1, 2. (a) Kote bann adorater Zeova ti ador li dan lepase? (b) Ki mannyer Zezi ti santi anver tanp Bondye Zerizalenm? (c) Ki bi sa lartik?

DEPI byen lontan bann serviter Bondye in toultan annan en landrwa pour vre ladorasyon. I kapab ki Abel ti servi en lotel ler i ti ofer lofrann avek Bondye. (Zen. 4:3, 4) Noe, Abraam, Izaak, Zakob ek Moiz zot osi zot ti fer bann lotel. (Zen. 8:20; 12:7; 26:25; 35:1; Egz. 17:15) Zeova ti demann bann Izraelit pour konstri tabernak. (Egz. 25:8) Pli tar, zot ti konstri en tanp pour ador Zeova. (1 Rwa. 8:27, 29) Apre ki bann Zwif ti retournen sorti an egzil Babilonn, zot ti regilyerman zwenn ansanm dan bann sinagog. (Mark 6:2; Zan 18:20; Akt 15:21) Bann Kretyen dan premye syek ti zwenn dan lakaz bann manm dan kongregasyon. (Akt 12:12; 1 Kor. 16:19) Ozordi, pep Zeova partou dan lemonn i zwenn dan plizyer dizenn milye Lasal Rwayonm kot zot aprann lo Zeova e ador li.

² Zezi ti annan bokou respe pour tanp Zeova Zerizalenm. Sa lanmour ki Zezi ti annan pour tanp ti fer son bann disip rapel parol en psalmis ki ti dir: “En gran devouman pour ou lakaz i brile dan mwan.” (Ps. 69:9; Zan 2:17) En Lasal Rwayonm pa “lakaz Zeova” parey i ti leka pour tanp Zerizalenm. (2 Kron.  5:13; 33:4) Kantmenm sa, dan Labib i annan bann prensip ki montre nou ki mannyer nou landrwa ladorasyon ozordi i devret ganny servi avek respe. Dan sa lartik, nou pou diskit lo bann prensip Labib ki ansenny nou ki mannyer nou devret konport nou ler nou dan Lasal Rwayonm, ki mannyer nou devret pran swen avek li e ki mannyer nou kapab kontribye finansyerman pour konstri bann Lasal Rwayonm. *

3-5. Ki bi en Lasal Rwayonm e ki mannyer sa i devret annan en lefe lo lafason ki nou vwar nou bann renyon?

³ En Lasal Rwayonm i sa landrwa prensipal kot dimoun i zwenn pour ador Zeova. Bann renyon ki ganny fer tou le semenn kot Lasal Rwayonm i enn parmi bann provizyon ki Zeova in fer pour nouri nou spirityelman. I la kot nou ganny bann manze spirityel enportan ek gidans atraver son lorganizasyon. Tou bann ki asiste renyon i fer sa, akoz zot in ganny envite par Zeova ek son Garson. Menm si nou’n ganny envite pour manz “atab avek Senyer” sak semenn, nou pa devret pran sa lenvitasyon alalezer.—1 Kor. 10:21.

⁴ Zeova i vwar sa bann lokazyon pour ador li e lesanz lankourazman sitan enportan ki i ti enspir zapot Pol pour ankouraz nou pour pa abandonn nou rasanbleman. (Lir Ebre 10:24, 25.) Eski nou ti pou montre respe pour Zeova si nou ti mank renyon pour bann rezon ki pa valab? Nou kapab montre ki kantite nou apresye Zeova ek son bann provizyon par prepare e partisipe dan sa bann renyon.—Ps. 22:22.

⁵ Fason ki nou konport nou dan renyon e fason ki nou pran swen avek nou bann Lasal Rwayonm i montre ki kantite nou respe Zeova. Eski pa i vre ki nou latitid i relye avek fason ki nou santi konsernan non Bondye ki laplipar ditan i ganny mete lo lansenny Lasal Rwayonm?—Konpar 1 Lerwa 8:17.

6. Ki serten in dir konsernan nou bann Lasal Rwayonm e bann ki asiste renyon laba? (Vwar portre lo paz 27.)

⁶ Ler nou montre respe pour nou landrwa ladorasyon souvan lezot dimoun i remarke. Par egzanp, en msye Lartiki ti dir: “Lapropte ek lord ki mon ti vwar dan Lasal Rwayonm ti enpresyonn mwan. Bann dimoun laba ti’n byen sanze, i ti annan en sourir lo zot figir e zot ti akeyir mwan byen. Sa ti vreman enpresyonn mwan.” Sa msye ti konmans asiste renyon regilyerman e pa bokou letan apre i ti batize. Dan en lavil Lendonezi, en kongregasyon ti envit bann zofisye gouvernman ek zot vwazen pour en portouver avan ki zot fer dedikasyon zot nouvo Lasal Rwayonm. Mer sa lavil ti asiste. I ti enpresyonnen akoz sa batiman ti en bon kalite, i ti pratik e i ti annan en zoli zarden. I ti dir: “Lapropte sa lasal i montre ki zot vreman annan en lafwa solid.”

7, 8. Ki bann ki pe asiste renyon i devret gard antet?

⁷ Nou demontre respe pour sa Bondye ki’n envit nou pour asiste bann renyon Kretyen par nou bon konportman, resanz ek laparans. Respe i osi vedir ki nou evit serten ekstrenm. Nou pa devret ni tro strik, ni tro lesefer lo lafason ki nou devret konport nou kan nou asiste renyon. I vre ki Zeova i anvi son bann serviter ek lezot ki’n ganny envite i santi zot  konfortab. Me an menm tan, bann ki dan lasistans pa ti pou anvi mank respe pour renyon par sanz dan en fason devergonde, teks, koze pandan renyon, manze, bwar oubyen fer lezot keksoz ankor. Bann paran i devret ed zot zanfan pour konpran ki Lasal Rwayonm pa en landrwa pour taye oubyen pour zwe.—Ekle. 3:1.

⁸ Kan Zezi ti vwar bann dimoun pe vann bann keksoz dan tanp Bondye, i ti ankoler e i ti pous zot. (Zan 2:13-17) Nou Lasal Rwayonm osi i en landrwa pour vre ladorasyon kot nou ganny edike spirityelman. Alor okenn keksoz ki annan pour fer avek biznes, ki napa nanryen pour fer avek keksoz spirityel, i devret ganny fer dan lezot landrwa.—Konpar Neemya 13:7, 8.

9, 10. (a) Ki mannyer bann nouvo Lasal Rwayonm i ganny konstrir e avek ki rezilta? (b) Ki provizyon ki’n ed bann kongregasyon ki ti napa ase larzan pour konstri zot prop Lasal Rwayonm?

⁹ Lorganizasyon Zeova i fer bokou pour ede konstri bann Lasal Rwayonm. Se bann volonter ki fer bann plan, konstri e repar zot. Ki rezilta sa in anmennen? Depi le 1 Novanm 1999, plis ki 28,000 nouvo landrwa ladorasyon in ganny konstrir pour bann kongregasyon partou dan lemonn. Sa i vedir ki pandan sa dernyen 15 an, an mwayenn senk nouvo Lasal Rwayonm in ganny konstrir toulezour.

¹⁰ I annan bokou zefor ki pe ganny fer pour siport konstriksyon Lasal Rwayonm kot i annan sa bezwen. Sa provizyon i baze lo sa prensip Labib ki bann ki annan plis i kapab kouver sa ki manke, “se koumsa ki pou annan legalite.” (Lir 2 Korentyen 8:13-15.) Sa in fer ki bann zoli Lasal Rwayonm in ganny konstrir pour bann kongregasyon ki pa ti pou annan ase larzan pour konstri zot prop Lasal Rwayonm.

11. Ki serten frer ek ser i dir konsernan zot nouvo Lasal Rwayonm e ki mannyer sa i fer ou santi?

¹¹ En kongregasyon Costa Rica ki ti benefisye avek sa provizyon ti ekrir: “Ler nou debout devan sa Lasal Rwayonm, nou santi konmsi nou pe reve. Nou zis pa oule krwar. Nou zoli lasal ti fini ganny fer dan zis wit zour! Sa ti posib gras a benediksyon Zeova, bann laranzman ki’n ganny fer par son lorganizasyon e sipor nou bann frer ek ser. Sa landrwa ladorasyon i en kado presye, en pyer presye ki Zeova in donn nou. Nou vreman kontan.” Eski pa i tous ou leker pour tande ki nou bann frer ek ser i apresye bann nouvo Lasal Rwayonm e ki lezot osi i  eksperyans menm lazwa partou dan lemonn? Sa i travay Zeova, parski zis apre ki en nouvo Lasal Rwayonm in ganny konstrir, plis dimoun ki annan en leker senser i konmans asiste renyon pour aprann lo nou Kreater.—Ps. 127:1.

12. Ki mannyer ou kapab ede dan konstriksyon Lasal Rwayonm?

¹² Bokou frer ek ser in trouv bokou lazwa pour partisip dan konstriksyon bann Lasal Rwayonm. Ki swa nou kapab ede dan bann konstriksyon oubyen non, nou tou nou annan sa privilez pour siport sa bann proze atraver nou bann donasyon. Dan letan Labib pep Bondye ti annan devouman pour vre ladorasyon e sa ti pous zot pour kontribye finansyerman pour konstri bann landrwa ladorasyon e nou fer parey ozordi pour glorifye Zeova.—Egz. 25:2; 2 Kor. 9:7.

13, 14. Ki prensip Labib ki montre ki nou devret gard nou Lasal Rwayonm prop e annord?

¹³ Ler en nouvo Lasal Rwayonm i ganny konstrir, i bezwen ganny garde prop e annord pour reflekte bann kalite ek personnalite sa Bondye ki nou adore, en Bondye ki annord. (Lir 1 Korentyen 14:33, 40.) Labib i asosye sentete ek lapropte spirityel avek lapropte fizik. (Rev. 19:8) Alor, si nou anvi laprouvasyon Zeova, nou osi bezwen annan en bon lizyenn.

¹⁴ Ler nou gard nou Lasal Rwayonm prop e annord, nou fyer pour envit dimoun pour asiste nou bann renyon e zot pou vwar ki nou vreman met an pratik sa ki nou ansennyen konsernan en nouvo lemonn prop. Zot pou vwar ki nou ador en Bondye ki sen e ki byento i pou  transform later pour ki i vin en zoli paradi.—Iza. 6:1-3; Rev. 11:18.

15, 16. (a) Akoz i kapab difisil pour gard Lasal Rwayonm prop, me akoz sa i enportan? (b) Ki laranzman i annan dan ou kongregasyon pour netway lasal e ki privilez nou tou nou annan?

¹⁵ Dimoun i annan diferan lopinyon konsernan netwayaz. Akoz? I kapab akoz lafason ki zot in ganny elve. Serten i reste dan en landrwa kot i annan bokou lapousyer oubyen kot bann semen i sal e annan labou. Lezot napa ase delo oubyen bann prodwi pour netwaye. Nenport ki kote nou reste e nenport ki fason ki dimoun dan nou teritwar i vwar netwayaz, nou devret gard nou Lasal Rwayonm prop e annord. I sa landrwa ki nou ador Zeova.—Det. 23:14.

¹⁶ Si nou oule ki nou Lasal Rwayonm i prop, nou bezwen organize pour netway li. Sak konsey ansyen i bezwen fer sir ki en progranm i ganny fer e ki i annan ase lekipman ek prodwi pour gard lasal dan en bon leta. I annan serten travay netwayaz ki bezwen ganny fer apre sak renyon tandis ki serten zis tanzantan, alor nou bezwen byen organize pour ki nanryen pa ganny oubliye. Nou tou nou annan sa loner pour partisip dan netwayaz nou Lasal Rwayonm.

17, 18. (a) Ki legzanp i annan dan Labib ki montre ki nou bezwen mentenir bann landrwa ladorasyon? (b) Akoz bann Lasal Rwayonm i bezwen ganny garde an bon leta?

¹⁷ Nou osi gard bann Lasal Rwayonm an bon leta par fer bann travay reparasyon ki i annan. Lerwa Yeoas ki sorti Zida ti demann bann pret pour servi kontribisyon ki ti’n ganny anmase dan lakaz Zeova pour “repar sa lakaz kot in andomaze.” (2 Rwa. 12:4, 5) Plis ki 200 an pli tar, Lerwa Yosiya osi ti servi kontribisyon tanp pour fer bann reparasyon ki neseser.—Lir 2 Kronik 34:9-11. *

¹⁸ Bann biro brans in remarke ki dan serten pei dimoun pa abitye fer mentenans lo bann batiman oubyen lekipman. I kapab ki sa i akoz pa bokou ki konnen ki mannyer pour fer sa oubyen ki annan sa mwayen pour fer li. Me, i kler ki si bann Lasal Rwayonm pa ti ganny mentenir, sa ti pou fer ki zot ti pou deteryore avan ler e sa pa ti pou en bon temwannyaz pour lakominote. De lot kote, ler bann manm kongregasyon i fer tou sa ki zot kapab pour gard Lasal Rwayonm an bon leta, sa i anmenn loner pour Zeova e fer ki nou pa gaspiy larzan ki bann frer ek ser in donnen.

19. Ki ou determinen pour fer konsernan sa batiman ki nou servi pour vre ladorasyon?

¹⁹ En Lasal Rwayonm i en batiman ki’n ganny dedye avek Zeova. Alor nou pa kapab dir ki i pou en dimoun oubyen pour en kongregasyon. Parey nou’n vwar dan sa lartik, bann prensip Labib pou ed nou annan sa bon latitid anver sa landrwa kot nou ador Bondye. Tou dimoun dan kongregasyon i kapab montre respe pour bann landrwa ladorasyon par fer bann kontribisyon pour bann nouvo konstriksyon e donn zot letan ek lenerzi pour fer ki bann Lasal Rwayonm i reste prop e ganny byen mentenir. Ler nou siport sa bann dispozisyon ki pe ganny fer, nou montre nou devouman pour landrwa ladorasyon Zeova, parey Zezi ti fer.—Zan 2:17.