AN 1870 en pti group dimoun Pittsburgh (Allegheny), Pennsylvania Leta-z-ini ti konmans fer resers lo bann verse Labib. Anba direksyon Charles Taze Russell zot ti etidye konsernan ranson e zot pa ti tarde pour realize ki sa i en laspe byen enportan dan plan Zeova. Pa zot ti vreman kontan pour aprann ki ranson i permet zot e menm bann ki pa ti ankor tann koz lo Zezi ganny sove! Par rekonesans zot ti santi zot pouse pour komemor lanmor Zezi tou le-z-an an son memwar.—1 Kor. 11:23-26.

Frer Russell ti konmans pibliy Zion’s Watch Tower ki ti siport sa lansennyman ranson konman pli gran fason ki Bondye i demontre son lanmour. Sa Latour Veyer ti apel letan Memoryal lanmor Zezi “en letan vreman presye” e i ti ankouraz son bann lekter pour komemor li swa Pittsburgh oubyen dan lezot landrwa dan bann group an prive. “Menm si i annan de oubyen trwa zot ki annan menm lafwa” oubyen zis enn, dan en sans Kris ti pou avek zot.

Sak lannen i ti annan deplizanpli plis dimoun ki ti asiste Memoryal Pittsburgh. En lenvitasyon ti dir: “Ou pou ganny akeyir avek gran ker.” Byensir bann Etidyan Labib dan sa landrwa ti pare pour donn zot bann frer ek ser landrwa reste ek manze. An 1886, i ti annan “en miting zeneral” ki ti ganny fer pandan letan Memoryal e i ti dire pour plizyer zour. Latour Veyer ti dir: “Vini avek ou leker ki deborde avek lanmour pour sa Met, son bann frer e pour son laverite.”

Pour plizyer lannen, bann Etidyan Labib Pittsburgh ti fer bann lasanble pour bann ki ti krwar dan ranson e ki ti’n asiste Memoryal laba. Anmezir ki lakantite Etidyan Labib ti ogmante, lakantite dimoun e landrwa kot Memoryal ti ganny fer ti osi ogmante partou dan lemonn. Ray Bopp ki ti dan (kongregasyon) Chicago ecclesia i rapel ki dan bann lannen 1910 i ti pran plizyer erdtan pour pas bann lanblenm avek sa plizyer santenn ki ti’n asiste akoz preski laplipar zot ti pe pran lanblenm.

Ki lanblenm ki ti ganny servi? Menm si zot ti konnen ki Zezi ti’n servi diven pandan Repa Senyer, pour en pe letan Latour Veyer ti ankouraz zot pour servi zi rezen pir oubyen servi zi rezen ki’n bwi, pour pa tant bann ki ti annan “laser feb.” Annefe, i ti annan diven pour bann ki ti santi ki “diven ki’n ganny fermante ti devret ganny servi.” Pli tar bann Etidyan Labib ti konpran ki diven rouz pir i sa senbol apropriye pour reprezant disan Zezi.

Komemorasyon lanmor Zezi ti donn en bon loportinite pour reflesir seryezman. Me dan serten  kongregasyon, i ti annan en latmosfer tris e ler progranm ti fini tou dimoun ti ale san dir en mo. Sa liv Jehovah ki ti sorti an 1934 ti dir ki Memoryal pa devret ganny fer “dan lapenn” akoz Zezi ti mor dan soufrans, me “dan lazwa” akoz in vin Lerwa depi 1914.

An 1935, i ti annan en gran sanzman ki ti annan en lefe lo lafason ki bann Memoryal ti pou ganny fer a lavenir parski sinifikasyon “sa gran kantite dimoun” (KJ), oubyen “gran lafoul” dan Revelasyon 7:9 ti ganny klarifye. Ziska sa letan, bann serviter Zeova ti krwar ki sa group ti pe refer avek bann Kretyen ki ti’n dedye zot lavi me ki ti napa bokou devouman. Aprezan sa gran lafoul ti ganny idantifye konman bann adorater fidel ki annan lespwar pour viv dan paradi lo later. Apre sa klarifikasyon e apre ki Russell Poggensee ti’n byen egzamin son lekor i ti admet: “Zeova pa ti’n donn mwan sa lespwar pour al viv dan lesyel atraver son lespri sen.” Frer Poggensee e bokou ki ti fidel parey li, ti aret pran lanblenm me zot ti kontinyen asiste Memoryal.

Pandan sa “letan vreman presye” bann kanpanny spesyal ti en bon fason pour tou dimoun demontre lapresyasyon pour sa ranson. En Bulletin an 1932 ti ankouraz bann Kretyen pour pa vin “bann sen Memoryal,” setadir bann ki ti pe pran lanblenm me ki pa ti “bann vre travayer” ki pe pres sa mesaz laverite. En Bulletin an 1934 ti ankouraz bann frer ek ser pour fer pionye asistan: “Eski nou pou ganny 1,000 dimoun pour pran servis pandan letan Memoryal?” Konsernan bann Kretyen swazir, sa Informant ti dir: “Zot lazwa pour konplet si zis zot partaz sa mesaz Rwayonm.” Avek letan sa parol ti pou osi aplik avek bann ki ti annan lespwar pour viv lo later. *

Memoryal i sa sware pli sakre dan lannen pour tou pep Zeova. Zot menm fer li dan bann sirkonstans difisil. An 1930, Pearl English ek son ser Ora ti mars apepre 80 kilomet pour asiste Memoryal. Kan en misyonner ki apel Harold King ti ganny mete dan en kaso li tousel Lasin, i ti ekrir bann poenm ek kantik konsernan Memoryal e i ti servi black currants ek diri pour fer bann lanblenm. Depi Les Lerop, Sant Lanmerik ziska Lafrik bann Kretyen kouraze in komemor lanmor Zezi menm dan bann letan lager oubyen ler zot travay ti’n ganny enterdi. Nenport ki kote nou ete oubyen sityasyon ki nou ladan, nou zwenn ansanm pour onor Zeova ek Zezi Kri pandan Memoryal, sa letan vreman presye.