Zeova i gid nou travay lansennyman dan lemonn antye
“Mwan Zeova, mon ou Bondye, sa Enn ki pe ansenny ou pour ou prop byenfe, sa Enn ki pe gid ou dan sa semen ki ou devret marse.”
1. Ki lobstak bann Kretyen dan nou letan in rankontre dan zot travay predikasyon?
VER lafen diznevyenm syek ek konmansman ventyenm syek bann Etidyan Labib * ti rankontre bokou lobstak. Parey bann Kretyen dan premye syek, zot ti anons en mesaz ki bokou dimoun pa ti kontan. I ti annan zis en ptigin zot e lemonn an zeneral ti konsider zot konman en group ki ti napa en gran ledikasyon. Deplis, avek letan zot ti pou sibir “gran lakoler” Satan. (Rev. 12:12) Zot ti pou fer sa travay predikasyon pandan “bann dernyen zour,” en lepok ki ganny dekrir konman en “letan difisil.”
2. Ki Zeova pe fer pour fer avanse sa travay predikasyon dan nou letan?
2 Par kont, Zeova i anvi ki son pep dan nou letan i anons sa bon nouvel plis ki zanmen oparavan e napa nanryen ki kapab anpes li akonpli son plan. Zis parey Zeova ti delivre nasyon Izrael Babilonn, i’n osi delivre son bann serviter dan nou letan avek “Gran Babilonn” ki reprezant tou fo larelizyon. (Rev. 18:1-4) I’n ansenny nou pour nou prop byenfe, beni nou avek lape e ed nou pour ansenny lezot. (Lir Izai 48:16-18. *) Sa pa vedir ki Zeova i servi son abilite pour vwar lavenir pour li konn e enfliyans tou keksoz ki pase lo later pour li kapab fer avanse sa travay predikasyon. Serten kondisyon in ed bann Temwen pour prese me i zis avek led Zeova ki nou’n kapab andir bann sityasyon parey persekisyon ek lezot leprev ki fer li difisil pour akonpli nou misyon dan sa lemonn ki dan pouvwar Satan.
3. Ki mannyer “vre konnesans” in vin annabondans?
3 Zeova ti enspir profet Danyel pour predir ki “vre konnesans” ti pou vin annabondans pandan letan lafen. (Lir Danyel 12:4. *) Zeova ti ed bann Etidyan Labib pour konpran bann lansennyman de baz sorti dan Labib ki ti’n ganny kasyet pour bokou letan par bann fo lansennyman. Aprezan i pe servi son pep pour anons sa vre konnesans dan lemonn antye. Ozordi, nou pe vwar lakonplisman profesi Danyel. Preski 8,000,000 dimoun in aksepte laverite sorti dan Labib e zot pe anons li dan lemonn antye. Kwa ki’n fer sa travay predikasyon mondyal posib?
LAFASON KI TRADIKSYON LABIB IN ED NOU
4. Dan ki kantite langaz Labib ti’n ganny tradwir pandan diznevyenm syek?
4 En keksoz ki’n ed nou pres sa bon nouvel i lefet ki Labib i disponib partou dan lemonn. Pour plizyer syek, bann sef relizye ki pretann ki zot Kretyen ti dekouraz dimoun pour lir Labib e opoz zot. Zot ti menm responsab pour lanmor serten dimoun ki ti tradwir Labib. Me pandan diznevyenm syek, bann sosyete Labib ti fer Labib disponib swa antye oubyen en parti dan apepre 400 langaz. A lafen sa syek, bokou dimoun ti annan en Labib me zot ti napa konnesans egzakt lo bann lansennyman Labib.
5. Ki travay bann Temwen Zeova in fer pour tradwir Labib?
5 Bann Etidyan Labib ti konnen ki zot ti bezwen prese e zot ti travay dir pour eksplik lezot sa ki Labib i ansennyen. An plis, pep Zeova in servi e distribye plizyer versyon Labib. Depi 1950, zot in pibliy New World Translation of the Holy Scriptures swa an antye oubyen en parti dan plis ki 120 langaz. Edisyon New World Translation 2013 an Angle pou fer li pli fasil pour tradwir Labib dan lezot langaz. An retour, par servi en Labib ki kler e fasil pour lir sa i ed nou dan travay predikasyon.
LAFASON KI LAPE IN ED NOU
6, 7. (a) Ki kantite lager in annan dan nou letan? (b) Ki mannyer ler i annan en serten letan lape dan serten pei sa in benefisye nou travay predikasyon?
6 Ou kapab pe mazinen, ‘Ki kantite lape in annan dan lemonn?’ Par egzanp, dan ventyenm syek plizyer milyon dimoun in mor akoz lager, sirtou pandan sa de lager mondyal. Me an 1942 pandan ki Dezyenm Lager Mondyal ti pe deroule, Nathan Knorr, ki ti pe diriz travay predikasyon parmi bann Temwen Zeova, ti donn sa diskour ki annan pour tit “Peace
7 Ler Dezyenm Lager Mondyal ti fini, sa pa ti anmenn lape total. Dapre en resi, i ti annan 331 lager ant 1946 ek 2013. Plizyer milyon dimoun ti mor. Me pandan sa bann lannen, plizyer pei in annan en serten letan lape e pep Zeova in profit sa letan pour pres sa bon nouvel. Ki rezilta sa in anmennen? An 1944, i ti annan mwens ki 110,000 proklanmater Rwayonm dan lemonn antye. Ozordi, i annan apepre 8,000,000! (Lir Izai 60:22. *) Eski pa nou rekonesan ler nou kapab pres sa bon nouvel dan bann letan lape?
BANN BON MWAYEN TRANSPOR IN ED NOU
8, 9. Ki amelyorasyon in annan dan mwayen transportasyon e ki mannyer sa in ed nou dan nou travay?
8 Bann amelyorasyon dan mwayen transportasyon in ede pour ki sa bon nouvel i ganny prese pli fasilman. An 1900, apepre 21 an apre ki premye Latour Veyer ti’n ganny enprimen i ti annan zis apepre 8,000 loto ki ti’n ganny anrezistre Leta-z-ini e i ti annan zis detrwa semen ki ti ase bon pour loto pas lo la. Aprezan, dan lemonn antye i annan plis ki en bilyon edmi transpor ki’n ganny anrezistre e i annan bann bon semen preski partou. Semen avek loto i permet bokou nou pour anmenn sa bon nouvel kot bann dimoun ki reste dan bann landrwa elwannyen. Me menm si nou napa en bon mwayen pour vwayaze e nou bezwen mars bann gran distans, nou fer sa zefor neseser pour fer disip.
9 I annan lezot mwayen transpor ki’n ed nou dan nou travay. Bann konminyon, bato ek tren i fer li posib pour transport bann piblikasyon baze lo Labib dan bann landrwa elwannyen dan zis detrwa semenn. Bann sirveyan rezyonal, manm Komite Brans, bann misyonner ek lezot i kapab vwayaz ase vit par avyon pour asiste bann lasanble oubyen pour desarz lezot responsabilite teokratik. Deplis, bann manm Konsey Direkter ek lezot frer sorti kot biro brans prensipal i vwayaz par avyon pour al dan lezot pei pour ankouraz e enstri bann frer ek ser. Alor bann amelyorasyon dan mwayen transportasyon i ede pour promot linite parmi pep Zeova.
LAFASON KI LANGAZ IN ED NOU
10. Akoz i kapab ganny dir ki Angle i en langaz ki ganny servi partou dan lemonn?
10 Pandan premye syek, Koine ti en kalite versyon langaz Grek ki laplipar dimoun dan Lanpir Romen ti koze. Eski i annan en langaz ki laplipar dimoun i koze dan nou letan? Bokou dimoun ti pou reponn ki Angle i sa langaz. Liv English as a Global Language i dir: “Apepre en kar popilasyon later i deza koz byen oubyen konpran Angle.” Angle i sa langaz ki pli ganny ansennyen dan lemonn e i ganny servi pour kominike partou dan lemonn dan domenn komers, politik, lasyans ek teknolozi.
11. Ki mannyer Angle in ede fer avanse vre ladorasyon?
11 Lefet ki Angle i sitan popiler sa in ede pour fer avanse vre ladorasyon. Pour plizyer lannen, Latour Veyer ek lezot piblikasyon baze lo Labib ti ganny enprimen an Angle avan. I langaz ofisyel kot biro brans prensipal Temwen Zeova. I osi ganny servi pour ansenny bann etidyan kot Watchtower Educational Center, Patterson, New York, Leta-z-ini.
12. Dan ki kantite langaz bann serviter Zeova in tradwir bann piblikasyon baze lo Labib e ki mannyer teknolozi in ede pour fer sa?
12 Vi ki nou annan sa privilez pour pres sa bon nouvel konsernan Rwayonm Bondye avek tou pep, alor nou’n tradwir nou bann piblikasyon dan apepre 700 langaz. Bann devlopman dan teknolozi konpiter, enkli devlopman sa progranm ki apel MEPS (Multilanguage Electronic Publishing System), in ed nou pour fer sa. Sa bann zefor in ed nou pour propaz sa mesaz Rwayonm e in promot linite antre nou dan lemonn antye. Me nou ini sirtou akoz nou koz sa langaz pli enportan, sa i sa “langaz pir” lo laverite sorti dan Labib.
LAFASON KI BANN LALWA IN EDE
13, 14. Ki mannyer bann Kretyen denozour in benefisye avek bann lalwa ek desizyon legal?
13 Parey nou ti vwar dan sa premye lartik, bann Kretyen dan premye syek ti benefisye avek lalwa Romen ki ti o pouvwar partou dan sa lanpir. Pareyman, bann Kretyen denozour i benefisye avek bann dispozisyon legal. Par egzanp, Leta-z-ini, kot biro brans prensipal bann Temwen Zeova i ete, konstitisyon sa pei i donn dimoun drwa swazir zot larelizyon, koz lo sa ki zot krwar e zwenn ansanm. Sa in fer ki bann frer Leta-z-ini i lib pour zwenn ansanm pour koz lo Labib e partaz sa ki zot pe aprann avek lezot. Par kont, laliberte pour ganny serten drwa ti bezwen ganny etabli legalman ankour. (Fili. 1:7) Ler bann ziz ek ziri ankour in esey fer bann Temwen Zeova Leta-z-ini aret prese zot in al kot bann lakour pli o e souvandfwa ziz ti an zot faver.
14 Dan lezot pei bann lakour in osi an nou faver pour nou kapab ganny laliberte relizye e annan sa drwa pour prese. Dan serten pei nou’n perdi bann ka ankour me nou’n fer rapel avek bann lakour enternasyonal. Par egzanp, depi Zen 2014 Lakour Eropeen pour Drwa Imen ti an nou faver dan 57 ka e desizyon sa Lakour i bezwen ganny swiv dan laplipar pei Lerop. Menm si “tou dimoun [i] ay” nou, lakour bokou pei in dir ki nou annan drwa pratik vre ladorasyon.
LAFASON KI LEZOT FAKTER IN ANNAN LEFE LO NOU TRAVAY LANSENNYMAN
Nou fer bann piblikasyon baze lo Labib disponib pour tou pep lo later
15. Ki amelyorasyon in ganny fer dan lendistri enprimen e ki mannyer sa in ed nou?
15 Bann amelyorasyon dan lendistri enprimen in kontribye pour ki sa bon nouvel i ganny prese partou. Pour plizyer syek, sa metod pour enprimen ki ti’n ganny envante par Johannes Gutenberg apepre lannen 1450 pa ti’n sanz bokou. Par kont, pandan sa de dernyen syek bann gran sanzman in arive dan lendistri enprimen. Bann masin pour enprimen in vin pli gro, pli vit e pli sofistike. I pli bon marse pour prodwir papye e fer bann liv. Offset printing in ranplas sa metod letterpress e sa i fer li pli vit pour prodwir bann piblikasyon e amelyor nou bann portre. Ki lefe sa in annan lo nou travay? Zis mazinen: I ti annan 6,000 kopi premye nimero Latour Veyer (Zilyet 1879) ki ti ganny enprimen, san okenn portre e dan zis en sel langaz, Angle. Ozordi, 136 lannen pli tar, plis ki 50,000,000 kopi sak nimero Latour Veyer pe ganny enprimen e distribye. I annan bann zoli portre e i disponib dan plis ki 200 langaz.
16. Ki teknolozi ki’n ganny envante ki’n ed nou pres partou lo later? (Vwar portre lo paz 24.)
16 Mazin serten teknolozi ki’n ganny envante dan sa dernyen 200 an ki pep Bondye in servi pour pres sa bon nouvel. Nou’n mansyonn tren, loto ek avyon me in osi annan bisiklet, typewriter, masin ki ekrir Bray, telegraf, telefonn, kamera, rikord video ek son, radyo, televizyon, film, konpiter ek Enternet. Dan plizyer fason sa bann keksoz in ed nou akonpli sa konmann pour fer disip. Pour akonpli sa profesi kot pep Zeova ti pou “bwar dile bann nasyon,” nou’n byen servi resours bann nasyon, parey teknolozi modern pour nou kapab prodwir Labib ek bann piblikasyon baze lo Labib dan plizyer langaz.
17. (a) Ki konklizyon nou tonm lo la? (b) Akoz Zeova i permet nou pour “travay ansanm avek” li?
17 I kler ki nou annan benediksyon Bondye. Byensir Zeova pa depan lo nou led pour akonpli son plan. Me, nou Papa ki kontan nou i permet nou pour “travay ansanm avek” li e sa i permet nou pour montre li ki nou kontan li ek nou prosen. (2 Kor. 6:1; Mark 12:28-31) Annou byen servi bann loportinite ki nou annan pour anons sa mesaz Rwayonm, sa travay pli enportan ki pe ganny fer lo later. Alor, annou a tou pri montre nou lapresyasyon ki Zeova in gid e beni nou travay lansennyman dan lemonn antye!
^ par. 1 Bann Etidyan Labib ti adopte non Temwen Zeova an 1931.
^ par. 2 Izai 48:16-18: “16 ‘Vin o bor mwan e ekout sa. Depi o konmansman mon pan’n dir nanryen an sekre. Depi ler sa ti arive mon ti la.’ Aprezan Souvren Senyer Zeova in anvoy mwan ek son lespri. 17 La sa ki Zeova i dir, sa Enn ki’n reaste ou, Sen Izrael: ‘Mwan Zeova, mon ou Bondye, sa Enn ki pe ansenny ou pour ou prop byenfe, sa Enn ki pe gid ou dan sa semen ki ou devret marse. 18 Si selman ou ekout byen mon bann komannman! Alor ou lape pou vin zis parey en larivyer e ou ladrwatir parey bann laroul dan lanmer.’”
^ par. 3 Danyel 12:4: “Tandis ki ou Danyel, gard sekre sa bann parol e gard sele sa liv ziska letan lafen. Bokou pou rod partou kote e sa vre konnesans pou vin annabondans.”
^ par. 7 Izai 60:22: “Sa enn ki pti pou vin en milye e sa enn ptipti en nasyon for. Mwan menm Zeova, mon pou akseler li dan son letan.”
^ par. 12 Tsefanya 3:9: “Alor mon pou sanz langaz bann pep pour fer zot koz en langaz pir, pour ki zot tou zot kapab kriy lo non Zeova, pour zot servi li zepol kont zepol.”
^ par. 16 Izai 60:16: “Ou pou bwar dile bann nasyon, ou pou tete lo lestoman bann lerwa e vreman ou pou konnen ki mwan Zeova mon ou Sover e Bondye pwisan Zakob, sa Enn ki’n reaste ou.”
