Zeova pou touzour kontan nou
“Mon pou medit lo tou sa ki ou fer.”
KANTIK: 18, 61
1, 2. (a) Akoz ou asire ki Zeova i kontan son pep? (b) Avek ki bezwen nou’n ganny kree?
AKOZ ou asire ki Zeova i kontan son pep? Avan ki ou reponn sa kestyon, annou vwar ki lezot in dir: Pour plizyer lannen, bann frer ek ser ti ankouraz en ser ki apel Taylene pour rezonnab e pa ekspekte tro bokou avek son lekor. I dir: “Si Zeova pa ti kontan mwan, i pa ti pou’n kontinyen donn mwan konsey.” En lot ser ki apel Brigitte in elve de zanfan li tousel apre ki son msye in mor, i dir: “I difisil pour elve zanfan dan lemonn Satan, sirtou ler ou en paran tousel. Me mon asire ki Zeova i kontan mwan parski menm ler mon’n plere e mon leker i fermal i’n toultan gid mwan e i pa’n zanmen les mwan eksperyans plis ki mon kapab siporte.” (1 Kor. 10:13) Sandra i soufer avek en maladi ki napa gerizon. Dan en lasanble en ser ti demontre lentere personnel dan li. Msye Sandra i dir: “Nou pa ti konn li personnelman, me lefet ki i ti montre ki i ti vreman enterese avek nou, sa ti tous nou leker en kantite. Menm dan bann pti fason ki bann frer ek ser i demontre zot lanmour pour nou, sa i montre mwan ki kantite Zeova i kontan nou.”
2 Nou’n ganny kree avek sa bezwen pour kontan e pour lezot kontan nou. I fasil pour nou dekouraze si sa dezir pa ganny satisfer akoz en levennman san ekspekte, dezapwentman, problenm lasante oubyen finansyel ouswa akoz nou pa pe reisi dan nou minister. Si nou konmans santi ki Zeova i nepli kontan nou, i ti a byen ki nou rapel ki nou annan en gran valer pour li e ki i la “pe tyonbo [nou] lanmen drwat” e i pe ed nou. I pa pou zanmen oubliy nou si nou reste fidel avek li.
3. Kwa ki kapab ed nou pli asire ki Zeova pou touzour kontan nou?
3 Sa bann Temwen ki nou fek koz lo la ti asire ki Bondye ti avek zot dan letan difisil. Nou osi nou kapab asire ki Zeova i dan nou kote. (Ps. 118:6, 7) Dan sa lartik nou pou diskit lo kat kado ki montre ki Zeova i kontan nou. Sa i (1) son kreasyon, (2) Labib, (3) lapriyer ek (4) ranson. Ler nou medit lo bann bon keksoz ki Zeova in fer, sa i fer nou annan plis rekonesans akoz son lanmour i pour touzour.
MEDIT LO KREASYON ZEOVA
4. Ler nou medit lo kreasyon Zeova, ki sa i montre?
4 Eski pa kreasyon i montre nou ki Zeova pou touzour kontan nou? Toutafe, parski se Son lanmour ki ti motiv li pour kree. (Rom. 1:20) I’n kree later avek en ekosistenm ki fer later annan en bon lanvironnman ki permet nou viv byen. Me, i pa oule ki nou zis egziste koumsanmenm. Par egzanp, nou bezwen manze pour nou kontinyen viv. Alor, Zeova ti fer sir ki later i kapab prodwir en varyete manze ki nourisan pour nou. Pa zis sa, i’n menm fer ki i en plezir pour manze e nou ganny satisfaksyon! (Ekle. 9:7) En ser Kanada ki apel Catherine i kontan obzerv kreasyon, espesyalman pandan prentan. I dir: “I enkrwayab ki mannyer tou keksoz i vin vivan, bann fler i konnen ki i’n ler pour bourzonnen, bann zwazo migrater i retournen e bann pti kolibri i vin an deor lafnet mon lakwizin pour manz sa ki mon’n mete pour zot. Zeova i bezwen kontan nou pour donn nou tou sa bann keksoz ki fer nou kontan.” Nou Papa dan lesyel i pran plezir dan son kreasyon e i anvi ki nou osi nou fer parey.
5. Ki mannyer nou vwar lanmour Zeova dan fason ki i’n kree nou?
5 Zeova in kree nou avek sa abilite pour fer bann bon travay ki donn nou lazwa. (Ekle. 2:24) I ti donn bann imen sa responsabilite pour ranpli later, domin li e annan kontrol lo bann pwason, zwazo ek tou zannimo ki pe marse lo later. (Zen. 1:26-28) Deplis, Zeova in kree nou avek bann kalite ki permet nou imit li, pa sa i montre ki i vreman kontan nou!
REKONNET VALER LABIB
6. Akoz nou devret annan en gran lapresyasyon pour Labib?
6 Bondye in demontre ki i vreman kontan nou kan i’n donn nou Labib. Labib i montre kwa ki nou bezwen konnen lo Bondye e son fason azir anver limanite. Par egzanp, Labib i dir nou ki mannyer i ti azir avek bann Izraelit ki ti souvan dezobei li. Psonm 78:38 i dir: “I ti demontre mizerikord, i ti pardonn zot fot e i pa ti detri zot. Souvan i ti tenir son lakoler olye les son lakoler monte.” Ler ou reflesir lo sa verse, sa i kapab ed ou personnelman pour apresye ki Zeova i kontan ou e i pran swen avek ou. Ou kapab asire ki ou enportan pour li.
7. Akoz Labib i devret annan en gran valer pour nou?
7 Labib i devret annan en gran valer pour nou parski i sa fason prensipal ki Bondye i kominik avek nou. Kan en paran ek en zanfan i kominik byen, zot ranforsi zot lanmour ek konfyans dan kanmarad. Ki nou kapab ekspekte avek Zeova? Menm si nou pa’n zanmen vwar li oubyen tann son lavwa, atraver son Parol i konmsi i koz avek nou e nou bezwen ekoute. (Iza. 30:20, 21) Zeova i anvi gid nou, son pep ki’n dedye avek li e protez nou kont danze. I osi anvi ki nou konn li e met konfyans dan li.
Menm si Yeou ti bezwen donn Yeosafat konsey, Zeova ti trouv “bann bon keksoz” dan sa lerwa (Vwar paragraf 8, 9)
8, 9. Ki Zeova i anvi nou konnen? Donn en legzanp sorti dan Labib.
8 Zeova i anvi nou konnen ki i kontan nou e ki i pa get zis nou lenperfeksyon. I rod sa ki bon dan nou. (2 Kron. 16:9) Annou vwar ki mannyer Zeova ti vwar sa ki bon dan lerwa Zida, Yeosafat. Yeosafat ti fer en move desizyon pour zwenn ansanm avek lerwa Izrael, Aab e al lager kont bann Siryen, Ramot-Gilead. Menm si 400 fo profet ti dir Lerwa Aab ki i ti pou ganny laviktwar dan sa batay, Mikaya ki ti sa vre profet Zeova, ti dir Yeosafat ki si i ti lager i ti pou perdi sa batay. Aab ti mor dan sa batay e Yeosafat ti sap lanmor. Ler Yeosafat ti retourn Zerizalenm, Zeova ti servi Yeou pour konsey li pour son fot. Kantmenm sa, Yeou ti osi dir li: “I annan bann bon keksoz ki’n ganny vwar dan ou.”
9 O konmansman renny Yeosafat, i ti’n demann bann prens, Levit ek pret pour vwayaz dan bann lavil Zida pour ansenny son bann sitwayen Lalwa Zeova. Sa konpanny ti telman en sikse ki menm dimoun dan lezot nasyon ti aprann lo Zeova. (2 Kron. 17:3-10) I vre ki Yeosafat ti’n fer en keksoz mal, me Zeova pa ti oubliy bann bon keksoz ki i ti’n fer. Sa resi Labib i ed nou rapel ki malgre ki nou bann imen enparfe, Zeova pou touzour kontan nou si nou fer nou mye pour servi li.
APRESYE SA PRIVILEZ POUR PRIYE
10, 11. (a) Akoz lapriyer i en kado spesyal sorti kot Zeova? (b) Ki mannyer Bondye i kapab reponn nou lapriyer? (Vwar portre lo paz 9.)
10 En papa ki kontan son bann zanfan i pran letan pour ekout zot ler zot anvi koz avek li. I anvi konn sa ki trakas zot akoz i enterese avek sa ki dan zot leker. Zeova, nou Papa dan lesyel i ekout nou ler nou servi sa zoli privilez ki nou annan pour priye.
11 Nou kapab koz avek Zeova dan lapriyer nenport ki ler. I pa’n met okenn restriksyon. I nou Zanmi ki toultan pare pour ekout nou. Taylene, ki nou’n koz lo la oparavan i dir: “Ou kapab dir li tou keksoz.” Ler nou eksprim nou bann panse pli profon avek Bondye dan lapriyer, i kapab reponn nou atraver en verse Labib, en magazin oubyen en parol lankourazman sorti kot en frer oubyen ser. Zeova i ekout nou ler nou sipliy li e i konpran nou menm ler personn pa konpran nou. Ler i reponn nou bann lapriyer sa i en fason pour montre ki i pou touzour kontan nou.
12. Akoz nou bezwen etidye bann lapriyer dan Labib? Donn en legzanp.
12 Nou kapab aprann bokou avek bann lapriyer dan Parol Bondye. Alor, par ler i ti a byen ki nou etidye sa bann lapriyer pandan nou Ladorasyon Fanmir. Ler nou reflesir lo ki mannyer bann serviter Zeova dan lepase ti eksprim zot panse pli profon avek Bondye, sa i kapab ed nou amelyor nou lapriyer. Pran par egzanp lapriyer ki Yona ti fer pour demann Zeova pardon ler i ti dan vant en gro pwason. (Yona 1:17–2:10) Egzamin lapriyer senser ki Salomon ti fer kot linogirasyon tanp. (1 Rwa. 8:22-53) Medit lo lapriyer model ki Zezi ti fer. (Mat. 6:9-13) Pli enportan ki tou, annou “demann Bondye tou sa ki [nou] bezwen” regilyerman. Si nou fer sa, “lape Bondye ki depas tou konpreansyon imen i ava gard [nou] leker ek [nou] lespri.” Nou pou osi annan plis rekonesans ki son lanmour i pour touzour.
DEMONTRE REKONESANS POUR RANSON
13. Ki loportinite tou imen i kapab gannyen gras a sa ranson?
13 Zeova in donn nou ranson konman en kado pour ki “nou ganny lavi.” (1 Zan 4:9) Ler zapot Pol ti koz lo sa pli gran fason ki Zeova ti’n demontre son lanmour, i ti ekrir: “Kris dan letan fikse, ti mor pour bann peser. Apenn si nou pou aksepte mor pour en dimoun zis; petet i ti a posib ki nou ti a aksepte mor pour en bon dimoun. Me Bondye in prouv son lanmour pour nou: Kan nou ti ankor peser, Kris in mor pour nou.” (Rom. 5:6-8) Ranson i sa pli gran legzanp lanmour Bondye e i donn nou tou sa loportinite pour annan en bon relasyon avek li.
14, 15. Ki ranson i vedir pour (a) bann Kretyen swazir? (b) bann ki annan lespwar pour viv lo later?
14 I annan en pti group Kretyen ki santi ki Zeova pou touzour kontan zot dan en fason spesyal. (Zan 1:12, 13; 3:5-7) Vi ki zot in ganny swazir par lespri sen, zot in vin “zanfan Bondye.” (Rom. 8:15, 16) Pol ti dir ki bann Kretyen swazir in ‘resisite e pe rennyen ansanm avek Kris Zezi dan lesyel.’ (Efe. 2:6) Zot annan sa pozisyon spirityel akoz zot in ‘ganny sele avek Lespri Sen ki ti’n promet, sa i garanti zot leritaz,’ setadir, ‘sa lesperans ki’n rezerve pour zot dan lesyel.’
15 Me lamazorite dimoun ki montre lafwa dan ranson i annan sa loportinite pour vin zanmi avek Zeova e a lavenir zot pou kapab ganny adopte konman zanfan Bondye e viv pour touzour dan Paradi lo later. Alor, atraver ranson, Zeova i demontre son lanmour pour limanite. (Zan 3:16) Si nou annan lespwar pour viv lo later pour touzour e nou kontinyen servi Zeova fidelman, nou kapab asire ki i pou fer lavi gou pour nou dan nouvo lemonn. Pa i byen ki nou vwar ranson konman sa pli gran levidans ki Bondye pou touzour kontan nou!
DEMONTRE KI OU KONTAN ZEOVA
16. Ki nou pou fer apre ki nou’n medit lo lanmour Bondye?
16 Nou pa pou zanmen kapab fini konte konbyen fwa Zeova in demontre son lanmour pour nou. Psalmis David ti sante: “Ou bann panse i vreman presye pour mwan! O Bondye pa zot tou ansanm zot vreman en kantite! Si mon esey kont zot, zot pli bokou ki gren disab.” (Ps. 139:17, 18) Ler nou medit lo bann fason ki Zeova i demontre ki i kontan nou, sa pou motiv nou pour kontan li an retour e donn li nou meyer.
17, 18. Ki serten fason nou kapab demontre ki nou kontan Bondye?
17 I annan bokou fason pour eksprim nou lanmour pour Zeova. Par egzanp, nou demontre lanmour pour Bondye ek nou prosen par anons sa mesaz Rwayonm avek devouman. (Mat. 24:14; 28:19, 20) Nou osi demontre ki nou vreman kontan Zeova par andir fidelman bann leprev ki teste nou lafwa. (Lir Psonm 84:11; * Zak 1:2-5.) Menm si nou pas dan bann gro leprev, nou kapab asire ki Bondye i konnen ki nou pe soufer e i pou ed nou parski nou presye pour li.
18 Nou lanmour pour Zeova i motiv nou pour medit lo son kreasyon ek lezot keksoz merveye ki i’n fer. Nou demontre ki nou kontan Bondye e apresye Labib par etidye li o profon. Nou lanmour pour Zeova i fer nou vin pli pre avek li dan lapriyer. An plis, nou lanmour pour Zeova i vin pli for anmezir ki nou medit lo ranson ki i’n donnen pour nou pese. (1 Zan 2:1, 2) Sa i zis serten fason pour montre Zeova ki nou apresye ki i pou touzour kontan nou.
^ par. 3 Psonm 77:11, 12: “11 Mon pou rapel sa ki Ya in fer, mon pou rapel bann keksoz merveye ki ou’n fer dan lepase. 12 Mon pou medit lo tou sa ki ou fer e reflesir lo ou bann fason azir.”
^ par. 7 Psonm 19:7-11: “7 Lalwa Zeova i parfe, i redonn lafors. Rapel Zeova i diny konfyans, i fer sa ki napa leksperyans saz. 8 Bann lord Zeova i drwat, i fer leker rezouir. Komannman Zeova i pir, i fer lizye briye. 9 Lakrent pour Zeova i pir, i dire pour touzour. Zizman Zeova i vre, zot tou zot drwat. 10 Zot pli presye ki lor, ki lor rafinen e pli dou ki dimyel, dimyel ki koule dan gof. 11 Ou serviter in ganny averti par zot, i annan en gran rekonpans pour sa enn ki obei.” Proverb 1:33: “Me sa enn ki pe ekout mwan, pou reste an sekirite e i pou viv dan trankilite san per maler.”
^ par. 17 Psonm 84:11: “Parski Zeova i en soley ek en boukliye, i donn laprouvasyon ek laglwar. Zeova pa pou refiz nanryen ki bon avek bann ki pe demontre lentegrite.”
