GUY HOLLIS PIERCE, en manm Konsey Direkter Temwen Zeova ti fini son lavi lo later Mardi le 18 Mars 2014, a laz 79 an. Konman en frer Kris i’n resisite e ganny son rekonpans dan lesyel.—Ebr. 2:10-12; 1 Pyer 3:18.

Guy Pierce ti ne le 6 Novanm 1934, Auburn, Kaliforni, Leta-z-ini. An 1955 i ti batize e an 1977 i ti marye avek Penny, son madanm ki i ti byen kontan. Ansanm zot ti elve en fanmir. I ti osi konman en papa pour bokou lezot dimoun. An 1982, li ek Penny ti konmans fer servis pionye e an 1986 i ti konmans servi konman sirveyan rezyonal Leta-z-ini. I ti fer sa pour 11 an.

An 1997, Guy ek Penny Pierce ti konmans servi dan Betel Leta-z-ini. Frer Pierce ti travay dan Departman Servis. An 1998 i ti ganny apwente pour ed Komite Personnel Konsey Direkter. Le 2 Oktob 1999, pandan annual meeting Watch Tower Bible and Tract Society of Pennsylvania i ti ganny anonse ki Frer Pierce ti’n ganny apwente konman en manm Konsey Direkter. Pli resaman, i ti servi avek Komite Personnel, Redaksyon, Edisyon ek bann kordinater.

Dimoun sorti dan diferan pei ek kiltir ti santi zot konfortab avek Frer Pierce akoz i ti annan en zoli sourir e kontan fer riye. Annefe, bann kalite dan li ki dimoun ti pli kontan ti son lanmour, limilite, lobeisans anver bann lalwa ek prensip drwat e son lafwa solid dan Zeova. Pour Guy Pierce i ti annan plis sans ki soley pa ti pou leve ki bann promes Zeova pa ti pou vin vre e i ti anvi lemonn antye i konn sa.

Frer Pierce ti travay dir dan servis Zeova. I ti lev granmaten e souvan travay ziska tar aswar. I ti vwayaz partou dan lemonn pour ankouraz son bann frer ek ser e i pa ti zanmen tro okipe pour pas letan avek sak Betelit ek lezot ki ti bezwen en zanmi, konsey ek led. Menm apre plizyer lannen bann frer ek ser i rapel son lospitalite, son lanmitye ek son bann lankourazman ki i ti donnen atraver Labib.

I’n kit deryer son madanm, sis zanfan, pti zanfan, ayer pti zanfan e an plis ki sa en kantite zanfan spirityel. Diskour memoryal pour Frer Pierce ti ganny fer Betel Brooklyn Sanmdi le 22 Mars 2014 par Mark Sanderson, en manm lo Konsey Direkter. Dan sa diskour i ti koz lo lespwar ki Frer Pierce ti annan pour al dan lesyel e lir parol Zezi ki dir: “I annan en kantite lasanm dan lakaz mon Papa. . . . Apre ki mon al prepar en plas pour zot, mon pou retournen e pran zot avek mwan, pour ki zot a la kot mwan mon ete. E zot konn semen kot mon pe ale.”—Zan 14:2-4.

I vre ki nou pou mank Frer Pierce en kantite. Me nou kontan ki i ti “konn semen” pour al kot i pou reste pour touzour.