1, 2. (a) Akoz i enportan pour bann Kretyen fidel avek Bondye e ki mannyer sa i relye avek pa pran kote dan bann konfli sa lemonn? (Vwar portre anler.) (b) Avek kwa ki bokou dimoun i fidel e ki rezilta sa in anmennen?

BANN serviter Zeova pa pran okenn kote e pa enplik zot dan bann zafer ki diviz dimoun, tel parey nasyonalizm, rasizm oubyen keksoz ki annan pour fer avek kiltir. Akoz? Parski tou bann ki’n dedye zot lavi avek Zeova in promet li zot lanmour, fidelite ek lobeisans. (1 Zan 5:3) Nou anvi soumet avek bann standar drwat Bondye nenport landrwa ki nou reste, nenport ki lorizin, nasyonalite oubyen kiltir ki nou annan. Nou fidelite anver Zeova ek son Rwayonm i pli enportan ki okenn lezot keksoz. (Mat. 6:33) Pour bann Kretyen kapab demontre sa kalite fidelite zot bezwen reste separe avek tou bann konfli ek deba sa lemonn.—Iza. 2:4; lir Zan 17:11, 15, 16.

² En kantite dimoun dan lemonn ozordi i fidel avek zot pei, tribi oubyen kiltir e menm par ler zot lekip nasyonal. Malerezman, sa in fer dimoun fer konpetisyon avek kanmarad, ay kanmarad e in arive par ler ki zot in touy bann ki pran kote avek en lot parti. Menm si nou pa pran kote dan sa bann konfli, zot  kapab afekte nou ek nou fanmir e par ler sa i kapab fer nou sibir serten lenzistis. I ti pou fasil pour nou pran kote si bann gouvernman i fer bann desizyon enzis parski Bondye in kree nou avek sa abilite pour konnen kwa ki zis oubyen enzis. (Zen. 1:27; Det. 32:4) Ki mannyer nou reazir dan sa bann sirkonstans? Eski nou pran kote?

3, 4. (a) Akoz bann Kretyen pa pran kote dan bann deba sa lemonn? (b) Ki nou pou diskite dan sa lartik?

³ Bann lenstitisyon ki gouvern sosyete imen i kapab met presyon lo bann sitwayen pour pran kote kan i annan bann konfli. Bann vre Kretyen pa kapab fer sa. Nou pa partisip dan bann deba politik sa lemonn, ni al lager. (Mat. 26:52) Nou pa krwar ki en parti lemonn Satan i pli meyer ki en lot. (2 Kor. 2:11) Vi ki nou pa fer parti sa lemonn, nou napa nanryen pour fer avek bann konfli dan sa lemonn.—Lir Zan 15:18, 19.

⁴ Me lefet ki nou enparfe, serten parmi nou i kapab ankor annan bann move santiman lo bann dimoun ki diferan avek nou. (Zer. 17:9; Efe. 4:22-24) Alor, dan sa lartik nou pou vwar serten prensip ki kapab ed nou sirmont sa bann tandans. Nou pou osi vwar ki mannyer nou kapab antrenn nou lespri ek konsyans pour fidel avek Rwayonm Bondye.

5, 6. Ki mannyer Zezi ti reazir anver diferan dimoun dan sa landrwa kot i ti reste e akoz?

⁵ Si zanmen ou trouv ou dan en sityasyon kot ou pa tro asire ki pour fer, i ti a byen ki ou demann ou lekor, ‘Ki Zezi ti pou’n fer?’ Ler Zezi ti lo later i ti viv dan en landrwa kot i ti annan dimoun sorti dan diferan rezyon, tel parey Zide, Galile, Samari ek lezot ankor. Labib i montre ki i ti annan dezakor ant bann dimoun sorti dan sa bann diferan rezyon. (Zan 4:9) I ti annan bokou dezakor ant bann Farizyen ek Sadiseen (Akt 23:6-9); ant bann dimoun ek kolekter taks (Mat. 9:11); ant bann ki ti’n ganny edike avek bann profeser Lalwa ek bann ki pa ti’n ganny edike dan sa fason. (Zan 7:49) Bokou dimoun dan premye syek pa ti kontan bann Romen ki ti pe diriz Izrael. Me Zezi pa ti zanmen partisip dan sa bann konfli. Menm si i ti defann laverite lo Zeova e konnen ki Izrael ti nasyon spesyal Bondye, i pa ti zanmen ansenny son bann disip ki zot ti pli bon ki lezot. (Zan 4:22) O kontrer, i ti ankouraz zot pour kontan tou dimoun konman zot prosen.—Lik 10:27.

⁶ Akoz Zezi pa ti siport sa bann move pwennvi ki bann Zwif ti annan? Parski ni li, ni son Papa pa pran kote dan bann deba sa lemonn. Kan Zeova ti kree zonm ek fanm avek led son Garson, i ti anvi ki zot ranpli later antye. (Zen. 1:27, 28) Bondye ti kree imen dan en fason ki zot kapab prodwir diferan ras. Ni Zeova, ni Zezi pa vwar en ras, nasyonalite oubyen langaz pli siperyer ki en lot. (Akt 10:34, 35; Rev. 7:9, 13, 14) Nou devret swiv zot legzanp parfe.—Mat. 5:43-48.

7, 8. (a) Avek lekel bann Kretyen i pran kote e akoz? (b) Ki bann vre Kretyen i devret rekonnet konsernan solisyon bann problenm sosyal ek politik?

⁷ Menm si nou pa siport okenn dirizan imen, i annan enn ki nou siporte, sa i Zeova. Dan zarden Edenn, Satan ti dir ki Zeova pa ti sa pli bon dirizan pour bann imen. Satan ti anvi ki bann imen i krwar ki son fason fer ti pli bon ki pour Bondye. Aprezan, tou dimoun i bezwen deside si zot krwar ki fason fer Bondye i pli  siperyer ki pour Satan oubyen lekontrer. Onnetman, eski ou pran kote Zeova par swazir pour obeir son bann lalwa ek standar dan plas fer keksoz ou prop fason? Eski ou vwar son Rwayonm konman sel solisyon bann problenm limanite? Oubyen eski ou krwar ki zonm i kapab diriz son lekor?—Zen. 3:4, 5.

⁸ Ou larepons pour sa bann kestyon pou montre ki mannyer ou pou reponn kan dimoun i demann ou ou lopinyon konsernan bann deba politik sa lemonn. Depi lontan bann politisyen, aktivis oubyen lezot group in lalit pour rod en solisyon pour bann problenm ki kree divizyon. I kapab ki zot senser dan zefor ki zot pe fer e ki zot annan bann bon motivasyon. Me, bann Kretyen i rekonnet ki zis Rwayonm Bondye ki kapab rezourd problenm limanite e garanti vre lazistis. Nou devret kit sa dan lanmen Zeova. Apre tou, si sak Kretyen ti ensiste ki son solisyon i pli bon, pa to ou tar kongregasyon ti pou divize?

9. Ki problenm ti egziste dan premye syek dan kongregasyon Korent e ki solisyon Pol ti donnen pour rezourd sa problenm?

⁹ Annou vwar ki mannyer serten Kretyen dan premye syek ti reazir kan en problenm ki ti kapab kree divizyon ti leve dan kongregasyon. Bann dimoun Korent ti pe dir: “‘Mwan, mon pour Pol,’ en lot, ‘Mwan, mon pour Apolos,’ oubyen ‘Mwan, mon pour Pyer’, oubyen ‘Mwan, mon pour Kris.’” Kan Pol ti tann sa i ti soke, sa ti en problenm serye akoz sa ti’n kapab afekte lape dan kongregasyon. Alor i ti demande: “Eski Kris i divize?” Ki ti solisyon sa move fason panse? Pol ti ankouraz bann Kretyen: “Mon demann zot par Zezi-Kris nou Senyer: Met zot byen dakor ansanm e ki okenn divizyon pa egziste parmi zot. Reste byen ini ansanm dan en menm lespri e en menm lopinyon.” Pareyman, i pa devret annan okenn divizyon dan kongregasyon ozordi.—1 Kor. 1:10-13; lir Romen 16:17, 18.

10. Ki legzanp zapot Pol ti servi pour montre ki en Kretyen pa devret pran kote dan bann konfli sa lemonn?

¹⁰ Pol ti ankouraz bann Kretyen swazir pour konsantre lo zot sitwayennte dan lesyel dan plas konsantre lo bann keksoz lo later. (Fili. 3:17-20) * Zot ti bezwen azir konman bann lanbasader Kris. Ler en dimoun i travay konman en lanbasader dan en pei i pa enterfer dan bann zafer politik sa pei. Pareyman, i pa ti pou byen pour bann Kretyen swazir enterfer dan bann problenm ek zafer politik sa lemonn. (2 Kor. 5:20) Bann Kretyen ki annan sa lespwar pour viv lo later i osi bann sitwayen Rwayonm Bondye, alor i pa apropriye pour zot pran kote dan bann zafer politik sa lemonn.

11, 12. (a) Ki kalite lanvironnman ki kapab fer li difisil pour en Kretyen reste fidel avek Rwayonm Bondye? (b) Ki problenm en Kretyen ti fer fas avek e kwa ki ti ed li sanze?

¹¹ Preski partou dan lemonn bann dimoun i santi zot vreman pros avek bann dimoun ki annan menm listwar, kiltir ek langaz ki zot. Souvan zot vreman fyer pour zot pei. Me nou pa devret les sa bann latitid afekte nou. O kontrer, nou bezwen sanz nou fason panse e antrenn nou konsyans pour ki nou pa pran okenn kote dan nenport sirkonstans. Ki mannyer nou kapab fer sa?

 ¹² Pran par egzanp en ser ki apel Mirjeta, * ki sorti dan en rezyon ansyen Yougoslavi. I ti ganny elve pour ay bann Serb. Ler i ti aprann ki Zeova pa fer preferans e ki Satan ki responsab e ankouraz dimoun pour annan laenn rasyal, i ti lite pour tir sa bann santiman patriyotik. Me kan en lager etnik ti deklare dan son pei, i ti rekonmans santi sa laenn ki i ti annan e sa ti fer li difisil pour Mirjeta pres avek bann Serb. I ti realize ki i pa ti kapab zis espere e swete ki sa bann move santiman i al tousel. I ti sipliy Zeova pour ed li, pa zis pour sirmont sa difikilte me osi pour ogmant son servis e kalifye pour vin en pionye. I dir: “Mon’n aprann ki ler ou konsantre lo predikasyon sa i sa pli bon led. Mon esey imit personnalite Zeova dan predikasyon e mon’n vwar ki mannyer ptitapti sa i’n retir mon bann move santiman.”

13. (a) Ki sityasyon ki ti fer en Temwen agase, me ki mannyer i ti reazir? (b) Ki leson nou kapab aprann avek leksperyans Zoila?

¹³ Annou vwar legzanp en lot ser ki apel Zoila, ki sorti Meksiko me aprezan i dan en kongregasyon Lerop. I ti remarke ki serten frer ek ser dan kongregasyon ki ti sorti en lot rezyon dan Lanmerik Latin ti fer bann fars ek remark ki pa apropriye konsernan koutim ek lanmizik son pei. Ki mannyer ou ti pou’n reakte? I toutafe normal ki sa bann komanter ti agas Zoila. I byen ki i ti rod led avek Zeova pour tir okenn move santiman ki i ti annan dan son leker. Nou bezwen admet ki serten parmi nou i ankor pe lite avek sa bann problenm. Nou pa ti pou zanmen anvi fer ouswa dir okenn keksoz ki fer en group paret pli siperyer ki en lot oubyen ki kapab kree divizyon ant bann frer ek ser oubyen lezot.—Rom. 14:19; 2 Kor. 6:3.

14. Kwa ki kapab ed ou pour annan menm pwennvi ki Zeova lo lezot?

¹⁴ Eski landrwa kot ou’n grandi oubyen lafason ki ou’n ganny elve in fer ou vin patriyotik? Eski ou ankor annan sa bann santiman dan ou leker? Bann Kretyen pa devret les sa santiman patriyotik fer zot annan en move pwennvi lo lezot. Me si ou realize ki ou annan bann move santiman anver dimoun ki annan en lot nasyonalite, kiltir oubyen ras, ki ou pou fer? I ti a byen pour medit lo ki mannyer Zeova i vwar patriyotizm ek prezidis. Ou kapab fer resers lo sa topik pandan ou letid personnel oubyen dan Ladorasyon Fanmir. Apre sipliy Zeova pour ed ou devlop menm santiman anver bann dimoun parey li.—Lir Romen 12:2.

15, 16. (a) Ki mannyer nou ekspekte lezot pour reazir ler nou reste fidel avek Bondye? (b) Ki mannyer bann paran i kapab ed zot zanfan reste fidel avek Zeova?

¹⁵ To ou tar, tou serviter Zeova pou vwar zot dan en sityasyon kot zot konsyans pour obliz zot pour azir dan en fason diferan avek bann ki otour zot, setadir zot koleg travay, kanmarad lekol, vwazen, fanmir oubyen lezot ankor. (1 Pyer 2:19) Definitivman, nou devret diferan! Nou pa devret sirprann si lemonn i ay nou akoz nou pa pran kote avek zot parski Zezi ti dir nou ki sa pou arive. Laplipar dimoun ki pa kontan nou pa konpran rezon akoz nou pa pran okenn kote dan bann zafer sa lemonn. Me pour nou, sa i bann keksoz pli enportan.

¹⁶ Pour fidel avek Zeova nou bezwen obeir li nenport kwa ki dimoun i dir oubyen fer nou. (Dan. 3:16-18) Lafreyer zonm i kapab annan en lefe lo tou  dimoun, me i kapab pli difisil pour bann zenn montre zot diferan avek lezot. Si ou zanfan pe fer fas avek bann sityasyon tel parey salye paviyon oubyen bann lafet patriyotik pa ezite pour ed zot. Pandan Ladorasyon Fanmir ou kapab ed zot konpran ki mannyer Zeova i santi konsernan sa bann keksoz pour zot annan kouraz e fer fas avek sa bann difikilte. Ed zot pour eksprim zot konviksyon kler e avek respe. (Rom. 1:16) Ou kapab ed zot plis ankor par koz avek zot ansenyan lo sa size si i neseser.

17. Ki latitid nou bezwen evite e akoz?

¹⁷ I pa drol si ou kontan sa pei kot ou’n grandi, son kiltir, langaz ek manze. Me eski nou krwar ki sa ki nou kontan i toultan pli bon ki sa ki lezot dimoun i kontan? Zeova i anvi ki nou apresye sa varyete keksoz ki i’n kree. (Ps. 104:24; Rev. 4:11) Alor akoz nou bezwen ensiste ki en fason fer i pli bon ki en lot fason fer?

18. Ki mannyer ler nou annan menm pwennvi ki Zeova sa pou en benediksyon pour nou?

¹⁸ Bondye i anvi ki tou sort dimoun i ganny en konnesans egzakt lo laverite e ganny lavi eternel. (Zan 3:16; 1 Tim. 2:3, 4) Nou pare pour ekout nide lezot dimoun e souvan nou kapab aksepte zot, menm si zot kapab diferan avek sa ki pour nou. Anmezir ki nou reste fidel avek Zeova, nou devret evite mel dan bann konfli sa lemonn. Nou pa devret pran okenn kote dan lemonn Satan. Pa nou rekonesan ki Zeova in liber nou avek tou sa bann keksoz dan lemonn Satan ki kree divizyon, lafyerte ek lespri konpetisyon! Annou determinen pour devlop menm leta lespri parey en psalmis ki ti dir: “Gete! Ki mannyer i bon e ki mannyer i agreab pour bann frer reste ansanm dan linite!”—Ps. 133:1.