‘Retournen e ankouraz ou bann frer’

PYER ti plere asodlarm apre ki i ti’n rennyen Zezi. Menm si sa zapot ti pou bezwen fer bokou zefor pour reganny son spirityalite, Zezi ti anvi servi li pour ed lezot. Alor, Zezi ti dir li: “Kan ou a’n retournen, ankouraz ou bann frer.” (Lik 22:32, 54-62) Pli tar, Pyer ti vin en pilye dan kongregasyon Kretyen dan premye syek. (Gal. 2:9) Pareyman, en frer ki ti’n deza servi konman en ansyen i kapab reganny sa responsabilite e trouv lazwa par fortifye bann frer ek ser spirityelman.

Serten ki ti ansyen oparavan e ki’n ganny tire i kapab santi ki zot in fel. Julio, * ki ti en ansyen Sid Lanmerik pour plis ki 20 an i dir: “Prepar bann diskour, vizit bann frer ek ser e fer vizit pastoral kot bann manm ki dan kongregasyon ti form en gran par dan mon lavi! Me zis en sel kou tousala ti disparet e kit en vid dan mon lavi. Tousala ti annan en lefe terib lo mwan.” Ozordi, Julio in reganny son privilez konman ansyen.

‘KONSIDER TOU KONMAN EN LAZWA’

Disip Zak ti ekrir: “Mon bann frer, konsider konman en lazwa, tou bann leprev ki zot bezwen pas ladan.” (Zak 1:2) Zak ti pe refer avek bann leprev ki nou gannyen atraver persekisyon e nou lenperfeksyon. I ti mansyonn bann dezir egois, fer lapreferans e lezot keksoz ankor. (Zak 1:14; 2:1; 4:1, 2, 11) Ler Zeova i disiplin nou, sa i kapab fermal. (Ebr. 12:11) Me sa bann leprev pa devret fer nou perdi nou lazwa.

Menm si nou’n perdi nou responsabilite dan kongregasyon, nou ankor annan sa loportinite pour egzamin profonder nou lafwa e demontre nou lanmour pour Zeova. Nou osi kapab reflesir lo akoz nou ti pe servi konman en ansyen.  Eski i ti pour nou prop benefis oubyen nou ti ganny motive pour ganny sa privilez akoz nou lanmour pour Bondye e nou konviksyon ki kongregasyon i pour li e merit ganny byen pran swen avek? (Akt 20:28-30) Bann frer ki ti ansyen ki kontinyen fer servis sakre avek lazwa i montre tou dimoun, enkli Satan ki zot lanmour pour Zeova i senser.

Ler Lerwa David ti ganny disiplinen akoz i ti’n komet bann pese grav, i ti aksepte disiplin e i ti ganny pardonnen. David ti sante: “Ere sa zonm ki son lofans in ganny pardonnen, sa enn ki son pese in ganny kouver. Ere sa zonm ki Zeova pa pran an kont son fot e ki pa anbet lezot.” (Ps. 32:1, 2) Disiplin ti rafin David e san dout ti fer li vin en pli bon berze pour pep Bondye.

Souvandfwa, bann frer ki reganny apwente ansyen i vin bann pli bon berze ki zot ti ete avan. En ansyen i dir: “La mon pli byen konpran ki mannyer pour pran swen avek bann ki’n fer en fot.” En lot ansyen i dir: “Aprezan mon pli apresye mon privilez pour servi bann frer ek ser.”

ESKI OU KAPAB RETOURNEN?

Sa psalmis ti ekrir: “[Zeova] pa pou toultan rod fot.” (Ps. 103:9) Alor nou pa devret krwar ki Bondye pa pou zanmen met konfyans dan en dimoun ki’n komet en fot grav. Ricardo ki ti perdi son privilez konman en ansyen apre ki i ti annan sa responsabilite pour plizyer lannen, i dir: “Mon ti vreman dezapwente avek mon fot. Pour en bon pe letan, mon pa ti santi mon alaoter e sa ti anpes mon retournen pour servi bann frer ek ser konman en ansyen. Mon pa ti krwar ki mon ti pou kapab fer zot annan konfyans dan mwan ankor. Me vi ki mon kontan ed lezot, mon ti kapab kondwir bann letid Labib, ankouraz bann frer ek ser dan Lasal Rwayonm e travay avek zot dan predikasyon. Sa ti ed mwan reganny mon konfyans e aprezan mon pe servi ankor konman en ansyen.”

Si en frer i gard rankin, sa i kapab anpes li servi konman en ansyen. Pa i pli bon pour vin parey David en serviter Zeova ki ti bezwen taye pour  sov Lerwa Sail ki ti zalou! David ti refize pour revanze, menm ler i ti annan sans pour fer li. (1 Sam. 24:4-7; 26:8-12) Ler Sail ti mor dan en batay, David ti an dey e i ti refer avek li ek son garson Yonatann konman bann “byenneme ki ti ganny apresye.” (2 Sam. 1:21-23) David pa ti gard rankin.

Si ou santi ki ou viktim en mal konprenezon oubyen lenzistis, pa bezwen les rankin domin ou bann panse. Par egzanp, kan William ti perdi son responsabilite konman ansyen apre ki i ti’n servi pour 30 an Grannbretanny, i ti gard rankin anver serten ansyen. Kwa ki ti ed William pour reganny son balans? I ti dir: “Mon ti lir liv Zob ki ti ankouraz mwan. Si Zeova ti ed Zob pour fer lape avek son trwa konpanyon, konbyen plis I ti pou ed mwan pour fer lape avek bann ansyen Kretyen!”​—Zob 42:7-9.

BONDYE I BENI BANN KI RESERVI KONMAN BERZE

Si ou ki ti deside aret servi konman berze troupo Bondye i ti a byen pour demann ou lekor akoz ou ti fer sa. Eski ou ti sarze avek ou prop problenm? Eski lezot keksoz ti vin pli enportan dan ou lavi? Eski lenperfeksyon lezot ki ti’n dekouraz ou? Nenport kwa ki’n arive, rapel ki ou ti dan en pozisyon pour ed lezot pli byen ler ou ti ansyen. Ou bann diskour ti fortifye zot, ou legzanp ti ankouraz zot e ou bann vizit pastoral ti ed zot andir zot leprev. Ou travay konman en ansyen fidel ti fer leker Zeova zwaye, parey ou, ou ti zwaye.​—Prov. 27:11.

Zeova in ed zonm pour reganny zot lazwa e zot dezir pour diriz kongregasyon. Si ou ti aret servi konman ansyen oubyen ou ti ganny tire, ou kapab “swete ganny plas dirizan” ankor. (1 Tim. 3:1) Pol ti ‘touzour priye’ ki bann Kretyen Kolos i ganny konnesans egzakt konsernan lavolonte Bondye “pour ki zot ava kapab viv, en lavi ki Bondye i aprouve e ki fer li plezir dan tou sa ki zot fer.” (Kol. 1:9, 10) Si ou’n reganny sa privilez pour servi konman ansyen, rod lafors, pasyans ek lazwa avek Zeova. Dan sa bann dernyen zour, pep Bondye i bezwen led spirityel avek bann berze ki kontan zot. Eski ou kapab e pare pour fortifye ou bann frer?

[Not anba lo paz]

[Portre lo paz 27]

Zeova in ed zonm pour reganny zot lazwa ek zot dezir pour reservi konman ansyen

[Portre lo paz 28]

Montre ou lanmour pour Zeova par fer servis sakre avek lazwa