Lafason ki Zeova i apros avek nou

“Apros avek Bondye, e i ava apros avek zot.”​—ZAK 4:8.

KI MANNYER OU SANTI KONSERNAN . . .

lenvitasyon Zeova pour apros avek li?

ranson ki Bondye in donnen?

lafason ki Parol Bondye in ganny ekrir pour ki nou kapab konpran?

1. Kwa ki en nesesite pour bann imen e lekel ki kapab satisfer sa?

I NESESER pour imen santi zot pros avek kanmarad. Dapre en diksyonner, sak dimoun i “pros avek kanmarad kan zot kontan kanmarad en kantite e konn kanmarad tre byen.” Nou kontan relasyon ki nou annan avek nou fanmir ek zanmi ki kontan, apresye e konpran nou. Par kont, sa Enn ki nou bezwen devlop sa relasyon pli pros avek i nou Gran Kreater.​—Ekle. 12:1.

2. Ki Zeova i promet nou, me akoz bokou dimoun pa krwar dan sa promes?

² Dan son Parol, Zeova i ankouraz nou pour “apros avek” li e si nou fer sa, i promet ki “i ava apros avek” nou. (Zak 4:8) Pa i en lazwa pour konn sa! Me bokou dimoun i vwar ki i pa fer sans pour krwar ki Bondye i anvi apros avek zot, zot santi ki zot pa diny pour apros li oubyen ki i tro lwen avek zot. Eski i vreman posib pour vin pros avek Zeova?

3. Ki nou devret realize konsernan Zeova?

³ An realite Zeova “pa lwen avek sakenn parmi nou” ki anvi trouv li e i posib pour konn li. (Lir Akt 17:26, 27; Psonm 145:18. *) Nou Bondye i anvi ki menm bann imen enparfe i vin  pros avek li e i pare e anvi aksepte zot konman son bann zanmi pros. (Iza. 41:8; 55:6) Atraver son prop leksperyans, sa psalmis ti kapab ekrir sa konsernan Zeova: “Ou, sa Enn ki ekout lapriyer, tou kalite dimoun pou vin ver ou. Byennere sa enn ki ou swazir e fer aprose.” (Ps. 65:2, 4) Sa resi Labib konsernan Lerwa Aza ki ti sorti Zida i donn nou en bon legzanp en dimoun ki ti apros avek Bondye e i montre ki mannyer Zeova ti reazir. *

APRANN ATRAVER EN LEGZANP DAN LEPASE

4. Ki legzanp Lerwa Aza ti kite pour pep Zida?

⁴ Lerwa Aza ti demontre son devouman pour vre ladorasyon ler i ti tir bann prostitye dan tanp ek bann zidol ki ti annan dan sa pei. (1 Rwa. 15:9-13) Lefet ki Aza li menm ti’n apros avek Bondye e obei son bann lalwa, i ti kapab ankouraz sa pep pour “rod Zeova, Bondye zot bann zanset e pour obei Lalwa ek son komannman.” Gras a benediksyon Zeova, i ti annan en lape konplet pandan sa premye di-z-an ki Aza ti rennyen. Lekel ki Aza ti donn loner pour sa bann moman lape? I ti dir lepep: “Nou ankor annan nou pei akoz nou’n rod Zeova nou Bondye. Nou’n rode e i’n donn nou repo partou kote.” (2 Kron. 14:1-7) Annou vwar ki ti arive apre.

5. Dan ki sityasyon Aza ti demontre ki i ti depan lo Bondye e avek ki rezilta?

⁵ Met ou dan plas Aza. Zera sa Etyopyen in vin kont Zida avek 1,000,000 zonm ek 300 saret. (2 Kron. 14:8-10) Ki ou ti pou fer si ou vwar sa gran larme pe vin atak ou rwayonm? Dan ou larme i annan zis 580,000 zonm! Zot annan apepre 2 zonm pour 1 zonm dan ou larme, eski ou ti pou mazinen akoz Bondye pe les zot vin atak ou rwayonm? Dan sa sityasyon, eski ou ti pou esey rezourd sa problenm dapre ou prop lasazes? Lafason ki Aza ti azir ti demontre son relasyon pros avek Zeova e son konfyans dan li. I ti kriye: “Ed nou O Zeova nou Bondye akoz nou pe kont lo ou e i lo ou non ki nou pe vin kont sa lafoul. O Zeova ou nou Bondye. Pa les zonm ganny laviktwar lo ou.” Ki ti reaksyon Bondye anver demann ki Aza ti fer avek tou son leker? “Zeova ti ganny laviktwar lo bann Etyopyen.” I ti napa ni menm en lennmi ki ti sirviv sa batay!​—2 Kron. 14:11-13.

6. Ki mannyer nou devret imit Aza?

⁶ Akoz Aza ti annan konfyans total dan gidans Bondye ek son proteksyon? Labib i dir ki “Aza ti fer sa ki byen dan lizye Zeova” e ki son “leker . . . ti tou pour Zeova.” (1 Rwa. 15:11, 14) Nou osi tou nou bezwen servi Bondye avek tou nou leker. I absoliman neseser ki nou fer sa si nou oule annan en relasyon pros avek li la konmela e dan lavenir. Pa nou kapab apresye ki Zeova in pran linisyativ pour fer nou apros avek li e ed nou devlop e gard en relasyon pros avek li! Annou vwar de fason ki Bondye in fer sa.

ZEOVA IN FER NOU APROS AVEK LI ATRAVER RANSON

7. (a) Ki Zeova in fer ki fer nou apros avek li? (b) Ki fason pli enportan Bondye i fer nou apros avek li?

⁷ Zeova ti demontre son lanmour pour lafanmir imen ler i ti kree nou zoli later pour nou reste lo la. I ankor pe demontre son lanmour pour nou par soutenir nou lavi atraver bann provizyon fizik ki merveye. (Akt 17:28; Rev. 4:11) Sa ki pli enportan se ki Zeova i pran swen avek nou bezwen spirityel. (Lik 12:42) I osi asir nou ki i ekout nou lapriyer li  menm. (1 Zan 5:14) Par kont, fason pli enportan ki Bondye i fer nou vin pros avek li e ki nou ganny atire anver li, se par lanmour ki i demontre par mwayen sa ranson. (Lir 1 Zan 4:9, 10, 19.) Zeova ti anvoy “son sel Garson” lo later pour ki nou ganny delivre dan pese ek lanmor.​—Zan 3:16.

8, 9. Ki rol Zezi i zwe dan plan Zeova?

⁸ Zeova in fer li posib ki menm bann dimoun ki ti viv avan letan Kris i kapab benefisye atraver sa ranson. Dek ki Zeova ti’n profetiz konsernan en Sover ki ti pou vini pour sov limanite, pour li, i ti konmsi sa ranson ti’n fini ganny peye akoz i ti konnen ki son plan ti pou sirman ganny akonplir. (Zen. 3:15) Plizyer syek pli tar, zapot Pol ti eksprim son lapresyasyon avek Bondye pour “Kris Zezi ki’n delivre zot.” Pol ti azoute: “Bondye . . . dan letan pase in montre pasyans, e i pa’n pini zonm pour zot pese.” (Rom. 3:21-26) Pa Zezi i zwe en rol vreman enportan pour nou vin pros avek Bondye!

⁹ I selman atraver Zezi ki bann dimoun ki annan limilite i kapab konn Zeova, vin pros avek li e annan en relasyon entim avek li. Ki mannyer Labib i montre sa? Pol ti ekrir: “Bondye in prouv son lanmour pour nou: Kan nou ti ankor peser, Kris in mor pour nou.” (Rom. 5:6-8) Zeova in donn Zezi konman en sakrifis, pa akoz nou merite, me akoz i kontan nou. Zezi ti dir: “Personn pa kapab vin kot mwan, si mon Papa ki’n anvoy mwan, pa atir li.” En lot fwa i ti dir: “Personn pa kapab ariv kot mon Papa san pas par mwan.” (Zan 6:44; 14:6) Zeova i servi son lespri sen pour fer nou apros avek li atraver Zezi e i ed nou pour reste dan Son lanmour avek lespwar pour ganny lavi eternel a lavenir. (Lir Zid 20, 21.) Annou vwar en lot fason ki Zeova i fer nou apros avek li.

ZEOVA I FER NOU APROS AVEK LI ATRAVER LABIB

10. Ki Labib i ansenny nou ki ed nou vin pli pros avek Bondye?

¹⁰ Ziska aprezan dan sa lartik, nou’n sit bann verse sorti dan 14 diferan liv Labib. San Labib, ki mannyer nou ti pou’n konnen ki nou kapab vin pros avek nou Kreater? San Labib, ki mannyer nou ti pou’n aprann konsernan ranson e ki nou pe ganny atire ver Zeova atraver Zezi? Atraver son lespri sen, Zeova in enspir bann zonm pour ekrir Labib ki montre nou son zoli personnalite e osi son plan merveye. Par egzanp, dan Egzod 34:6, 7, Zeova i dekrir li menm avek Moiz konman “en Bondye ki annan mizerikord ek konpasyon, ki pa ankoler vitman e ki annan en kantite lanmour fidel ek laverite, i pe demontre lanmour fidel pour plizyer milye, pardonn fot, lofans ek pese.” Lekel ki pa ti pou ganny atire ver en dimoun koumsa? Zeova i konnen ki pli nou aprann konsernan li atraver Labib, pli i pou vin reel pour nou e nou pou santi pli pros avek li.

11. Akoz nou bezwen fer zefor pour aprann lo bann kalite Bondye ek son fason fer? (Vwar portre lo paz 16.)

¹¹ Pour eksplike ki mannyer nou kapab ganny en pli bon lanmitye avek Bondye, lentrodiksyon dan liv Apros avek Zeova i dir: “Dan nenport lanmitye ki nou devlope, sa relasyon i baze lo konn sa dimoun, admir e apresye son bann kalite ki i annan. Alors, bann kalite Bondye ek lafason ki i azir, parey i ganny revele dan Labib, i bann size enportan pour etidye.” Alor, pa nou devret apresye ki Zeova in fer son Parol ganny ekrir dan en fason ki nou imen nou kapab konpran!

12. Akoz Zeova ti servi bann imen pour ekrir Labib?

 ¹² Zeova ti’n kapab fer bann lanz ekrir Labib. Apre tou, zot vreman enterese avek nou e dan nou bann aktivite. (1 Pyer 1:12) San dout, bann lanz ti’n kapab ekrir mesaz Bondye pour limanite. Me eski zot ti pou’n vwar keksoz parey bann imen? Eski zot ti pou’n kapab konpran nou bann bezwen, febles ek dezir? Non, Zeova ti konn zot limit. I pli fasil pour nou konpran Labib akoz bann imen ki’n ekrir. Nou kapab konpran fason panse ek santiman bann ekriven Labib e lezot ki’n ganny mansyonnen dan Labib. Nou kapab konpran zot bann dezapwentman, dout, lafreyer ek lenperfeksyon e osi zot lazwa ek sikse. Parey profet Eliya, tou bann ekriven Labib “ti annan menm natir ki nou.”​—Zak 5:17.

13. Ki mannyer lapriyer Yona i tous ou leker?

¹³ Par egzanp, mazinen si en lanz ti pou’n kapab eksprim sa santiman ki Yona ti annan kan sa profet ti sove pour pa akonpli sa misyon ki Bondye ti’n donn li. Pa i ti pli byen ki Zeova ti fer Yona ekrir son prop resi, enkli son lapriyer senser anver Bondye ler i ti dan fon lanmer! Yona ti dir: “Kan mon ti pe mor, Zeova ti sa Enn ki mon ti mazinen.”​—Yona 1:3, 10; 2:1-9.

14. Akoz ou kapab konpran sa ki Izai ti ekrir lo li menm?

¹⁴ Mazin osi sa ki Zeova ti fer Izai ekrir lo li menm. Apre ki sa profet ti’n vwar en vizyon laglwar Bondye, i ti ganny motive pour dir sa konsernan son prop lenperfeksyon: “Maler pour mwan! I konmsi mon’n mor, akoz mon en zonm ki annan lalev sal e mon reste parmi en pep ki annan lalev sal, parski mon lizye in vwar Lerwa, Zeova bann larme li menm!” (Iza. 6:5) Eski en lanz  ti pou’n kapab dir sa bann parol lo li menm? Me Izai ti kapab e nou kapab konpran ki mannyer i ti santi.

15, 16. (a) Akoz nou kapab konpran sa ki lezot imen i santi? Donn bann legzanp. (b) Kwa ki pou ed nou vin pli pros avek Zeova?

¹⁵ Eski bann lanz ti pou’n kapab dir ki zot “pa merite” parey Zakob ti dir i ete oubyen “peser” parey Pyer ti konsider li menm? (Zen. 32:10; Lik 5:8) Eski zot ti pou’n “per” parey bann disip Zezi oubyen eski bann bon lanz ti pou’n bezwen “pran kouraz” kan zot ti pe fer fas avek lopozisyon pour anons bon nouvel, parey Pol ek lezot ti bezwen fer? (Zan 6:19; 1 Tesa. 2:2, NW) Non, bann lanz i parfe dan tou sans e zot annan lafors ekstraordiner. Par kont, kan en imen enparfe i eksprim sa bann lemosyon, deswit nou konpran zot santiman parski nou tou nou zis bann imen enparfe. Ler nou lir Parol Bondye, nou vreman kapab “rezoui avek sa ki dan lazwa, e pran lapenn avek sa ki dan lapenn.”​—Rom. 12:15.

¹⁶ Si nou medit lo sa ki Labib i dir konsernan lafason Zeova ti tret son bann serviter fidel dan lepase, nou pou aprann en kantite keksoz merveye konsernan nou Bondye, ki avek pasyans ek lanmour ti apros avek bann imen enparfe. Alor nou pou konn Zeova pli byen e kontan li en kantite. Sa pou fer ki nou vin pli pros avek li.​—Lir Psonm 25:14. *

DEVELOP EN LANMITYE AVEK BONDYE KI PA KAPAB KASE

17. (a) Ki bon konsey Azarya ti donn Aza? (b) Ki mannyer Aza ti inyor konsey Azarya e ki ti arive?

¹⁷ Apre ki Lerwa Aza ti ganny en gran laviktwar lo larme Etyopyen, profet Bondye Azarya ti annan bann parol saz pour dir li ek son pep. Azarya ti dir: “Zeova i avek zot osi lontan ki zot avek li e si zot rod li, i pou les zot trouv li, me si zot kit li, i pou kit zot.” (2 Kron. 15:1, 2) Me pli tar dan son lavi Aza pa ti swiv sa bon konsey. Ler Aza ti ganny menase avek zot lennmi rwayonm nor Izrael, i ti rod led avek bann Siryen. Dan plas rod led Zeova ankor enn fwa, i ti rod fer en lalyans avek bann payen. Alor Aza ti ganny dir: “Ou’n azir dan en fason bet dan sa sityasyon, alor konmansman ozordi, i pou annan lager kont ou.” Larestan lannen ki Aza ti dirize ti annan zis lager menm. (2 Kron. 16:1-9) Ki nou aprann?

18, 19. (a) Ki nou devret fer si nou’n les nou elwannyen avek Bondye? (b) Ki mannyer nou kapab vin pli pros avek Zeova?

¹⁸ Nou pa devret zanmen dekile avek Zeova. Si nou’n les nou elwannyen avek li, nou devret azir annakor avek Osea 12:6, ki dir: “Retourn kot ou Bondye, gard ou lanmour fidel ek lazistis e touzour gard lespwar dan ou Bondye.” Alor, annou touzour kontinyen vin pli pros avek Zeova par medit avek lapresyasyon lo sa ranson e par etidye o profon son Parol Labib.​—Lir Deterononm 13:4. *

¹⁹ En psalmis ti ekrir: “I bon pour mwan apros avek Bondye.” (Ps. 73:28) Nou tou annou kontinyen aprann bann nouvo keksoz lo Zeova e devlop plis lapresyasyon pour sa kantite rezon ki nou annan pour kontan li. Ki Zeova i vin pli pre avek nou la konmela e pour leternite!

[Not anba lo paz]

[Kestyon]

[Portre lo paz 19]

Ki mannyer lafason ki Zeova ti azir avek Yona ek Pyer i fer ou vin pli pros avek Li? (Vwar paragraf 13, 15)