen. 1:27, 28.

3. (a) Pour ganny benediksyon Bondye, ki Adan ek Ev ti bezwen fer, me ki ti arive? (b) Ki kestyon nou pou egzaminen?

³ Pour ganny sa bann benediksyon, Adan ek Ev ti pou bezwen obeir Zeova e rekonnet son dominasyon. (Zen. 2:15-17) Zis anba sa bann kondisyon ki zot ti kapab akonpli plan ki Bondye ti annan pour zot. Me malerezman, zot ti ganny enfliyanse par Satan, “sa serpan lantikite” e fer pese kont Bondye. (Rev. 12:9; Zen. 3:1-6) Ki mannyer sa rebelyon in afekte bann madanm? Ki bann madanm fidel dan lepase in akonpli? Akoz bann madanm Kretyen denozour i kapab ganny konsidere konman “en gran larme”?​—Ps. 68:11.

REZILTA DEZOBEISANS

4. Lekel ki ti koupab pour pese sa premye koup?

⁴ Kan Adan ti ganny demande pour rann kont pour son dezobeisans, i ti donn sa leskiz ki pa valab: “Sa madanm ki ou’n donn mwan, li ki’n donn mwan fri dan sa pye dibwa, alor mon’n manze.” (Zen. 3:12) Adan pa ti zis refize aksepte responsabilite pour son pese, me i ti osi esey blanm sa madanm ki Bondye ti’n donn li e i ti menm blanm Bondye, sa Enn ki donn avek lanmour! Tou le de Adan ek Ev ti fer pese, me Adan ki ti koupab pour zot fot. Sanmenm zapot Pol ti ekrir ki “pese in antre dan lemonn par en sel zonm [Adan], e pese in anmenn lanmor.”​—Rom. 5:12.

5. Lefet ki Bondye in permet imen pour diriz zot menm pour en pe letan, ki sa in prouve?

⁵ Satan ti fer sa premye koup krwar ki zot pa ti bezwen Zeova konman zot Dirizan. Sa ti soulev en kestyon enportan: Lekel ki annan drwa dirize? Pour reponn sa kestyon enn fwa pour tou, Bondye ti permet imen pour diriz zot menm pour en pe letan. I ti konnen ki san son dominasyon imen pa ti pou reisi. Diran bann syek, sa bann fason dirize in met sosyete imen dan en pake problenm enn deryer lot. Zis dan sa dernyen syek, apepre 100,000,000 dimoun in mor dan lager e sa i enkli plizyer milyon zonm, fanm ek zanfan inosan. Alor i annan deza en ta levidans ki “i pa pour en imen ki pe marse pour diriz son lepa.” (Zer. 10:23) I pour sa rezon ki bann vre Kretyen i aksepte Zeova konman zot Dirizan.​—Lir Proverb 3:5, 6. *

6. Ki mannyer bann madanm i ganny trete dan bokou pei?

⁶ Tou le de, msye ek madanm in soufer dan sa lemonn dominen par Satan. (Ekle. 8:9; 1 Zan 5:19) Me se bann madanm ki’n sibir serten bann krim pli terib. Apepre 30 poursan madanm dan lemonn antye i dir ki zot in ganny abize par zot msye oubyen zot partner. Serten sosyete i prefer bann garson plis ki bann fiy parski zot panse zot pou grandi e annan zot prop zanfan pour protez zot desandans e pran swen avek zot paran aze ek granparan. Dan serten pei, bann fiy i ganny rezete e i annan bokou plis fiy ki garson ki ganny avorte.

7. Ki kalite konmansman Bondye ti donn tou le de msye ek madanm?

⁷ Sertennman sa bann move fason ki bann madanm i ganny trete pa fer plezir Bondye. Bondye i tret bann madanm dan en fason zis e i respekte zot. Sa i evidan lefet ki Zeova ti kree Ev parfe avek bann karakteristik ki ti fer li en zoli konpanyon pour Adan non pa en lesklav. Sa i  en rezon akoz a lafen sizyenm zour kreasyon, Bondye “ti vwar tou keksoz ki i ti’n fer e gete! i ti tre bon.” (Zen. 1:31) Wi, “tou keksoz” ki Zeova ti fer ti “tre bon.” I ti donn tou le de msye ek madanm en bon konmansman!

BANN MADANM KI TI ANNAN SIPOR ZEOVA

8. (a) Dekrir konportman laplipar imen. (b) Tou dilon listwar lekel ki Bondye in donn son laprouvasyon?

⁸ Konportman laplipar zonm ek fanm ti vin pli pir apre rebelyon dan zarden Edenn e pandan sa syek ki’n pase in vin pli pir ki zanmen oparavan. Labib ti predir ki move kondwit ti pou ogmante “dan bann dernyen zour.” I telman annan move keksoz ki imen i fer partou ki montre ki vreman nou dan bann “letan difisil.” (2 Tim. 3:1-5) Me tou dilon listwar limanite, “Souvren Senyer Zeova,” in demontre son laprouvasyon anver zonm ek fanm ki met konfyans dan li, obeir son bann lalwa e soumet avek li konman zot Dirizan.​—Lir Psonm 71:5. *

9. Ki kantite dimoun ti sirviv Deliz e akoz?

⁹ Kan Bondye ti detrir sa lemonn vyolan dan lepase atraver en Deliz dan letan Noe, pa bokou dimoun ki ti sirviv. Si bann frer ek ser Noe ti ankor vivan sa letan zot osi zot ti mor dan sa deliz. (Zen. 5:30) Me i ti annan menm kantite madanm ki msye ki ti sirviv sa Deliz. Bann sirvivan ti Noe, son madanm, son trwa garson ek zot madanm. Zot ti ganny prezerve akoz zot ti annan lakrent pour Bondye e zot ti fer son lavolonte. Sa plizyer bilyon imen ki pe viv ozordi i desandans sa wit dimoun ki ti annan sipor Zeova.​—Zen. 7:7; 1 Pyer 3:20.

10. Akoz bann madanm fidel bann patrias ti annan sipor Zeova?

¹⁰ Plizyer lannen pli tar, bann madanm fidel bann patrias ti osi ganny sipor Zeova. Sa pa ti pou leka si zot ti pe zis konplent akoz zot bann difikilte dan lavi. (Zid 16) Pran legzanp Sara, madanm Abraam. I difisil pour mazin li pe konplent zanmen fini kan zot ti pe kit zot lavil konfortab Our pour al viv dan bann latant dan en lot landrwa. O kontrer, “Sara ti obei Abraam e apel li son Senyer.” (1 Pyer 3:6) Mazin osi Rebeka, i ti en benediksyon sorti kot Zeova e en bon madanm. I pa sirprenan ki son msye Izaak “ti tonm anmoure avek li e . . . ti trouv konsolasyon apre ki i ti’n perdi son manman.” (Zen. 24:67) Pa nou kontan ki parmi nou ozordi i annan bann madanm fidel parey Sara ek Rebeka!

11. Ki mannyer de fanm saz Ebre ti demontre kouraz?

¹¹ Pandan bann lannen ki zot ti dan lesklavaz Lezip bann Izraelit ti ogmant en kantite e Faraon ti donn lord pour touy tou bann garson Ebre kan zot ne. Par kont, annou vwar ki de fanm saz Ebre, Sifra ek Poua ki tre probab ti ansarz lezot fanm saz, ti fer. Akoz zot lakrent pour Zeova, avek kouraz zot ti refize touy sa bann pti baba. Alor Zeova ti rekonpans sa de madanm par permet zot annan zot prop fanmir.​—Egz. 1:15-21.

12. Kwa ki ti remarkab konsernan Debora ek Yael?

¹² Debora en madanm ki ti profet dan letan bann ziz Izrael, ti en lot madanm ki ti annan sipor Bondye. I ti ankouraz Ziz Barak e ed bann Izraelit ki ti pe soufer ganny libere, me i ti predir ki pa Barak ki ti pou ganny laglwar pour laviktwar lo bann Kananeen. O kontrer, Bondye ti pou donn sef larme Kananeen, Sisera “dan lanmen en madanm.” Se sa ki ti  arive kan Yael, en madanm ki pa ti en Izraelit ti touy li.​—Ziz 4:4-9, 17-22.

13. Ki Labib i dir nou lo Abigail?

¹³ Abigail ti en madanm remarkab ki ti viv dan 11 syek A.N.L. I ti annan disernman, me kant a son msye Nabal, i ti brit, en nanryen ditou e bet. (1 Sam. 25:2, 3, 25) David avek son bann zonm ti protez bann byen Nabal pour en serten letan, me ler zot ti demann bann provizyon, “i ti ensilte zot” e i pa ti donn zot nanryen. Sa ti fer David sitan ankoler ki i ti deside pour al touy Nabal avek son bann zonm. Kan Abigail ti tann sa, i ti anmenn manze ek keksoz pour bwar pour David avek son bann zonm e sa ti evite ki i annan versman disan. (1 Sam. 25:8-18) Pli tar David ti dir li: “Loue Zeova Bondye Izrael ki’n anvoy ou ozordi pour rankontre mwan!” (1 Sam. 25:32) Apre ki Nabal ti mor, David ti marye avek Abigail.​—1 Sam. 25:37-42.

14. Ki travay bann fiy Saloum ti fer e ki mannyer bann madanm Kretyen pe fer parey ozordi?

¹⁴ Bokou msye, madanm ek zanfan ti mor kan larme Babilonnyen ti detri Zerizalenm ek son tanp lannen 607 A.N.L. Miray lavil Zerizalenm ti ganny rekonstri lannen 455 A.N.L. anba gidans Neemya. Parmi bann ki ti ede pour rekonstri sa miray ti bann fiy Saloum, en prens ki ti okip lanmwatye Zerizalenm. (Nee. 3:12) Zot ti volonterman fer bann pti travay. Pa nou apresye sa kantite madanm Kretyen ki siport bann proze konstriksyon avek lazwa dan plizyer fason ozordi!

BANN MADANM FIDEL DAN PREMYE SYEK

15. Ki privilez Bondye ti donn en madanm ki ti apel Mari?

¹⁵ En pe letan avan e pandan premye syek N.L., Zeova ti beni plizyer madanm avek bann bon privilez. Enn parmi zot ti en vyerz ki ti apel Mari. Kan i ti’n fiyanse avek Zozef, i ti konsevwar en zanfan dan en fason mirakile atraver lespri sen. Akoz Bondye ti swazir li pour vin manman Zezi? San dout, akoz i ti annan bann kalite spirityel ki ti neseser pour pran swen avek son zanfan parfe ziska ki i vin adilt. Pa i ti en privilez pour vin manman sa pli gran zonm ki’n deza viv lo later!​—Mat. 1:18-25.

16. Donn en legzanp ki montre ki latitid Zezi ti annan anver bann madanm.

¹⁶ Zezi ti vreman zantiy avek bann madanm. Par egzanp, annou vwar legzanp en madanm ki ti annan lemorazi pour 12 an. I ti vin par deryer Zezi dan en lafoul e tous son lenz. Dan plas reprimann li, Zezi ti dir dan en fason zantiy: “Ma-fiy ou lafwa in sov ou, al an-pe, e ganny delivre avek ou maladi.”​—Mark 5:25-34.

17. Ki levennman mirakile ti arive zour Lapannkot 33 N.L.?

¹⁷ Serten madanm ki ti bann disip Zezi ti ed li ek son bann zapot. (Lik 8:1-3) Zour Lapannkot 33 N.L., apepre 120 msye e osi bann madanm ti ganny lespri sen Bondye dan en fason spesyal. (Lir Akt 2:1-4.) Sa ti’n ganny predir dan sa parol: “Mon [Zeova] pou vers mon lespri sen lo tou kalite dimoun e ou bann garson ek fiy pou profetize. . . Menm lo bann lesklav zonm ek bann lesklav madanm mon pou vers mon lespri sen.” (Yoel 2:28, 29) Par sa levennman mirakile zour Lapannkot, Bondye ti montre ki i ti’n rezet nasyon Izrael ki ti’n vin aposta e donn son laprouvasyon “Izrael Bondye.” Tou le de msye ek madanm i form parti Izrael Bondye. (Gal. 3:28; 6:15, 16, NW) Sa kat fiy Filip ki ti en evanzelizater ti parmi bann madanm Kretyen ki ti prese dan premye syek.​—Akt 21:8, 9.

 “EN GRAN LARME” MADANM

18, 19. (a) Konsernan vre ladorasyon, ki privilez Bondye in donn tou le de msye ek madanm? (b) Ki mannyer sa psalmis ti refer avek bann madanm ki anons sa bon nouvel?

¹⁸ Ver lafen bann lannen 1800, detrwa msye ek madanm ti demontre bokou lentere pour vre ladorasyon. Zot ti prepar semen pour bann ki aprezan pe partisip dan lakonplisman profesi Zezi ki dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”​—Mat. 24:14.

¹⁹ Ozordi sa pti group Etidyan Labib in agrandi pour vin plis ki 8,000,000 Temwen pour Zeova. Plis ki 11,000,000 lezot ankor i montre lentere dan Labib ek nou travay par asiste Memoryal lanmor Zezi ki ganny fer tou le-z-an. Dan laplipar pei lamazorite bann ki asiste i bann madanm. An plis, parmi sa plis ki 1,000,000 serviter a plen tan dan lemonn antye, lamazorite i bann madanm. Byensir Bondye in donn bann madanm fidel sa privilez pour akonpli parol sa psalmis: “Zeova i donn sa konmann, bann madanm ki pe anons sa bon nouvel i en gran larme.”​—Ps. 68:11.

BENEDIKSYON KI BANN MADANM FIDEL POU GANNYEN

20. Ki bann proze letid ki nou merit egzaminen?

²⁰ I annan sitan bokou legzanp bann madanm fidel dan Labib ki nou pa pou kapab fini koz lo la. Me nou tou nou kapab lir lo zot dan Parol Bondye e dan bann lartik ki ganny pibliye dan nou bann piblikasyon. Par egzanp, nou kapab medit lo fidelite Rit. (Rit 1:16, 17) Kan nou lir sa liv ki port non Larenn Ester dan Labib ek bann lartik lo li, sa i kapab ranforsi nou lafwa. Nou kapab benefisye atraver sa bann kalite proze letid ki kapab ganny fer dan Ladorasyon Fanmir. Si nou reste tousel, nou kapab egzamin sa bann topik dan nou letid personnel.

21. Ki mannyer bann madanm fidel in montre zot devosyon anver Zeova dan bann moman difisil?

²¹ San dout Zeova i beni travay predikasyon ki bann madanm Kretyen pe fer e siport zot dan bann moman difisil. Par egzanp, avek son led bann madanm fidel ti gard zot lentegrite anba dominasyon Nazi e Kominis kan bokou parmi zot ti soufer kot menm serten ti perdi zot lavi akoz zot lobeisans pour Bondye. (Akt 5:29) Ozordi parey dan lepase, nou bann ser ansanm avek tou lezot adorater Bondye i siport souvrennte Bondye. Annefe, parey bann Izraelit dan lepase, Zeova i tyonbo zot lanmen drwat e dir: “Pa bezwen per. Mon pou ed ou.”​—Iza. 41:10-13.

22. Ki privilez nou kapab enpasyan pour gannyen dan lavenir?

²² Byento bann msye ek madanm fidel pou fer later vin en paradi e ed plizyer milyon dimoun ki resisite pour aprann konsernan plan Zeova. Ziska ki sa i arive, ki swa msye oubyen madanm, annou apresye nou privilez pour servi Bondye “zepol kont zepol.”​—Tsef. 3:9.

[Not anba lo paz]

[Kestyon]

[Portre lo paz 10]

Bann madanm ki anons sa bon nouvel i vreman “en gran larme” (Vwar paragraf 18, 19)