DAN NOU ARSIV

Sa “Eureka Drama” ti ed bokou trouv laverite dan Labib

“EUREKA!” Sa mo i vedir “Mon’n trouve!” Diran diznevyenm syek kan bann dimoun ti pe rod lor Kaliforni, Leta-z-ini ou ti pou kapab tann bann miner kriy sa parol kan zot ti pou’n trouv lor. Par kont, Charles Taze Russell ek lezot Etidyan Labib ti’n trouv en keksoz ki annan plis valer ki lor, sa i laverite dan Labib. Zot ti osi enpasyan pour partaz sa avek lezot.

Lete 1914, plizyer milyon dimoun dan bann gran lavil ti’n rasanble pour vwar sa film “Photo-Drama of Creation” ki ti dire pour wit erdtan. Sa film ti’n ganny fer par International Bible Students Association (I.B.S.A.). Dan sa film ti annan bann slayd kouler, en narasyon byen enteresan ek zoli lanmizik klasik, i ti baze lo Labib e i ti fer lodyans vwar ki mannyer kreasyon ti konmanse e listwar imen ziska lafen renny Mil An ki Kris pou dirize.​—Rev. 20:4. *

Me ki ti pou arive avek bann ki ti reste dan bann pti lavil e dan lakanpanny? An Out 1914, I.B.S.A. ti fer sorti “Eureka Drama,” setadir en versyon “Photo-Drama” ki ti kapab ganny transporte, me ki ti napa bann bout film, pour fer sir ki tou bann ki ti swaf laverite pa mank nanryen. I ti annan trwa kalite e dan detrwa langaz: Set “Eureka X” ti annan son narasyon ek lanmizik an antye. Set “Eureka Y” ti annan narasyon ek lanmizik an antye e osi bann zoli slayd kouler. “Eureka Family Drama” ki ti ganny fer pour zwe kot bann lakaz ti annan zis serten bout narasyon e bann sanson. Bann granmofonn ek prozekter ase bon marse ti osi kapab ganny aste.

Bann Etidyan Labib pa ti bezwen en prozekter film oubyen en gran lekran pour sa prezantasyon gratwit, alor zot ti kapab al dan bann lakanpanny e anons mesaz Rwayonm dan bann nouvo teritwar. Set “Eureka X” ki ti annan zis son ti kapab ganny zwe lizour oubyen aswar. Prozekter slayd “Eureka Y” ti kapab zwe san elektrisite an servan en carbide lamp. En rapor dan Latour Veyer Finlenn ti dir: “Nou kapab montre sa bann portre preski partou.” Pa sanmenm ki ti arive!

Dan plas lwe en gran lasal teat, bann Etidyan Labib ti souvandfwa rod bann landrwa kot zot pa ti bezwen peye, par egzanp bann laklas, courthouse, stasyon tren e menm dan bann lasanm dan bann  gran lakaz. Laplipar sa bann prezantasyon ti ganny fer dan bann landrwa oplenner avek en lekran ki ti’n ganny fer avek en gran tapi blan tale lo bor en stor lo laferm. Anthony Hambuch ti ekrir: “Bann fermye ti fer en pti stad dan zot zarden fri, zot ti met bann gran poto dibwa kot dimoun ti kapab asize e ekout byen sa progranm. Sa lekip “Eureka” ti servi en “Drama wagon” pour zot bann lekipman, bagaz, latant ek bann zartifay pour kwi manze.

Par ler ti napa bokou dimoun me defwa ti annan plizyer santenn dimoun ki ti vin ekout “Eureka.” Dan en lavil Leta-z-ini ki ti annan 150 zabitan, i ti annan 400 dimoun ki ti asiste dan en lekol. Lezot landrwa, serten ti mars 8 kilomet ale retour pour vwar “Eureka Drama.” Laswed, bann vwazen Charlotte Ahlberg’s ki ti’n zwenn kot son pti lakaz “ti vreman ganny touse” kan zot ti tann sa “Eureka Drama.” Apepre 1,500 dimoun ti asiste dan en lavil elwannyen Lostrali kot zot ti rod bann mineral anba later. Latour Veyer ti fer resorti ki kot bann lekol ek kolez, “bann ansenyan ek bann zelev i apresye bann portre ek nou bann zoli narasyon ek lanmizik ki ganny zwe lo granmofonn.” Sa “Eureka Drama” ti menm popiler dan bann landrwa kot ti annan sinema.

KILTIV LAGRENN LAVERITE

Sa “Eureka Drama” ti vin en zouti itil dan “Class Extension Work” kot bann Etidyan Labib ti anvoy bann orater pour konmans bann nouvo letid. I difisil pour konnen konbyen dimoun ti vwar “Eureka Drama.” Bokou set “Drama” ti regilyerman ganny servi. Me, an 1915 zis 14 parmi sa 86 lekip “Drama” ki ti regilyerman dir konbyen ki ti asiste. Menm si i ti dekourazan ki zot pa ti arive konn sif egzakt sa kantite dimoun ki ti’n asiste, rapor a lafen lannen ti dir ki plis ki en milyon ti’n vwar sa “Drama.” Plis ki 30,000 dimoun ki ti’n vwar sa “Drama” ti demann bann piblikasyon baze lo Labib.

I kapab ki sa “Eureka Drama” pa’n kit en latras dan listwar imen, me depi Lostrali ziska Larzantin, Sidafrik ziska British Isles, Lenn e Karaib, i paret ki plizyer milyon ti vwar sa prezantasyon ki napa son parey. Bokou parmi zot ti trouv laverite dan Labib ki pli presye ki lor e ti kapab kriye “Eureka!”

[Not anba lo paz]

[Bwat lo paz 32]

“Labib pou parey en nouvo liv pour ou”

Sa “Photo-Drama” ek “Eureka Drama” ti ganny fer pour ed dimoun devlop lafwa dan Labib konman sa pli gran sours laverite dan lasyans e sa pli bon gidans pour nou lavi. Apre ki zot ti’n vwar sa “Drama,” bokou ki ti’n asiste ti ganny sa liv Scenario of the Photo-Drama of Creation. Dan sa liv ki ti ranpli avek bann legzanp ek bann diskour sa “Drama” ti fer Labib “parey en nouvo liv.” Plizyer milyon Scenario ti ganny donnen gratwitman. En Etidyan Labib ti ekrir ki liv Scenario ti paret sa dezyenm pli bon fason ki nou kapab mazinen pour ouver lizye bann aveg” apre sa “Drama.”

Sa liv Scenario ki ti annan bokou portre ti sa liv ki bann Etidyan Labib ti kontan konman en fanmir. Alice Hoffmann ki ti en pti fiy ek son pti frer ti kontan zot liv Scenario. I ti ekrir: “Pa nou ti kontan pour get sa liv e mazin sak slayd!”

[Portre lo paz 31]

En prozekter ti ganny servi pour montre bann slayd kouler