Servi Parol Bondye I vivan!

“Parol Bondye i vivan e i annan pisans.”​—EBR. 4:12.

KI OU PANSE?

Kwa ki pou donn plis lenpak nou bann prezantasyon ki nou servi dan predikasyon?

Ki mannyer bann trak i ankouraz nou pour servi Labib dan premye vizit e bann retourn vizit?

Ki mannyer nou kapab imit latitid Pol kan nou pe prepar pour predikasyon?

1, 2. Ki misyon Zeova ti donn Moiz e ki mannyer I ti reasir li?

ESKI ou kapab mazinen ki mannyer ou ti pou santi si ou ti bezwen debout devan sa dirizan pli pwisan lo later e koz pour pep Zeova? I tre probab ki ou ti pou enkyet, santi ki ou pa alaoter e per. Ki mannyer ou ti pou prepar ou prezantasyon? Ki ou ti pou kapab fer pour ou prezantasyon annan plis lenpak konman en reprezantan Bondye tou pwisan?

² Moiz ti dan sa menm sityasyon. Zeova ti dir Moiz, sa “zonm ki ti annan bokou plis limilite ki tou zonm lo sirfas later,” ki i ti pe ganny anvoye kot Faraon pour sov pep Bondye kont labi pouvwar e lesklavaz Lezip. (Nom. 12:3) Parey bann levennman ti pou montre, Faraon ti en zonm arogan e i ti napa okenn respe pour personn. (Egz. 5:1, 2) Pourtan, Zeova ti anvi ki Moiz i donn lord Faraon pour les plizyer milyon son bann lesklav ale. Alor i fer sans ki Moiz ti demann Zeova: “Ki mwan ete ki mon devret al kot Faraon e tir bann Izraelit Lezip?” Moiz ti bezwen santi ki i pa alaoter e ki i pa ti kapab fer sa. Me Bondye ti reasir li ki i pa ti pou tousel. Zeova ti dir: “Mon pou avek ou.”​—Egz. 3:9-12.

3, 4. (a) Ki lafreyer Moiz ti annan? (b) Dan ki fason ou kapab trouv ou dan en sityasyon difisil parey Moiz?

³ Ki lafreyer Moiz ti annan? I kler ki Moiz ti per pangar  Faraon pa ti pou resevwar oubyen ekout en reprezantan Zeova. Moiz ti osi per ki son prop pep pa ti pou krwar ki Zeova ti’n apwent li pour tir zot Lezip. Alor Moiz ti dir Zeova: “Meton zot pa krwar mwan e pa ekout mon lavwa akoz zot pou dir, ‘Zeova pa’n aparet avek ou.’”​—Egz. 3:15-18; 4:1.

⁴ Sa larepons ki Zeova ti donn Moiz e bann levennman ki ti arive apre i kapab ansenny sakenn de nou en bon leson. I vre, petet ou pa pou zanmen bezwen al devan en zofisye gouvernman. Me eski ou’n deza vwar li difisil pour koz lo Bondye ek son Rwayonm menm avek bann dimoun ki ou vwar tou le zour? Si sa i leka, annou vwar ki nou kapab aprann atraver leksperyans Moiz.

“KWA KI DAN OU LANMEN?”

5. Ki Zeova ti met dan lanmen Moiz e ki mannyer sa ti diminyen son lafreyer? (Vwar portre lo paz 11.)

⁵ Ler Moiz ti admet ki i ti per ki son parol pa ti pou ganny pran o serye, Bondye ti prepar li pour fer fas avek sa ki ti pe al arive. Sa resi dan liv Egzod i dir: “Zeova ti dir [Moiz]: ‘Kwa ki dan ou lanmen?’ I ti reponn: ‘En baton.’ I ti dir: ‘Zet li ater.’ Alor i ti zet ater e i ti vin en serpan e Moiz ti taye. Aprezan Zeova ti dir Moiz: ‘Anvoy ou lanmen e tyonbo son lake.’ I ti anvoy son lanmen e tyonbo li e i ti vin en baton dan son lanmen. Apre Bondye ti dir: ‘Sa i pour ki zot kapab krwar ki Zeova . . . in aparet avek ou.’” (Egz. 4:2-5) Wi, Zeova ti met dan lanmen Moiz en keksoz ki i ti kapab servi pour prouve ki son mesaz ti sorti kot li. Sa ki ti paret zis en baton pour lezot ti vin vivan atraver pwisans Bondye. Pa sa mirak ti pou azout pwa avek parol Moiz e prouve ki san dout i ti annan sipor Zeova! Alor, Zeova ti dir li: “Ou pou pran sa baton dan ou lanmen e fer bann mirak avek.” (Egz. 4:17) Avek sa baton dan son lanmen, Moiz ti annan laprev ki i ti annan lotorite Bondye e i ti kapab ale e reprezant sa vre Bondye avek konfyans devan son prop pep ek Faraon.​—Egz. 4:29-31; 7:8-13.

6. (a) Kwa ki devret dan nou lanmen ler nou dan predikasyon e akoz? (b) Eksplike ki mannyer “Parol Bondye i vivan” e ki mannyer i “annan pisans.”

⁶ Kan nou pe anons mesaz Labib avek lezot, nou kapab demann sa menm kestyon: “Kwa ki dan ou lanmen?” Dan bokou ka Labib ki pou dan nou lanmen, pare pour nou servi li. Menm si serten i kapab vwar Labib konman zis en liv, Zeova i koz avek nou atraver son Parol an ekri ki’n ganny enspire. (2 Pyer 1:21) Ladan i annan bann promes Bondye konsernan sa ki pou ganny akonpli ler son Rwayonm pou dirize. Sanmenm sa zapot Pol ti kapab ekrir: “Parol Bondye i vivan e i annan pisans.” (Lir Ebre 4:12.) Tou bann promes Zeova pe al annavan e i pe konstaman travay pour fer zot ganny akonplir. (Iza. 46:10; 55:11) Dek ki en dimoun i realiz sa konsernan Parol Zeova, sa ki i lir dan Labib i kapab annan en gran lefe lo son lavi.

7. Ki mannyer nou kapab “anons byen mesaz laverite”?

⁷ Wi, Zeova in met dan nou lanmen son Parol an ekri ki vivan ki nou kapab servi pour prouve ki nou mesaz i vre e i sorti kot Bondye. I pa drol alor ki apre ki Pol ti ekrir bann Ebre, i ti ankouraz Timote ki i ti pe formen pour “anons byen mesaz laverite.” (2 Tim. 2:15) Ki mannyer nou kapab aplik konsey Pol? Par lir aotvwa bann verse Labib apropriye ki kapab tous leker bann dimoun ki pou ekout nou. Bann trak ki nou ti gannyen 2013 in ganny fer pour ed nou fer sa.

 LIR EN VERSE LABIB APROPRIYE

8. Ki en sirveyan servis ti dir konsernan bann trak?

⁸ Tou bann nouvo trak in ganny fer dan menm forma. Alor ler nou’n aprann pour servi enn, nou’n aprann ki mannyer pour servi zot tou. Eski i fasil pour servi zot? En sirveyan servis Awai, Leta-z-ini ti ekrir: “Nou pa ti vreman realize ki kantite sa bann nouvo zouti ti pou efikas dan temwannyaz portanport e temwannyaz an piblik.” In vwar ki fason sa bann trak in ganny ekrir i ankouraz bann dimoun pour reazir pli byen e souvandfwa sa i fer ki i annan bann bon konversasyon. I santi ki sa i akoz sa kestyon kot zot bezwen swazir larepons korek ki lo kouvertir sa trak. Sa met lakour pa bezwen trakase ki i pou donn en larepons ki mal.

9, 10. (a) Ki mannyer nou bann trak i ankouraz nou pour servi Labib? (b) Ki trak ou’n ganny plis sikse avek e akoz?

⁹ Sak trak i ankouraz nou pour lir en verse Labib apropriye. Par egzanp, get sa trak Eski soufrans pou fini en zour? Ki swa sa dimoun i swazir “wi,” “non” oubyen “petet” pour reponn sa kestyon, ouver sa trak e san ki ou dir okenn lezot keksoz dir, “Get sa ki Labib i dir.” Apre lir Revelasyon 21:3, 4.

¹⁰ Pareyman, ler nou pe servi sa trak Ki ou pwennvi lo Labib? i pa sa trwa larepons sa met lakour i swazir lo sa trak ki enportan. Zis ouver sa premye paz e dir, “Labib i dir ki ‘Tou Lekritir i enspire par Bondye.’” Ou kapab azoute, “Anfet, sa verse i dir plis ki sa.” Apre ouver ou Labib e lir 2 Timote 3:16, 17.

11, 12. (a) Ki satisfaksyon ou gannyen dan predikasyon? (b) Ki mannyer bann trak i kapab ed ou prepare pour fer bann retourn vizit?

¹¹ Reaksyon sa met lakour pour determinen si nou pou kapab kontinyen lir e diskit lo sa trak. An tou ka, apard ki donn sa bann dimoun sa trak ou annan sa satisfaksyon pour lir Parol Bondye avek zot menm si ou kapab lir zis enn oubyen de verse Labib premye fwa ki ou zwenn zot. Pli tar ou kapab kontiny sa diskisyon.

¹² Deryer sa trak anba sa soutit “Pour reflesir lo la” i annan en kestyon e bann verse Labib ki nou kapab diskit lo la ler nou fer retourn vizit. Dan sa trak Ki mannyer ou vwar lavenir? sa kestyon  pour retourn vizit i: “Ki mannyer Bondye pou fer sa lemonn vin pli meyer?” Matye 6:9, 10 ek Danyel 2:44 i ganny site. Pour sa trak Eski bann mor i vreman kapab viv ankor? sa kestyon i: “Akoz nou vyeyi e mor?” Zenez 3:17-19 ek Romen 5:12 i ganny site.

13. Eksplike ki mannyer nou kapab servi bann trak pour konmans letid Labib.

¹³ Sa bann trak in ganny fer pour ed nou konmans bann letid Labib. Kan en dimoun i skàn sa kod * ki lo dernyen paz sa trak sa pou anmenn li lo nou sit Enternet kot i kapab vwar en keksoz ki ankouraz li pour etidye Labib. Sa bann trak i osi met lanfaz lo en leson spesifik dan sa brosir Bon nouvel sorti kot Bondye! Par egzanp, sa trak Lekel ki vreman kontrol lemonn? i refer avek leson 5 dan sa brosir. Sa trak Kwa ki pli enportan pour ki ou lavi fanmir i ere? i refer avek leson 9. Si ou servi bann trak mannyer nou sipoze, ou pou swiv sa bon legzanp pour servi Labib dan ou premye vizit e kan ou fer retourn vizit. An retour, sa i kapab fer ki nou konmans plis letid Labib. Kwa ankor ki ou kapab fer pour servi byen Labib dan ou predikasyon?

DISKIT EN TOPIK KI PE PREOKIP LESPRI BANN DIMOUN

14, 15. Ki mannyer ou kapab imit latitid Pol dan ou minister?

¹⁴ Pol ti annan en gran dezir pour konpran “pli gran kantite dimoun posib” dan son minister. (Lir 1 Korentyen 9:19-23.) Remarke ki Pol ti anvi “ganny bann Zwif . . . , bann ki anba lalwa . . . , bann ki pa konn lalwa . . . , bann ki feb.” Wi, i ti anvi pres avek “tou dimoun pour [li] sov de-trwa parmi zot par tou mannyer posib.” (Akt 20:21) Ki mannyer nou kapab imit latitid Pol anmezir ki nou prepar nou pour partaz laverite avek “tou [“sort kalite,” NW] dimoun” dan nou teritwar?​—1 Tim. 2:3, 4.

¹⁵ Bann sizesyon i aparet dan Nou Minister Rwayonm sak mwan. Esey zot. Me si i annan lezot topik ki pe preokip bann dimoun dan ou teritwar pran sa an konsiderasyon e fer bann prezantasyon ki pou evey zot lentere. Mazin lanvironnman ki ou viv ladan, lo bann dimoun ki reste la e lo sa ki pli preokip zot. Apre, mazin en verse Labib ki al byen avek zot sityasyon. En sirveyan rezyonal i dir sa konsernan lafason ki li ek son madanm i met lanfaz lo Labib: “Laplipar met lakour pou permet nou lir en verse si nou bref e koz direkteman lo sa pwen. Apre ki nou’n dir bonzour avek nou Labib ouver dan nou lanmen, nou lir sa verse.” Aprezan annou vwar detrwa legzanp bann topik, kestyon ek verse Labib ki mars byen dan predikasyon ki ou kapab servi.

16. Eksplike ki mannyer Izai 14:7 i kapab ganny servi dan predikasyon.

¹⁶ Si ou reste dan en landrwa kot i annan krim ek vyolans ou kapab demann en dimoun: “Eski ou kapab mazinen ki en zour sa pou gran tit dan nouvel: ‘Aprezan later antye i anpe, dan trankilite. Dimoun i kriye avek lazwa’? Se sa ki Labib i dir dan Izai 14:7. Anfet, dan Labib i annan bokou promes ki Bondye in fer ki montre ki pou annan en letan kot pour annan lape en zour.” Apre ofer pour lir enn sa bann promes dan Labib.

17. Ki mannyer ou kapab entrodwir Matye 5:3 dan en konversasyon?

¹⁷ Eski i difisil pour bokou msye dan ou rezyon ganny en louvraz? Si sa i leka, ou kapab konmans en konversasyon par dir: “Ki kantite larzan en msye i bezwen pour son fanmir ere?” Apre ki sa dimoun in reponn ou kapab dir: “Bokou msye i  ganny bokou plis larzan ki sa, me kantmenm sa zot fanmir pa ere. Alor, ki zot vreman bezwen?” Apre lir Matye 5:3 e ofer en letid Labib.

18. Ki mannyer ou kapab servi Zeremi 29:11 pour rekonfort lezot?

¹⁸ Eski bann dimoun dan ou zanmirant pe soufer akoz en maler ki fek arive? Ou kapab konmans ou prezantasyon par dir: “Mon’n vin kot ou pour ofer serten rekonfor. (Lir Zeremi 29:11. *) Eski ou’n remark sa trwa keksoz ki Bondye i anvi pour nou? ‘Lape,’ ‘en lavenir’ ek ‘en lespwar.’ Eski pa nou kontan pour konnen ki i anvi nou annan en bon lavi? Me ki mannyer sa i kapab posib?” Apre sa, atir son latansyon lo en leson apropriye dan sa brosir Bon Nouvel.

19. Eksplike ki mannyer Revelasyon 14:6, 7 i kapab ganny servi kan nou pe koz avek bann dimoun relizye.

¹⁹ Eski ou viv dan en zanmirant kot dimoun i enterese dan larelizyon? Si sa i leka, ou kapab konmans en konversasyon par demann sa kestyon: “Si en lanz ti koz avek ou, eski ou ti pou ekout sa ki i ti annan pour dir? (Lir Revelasyon 14:6, 7.) Vi ki sa lanz i dir ‘Donn Bondye loner,’ eski pa i ti pou enportan pour idantifye ki Bondye i pe koz lo la? Sa lanz i donn nou en nide kan i dir i ‘sa Enn ki’n fer lesyel, later.’ I ti lekel sa Enn?” Apre lir Psonm 124:8 ki dir: “Nou led i dan non Zeova, sa Enn ki’n kree lesyel ek later.” Apre ofer pour eksplik plis konsernan Zeova nou Bondye.

20. (a) Dan ki fason Proverb 30:4 i kapab ganny servi pour ansenny en dimoun non Bondye? (b) Eski i annan en verse Labib ki ou servi ki anmenn bann bon rezilta?

²⁰ Ou kapab konmans en konversasyon avek en zenn par dir: “Mon ti a kontan lir en verse Labib ki demann en kestyon vreman enportan. (Lir Proverb 30:4. *) Sa verse pa kapab ganny aplike avek okenn imen, alor i bezwen ki i pe dekrir nou Kreater. * Ki mannyer nou kapab konn son non? Mon ti a kontan montre ou dan Labib.”

SERVI PWISANS PAROL BONDYE DAN OU PREDIKASYON

21, 22. (a) Ki mannyer en verse Labib ki apropriye i kapab sanz lavi en dimoun? (b) Ki ou determinen pour fer dan predikasyon?

²¹ Ou pa zanmen konnen ki mannyer dimoun pou reazir ler en verse Labib i apropriye. Par egzanp, de Temwen Lostrali ti tap laport en zenn madanm. Enn ti demann li, “Eski ou konn non Bondye?” e apre i ti lir en verse Labib, sa ti Psonm 83:18. Sa madanm i dir: “Mon ti soke! Apre ki zot ti’n ale mon ti dray 56 kilomet pour al kot en laboutik ki vann liv pour get dan bann lezot tradiksyon Labib e apre mon ti rod sa non dan diksyonner. Ler mon ti’n konvenk mon lekor ki non Bondye i Zeova, mon ti mazinen kwa ankor ki mon pa ti konnen.” Pa tro bokou letan apre, li avek son fitir msye ti konmans etidye Labib e pli tar zot ti batize.

²² Parol Bondye i sanz lavi bann ki lir li e devlop lafwa dan bann promes Zeova ki vivan. (Lir 1 Tesalonisyen 2:13.) Mesaz Labib i pli pwisan ki nenport kwa ki nou kapab dir pour esey tous leker en lot dimoun. Se pour sa rezon, ki a sak loportinite ki nou gannyen, nou devret servi Parol Bondye. I vivan!

[Not anba lo paz]

[Kestyon]

[Portre lo paz 13]

Eski ou pe servi Labib ek bann trak dan en fason efikas dan ou predikasyon? (Vwar paragraf 8-13)