1, 2. (a) Ki serten paran ki annan zanfan adolesan i trakas lo la? (b) Ki mannyer bann zanfan i kapab profit zot adolesans?

ENN parmi bann moman pli zwaye dan lavi en paran se ler son zanfan i batize. Tou le kat zanfan Berenice ti batize avan laz 14 an. I dir: “I ti en moman vreman emosyonnel pour nou. Definitivman nou ti kontan ki nou zanfan ti anvi ador Zeova. Me nou ti osi konnen ki konman bann adolesan nou zanfan ti pou fer fas avek bokou defi.” I kapab ki ou osi ou annan menm traka si ou garson oubyen fiy i en adolesan oubyen pou vin en adolesan byento.

² En eksper dan psikolozi bann zanfan i dir ki bann lannen adolesan i kapab difisil pour tou le de, paran ek zanfan, me bann paran pa devret krwar ki zot adolesan pa normal oubyen ankor pe azir konman en manrmay. O kontrer, i dir ki bann adolesan i annan bann bon nide, bann santiman profon e zot anvi pas letan avek zot zanmi. Alor, ler ou zanfan i adolesan, zot kapab devlop en  pli bon lanmitye avek Zeova, zis parey Zezi ti fer ler i ti zenn. (Lir Lik 2:52.) Zot osi kapab amelyor zot abilite pour prese e devlop en gran lanvi pour fer plis dan servis Bondye. Deplis, zot kapab fer zot prop desizyon, par egzanp, pour dedye zot lavi avek Zeova e obei li. Me konman en paran, ki ou kapab fer pour form ou adolesan pour servi Zeova? Ou kapab aprann avek lafason ki Zezi ti form son bann disip avek lanmour, limilite ek bon zizman.

3. Ki mannyer bann zapot ti konnen ki Zezi ti zot zanmi?

³ Zezi pa ti zis en Met pour son bann zapot. I ti osi zot zanmi. (Lir Zan 15:15.) Dan letan Labib, en met pa ti pou koz avek son bann lesklav lo sa ki i panse e santi. Me Zezi pa ti tret son bann zapot konman lesklav. I ti kontan zot e i ti pas letan avek zot. I ti kontan pour partaz son bann santiman ek panse avek zot e i ti ekout byen ler zot ti eksprim zot panse ek santiman. (Mark 6:30-32) Sa kominikasyon ant Zezi ek son bann zapot ti fer zot vin bann bon zanmi e ti prepar son bann zapot pour sa travay ki zot ti annan pour fer a lavenir.

4. Paran, ki mannyer ou kapab vin zanmi avek ou zanfan? (Vwar portre lo paz 9.)

⁴ Menm si ou annan lotorite lo ou bann zanfan, ou osi kapab vin zot zanmi. Bann zanmi i pas letan ansanm. Petet ou kapab pas mwens letan dan travay oubyen pe fer lezot keksoz pour ki ou annan plis letan pour ou bann zanfan. Sa i en keksoz ki ou devret priy e mazin seryezman lo la. Bann zanmi i osi kontan preski menm keksoz. Alor rode ki ou adolesan i kontan, parey son lanmizik, film oubyen sport prefere. Apre, esey kontan sa ki i kontan. Ilaria, ki reste Itali, i dir: “Mon paran ti pran en lentere dan sa kalite lanmizik ki mon ti ekoute. Anfet, mon papa ti vin mon pli bon zanmi e mon ti santi mwan lib pour koz avek li menm lo bann size delika.” Ler ou vin zanmi avek ou zanfan e ed zot vin zanmi avek Zeova, ou pa perdi ou lotorite konman en paran. (Psonm 25:14) Ou zanfan pou vwar ki ou kontan zot e annan respe pour zot e i pou pli fasil pour zot koz avek ou lo nenport kwa.

5. Ki mannyer bann disip Zezi ti kapab annan en lavi ere dan servis Zeova?

⁵ Zezi ti konnen ki si son bann disip ti vreman anvi servi Zeova e ti reste okipe pour pres sa bon nouvel, zot ti pou vreman ere. Alor i ti ankouraz zot pour travay dir dan predikasyon e i ti promet ki i ti pou ed zot.—Matye 28:19, 20.

6, 7. Ki mannyer ou pe demontre lanmour pour ou zanfan, ler ou ansenny zot pour annan en progranm regilye pour servi Zeova?

⁶ Ou anvi ki ou zanfan i reste pros avek Zeova. Zeova i anvi ki ou form e disiplin zot. I’n donn ou lotorite pour fer sa. (Efezyen 6:4) Alor ou bezwen fer sir ki ou zanfan i ganny sa formasyon regilyerman. Reflesir lo sa: Ou fer sir ki ou zanfan i al lekol akoz ou konnen ki i enportan ki zot ganny en ledikasyon e ki zot aprann bann nouvo keksoz. Dan menm fason, ou fer sir  ki zot asiste bann renyon, lasanble ek Ladorasyon Fanmir. Apre tou, sa ledikasyon ki zot gannyen avek Zeova i kapab sov zot lavi. Alor ed zot pour kontan aprann lo Zeova e pour realize ki i kapab ansenny zot pour vin vreman saz. (Proverb 24:14) Deplis, form ou zanfan pour al predikasyon regilyerman. Imit legzanp Zezi par ed zot pour kontan ansenny lezot Parol Bondye.

⁷ Ki mannyer en progranm regilye pour servi Zeova, tel parey letid, renyon ek predikasyon, i ed bann adolesan? Erin, ki reste Sidafrik, i dir: “Ler nou ti manrmay souvan nou ti plennyen oubyen konplent pour etidye Labib, al renyon ek predikasyon. Par ler nou ti enteronp nou letid fanmir par ekspre pour pa fer li. Me nou paran pa ti bes lebra.” I rekonesan anver son paran parski zot ti ed li realize ki sa bann keksoz i vreman enportan. Konmela, ler i pa kapab asiste en renyon oubyen al predikasyon, i enpasyan pour repran son progranm pli vit posib.

8. (a) Ki mannyer Zezi ti demontre ki i annan limilite? (b) Ki mannyer limilite Zezi ti ed son bann disip?

⁸ Menm si Zezi ti parfe, i ti annan limilite e i ti dir son bann disip ki i ti bezwen led Zeova. (Lir Zan 5:19.) Eski sa ti fer son bann disip annan mwens respe pour li? Non. Pli zot ti vwar ki i ti depan lo Zeova, pli zot ti annan konfyans dan li. Pli tar, zot ti imit son legzanp limilite.—Akt 3:12, 13, 16.

9. Ler ou admet ou bann fot e demann leskiz, ki mannyer sa i kapab ed ou adolesan?

⁹ Kontrerman avek Zezi, nou enparfe e nou fer bann fot. Alor annan limilite. Ou bezwen realize ki i annan bokou keksoz ki ou pa kapab fer e admet ler ou fer bann fot. (1 Zan 1:8) Koumsa ou adolesan pou aprann pour admet son bann fot e i pou annan plis respe pour ou. Apre tou, pour lekel ki ou annan plis respe? En sef ki admet ler i mal oubyen enn ki pa zanmen demann leskiz? Rosemary, ki annan trwa zanfan, i dir ki li ek son msye ti pare pour admet zot bann fot. I eksplike: “Sa ti pous nou zanfan pour koz avek nou ler zot ti annan en problenm.” I azoute: “Nou ti montre nou zanfan kote pour ganny bann pli bon solisyon zot problenm. Ler zot ti bezwen led, nou ti toultan servi nou bann piblikasyon baze lo Labib e nou ti priy ansanm.”

10. Ki mannyer Zezi ti demontre limilite menm ler i ti pe dir son bann disip ki pour fer?

¹⁰ Zezi ti annan lotorite pour dir son bann disip ki pour fer. Me vi ki i ti annan limilite, souvan i ti eksplik zot akoz zot devret fer li. Par egzanp, i pa ti zis dir zot rod plito Rwayonm  Bondye ek son lazistis. I ti osi dir: “E limenm i a donn zot anplis tou lezot keksoz osi.” Ler Zezi ti dir zot pa zize, i ti eksplike: “E ou pa ava ganny zize. Parski Bondye pou ziz ou parey ou ziz lezot.”—Matye 6:31–7:2.

11. Ki mannyer ou pe ed ou adolesan ler ou eksplik li rezon akoz ki ou’n fer en lareg oubyen en desizyon?

¹¹ Rod sa moman apropriye pour eksplik ou adolesan akoz ou’n fer en serten lareg oubyen en desizyon. I tre probab ki ler i konpran rezon akoz, i pou anvi obei ou. Barry, ki’n elve kat zanfan, i dir: “Ler ou donn bann rezon, sa i ed bann adolesan annan konfyans dan ou.” Bann adolesan pou vwar ki ou’n fer en lareg ouswa en desizyon akoz ou annan en bon rezon, pa zis akoz ou annan lotorite. Pa bliye ki ou adolesan i nepli en manrmay. Zot pe aprann ki mannyer pour reflesir lo zot menm e zot anvi fer zot prop desizyon. (Romen 12:1) Barry i eksplike: “Bann adolesan i bezwen aprann pour rezonnen pour arive fer en bon desizyon olye zis fer en desizyon baze lo sa ki zot santi.” (Psonm 119:34) Alor annan limilite e eksplik ou adolesan akoz ou’n pran en desizyon. Dan sa fason, i aprann pour fer son prop desizyon e i pou konnen ki ou annan respe pour li e ki ou realize ki i pe vin en adilt.

12. Vi ki Zezi ti annan bon zizman, ki mannyer i ti ed Pyer?

¹² Zezi ti annan bon zizman e i ti konpran ki kalite led son bann disip ti bezwen. Par egzanp, ler Zezi ti dir son bann disip ki i ti pou ganny touye, Pyer ti dir Zezi ki i bezwen bon avek son lekor. Zezi ti konnen ki Pyer ti kontan li, me i ti osi konnen ki lafason ki Pyer ti’n rezonnen ti mal. Ki mannyer Zezi ti ed li ek son bann lezot disip? Premyerman, i ti koriz Pyer. Apre sa, Zezi ti eksplike ki ti pou arive avek bann ki evite fer lavolonte Zeova ler i difisil pour fer li. Zezi ti osi dir ki Zeova ti pou rekonpans bann ki pa egois. (Matye 16:21-27) Pyer ti aprann sa leson.—1 Pyer 2:20, 21.

13, 14. (a) Kwa ki kapab montre ki ou adolesan i bezwen ranforsi son lafwa? (b) Ki mannyer ou kapab konnen ki led ou garson oubyen fiy i vreman bezwen?

¹³ Priy Zeova pour donn ou bon zizman pour ki ou kapab konpran ki kalite led ou adolesan i bezwen. (Psonm 32:8) Petet ou vwar ki i pa ere parey avan oubyen ki i koz an mal lo bann frer ek ser. Petet ou santi ki i annan en keksoz ki i pa pe dir ou. Pa bezwen taye pour krwar ki ou adolesan pe fer en keksoz vreman mal an kasyet. * (Vwar not.) Me selman pa bezwen inyor sa problenm oubyen zis swete ki sa problenm pour al lo li menm. I kapab ki ou bezwen ed li fortifye son lafwa.

¹⁴ Pour konnen ki mannyer ou kapab ed ou adolesan, demann kestyon dan en fason zantiy e avek respe. I konmsi ou pe tir delo dan en pwi. Si ou tir delo  tro vit, ou pa pou ganny sa kantite delo ki ou anvi. Pareyman, si ou enpasyan ler ou pe demann kestyon oubyen ou esey fors ou adolesan pour koze, ou pa pou konnen ki i vreman krwar e resanti. (Lir Proverb 20:5. *) (Vwar not.) Ilaria i rapel ki ler i ti en adolesan i ti anvi pas plis letan avek son bann kanmarad lekol me i ti konnen ki sa i mal. Son paran ti remarke ki i ti annan en keksoz ki ti pe trakas li. Ilaria i dir: “En zour swar, zot ti zis dir mwan ki zot ti’n remarke ki mon pa ti tro tro byen e zot ti demann mwan ki annan mal. Mon ti konmans plere, apre mon ti eksplik zot mon sityasyon e demann zot pour ed mwan. Zot ti may mwan e dir mwan ki zot konpran e promet pour ed mwan.” Deswit paran Ilaria ti konmans ed li pour fer zanmi dan lasal.

15. Ki lot fason Zezi ti montre ki i ti annan bon zizman?

¹⁵ Zezi ti osi annan bon zizman ler i ti remark bann bon kalite dan son bann disip. Par egzanp, ler Natanael ti tande ki Zezi ti sorti Nazaret, i ti dir: “Eski i posib sorti okenn keksoz de bon Nazaret?” (Zan 1:46) Si ou ti’n tann sa, eski ou ti pou mazinen ki Natanael ti negatif oubyen ki i ti ziz lezot avan ki i konn zot ouswa ki i ti napa lafwa? Pa sa ki Zezi ti krwar. O kontrer, i ti annan bon zizman e i ti konnen ki Natanael ti onnet, alor i ti dir: “En vre Izraelit, ki napa defo.” (Zan 1:47) Zezi ti kapab lir sa ki dan leker e i ti servi sa abilite pour rod sa ki bon dan dimoun.

16. Ki mannyer ou kapab ankouraz ou adolesan pour amelyore?

¹⁶ Menm si ou pa kapab lir sa ki dan leker dimoun parey Zezi, ou kapab annan bon zizman. Zeova i kapab ed ou rod sa ki bon dan ou adolesan. Menm  si ou adolesan i dezapwent ou, pa zanmen dir li ki i en move piti oubyen ki i en brizfer. Pa ni menm dir sa dan ou menm. O kontrer, dir li ou vwar son bann bon kalite e ki ou asire ki i anvi fer sa ki byen. Ler ou remark sa ki i fer pour amelyore, felisit li. Ed li pour travay lo son bann bon kalite par donn li plis responsabilite ler i posib. Zezi ti fer sa avek son bann disip. Enn an edmi apre ki Zezi ti’n zwenn Natanael (ki osi ganny apele Bartelemi), Zezi ti donn li en responsabilite enportan. I ti fer Natanael vin enn son zapot e Natanael ti fidelman fer sa travay ki Zezi ti donn li. (Lik 6:13, 14; Akt 1:13, 14) Alor, olye fer ou adolesan santi konmsi tou sa ki i fer napa byen, felisit li e ankouraz li. Fer li santi ki i kapab fer ou ek Zeova ere e ki i kapab servi son bann abilite pour servi Zeova.

17, 18. Si ou kontinyen form ou adolesan pour servi Zeova, ki rezilta sa i kapab anmennen?

¹⁷ Petet ou santi parey zapot Pol. I ti trakas en kantite pour bann ki ti parey en zanfan pour li. Zot ti sa bann ki i ti’n ede pour konn Zeova e i ti kontan zot en kantite. Alor son leker ti fermal ler i ti mazinen ki petet serten parmi zot ti pou aret servi Zeova. (1 Korentyen 4:15; 2 Korentyen 2:4) Victor, ki’n elve trwa zanfan, i dir: “Bann lannen ki zot ti adolesan pa ti fasil. Me, bann bon moman ti bokou plis ki bann defi ki nou ti rankontre. Avek led Zeova, nou ti annan en bon lanmitye avek nou zanfan.”

¹⁸ Paran, ou travay dir pour form ou zanfan akoz ou kontan zot bokou. Pa bes lebra. Zis mazinen ki kantite lazwa ou pou gannyen ler ou vwar ou zanfan deside pour servi Bondye e reste fidel avek li!—3 Zan 4.